Kraes i Stap Finis—?Yu Mas Mekem Wanem?
Kraes i Stap Finis—?Yu Mas Mekem Wanem?
“?Wanem saen bambae i soemaot we yu yu stap, mo we hemia lashaf blong fasin blong laef blong wol?”—MAT. 24:3, NW.
1. ?Wanem kwestin we ol aposol oli askem long Jisas we yumi intres long hem?
KLOSAP tu taosen yia bifo, Jisas i stap hem wan long Hil blong ol Oliftri, nao fo aposol blong hem oli kam storian wetem hem oli askem wan kwestin long hem se: “Plis yu talem long mifala. ?Wetaem bambae ol samting ya oli kamtru? ?Mo wanem saen bambae i soemaot we yu yu stap, mo we hemia lashaf blong fasin blong laef blong wol?” (Mat. 24:3, NW) Long kwestin ya we ol aposol oli askem, oli yusum tu toktok we yumi intres blong faenemaot mining blong tufala. Wan hemia “stap” mo narawan hemia “lashaf blong fasin blong laef blong wol.” ?Tufala tok ya i minim wanem?
2. ?Wanem mining blong tok ya “lashaf” we long lanwis Grik hemia syn·teʹlei·a?
2 Fastaem bambae yumi tokbaot mining blong tok ya “lashaf,” we long lanwis Grik hemia syn·teʹlei·a. Long Baebol ya New World Translation, oltaem oli tanem Grik tok ya (syn·teʹlei·a) i kam “lashaf” be wan narafala Grik tok, hemia te’los, oltaem oli tanem i kam “en.” Blong kasem save stret mining blong tufala tok ya, tingbaot wan tok we wan brata i givim long Haos Kingdom. “Lashaf” blong tok blong brata ya, hemia taem we hem i talem bakegen ol bigfala tingting we hem i bin tokbaot mo i talem olsem wanem ol man we oli lesin oli save yusum ol save ya we oli lanem. “En” blong tok ya hemia taem we brata i finis blong toktok mo i aot long platfom. Long sem fasin, taem Baebol i yusum tok ya “lashaf blong fasin blong laef blong wol” hem i minim ol laswan dei mo en blong fasin blong laef we i stap long wol ya.
3. ?Wanem sam samting we oli hapen long taem we Kraes i stap?
3 ?Olsem wanem long tok ya “stap” we ol aposol oli yusum long kwestin blong olgeta? Tok ya long lanwis Grik oli talem se pa·rou·siʹa. * Pa·rou·siʹa blong Kraes (taem we Kraes i “stap”) i stat long 1914 taem Jisas i kam King long heven, mo i gohed yet long taem blong “bigfala trabol,” taem Jisas i kam blong spolem ol rabis man. (Mat. 24:21) Long taem ya we Jisas i “stap,” i gat plante samting oli hapen: Hem i taem blong “ol las dei” blong rabis wol ya, hem i taem blong hivimap ol laswan man we bambae oli go long Kingdom, mo hem i taem we God i mekem ol Kristin ya we tabu spirit i makemaot olgeta oli laef bakegen long ded blong go stap long heven. (2 Tim. 3:1, NW; 1 Kor. 15:23; 1 Tes. 4:15-17; 2 Tes. 2:1) Yumi save talem olsem, se taem ya we Baebol i kolem “lashaf blong fasin blong laef blong wol” (syn·teʹlei·a) hem i semfala taem wetem wanem we Baebol i kolem taem we Kraes i “stap” (pa·rou·siʹa).
Wan Taem We i Longfala
4. ?Olsem wanem taem we Jisas i “stap” i sem mak long taem blong Noa?
4 Tok ya pa·rou·siʹa i minim wan longfala taem mo i laenap wetem taem ya we Jisas i talem se bambae hem i “stap.” (Ridim Matiu 24:37-39 long New World Translation.) Jisas i no talem se taem we hem i “stap” i sem mak long taem we bigfala ren i foldaon mo i kavremap wol, we hem i wan sotfala taem. Be hem i talem se taem ya we hem i “stap” i sem mak long taem blong Noa, hemia wan longfala taem we i laenap wetem laef blong ol man bifo we bigfala ren i foldaon. Insaed long taem ya Noa i bildim bigfala sip, mo hem i prij, mo bigfala ren i foldaon mo i kavremap wol. Olgeta samting ya evriwan oli hapen long wan longfala taem, i no long wan dei nomo. Long sem fasin, taem ya we Kraes i “stap” hem i no wan dei nomo, be hem i wan longfala taem we insaed long taem ya i gat plante samting we oli hapen gogo kasem taem blong bigfala trabol, mo bigfala trabol tu i stap insaed long taem ya.—2 Tes. 1:6-9.
5. ?Olsem wanem ol tok blong Revelesen japta 6 oli soemaot se taem ya we Jisas i “stap” hem i wan longfala taem?
5 I gat sam narafala profet tok blong Baebol we oli pruvum se taem we Kraes i “stap” hem i wan longfala taem mo i no minim taem ya nomo we hem i kam blong spolem ol rabis man. Buk blong Revelesen i tokbaot Jisas se hem i stap ron long wan hos we i waet mo hem i putum hat blong man we i win long faet. (Ridim Revelesen 6:1-8.) Afta we Jisas i kam King long 1914, buk blong Revelesen i talem se Jisas i olsem wan “man we i win finis long faet, nao i go blong faet bakegen, blong bambae i win bakegen.” Ale, Revelesen i talem se afta long Jisas i gat sam narafala man oli kam we oli ron long ol defdefren kala hos. Olgeta ya oli pija blong faet, kakae i sot, mo ol sik. Hemia ol samting we oli hapen long wan longfala taem we Baebol i kolem “ol las dei.” Yumi luk we ol samting ya oli stap hapen finis tede.
6. ?Revelesen japta 12 i halpem yumi blong kasem save wanem long saed blong taem ya we Kraes i “stap”?
6 Revelesen japta 12 i givim sam moa save long saed blong taem ya we Kingdom blong God i stanap long heven. Long japta ya yumi ridim stori blong wan faet we i kamaot long heven. Mikael—hemia Jisas Kraes we i stap long heven—mo ol enjel blong hem oli faet agensem Devel Setan mo ol rabis enjel blong hem. Long faet ya, Mikael i sakemaot Setan mo ol rabis enjel ya long heven, oli kamdaon long wol. Afta we samting ya i hapen, buk blong Revelesen i talem se Setan i kros tumas “from we hem i save se i gat smol taem nomo blong hem i stap yet.” (Ridim Revelesen 12:7-12.) Ol samting ya oli soemaot klia se afta we Kingdom blong Kraes i stanap long heven, laef long wol ya i jenis, i defren olgeta long laef blong bifo from we ol trabol bambae oli gohed blong kam antap bigwan long wol. Taswe Revelesen i talem se “sore tumas” long graon ya mo ol man we oli stap long hem.
7. ?Namba tu Sam i tokbaot wanem, mo wanem janis we Sam ya i talem se man i gat?
7 Wan narafala profet tok long saed blong taem ya we Jisas i kam King long Hil ya Saeon long heven hemia long namba tu Sam. (Ridim Ol Sam 2:5-9; 110:1, 2.) Be long Sam ya yumi luk se i gat wan taem we God i givim janis long ol lida blong wol ya, mo ol man we oli stap aninit long olgeta, blong oli jusum sipos oli wantem stap aninit long rul blong Kraes. God i talem long olgeta se oli mas “lanem mining blong ol samting ya” mo oli mas “harem tok ya” we i blong stretem olgeta. Long taem ya, olgeta man we ‘oli harem gud’ hemia ‘olgeta we oli go long Jeova blong hem i lukaot gud long olgeta,’ yes, hemia ol man we oli mekem wok blong Jeova mo King we hem i putumap. Taswe, taem ya we Jisas i “stap” olsem king long heven, hem i wan taem we ol man oli gat janis blong jenisim fasin blong olgeta.—Sam 2:10-12.
Luksave Saen
8, 9. ?Hu bambae i luksave saen se Kraes i “stap” mo hu bambae i kasem save mining blong saen ya?
8 Taem ol Farisi oli askem long Jisas se wetaem nao bambae Kingdom i kam, Jisas i talem se hemia “i no wan samting we ol man oli save luk long ae blong olgeta.” (Luk 17:20, 21) Ol man we oli no gat bilif bambae oli no luksave taem ya. Tru ya bambae oli no naf nating blong luksave saen blong taem ya from we oli no wantem we Jisas i kam King blong olgeta. ?Ale, hu nao bambae i luksave saen we i soem se Kraes i “stap” mo hu bambae i kasem save mining blong saen ya?
9 Long vas blong Luk, Jisas i gohed blong talem long ol disaepol blong hem se bambae oli luk saen ya i klia nomo olsem we oli luk “laetning i laet, i finisim skae, i stat long wan saed, i go finis long narasaed.” (Ridim Luk 17:24-29.) I gud blong makem we Matiu 24:23-27 i joenem semfala pijatok ya blong laetning i go wetem saen we i soemaot se Kraes i “stap.”
Ol Man Blong Naoia We Bambae Oli Luk Saen Ya
10, 11. (a) ?Bifo, yumi ting se tok ya ‘ol man blong naoia’ long Matiu 24:34 i minim wanem? (b) ?Taem ol disaepol blong Jisas oli harem we hem i tokbaot ‘ol man blong naoia,’ oli klia nomo se hem i stap tokbaot hu?
10 Bifo, Wajtaoa i bin eksplenem se long faswan handred yia, tok ya “ol man we oli stap laef naoia” long Matiu 24:34, i minim “ol man Jiu we oli laef long semfala taem mo we oli no bilif.” * I bin luk olsem se mining ya i stret from we long ol narafala vas we Jisas i talem tok ya, oltaem hem i stap tokbaot ol man we oli gat fasin we i no stret. Mo long bighaf blong ol vas ya, taem Jisas i talem tok ya “ol man blong naoia” no “yufala ol man blong tede” hem i ademap sam tok, olsem ‘yufala i man nogud,’ blong eksplenem se oli wanem kaen man. (Mat. 12:39; 17:17; Mak 8:38) From samting ya, Wajtaoa i bin eksplenem se, tede tu, ‘ol man blong naoia’ we Jisas i tokbaot, i minim ol rabis “man blong naoia” we oli no bilif, olgeta ya bambae oli luk ol saen we oli soemaot se hemia “lashaf blong fasin blong laef blong wol” (syn·te·leiʹa) mo bambae oli stap tu long taem we en (teʹlos) i kam.
11 I tru se plante taem Jisas i bin yusum tok ya ‘ol man blong naoia’ taem hem i stap tokbaot, no i stap tok long ol rabis man we oli laef long taem blong hem. ?Be olsem wanem long tok ya we hem i yusum long Matiu 24:34? ?Hem i stap tokbaot ol rabis man long taem blong hem? Tingbaot se i gat fo disaepol blong Jisas we oli kam luk hem taem hem i stap “hem wan.” (Mat. 24:3, NW) Taem Jisas i toktok wetem fofala ya, hem i tokbaot ‘ol man blong naoia’ be hem i no yusum tok ya blong tokbaot ol rabis man. Taswe, taem fofala ya oli harem we Jisas i yusum tok ya ‘ol man blong naoia,’ oli kasem save se Jisas i stap minim fofala ya wetem ol narafala disaepol tu we olgeta ya nao bambae oli “no save ded evriwan, gogo olgeta samting ya [bambae oli] kamtru.”
12. ?Olsem wanem ol vas long japta 24 oli soemaot se Jisas i stap tokbaot hu taem hem i talem ‘ol man blong naoia’?
12 ?Wanem save nao we i sapotem mining ya? Yumi save yusum nomo ol save we oli stap long japta 24 blong Matiu. Taem yumi ridim Matiu 24:32, 33, Jisas i talem se: “Long fasin blong figtri, i gat wan samting blong yufala i lanem. Stret long taem ya we han blong hem i stat gru bakegen, mo ol niufala lif oli stat kamkamaot, yufala i save we i taem blong wokem garen blong yufala. Nao long sem fasin, taem yufala i luk ol saen ya, bambae yufala i save we mi, mi Pikinini blong Man . . . mi stap nomo long doa blong yufala.” (Skelem vas ya wetem Mak 13:28-30; Luk 21:30-32.) Ale, long Matiu 24:34, yumi ridim se: “Tru mi talem long yufala, ol man we oli stap laef naoia, bambae oli no save ded evriwan, gogo olgeta samting ya i kamtru.”
13, 14. ?From wanem yumi save talem se ‘ol man blong naoia’ we Jisas i tokbaot olgeta, i minim ol disaepol blong hem?
13 Jisas i talem se ol disaepol blong hem, we i no longtaem bambae tabu spirit i makemaot olgeta, olgeta nao bambae oli luk “olgeta samting” we oli stap hapen mo bambae oli luksave mining blong taem we oli stap long hem. Taswe, i sua se Jisas i stap minim ol disaepol blong hem taem hem i gohed i se: “Ol man we oli stap laef naoia, bambae oli no save ded evriwan, gogo olgeta samting ya i kamtru.”
14 Ol disaepol blong Jisas oli no olsem ol man we oli no gat bilif. Ol disaepol ya bambae oli luk saen ya be i no hemia nomo. Bambae oli kasem save mining blong hem tu. Bambae oli “lanem” samting taem oli luk saen ya mo bambae oli “save” trufala mining blong hem. Yes, bambae oli kasem save klia se Jisas ‘i stap long doa nomo.’ Taem smol haf blong ol profet tok blong Jisas i kamtru long faswan handred yia, ol man Jiu we oli no bilif, mo ol Kristin we tabu spirit i makemaot olgeta, olgeta evriwan oli luk ol samting we i hapen. Be ol Kristin we tabu spirit i makemaot olgeta, olgeta ya nomo oli bin lanem samting, min se olgeta nomo oli kasem save mining blong ol samting we oli luk.
15. (a) ?Long taem blong yumi, hu olgeta we oli mekemap ‘ol man blong naoia’ we Jisas i tokbaot? (b) ?From wanem yumi no save kaontem se taem blong ‘ol man we oli stap laef naoia,’ i longfala olsem wanem? (Lukluk bokis long pej 29.)
15 Tede, ol man we oli no gat save long ol trutok blong God, oli ting se i no gat samting ‘we man i save luk long ae blong olgeta’ we i olsem saen blong soemaot se Jisas i stap finis. Oli ting se evri samting i stap sem mak nomo olsem we i bin stap longtaem finis i kam. (2 Pita 3:4) Be ol brata blong Kraes we tabu spirit i makemaot olgeta, oli no gat tingting olsem. Olgeta ya, oli wan grup we i olsem Jon bifo, oli luksave saen ya klia nomo olsem we wan laetning i laet, mo oli kasem save trufala mining blong hem. Long taem blong yumi, grup ya blong ol Kristin we tabu spirit i makemaot olgeta, olgeta ya nao oli ‘ol man blong naoia’ we bambae oli no save lus “gogo olgeta samting ya i kamtru.” * Hemia i givim tingting se sam long ol brata ya blong Kraes we tabu spirit i makemaot olgeta, bambae oli stap yet long wol ya taem bigfala trabol i stat.
“Oltaem, Yufala i Mas Lukaot Gud”
16. ?Olgeta man blong Kraes oli mas mekem wanem?
16 Be i no naf blong luksave saen nomo. Jisas i gohed i se: “Be tok ya we mi talem long yufala, mi stap talem long olgeta man se, ‘Oltaem, yufala i mas lukaot gud.’” (Mak 13:37) Tok ya i impoten long yumi evriwan, nomata yumi man we tabu spirit i makemaot yumi no yumi man blong bigfala kampani. Bitim 90 yia nao we Jisas i kam King long heven long 1914. Yumi mas rere mo yumi mas lukaotgud oltaem, nating se samtaem yumi harem se i had tumas blong mekem olsem. Taem yumi kasem save se Jisas i stap rul finis olsem King long heven, nating se yumi no save luk hem, samting ya i halpem yumi blong stap rere mo lukaot gud oltaem. Mo tu, samting ya i save halpem yumi blong tingbaot se i no longtaem nao bambae hem i kam blong spolem ol enemi blong hem, yes, bambae hem i kamtru long “taem we [yumi] no tingbaot.”—Luk 12:40.
17. ?Yumi luksave wanem, taem yumi kasem save se Jisas i stap finis, mo yumi mas gat strong tingting blong mekem wanem?
17 Naoia we yumi kasem save moa long saed blong taem ya we Jisas i stap, yumi luksave se yumi laef long wan taem we i impoten tumas. Yumi save se Jisas i stap rul finis olsem King long heven stat long 1914. I no longtaem bambae hem i kam blong spolem ol man nogud mo bambae hem i mekem ol bigbigfala jenis long wol ya. Taswe, naoia i taem blong mekem tingting blong yumi i strong moa blong tekpat fulwan long wok we Jisas i bin tokbaot se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en [teʹlos] i save kam.”—Mat. 24:14, NW.
[Ol futnot]
^ par. 3 Mining blong tok ya pa·rou·siʹa i klia taem yumi ridim ol tok blong aposol Pol long 2 Korin 10:10, 11 mo Filipae 2:12 long New World Translation. Pol i yusum tok ya blong skelem taem we hem i “stap” wetem ol brata blong hem mo taem hem i “no stap” wetem olgeta. Blong save moa long hemia yu save ridim Buk 2 blong Insight on the Scriptures, pej 676-679.
^ par. 10 Lukluk Wajtaoa, Novemba 1, 1995, pej 12-15, 19, 30, 31.
^ par. 15 I luk olsem se ol man blong naoia i laenap wetem ol man we faswan vison blong buk blong Revelesen i tokbaot olgeta. (Rev. 1:10–3:22) Long dei blong Masta, grup blong ol man blong naoia hem i stat long 1914 mo bambae i stap gogo kasem taem we laswan memba blong hem i ded mo i laef bakegen long heven.—Lukluk Revelesen Kolosap I Kasem Nambawan En blong Hem!, pej 24, haf 4.
?Bambae Yu Yu Ansa Olsem Wanem?
• ?Olsem wanem yumi save se taem we Jisas i stap hem i wan longfala taem?
• ?Hu i luksave mo i kasem save saen blong taem we Jisas i stap?
• ?Ol man blong naoia we Matiu 24:34 i tokbaot i minim hu tede?
• ?From wanem yumi no save kaontem se taem blong “ol man we oli stap laef naoia” i longfala olsem wanem?
[Kwestin]
[Bokis blong pija long pej 29]
?I Gat Rod Blong Kaontem Se Taem Blong ‘Ol Man We Oli Stap Laef Naoia’ i Longfala Olsem Wanem?
Tok ya “ol man we oli stap laef naoia,” plante taem i minim olgeta man we yia blong olgeta i defdefren, be evriwan oli laef long semfala taem we sam spesel samting i hapen. Eksampol: Eksodas 1:6 long New World Translation i talem se: “Nao Josef i ded, mo olgeta brata blong hem tu wetem olgeta man we oli laef long taem ya, oli ded.” Josef mo ol brata blong hem oli gat defdefren yia, be olgeta evriwan oli bin gotru long sem samting tugeta. Long “olgeta man we oli laef long taem ya” i gat sam brata blong Josef we oli bon bifo long Josef. Mo i gat samfala we oli laef yet afta we Josef i ded. (Jen. 50:24) Sam narafala man “we oli laef long taem ya,” olsem Benjamin, oli bon afta we Josef i bon mo oli gohed blong laef afta we Josef i ded.
Taswe taem Baebol i yusum tok ya “ol man we oli stap laef naoia” hem i blong minim olgeta man we oli laef long semfala taem we wan spesel samting i hapen, be yumi no save talem stret se taem ya i longfala olsem wanem. Nating se i olsem, yumi save se taem ya i gat en blong hem mo hem i no longfala tumas. Taswe taem Jisas i yusum tok ya “ol man we oli stap laef naoia,” long Matiu 24:34, hem i no givim wan save long ol disaepol blong hem we bambae i halpem olgeta blong faenemaot wetaem “ol las dei” bambae oli finis. Defren olgeta, Jisas i makem klia se bambae oli no save “dei blong samting ya, mo taem blong hem.”—2 Tim. 3:1, NW; Mat. 24:36.
[Tok blong pija long pej 26]
Afta we Jisas i kam King long 1914, Baebol i tokbaot hem olsem wan ‘man we i win finis mo bambae i win bakegen’
[Tok blong pija long pej 28]
“Ol man we oli stap laef naoia, bambae oli no save ded evriwan, gogo olgeta samting ya i kamtru”