Yu Mas Kam Wan Man We i Gat Sore Long Narafala

OL MAN we oli laef tede oli fesem ol trabol we oli mowas bitim ol taem bifo. Kakae i sot, ol man oli sik, oli pua, ol man oli brekem loa, oli faet, mo i gat ol disasta. Taswe ol man oli nidim tumas we narafala i sore long olgeta. Man we i gat sore i harem save soa blong narafala mo i kasem save long hadtaem we hem i stap fesem, nao hem i wantem tumas blong givhan long narafala ya. Olsem hot blong san we i mekem yumi haremgud long kolkol taem, sore we yumi gat long wan man we i harem nogud i save leftemap tingting blong hem mo daonem wari mo soa blong hem.

Long ol aksen mo toktok blong yumi, yumi save soemaot we yumi gat sore—yumi save lukaot long narafala mo stap wetem olgeta taem oli nidim yumi. I gud we yumi gat sore long ol famle, fren mo man we yumi save olgeta, be, i no long olgeta nomo. Yumi save soemaot sore long olgeta man nating se yumi no save olgeta. Jisas Kraes i wan man we i gat sore long narafala. Hem i stanemap wan kwestin long bigfala tok blong hem antap long hil, hem i askem se: “?Yufala i ting se sipos yufala i stap lavem olgeta ya nomo we oli stap lavem yufala, God bambae i givim pei long yufala from?” Hem i talem toktok ya tu se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.”—Matiu 5:46, 47; 7:12.

Plante man oli kolem toktok ya se Golden Rul. Yu yu save ridim ol tok ya blong Jisas long Baebol. Plante man oli agri se Baebol hem i beswan buk blong givim advaes we i tijim yumi olsem wanem blong soemaot sore. Baebol i talem bakegen mo bakegen se yumi mas givhan long ol man we oli no naf blong winim trabol we oli fesem, nomata wanem samting i mekem se oli no naf. Jeova God nao i givim Baebol long yumi mo i Wokem yumi, taswe Baebol i tokbaot Hem olsem beswan eksampol blong man we i gat sore.

Tingbaot toktok ya we i se: “[God] i stap givhan gud long ol wido mo long ol pikinini we papa blong olgeta i ded, blong ol man oli no ravem olgeta, mo hem i stap soemaot we hem i lavem ol strenja we oli stap wetem yumi, mo hem i stap givim kakae mo klos long olgeta.” (Dutronome 10:18) Baebol i tokbaot Jeova God se hem i stap “givhan long olgeta we ol narafala man oli stap mekem i no stret long olgeta, oli stap spolem olgeta, mo oltaem hem i stap givim kakae long olgeta we oli hanggri.” (Ol Sam 146:7) Jeova i bin givim wan loa long ol man Isrel long saed blong ol strenja we oli kam stap wetem olgeta, hem i talem se: “Yufala i mas lavem ol narafala man olsem we yufala i stap lavem yufala, mo yufala i mas lukaot gud long olgeta, sem mak olsem we yufala i stap lukaot gud long ol laen blong yufala nomo.”—Levitikas 19:34.

Be samtaem i had blong gat sore long ol man. Long wan leta we aposol Pol i raetem long ol Kristin long Kolosi hem i talem long olgeta se: ‘Sakemaot olfala laef ya blong yufala, wetem ol fasin blong hem, mo putum niufala laef ya blong yufala, olsem prapa klos blong yufala. Niufala laef ya, God nomo i stamba  blong hem. Mo oltaem, hem i stap mekem laef ya i kam niuwan bakegen, blong mekem yufala i savegud hem, mo blong mekem yufala i kam moa olsem hem . . . Hem i lavem yufala tumas, mo hem i jusumaot yufala finis, blong yufala i man blong hem. Nao from samting ya, yufala i mas putum niufala laef ya blong yufala olsem prapa klos blong yufala. Yufala i mas gat sore long ol man.’—Kolosi 3:9, 10, 12.

Yes, blong kam wan man we i gat sore, yumi mas traehad. Sore i wan fasin blong “niufala laef” we ol Kristin oli mas putum olsem prapa klos blong olgeta. Pol i bin laef wetem ol man Rom we oli raf tumas. Hem i leftemap tingting blong ol Kristin brata sista blong oli mekem sam bigfala jenis long ol prapa fasin blong olgeta, blong oli kam ol man we oli harem save soa blong narafala moa, blong oli soemaot sore moa.

Paoa Blong Sore

Samfala oli ting se man we i gat sore i no strong mo i isi long narafala blong spolem hem. ?Olsem wanem? ?Tingting ya i stret?

!No i no stret nating! Samting we i pusum man blong gat sore long narafala hemia strongfala lav we God nao i stamba blong hem, God i soemaot lav we i stretgud olgeta. “God, hem i stamba blong fasin blong lavem man.” (1 Jon 4:16) I stret nomo we Baebol i talem se Jeova i “Papa blong yumi we i gat sore, hem i God we i stamba blong fasin blong givhan.” (2 Korin 1:3) !Yes, Jeova “i kaen tumas long olgeta we oli no save talem tangkiu long hem, oli stap tingbaot olgeta nomo”!—Luk 6:35.

Man we i Wokem yumi i wantem we yumi tu yumi gat ol fasin we oli pulum yumi blong mekem i gud long narafala, olsem fasin sore. Maeka 6:8 i talem se: “Ol samting we i gud blong mekem, Hae God i talemaot finis long yumi. Hem i God blong yumi, mo hem i wantem blong yumi stap mekem ol fasin we i stret gud, mo blong yumi stap soemaot we yumi . . . [“laekem kaen fasin,” NW].” Ol Proveb 19:22 (NW) i talem se: “Sipos man i gat lav we i kaengud, samting ya i gud tumas.” Long fasin we i stretgud olgeta, Jisas we i Pikinini blong God i soemaot ol fasin blong Papa blong hem. Hem i talem long ol man blong hem se: “Yufala i mas gat sore long man, olsem we Papa blong yufala i gat sore long man.”—Luk 6:36.

I gat gudfala risen from wanem yumi wantem kam man we i gat sore, hemia from we fasin ya i gat paoa blong karem plante gudgudfala blesing i kam long yumi. Tok blong Ol Proveb 11:17 i stap kamtru plante, hem i se: “Taem man i kaengud long narafala man, fasin ya i stap mekem i gud long hem tu.” Taem yumi soemaot sore long narafala we i gat nid, long lukluk blong God i olsem we yumi stap mekem i gud long Hem. Hem nao i promes blong gat kaen fasin long ol man blong hem we oli gat sore long narafala. Tabu spirit i pulum King Solomon blong talem tok ya se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Ol Proveb 19:17) Mo Pol i raetem se: “Yufala i save finis, se . . . sipos [man] i stap mekem gudfala  wok, Masta blong yumi bambae i save givim pei long hem, we i stret long wok ya blong hem.”—Efesas. 6:8.

Sore i gat paoa blong pulum ol man blong holem fasin joengud, i givhan blong winim ol faet mo raorao. Sore i halpem yumi blong winim ol problem olsem taem yumi gat rong tingting long saed blong narafala, mo i givhan long yumi blong fofogivim yumi. Samtaem narafala i gat rong tingting long saed blong yumi from we yumi no talemaot klia ol tingting mo filing olsem we yumi bin wantem, no maet oli gat rong tingting long samting we yumi mekem. Long ol taem olsem, sore i save halpem yumi blong winim ol problem ya mo blong holem pis wetem narafala. I isi nomo blong fogivim wan man taem yumi save se oltaem hem i gat sore long narafala. Sore i givhan long yumi blong folem advaes we Pol i givim long ol Kristin, hemia se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala.”—Kolosi 3:13.

Man We i Gat Sore i Haremsave Soa Blong Narafala Mo i Tekem Aksen

Sore i gat paoa blong mekem se trabol blong narafala i no hevi bitim mak. Olsem yumi tokbaot finis, man we i gat sore i haremsave soa blong narafala we i stap trabol mo hem i safa from we narafala i safa. Man we i gat sore i rili kea long narafala we i stap harem nogud mo hem i tekem aksen blong givhan long hem.

Taem ol Kristin oli sore long narafala, oli stap folem fasin blong Jisas. Taem ol man oli kam long Jisas from we oli nidim samting long saed blong bodi no oli nidim help blong kam klosap moa long Jeova, neva Jisas i talem se hem i bisi tumas. Taem hem i luksave we narafala i gat nid, hem i sore long olgeta mo i faenem rod blong halpem olgeta.

Tingbaot filing blong Jisas taem hem i luk ol man we oli no kasem help we oli nidim blong wosipim God. Baebol i talem se: “Taem hem i luk ol man we oli plante tumas, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:36) Wan man we i gat gud save long lanwis ya Grik long Baebol, i tokbaot Grik tok ya we long vas ya oli tanem i kam ‘sore,’ i talem se tok ya i minim “wan filing dip insaed long man we i gat bigfala paoa long hem.” Sam man oli talem se Grik tok ya i gat moa paoa bitim ol narafala Grik tok we oli minim sore.

Long sem fasin, ol Kristin we oli gat sore oli kwik blong givhan long narafala we i nidim samting long saed blong bodi mo long saed blong wosip blong olgeta. Aposol Pita i raetem se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon.” (1 Pita 3:8) I gat wan famle we oli mas muv i go long wan narafala ples from we oli stap siksik tumas. Be famle ya i pua nomo. Ale sam Kristin brata oli givim wan haos long famle ya blong oli save stap long hem 6 manis we oli no nid blong pem. Hasban blong famle ya i talem se: “Evri dei oli stap kam visitim mifala blong meksua se mifala i oraet, mo oli talem ol tok we i leftemap tingting blong mifala, i mekem se mifala i haremgud blong stap long ples ya.”

Ol trufala Kristin oli tingbaot ol nid blong ol strenja. Oli glad blong givim taem, paoa, mo olting blong olgeta blong givhan long ol man we oli no save olgeta. Ol vonlontia we yumi tokbaot finis long faswan haf blong magasin ya, oli ol Witnes blong Jeova we oli halpem ol man we oli no save olgeta.

From we wanwan memba blong Kristin kongregesen i traehad blong wokem ol gudfala fasin, ol man insaed long kongregesen oli haremsave filing blong sore mo lav we i kaengud. Lav nao i pusum ol memba blong kongregesen blong faenem rod blong halpem narafala. Ating i gat sam wido long kongregesen, mo sam pikinini we oli no gat papa mo mama, maet oli nidim we yu soemaot se yu kea long olgeta mo yu haremsave soa blong olgeta. ?Olsem wanem? ?Yu yu save givhan long olgeta blong mekem se oli gat samting we oli nidim, blong oli kasem tritmen no merisen we oli nidim, blong oli gat ples blong slip, no maet sam narafala problem we olgeta wanwan oli fesem?

Tingbaot wan hasban mo waef long kantri blong Gris. Hasban i kasem sik ya strok, we i mekem wan saed blong bodi i ded. Tufala i mas go long wan hospital we i longwe long ples blong tufala. Be smol mane we tufala i kasem blong laef i kam long ol aranis we tufala i salem, mo stret long taem ya we tufala i mas go long hospital hem i taem we oli mas karem ol aranis long ol tri long plantesen blong tufala. ?Hu bambae i mekem samting ya taem tufala i stap long hospital? Ol brata sista long kongregesen blong tufala oli tekem aksen. Oli go karem ol aranis long plantesen mo oli salem olgeta, mekem se, hasban mo waef ya, tufala i gat mane we tufala i nidim blong laef mo tufala i save gat pis long tingting blong tufala.

 I gat plante defren rod blong soemaot we yumi gat sore. Ol Kristin we oli gat sore oli luksave se samtaem bigfala samting we samfala oli nidim taem oli harem nogud hemia blong man i soemaot kaen fasin long olgeta, kam visitim olgeta mo lesin long olgeta wetem sore, blong oli soemaot we oli haremsave soa blong olgeta, mo leftemap tingting blong olgeta wetem sam vas blong Baebol.—Rom 12:15.

Haremgud Blong Kampani Wetem Olgeta We Oli Gat Sore

Kristin kongregesen raonabaot long wol i soemaot we hem i wan ples we i gat pis mo we yumi save haremgud long hem. Hem i wan ples we ol man oli soemaot we oli gat sore mo kaen fasin. Ol trufala Kristin oli luksave se sore i pulum narafala blong kam klosap long olgeta, be man we i no kea long narafala i mekem narafala i gowe long hem. Taswe, oli stap traehad blong folem fasin blong Papa blong olgeta long heven mo oli wantem kam ol man we oli gat “sore” taem oli givhan long narafala folem samting we oli nidim.

Ol Witnes blong Jeova oli singaot yu blong kam kampani wetem olgeta blong haremgud long fasin sore, lav, mo kea we i stap long Kristin kongregesen blong olgeta. Oli welkamem yu mo oli sua se bambae yu haremgud blong kampani wetem olgeta.—Rom 15:7.

[Tok blong pija long pej 5]

Pol i givim advaes long ol Kristin long Kolosi se oli mas gat sore olsem we i prapa klos blong olgeta

[Tok blong pija long pej 7]

Taem Jisas i luksave se narafala i gat nid, sore i pusum hem blong faenem wan rod blong givhan long olgeta