Jisas Kraes—Misinari We i Nambawan Olgeta

“Mi mi kamaot long hem, mo hem i sanem mi mi kam.”—JON 7:29.

1, 2. ?Wanem ya wan misinari? ?Hu ya Misinari we i nambawan olgeta?

?TAEM yu harem tok ya “misinari” yu tingbaot wanem? Samfala oli tingbaot ol misinari blong Krisendom, * we plante long olgeta oli joen long politik mo mekem bisnes long ol kantri we oli go long olgeta. Be sipos yu yu wan Witnes blong Jeova, ating yu tingbaot ol misinari we Hed Kampani i sanem olgeta oli go talemaot gud nius long ol defren kantri blong wol. (Mat. 24:14) Ol misinari ya oli no tingbaot olgeta nomo, be oli spenem taem mo paoa blong olgeta blong mekem nambawan wok ya blong givhan long ol man blong oli kam klosap long Jeova God mo fren gud wetem hem.—Jem. 4:8.

² Tok ya “misinari” i no stap long Baebol Long Bislama. Be Grik tok we oli tanem i kam “ivanjelis” long Efesas 4:11, hem i save minim “misinari” tu. Jeova i Ivanjelis we i nambawan olgeta, be yumi no save talem se hem i Misinari we i nambawan olgeta, from we i no gat wan man i sanem hem. Jisas Kraes i tokbaot Papa blong hem long heven i se: “Mi mi kamaot long hem, mo hem i sanem mi mi kam.” (Jon 7:29) Jeova i soemaot we hem i lavem ol man long wol taem hem i sanem Pikinini blong hem i kam, wan nomo we hem i gat. (Jon 3:16) Yumi save talem se Jisas i Misinari we i nambawan olgeta, beswan Misinari, from we wan risen blong hem i kam long wol, i blong “wetnes long trutok.” (Jon 18:37, Gud Nyus Bilong Jisas Krais) Hem i karem plante frut long wok blong talemaot gud nius blong Kingdom, mo wok we hem i mekem, i stap givhan long yumi yet. Wan rod we wok ya i save givhan long yumi, se yumi save folem ol fasin blong Jisas blong tijim man, nating se yumi misinari no nogat.

3. ?Wanem ol kwestin we bambae yumi faenem ansa blong olgeta?

³ Wok blong Jisas blong talemaot Kingdom i mekem yumi tingbaot sam kwestin: ?Laef blong Jisas i olsem wanem taem hem i stap long wol? ?From wanem tijing blong hem i givhan long ol man? ?Mo wanem i mekem se hem i karem frut long wok blong prij?

Glad Blong Wok Long Niufala Ples

4-6. ?Wanem sam jenis we Jisas i mas lan long olgeta taem hem i kam long wol ya?

⁴ Plante misinari tede mo plante narafala Kristin we oli muv i go long ol ples we i nidim moa man blong talemaot Kingdom, oli aot long wan kantri we i gat plante samting blong mekem laef i isi, mo oli go long wan ples we i no gat plante samting mo laef i had. Be traem tingbaot olsem wanem laef blong Jisas i jenis, taem hem i aot long heven i kamdaon long wol. Fastaem, hem i stap wetem Papa blong hem mo ol enjel we oli mekem wok blong Jeova wetem gudfala tingting. (Job 1:6; 2:1) Nao hem i kamdaon long wol ya blong stap wetem ol man we tingting blong olgeta i fulap long sin mo rabis fasin. (Mak 7:20-23) Nating se Jisas i laekem ol disaepol blong hem tumas, be hem i luk we olgeta tu oli gat fasin we wan i wantem winim narawan. (Luk 20:46; 22:24) Be i tru, Jisas i stretgud olgeta,  taswe taem hem i fesem ol samting ya, hem i mekem fasin we i stret nomo.

⁵ I no gat wan merikel we i mekem se, taem Jisas i bon long wol ya, hem i save finis lanwis we hem i mas toktok long hem. Hem i mas lanem lanwis ya taem hem i pikinini nomo. !Tingbaot bigfala jenis ya! !Taem hem i stap long heven, hem i komanda blong ol enjel! Hem i toktok long ‘lanwis blong ol enjel.’ Be long wol, Jisas i toktok long wan lanwis we i defren olgeta, “lanwis blong ol man.” (1 Kor. 13:1) Nating se Jisas i mas lanem wan niufala lanwis, ol tok blong hem oli gud tumas, i no gat wan man we i toktok olsem hem.—Luk 4:22.

⁶ Tingbaot sam narafala jenis we Pikinini blong God i mas lan long olgeta taem hem i kam long wol ya. I tru se Jisas i no kasem sin blong Adam. Be hem i kam wan man, olsem ol man blong hem we biaen, tabu spirit i makemaot olgeta blong oli kam ol “brata” blong hem. (Ridim Hibrus 2:17, 18.) Taem Jisas i stap long heven olsem Mikael, Jif blong ol enjel, hem i komanda blong fulap enjel. Nating se i olsem, long laswan naet blong laef blong hem long wol ya, hem i no askem Papa blong hem long heven blong sanem “ol enjel, we oli moa long twelef kampani blong ol soldia,” blong oli givhan long hem, nogat. (Mat. 26:53; Jud 9) I tru, Jisas i bin mekem sam merikel taem hem i stap long wol ya. Be tingbaot wanem we hem i naf blong mekem sipos hem i bin stap long heven. Ol merikel ya oli smol nomo.

7. ?Ol man Jiu oli mekem wanem long saed blong Loa?

⁷ Taem Jisas i stap yet long heven olsem “Tok blong God,” maet hem nao enjel ya we God i sanem long nem blong Hem blong lidim ol man Isrel long draeples. (Jon 1:1; Eks. 23:20-23) Ol man Isrel oli bin ‘kasem Loa blong God finis, we ol enjel oli tekem i kam, be oli no obei long Loa ya nating.’ (Wok 7:53; Hib. 2:2, 3) Long faswan handred yia tu, ol lida blong skul blong ol man Jiu oli no luksave bigfala mining blong Loa ya. Wan eksampol blong samting ya, hemia loa long saed blong Sabat dei. (Ridim Mak 3:4-6.) Ol tija blong Loa mo ol Farisi oli “tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem.” (Mat. 23:23) Nating se oli mekem olsem, Jisas i no ting se i westem taem blong talemaot trutok long olgeta, hem i gohed nomo.

8. ?From wanem Jisas i save givhan long yumi?

⁸ Evri samting we Jisas i mekem, hem i glad nomo blong mekem. Hem i lavem ol man mo i wantem tumas blong halpem olgeta. Tingting ya i pulum hem oltaem. Hem i neva letem tingting blong hem i kam slak blong talemaot gud nius olsem evanjelis. Jisas i holemstrong long Jeova taem hem i stap long wol, mo from samting ya, hem i “prapa man blong sevem man, hem i save sevem olgeta we oli obei long hem.” Mo tu, “hem i save givhan long olgeta we ol samting oli stap traem olgeta, from we hem tu i harem nogud finis, mo ol samting ya oli traem hem finis.”—Hib. 2:18; 5:8, 9.

Kasem Gudfala Trening Blong Kam Wan Tija

9, 10. ?Wanem trening we Jisas i kasem bifo we hem i kamdaon long wol?

⁹ Tede, Hed Kampani i givim trening long ol Kristin we oli kam misinari. ?Olsem wanem? ?Jisas Kraes tu i bin kasem trening? Yes. Be hem i no skul long ol tija blong Loa, bifo we God i jusumaot hem blong kam Mesaea, nogat. Mo hem i no kasem tijing long ol nambawan tija blong skul blong ol man Isrel tu. (Jon 7:15; skelem Ol Wok 22:3.) ?Taswe, olsem wanem Jisas i kam wan nambawan tija?

¹⁰ Meri we i mama blong Jisas mo Josef we i tekem Jisas i kam pikinini blong hem, ating tufala i givim plante save long Jisas. Be beswan trening we Jisas i kasem blong mekem wok blong hem long wol, i kam long wan Man we i hae moa i winim ol narafala man. Jisas i tokbaot samting ya i se: “Ol tok ya blong mi oli no kamaot long mi nomo. Papa blong mi we i sanem mi mi kam, hem i talemaot long mi wanem fasin blong tok bambae mi folem, mo wanem tok bambae mi talem.” (Jon 12:49) Makemgud se Jeova i talem long Jisas wanem we hem i mas tijim ol narafala long hem. Bifo we Jisas i kamdaon long wol ya, i klia se hem i spenem plante taem blong lesin long ol tok we Papa blong hem i talem long hem. ?Yu ting se i gat wan trening we i moagud i bitim hemia?

11. ?Olsem wanem Jisas i mekem sem fasin olsem Papa blong hem i mekem long ol man?

¹¹ Stat long taem we God i wokem Pikinini blong hem, tufala i fren gud. Taem Jisas i stap yet long  heven, hem i wajemgud ol fasin we God i mekem long ol man. From samting ya, hem i luksave tingting blong God long saed blong olgeta. Pikinini blong God i lavem ol man olsem we God i lavem olgeta. Taswe, taem Jisas i stap long heven olsem waestok, hem i talem se: “Mi hapi tumas blong luk ol man.”—Prov. 8:22, 31.

12, 13. (a) ?Taem Jisas i lukluk samting we Papa blong hem i mekem long ol man Isrel, hem i lanem wanem? (b) ?Olsem wanem Jisas i folem samting we hem i lanem long trening blong hem?

¹² Pikinini blong God i kasem sam narafala trening tu. Hem i lukluk olsem wanem Papa blong hem i mekem, taem ol samting i no rongud. Tingbaot wanem we Jeova i mekem long ol man Isrel taem oli mekem stronghed. Nehemaea 9:28 i talem se: “Taem olgeta oli stap gud finis, i no longtaem oli girap, oli mekem sin bakegen, mo yu [Jeova yu] letem ol enemi blong olgeta oli kam winim olgeta, oli rulum olgeta bakegen. Be taem oli tanem tingting blong olgeta, oli askem long yu bakegen blong yu sevem olgeta, yu yu stap long heven, be yu harem olgeta, mo yu kam sevem olgeta. From fasin ya blong yu we oltaem yu yu gat sore long man, plante taem, yu yu kam sevem olgeta.” From we Jisas i wok wetem Jeova mo i wajemgud fasin blong hem, hem i lanem blong sore long ol man we hem i prij long olgeta.—Jon 5:19.

¹³ Taem Jisas i sore long ol disaepol blong hem, hem i stap folem samting we hem i lanem long trening blong hem. Long naet bifo we hem i ded, ol aposol we hem i lavem olgeta tumas, “oli lego hem, oli ronwe.” (Mat. 26:56; Jon 13:1) !Aposol Pita i giaman tri taem se hem i no save Jisas! Nating se i olsem, Jisas i wantem nomo we ol aposol oli kambak long hem. Hem i talem long Pita se: “Mi mi prea finis from yu, blong bilif blong yu bambae i no save foldaon. Mo taem yu tanem tingting blong yu, yu kambak long mi bakegen, yu mas mekem tingting blong ol brata blong yu i strong.” (Luk 22:32) “Ol aposol mo ol profet” oli fandesen blong Isrel blong God. Mo nem blong 12 gudfala aposol blong Smol Sipsip ya Jisas Kraes, oli stap long ol bigfala ston we oli sapotem stonwol blong Niufala Jerusalem. Kam kasem tede, ol Kristin we tabu spirit i makemaot olgeta, mo ol fren blong olgeta, “ol narafala sipsip,” we oli givim laef blong olgeta i go long God, oli wan bigfala ogenaesesen blong ol man blong talemaot Kingdom. Oli wok aninit long han blong God ya we i gat olgeta paoa, mo Pikinini we God i lavem tumas, i lidim olgeta.—Efes. 2:20; Jon 10:16; Rev. 21:14.

Fasin Blong Jisas Blong Tijim Man

14, 15. ?Olsem wanem tijing we Jisas i givim long ol man i defren long tijing blong ol tija blong Loa mo ol Farisi?

¹⁴ ?Olsem wanem Jisas i yusum trening we hem i kasem blong tijim ol man blong hem? Taem yumi skelem tijing we Jisas i givim wetem tijing we ol lida blong skul blong ol man Jiu oli givim, yumi luksave se fasin blong Jisas blong tijim man i moagud. Ol tija blong Loa mo ol Farisi oli ‘mekem tok blong God i nating nomo, blong oli save holem kastom blong olgeta.’ Be Jisas i no mekem olsem. Hem i no talemaot tingting blong hem nomo, be oltaem hem i yusum tok blong God. (Mat. 15:6; Jon 14:10) Hemia nao samting we yumi tu yumi mas mekem.

¹⁵ Wan narafala samting bakegen i mekem Jisas i defren long ol lida blong jos. Long saed blong ol tija blong Loa mo ol Farisi, Jisas i talem se: “Yufala i mas harem ol tok blong olgeta, mo yufala i mas mekem olgeta samting we oli talem. Be i nogud yufala i folem fasin blong olgeta, from we olgeta oli talem ol samting, be oli no mekem olsem we oli talem.” (Mat. 23:3) Ol tijing we Jisas i givim long ol man, hem tu i folem. Bambae yumi luk wan eksampol blong samting ya.

16. ?Olsem wanem Jisas i folem advaes ya we hem wan i givim long Matiu 6:19-21?

¹⁶ Jisas i talem long ol disaepol blong hem se oli mas ‘hivimap ol gudgudfala samting long heven.’ (Ridim Matiu 6:19-21.) ?Olsem wanem? ?Jisas tu i folem advaes ya? Yes, ol tok we hem i talem long  saed blong hem wan oli tru nomo. Hem i talem se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi, blong go slip long hem.” (Luk 9:58) Jisas i no mekem laef blong hem i fasfas. Hem i bisi long wok blong talemaot gud nius blong Kingdom, mo hem i soemaot rod long yumi olsem wanem blong stap longwe long ol wari we oli kamaot taem yumi hivimap ol gudgudfala samting long wol ya nomo. Laef blong hem i soemaot se i moagud we yumi hivimap ol gudgudfala samting long heven, we ‘kakros i no save kakae, mo rosta i no save spolem, mo ol man blong stil oli no save brekem haos, blong go insaed blong stil.’ ?Olsem wanem? ?Yu yu stap folem advaes ya blong Jisas blong hivimap ol gudgudfala samting long heven?

Ol Fasin Blong Jisas We Oli Pulum Ol Man

17. ?Wanem sam fasin blong Jisas we oli mekem se hem i nambawan ivanjelis?

¹⁷ ?Wanem ol fasin blong Jisas we oli mekem se hem i nambawan ivanjelis? Wan long olgeta, hemia tingting we Jisas i gat long saed blong ol man we hem i halpem olgeta. Hem i gat ol gudgudfala fasin blong Jeova, olsem tingting daon, lav, mo sore. Traem luk olsem wanem ol fasin ya oli pulum plante man oli kam long Jisas.

18. ?Wanem i soemaot se Jisas i gat tingting daon?

¹⁸ Jisas i agri blong kamdaon long wol ya, ale hem i “lego olgeta fasin ya [blong heven], nao i kam olsem man blong wok nomo. Hem i bon long wol ya, i kam man. Hem i karem fasin blong man.” (Fil. 2:7) Blong mekem samting ya, Jisas i mas gat tingting daon. Mo tu, Jisas i no lukluk daon long ol man olsem we hem i moagud long olgeta. Hem i no gat tingting ya se, ol man oli mas lesin long hem from we hem i aot long heven i kamdaon. Jisas i no mekem fasin olsem ol giaman mesaea mo tokflas from wok blong trufala Mesaea we hem i mekem. Defren olgeta, hem i talem long sam man se oli no mas talemaot hem long ol narafala, mo oli no mas talemaot bigfala wok we hem i mekem long olgeta. (Mat. 12:15-21) Jisas i wantem se ol man oli lukluk ol samting we hem i mekem, nao olgeta wanwan oli tekem prapa desisen blong olgeta. !Ol disaepol blong Jisas oli glad tumas we Masta blong olgeta i no wantem se oli mas stretgud, olsem ol enjel long heven we hem i bin stap wetem olgeta!

19, 20. ?Olsem wanem lav mo sore i pulum Jisas blong halpem ol man?

¹⁹ Jisas Kraes i soemaot se  hem i lavem ol man tu—hemia faswan bigfala fasin blong Papa blong hem long heven. (1 Jon 4:8) From we Jisas i lavem ol man, hem i tijim olgeta. Tingbaot filing blong Jisas long saed blong wan yangfala man we hem i gat haenem. (Ridim Mak 10:17-22.) Jisas “i lavem hem tumas” mo i wantem givhan long hem. Be yangfala man ya i gat plante samting, mo i no wantem lego ol samting ya blong kam wan man blong Kraes.

²⁰ Jisas i sore long ol man. Hemia wan narafala fasin we i pulum plante man oli kam long hem. Ol man we oli laekem tijing blong Jisas oli gat ol problem olsem ol narafala man, mo ol problem ya oli mekem tingting blong olgeta i hevi. Jisas i save samting ya, taswe hem i sore long ol man we hem i tijim olgeta, mo i wantem tumas blong givhan long olgeta. Tingbaot wan taem we Jisas wetem ol aposol blong hem oli bisi tumas, mo oli no gat taem blong kakae. ?Nating se i olsem, taem ol man oli hivap raon long Jisas, hem i mekem wanem? “Hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i stat tijim olgeta long plante samting.” (Mak 6:34) Jisas i luksave se ol man long ples we hem i prij long hem oli trabol gud, nao hem i yusum taem mo paoa blong hem blong tijim olgeta mo mekem ol merikel blong givhan long olgeta. Samfala oli laekem ol gudfala fasin blong Jisas, mo ol tok blong hem i tajem hat blong olgeta, ale oli kam ol disaepol blong hem.

21. ?Bambae yumi tokbaot wanem long nekis stadi?

²¹ I gat plante moa samting yet we yumi save lanem long saed blong wok blong Jisas long wol. Nekis stadi bambae i tokbaot samting ya. ?Wanem sam narafala rod we yumi save kam olsem Jisas Kraes, Misinari ya we i nambawan olgeta?

[Futnot]

?Bambae Yu Yu Ansa Olsem Wanem?

• ?Bifo we Jisas i kam long wol, hem i kasem wanem trening?

• ?Olsem wanem fasin blong Jisas blong tijim man i moagud i winim fasin blong ol tija blong Loa mo ol Farisi?

• ?Wanem ol fasin blong Jisas we oli pulum ol man?

[Kwestin]

[Tok blong pija long pej 19]

?Olsem wanem Jisas i tijim ol man?