Tok Blong Jeova i Wan Samting We i Laef

Ol Bigfala Poen Long Buk Blong Mak

LONG ol fofala Gospel, wan we i sot moa hemia Gospel blong Mak. Jon Mak i raetem Gospel ya toti yia afta we Jisas i ded mo i laef bakegen. Gospel blong Mak i tokbaot plante plante samting we oli hapen long ol tri yia haf we Jisas i stap prij, taswe taem yumi ridim ol stori long buk ya i olsem we ol samting oli hapen hareap nomo.

Buk ya i tokbaot Jisas Kraes olsem Pikinini blong God we i mekem plante merikel mo we i wok strong long wok blong prij. From samting ya, i luk olsem se ol save long buk blong Mak i go fastaem long ol man Rom mo ol man we oli no man Isrel. Buk ya i tokbaot plante ol wok blong Jisas i bitim wanem we hem i tijim. Sipos yumi tingting gud long Gospel blong Mak, samting ya bambae i mekem bilif we yumi gat long Mesaea i kam strong moa mo bambae i pusum yumi blong wok strong long Kristin wok blong prij olsem ol man blong talemaot tok blong God.—Hib. 4:12.

BIGFALA WOK BLONG JISAS LONG GALILI

(Mak 1:1–9:50)

Long fotin vas, Mak i tokbaot wok blong Jon Baptaes mo ol foti dei we Jisas i stap long draeples. Afta long ol vas ya, hem i stat blong tokbaot wok blong prij we Jisas i mekem long Galili. Plante taem hem i yusum tok ya “wantaem nomo” blong givim tingting se taem i sot, i olsem we ol samting oli hapen kwiktaem.—Mak 1:10, 12, NW.

I no bitim tri yia yet, be Jisas i prij long ol taon blong Galili tri taem finis. Mak i raetem stori ya folem stret taem we ol samting long stori ya oli hapen. Hem i no tokbaot Bigfala Toktok blong Jisas antap long Hil mo plante narafala longfala tok we Jisas i bin mekem.

Ansa Blong Sam Kwestin Long Saed Blong Baebol:

1:15—?Hem i stret “taem” blong wanem? Jisas i talem se i stret taem nao blong hem i statem minista wok blong hem. Kingdom blong God i kam klosap from we Jisas i stap mo hem nao i King we God i jusumaot. Wok blong prij we Jisas i mekem i save gat paoa long ol man we hat blong olgeta i stret mo i save pusum olgeta blong mekem samting we God i glad long hem.

1:44; 3:12; 7:36—?From wanem Jisas i no wantem se ol man oli talemaot ol merikel blong hem? Jisas i no wantem se ol man oli tekem wan desisen we i stanap long ol stori we oli harem nomo, from we maet oli harem ol giaman nius mo ol stori we oli blong mekem man i sapraes. Defren olgeta, hem i wantem we oli luksave olgeta wan se hem i Kraes mo oli mekem prapa desisen blong olgeta we i stanap long ol samting we oli luk. (Aes. 42:1-4; Mat. 8:4; 9:30; 12:15-21; 16:20; Luk 5:14) Tingbaot wan man blong kantri ya Gerasa we Jisas i ronemaot devel long hem. Jisas i talem long man ya blong mekem samting we i defren, hemia blong i gohom mo i talemaot samting we i hapen long hem long ol man ples blong hem. Ol man long kantri ya Gerasa oli talem long Jisas se hem i mas aot long ples blong olgeta. Taswe maet ol man long ples ya oli no savegud Jisas no maet oli no save hem nating. Ating taem oli luk man ya mo oli harem stori blong hem se Jisas i mekem i gud long hem, samting ya nomo bambae i blokem ol nogud toktok long saed blong ol pig ya we oli lus.—Mak 5:1-20; Luk 8:26-39.

2:28—?From wanem Jisas i talem se hem i “Masta blong Sabat dei”? Aposol Pol i raetem se: “Loa we God i givim long Moses, hem i pija nomo blong ol tru samting we i stap.” (Hib. 10:1) Olsem Loa ya i talem, Sabat dei i kam afta long sikis dei blong wok mo Jisas i bin hilim plante man long dei ya. Hemia i pija blong taem we ol man oli save spel long pis mo haremgud long ol narafala blesing we bambae oli kasem aninit long Taosen Yia Rul blong Kraes afta we rabis rul blong Setan i lus olgeta. From samting ya, King blong Kingdom ya i “Masta blong Sabat dei” tu.—Mat. 12:8; Luk 6:5.

3:5; 7:34; 8:12—?Olsem wanem Mak i save ol filing blong Jisas taem Jisas i kasem ol traem? Mak i no wan long ol 12 aposol mo hem i no wan  long ol gudfala fren blong Jisas. Ol kastom stori blong bifo oli talem se aposol Pita i talem plante samting long Mak from we Mak i wan gudfala fren blong hem.—1 Pita 5:13.

6:51, 52—?Wanem mining blong merikel blong ol “bred” ya we ol disaepol oli no kasem save long hem? Jisas i bin fidim 5,000 man wetem faef bred mo tu fis, hemia i no kaontem ol woman mo ol pikinini. Mining blong merikel ya blong ol “bred” we ol disaepol oli sud kasem save long hem long taem ya, hemia se Jeova i givim paoa long Jisas blong mekem ol merikel. (Mak 6:41-44) Sam aoa biaen, Jisas i mekem wan narafala merikel, hem i wokbaot antap long wota. Samting ya i mekem ol disaepol oli sapraes tumas. Be sipos olgeta oli bin luksave bigfala paoa we Jeova i givim long Jisas, bambae oli no sapraes bigwan olsem.

8:22-26—?From wanem Jisas i putum han blong hem tu taem long ae blong blaenman ya blong mekem hem i save lukluk bakegen? Jisas i mekem olsem from we hem i tingbaot man ya. Longtaem nao man ya i no luk delaet from ae blong hem i nogud. Taswe taem Jisas i stap mekem ae blong hem i kamgud sloslo, samting ya i givhan long man ya blong hem tu i lan sloslo long laet blong san.

Ol Lesen Blong Yumi:

2:18; 7:11; 12:18; 13:3. Mak i eksplenem ol kastom, ol tok, ol bilif mo ol ples we maet ol man we oli no man Jiu oli no save long olgeta. Hem i talem klia se ol Farisi oli stap “livim kakae blong mekem wosip,” mo Koban i ‘wan presen we i tabu, i blong God,’ mo ol Sadusi oli “stap talem se man we i ded i no save laef bakegen” mo taem man i stap long “Hil blong Tri ya Olif” hem i “save lukluk” i godaon long haos blong God. Mak i no tokbaot nating laen blong Mesaea from we hem i save se ol man Jiu nomo oli intres long save ya. Long rod ya, Mak i soemaot wan eksampol long yumi. Taem yumi joen long Kristin wok blong prij mo taem yumi givim ol tok long ol miting blong kongregesen, yumi mas tingbaot kastom mo save blong ol man we oli stap lesin long yumi.

3:21. Ol famle blong Jisas oli no bilif long hem. From samting ya, Jisas i stap tingbaot filing blong ol man we famle blong olgeta i no bilif long Jeova, maet famle i agensem no jikim olgeta from bilif blong olgeta.

3:31-35. Taem Jisas i baptaes, hem i kam Pikinini blong God long saed blong spirit mo “Jerusalem antap” i mama blong hem. (Gal. 4:26, NW) Stat long taem ya, famle blong Jisas, hemia ol man we oli obei long tok blong God, oli klosap moa long hem mo oli sas long lukluk blong hem i bitim ol prapa famle blong hem. Samting ya i tijim yumi blong yumi putum ol samting long saed blong wosip long fasples long laef blong yumi.—Mat. 12:46-50; Luk 8:19-21.

8:32-34. Yumi mas hareap blong luksave mo sakemaot eni toktok we narafala i talem long yumi se yumi mas tingbaot yumi wan fastaem. Wan man we i biaen long Kraes i mas rere blong “blokem ol samting we hem nomo i wantem,” hemia i min se hem i mas talem no long ol wok mo long ol  samting we oli blong mekem hem nomo i haremgud. Hem i mas rere blong karem “[“pos,” NW] blong hem,” blong safa no blong kasem sem, blong man i agensem hem mo maet kilim hem i ded from we hem i wan Kristin. Mo oltaem hem i mas “biaen” long Jisas, i min se hem i mas folem gud fasin blong laef blong Jisas. Blong stap olsem wan disaepol blong Kraes, i nidim we yumi traehad blong wokem mo holem wan tingting olsem hem, hemia se oltaem yumi rere blong lego samting we yumi nomo i wantem.—Mat. 16:21-25; Luk 9:22, 23.

9:24. Yumi no mas sem blong talemaot bilif blong yumi long narafala mo blong prea se bilif blong yumi i kam strong moa.—Luk 17:5.

LASWAN MANIS

(Mak 10:1–16:8)

Klosap long en blong yia 32 K.T, Jisas i kam long “provins ya Judia, nao i go stap long narasaed Jodan Reva” mo bigfala hip man oli kam long hem bakegen. (Mak 10:1) Hem i prij long ples ya finis, biaen hem i go long Jerusalem.

Long Nisan 8, Jisas i stap long Betani. Hem i stap kakae nao wan woman i kam mo i kafsaedem senta i go long hed blong Jisas. Ol samting we Mak i raetemdaon long Gospel ya oli folem stret oda we oli bin hapen, stat long taem we Jisas i kam long Jerusalem mo ol man oli presem hem i go kasem taem we hem i laef bakegen long ded.

Ansa Blong Sam Kwestin Long Saed Blong Baebol:

10:17, 18—?From wanem Jisas i stretem man ya we i kolem Hem se ‘Gudfala Tija’? Jisas i no wantem we man i yusum taetel ya blong leftemap hem. Jisas i leftemap Jeova mo i soemaot se trufala God i stamba blong olgeta gudfala samting. Mo tu, Jisas i pulum tingting blong man blong tingbaot wan stamba trutok hemia se Man we i Wokem olgeta samting, Jeova God, hem wan nomo i gat raet blong stanemap ol rul long saed blong wanem samting i gud mo wanem samting i nogud.—Mat. 19:16, 17; Luk 18:18, 19.

14:25—?Jisas i minim wanem taem hem i talem long ol disaepol blong hem se: “Bambae mi mi no moa save dring waen ya bakegen, gogo kasem we bambae mi dring niufala waen long [“Kingdom blong God,” NW]”? Taem Jisas i talem samting ya, hem i no min se i gat prapa waen long heven. Long Baebol, samtaem waen i pija blong bigfala glad. From samting ya, taem Jisas i talem tok ya, hem i stap tokbaot glad blong hem taem ol tabu man oli laef bakegen mo oli stap wetem hem long Kingdom.—Sam 104:15; Mat. 26:29.

14:51, 52—?Hu ya man ya we i “ronwe we i neked nomo”? Mak nomo i talem stori ya. Taswe, yumi save talem se man ya hemia Mak nomo.

15:34—?Tok blong Jisas se: “God blong mi, God blong mi. ?From wanem yu lego mi mi stap olsem ya?” i soemaot se Jisas i sot long bilif? Nogat. Yumi no save tingting we i pusum Jisas blong tok olsem, be tok blong hem i soemaot se maet Jisas i harem save we Jeova i no moa yusum paoa blong Hem blong protektem laef blong hem. Jeova i mekem olsem blong letem trabol we i kasem Jisas i traem bilif blong hem fulwan. Mo tu, maet Jisas i talem samting ya from we hem i wantem mekem wanem we Ol Sam 22:1 i talem long saed blong hem i kamtru.—Mat. 27:46.

Ol Lesen Blong Yumi:

10:6-9. Tingting blong God hemia se tufala we i mared oli joengud tugeta. From samting ya, i nogud we hasban no waef oli kwik blong mekem divos, be tufala i mas traehad blong mekem ol rul blong Baebol oli wok long laef blong tufala blong bambae tufala i save winim ol defren traem we maet i kamaot insaed long mared blong tufala.—Mat. 19:4-6.

12:41-44. Yumi lanem long eksampol blong wido woman ya we i pua se yumi mas glad blong givim presen mane blong sapotem trufala wosip.

[Tok blong pija long pej 31]

?From wanem Jisas i talem long man ya blong talemaot samting we i hapen long hem long ol man ples blong hem?