Man We i Gat Sore Long Narafala Long Wan Wol We i Nogud

WAN man long Burundi i kasem malaria mo i sik tumas. Hem i mas go kwiktaem long wan hospital. ?Be bambae hem i go long hospital olsem wanem? I no gat trak we i save karem hem. Tu man we tufala i gudfala fren blong hem, tufala i givhan long hem. Tufala i putum hem long wan baskel mo tufala i pusum hem faef aoa long ol bigfala hil. Tufala ya i taedgud be tufala i pusum hem go kasem ples we tufala i save putum hem long wan bas blong hem i go long hospital. Sam dei biaen, man ya i stap kam gud bakegen.

Long narasaed blong wol, long Ogis 2005, Hariken Katrina i spolem ol taon klosap long solwota long saot blong Yunaeted Stet. Afta we hariken i pas finis, wan smol grup blong ol volontia we oli stap givhan blong klinimap ples, oli luk we ol tri oli foldaon long wan haos mekem se haos i brokbrok nogud. Ale, nating se ol volontia ya oli no save ol man long haos ya, oli spenem fuldei blong katkatem ol tri ya we oli foldaon mo ol haf blong haos we i brokbrok mo blong klinimap ples. Woman blong haos ya i talem se: “Mi tangkiu we mi tangkiu bigwan long olgeta ya.”

Ol bigfala stori long nius oli tokbaot plante ol rabis samting we oli hapen mo ol samting we man i mekem blong spolem narafala. From ol stori olsemia, plante taem yumi no harem we i gat man evri dei we i soem sore mo kaen fasin long narafala. Be samting ya i no jenisim wanem we ol man long evri ples long wol oli nidim tumas, hemia blong man i lavem olgeta, rili kea long olgeta mo harem save soa blong olgeta. !Yes, yumi wantem tumas we man i gat sore long yumi! Maet ol man oli tingting moa long ol fasin olsem long taem blong Krismas, taem oli stap  tokbaot mo singsing long saed blong ‘pis we i stap wetem ol man we God i glad long olgeta.’—Luk 2:14.

Long wol ya we bighaf blong ol man oli no kea long narafala mo oli no kaen, maet i no isi long yumi blong gat sore long narafala. Plante man oli ting se sipos man i wantem win long laef mo gat gudfala laef, hem i no mas kea long narafala mo tingbaot narafala. I luk olsem oli laef folem tingting ya se, i moa waes blong mekem i nogud long narafala bitim we oli sore long hem. Griri fasin mo man i tinghae long hem wan nomo i kam antap bigwan mekem se man i no moa sore long narafala.

Taswe, plante man oli stap tingbaot samting we olgeta nomo oli wantem, oli no kea long filing blong narafala mo samting we narafala i wantem. Wol ya i givim tingting se ol man oli mas strong olsem ol man blong spot mo film we oli no kaen long narafala. Sam haeman blong politik oli gat fasin olsem tu.

From samting ya, i gud blong tingbaot ol kwestin olsem: ?From wanem yumi mas gat sore? ?I rili mekem i gud long narafala taem yumi gat sore long hem? ?Mo wanem bambae i halpem yumi blong gat sore? Ol haf we oli kam biaen bambae oli tokbaot ol kwestin ya.

[Bokis blong pija long pej 3]

• ?I wan slak fasin blong gat sore long narafala?

• ?Taem man i gat sore, hem i rili save mekem i gud long narafala?

• ?Wanem sam rod blong soemaot we yu yu gat sore long narafala?