?“I Gat Sam Long Yufala We Oli Waes, Mo Oli Gat Save”?

“Sipos i gat sam long yufala we oli waes, mo oli gat save, i gud oli soemaot samting ya long laef blong olgeta. Oli mas mekem ol gudfala wok, long fasin we tingting blong olgeta i stap daon, mo we oli waes.”—JEM. 3:13.

1, 2. ?Yumi save talem wanem long saed blong plante man we oli ting se oli waes?

?HU MAN we yu yu ting se i waes? ?Maet papa mama blong yu, wan olfala man, no wan tija blong yunivesiti? Tingting blong yu long saed blong man we i waes i save dipen long laef we yu gruap long hem mo laef blong yu naoia. Be ol man we oli mekem wok blong God, oli intres blong save wanem samting i mekem man i waes long tingting blong God.

² Wol ya i leftemap plante man se oli waes, be long lukluk blong God i no olgeta ya we oli waes. Tingbaot ol man ya we Job i toktok wetem olgeta. Long lukluk blong ol man ya oli ting se toktok blong olgeta i waes, be Job i talem se: “Mi mi save talem se i no gat wan long olgeta nating we i waes.” (Job 17:10) Long wan leta blong Aposol Pol hem i tokbaot sam man we oli no wantem save blong God, hem i se: “Oli stap talem se oli waes, be oli krangke nomo.” (Rom 1:22) Mo Jeova hemwan i tok klia long saed ya, hem i yusum profet Aesea blong talemaot toktok ya blong hem, i se: ‘!Yufala ya we i ting se yufala i waes, sore tumas long yufala!’—Aes. 5:21.

3, 4. ?Man we i gat trufala waes i mekem wanem?

³ I klia we yumi nidim blong faenemaot wanem samting i mekem man i gat trufala waes we biaen God nao i glad long hem. Long Ol Proveb 9:10 (NW) yumi faenem moa save, hem i talem se: “Sipos yu wantem kam waes, oraet, fastaem yu yu mas fraetgud long Jeova. Mo sipos yu kasem save long God we i Tabu Tumas, hemia nao yu gat dip save.” Man we i waes i mas gat gudfala fraet ya long God mo hem i mas tinghae long ol rul we God i stanemap. Be i no naf blong agri nomo se God i stap mo blong save se i gat sam rul we hem i stanemap, yumi nidim blong mekem moa. Disaepol Jemes i pulum yumi blong tingting moa long samting ya. (Ridim Jemes 3:13.) Makem toktok we hem i talem, i se: “I gud oli soemaot samting ya long laef blong olgeta. Oli mas mekem ol gudfala wok.” Evri dei, samting we yu mekem mo toktok blong yu i mas soemaot se yu gat trufala waes.

⁴ Man we i gat trufala waes i mekem ol gudfala desisen mo hem i yusumgud save mo fasin luksave we hem i gat. ?Wanem samting we yumi save mekem blong soemaot se yumi gat trufala waes ya? Jemes i talem sam samting we bambae ol man oli mekem sipos oli waes. * ?Hem i givim wanem advaes we i save givhan long yumi blong joengud wetem ol Kristin brata sista, mo wetem ol narafala man afsaed long kongregesen?

Aksen Blong Man i Soemaot Sipos Hem i Gat Trufala Waes

5. ?Fasin blong man we i gat trufala waes, i olsem wanem?

⁵ Olsem yumi tokbaot finis, Jemes i talem se waes i joen wetem ol gudfala wok. Wan man we i waes bambae i traehad blong mekem samting we i laenap wetem ol fasin blong God mo ol rul blong hem from we hem i fraetgud long Jeova, hemia nao fasin we i soemaot se man i stat blong kam waes. Yumi no bon wetem waes ya blong God. Be sipos oltaem yumi stadi long Baebol mo tingting dip long hem, yumi save kasem waes ya. Bambae tufala samting ya i halpem yumi blong mekem olsem Efesas 5:1 i talem, hem i se: “Yufala i mas traehad blong folem fasin blong [God].” Moa we yumi traehad blong folem fasin blong God, moa we bambae yumi soemaot se yumi waes long ol aksen blong yumi. Ol fasin blong Jeova oli hae moa long fasin blong ol man. (Aes. 55:8, 9) Taswe, taem yumi traehad blong folem fasin blong  Jeova bambae ol man raonabaot yumi oli luksave se yumi defren.

6. ?From wanem man we i gat kwaet fasin i soemaot se hem i man blong God? ?Olsem wanem wan man i soemaot se hem i gat kwaet fasin?

⁶ Jemes i talem se wan rod blong kam olsem Jeova hemia blong mekem ol gudfala wok wetem ‘tingting we i stap daon, mo we i waes.’ Ol Kristin we oli gat tingting daon oli kwaet man, be long semtaem oli strong blong holem ol rul blong Baebol. Taswe tingting daon i halpem olgeta blong oli no bitim mak long samting we oli mekem. Nating se God i gat olgeta paoa, hem i gat kwaet fasin, mo yumi no fraet blong kam klosap long hem. Pikinini blong God i tekem kwaet fasin blong Papa blong hem, taswe hem i save talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.”—Mat. 11:28, 29; Fil. 2:5-8.

7. ?From wanem yumi save tingbaot Moses olsem wan gudfala eksampol blong wan kwaet man?

⁷ Baebol i tokbaot sam narafala man tu we oli soemaot kwaet fasin, no tingting daon. Wan long ol man ya hemia Moses. Hem i mekem ol bigbigfala wok, be yet Baebol i tokbaot hem olsem man we “tingting blong hem i stap daon moa, i no gat wan narafala man long wol we tingting blong hem i stap daon olsem hem.” (Nam. 11:29; 12:3) Mo tingbaot paoa we Jeova i givim long Moses blong hem i save mekem wanem we Jeova i wantem. Jeova i glad blong yusum ol kwaet man blong mekem tingting blong hem i kamtru.

8. ?Olsem wanem ol sinman oli save gat wan ‘tingting we i stap daon, mo we i waes’?

⁸ I klia nomo se yumi ol sinman yumi naf blong gat ‘tingting we i stap daon, mo we i waes.’ ?Olsem wanem long yumi? ?Yumi save mekem wanem blong kam gud moa long fasin ya? Kwaet fasin i haf blong frut blong tabu spirit blong Jeova. (Gal. 5:22, 23) Yumi save prea blong askem spirit blong hem mo yumi save tekem aksen blong traehad blong soemaot frut blong spirit. Yes, yumi save trastem God se bambae hem i halpem yumi blong yumi naf moa blong gat kwaet fasin. Taem yumi ridim toktok blong man we i raetem Sam, yumi save mekem tingting blong yumi i strong blong wantem kam gud moa long fasin ya. Hem i talem se: ‘Ol man we tingting blong olgeta i stap daon, God i stap tijim olgeta long ol samting we hem i wantem.’—Sam 25:9.

9, 10. ?Yumi mas mekem wanem traehad blong soemaot kwaet fasin blong God, mo from wanem yumi mas traehad olsem?

⁹ Be yumi mas mekem bigfala traehad blong kam gud moa long saed ya. From laef we yumi gruap long hem, maet sam long yumi i no gat fasin blong kwaet man. Mo maet ol man raonabaot yumi oli no pulum yumi blong gat fasin blong kwaet man, sam oli talem se yumi mas tokbak long man we i tok long yumi. ?Be hemia fasin blong man we i waes? ?Sipos i gat wan smol faea long haos blong yu, bambae yu kafsaedem oel no kolwota long hem? Sipos yu kafsaedem oel long hem bambae faea i kam mowas, be sipos yu kafsaedem kolwota long hem bambae faea i godaon. Taswe, Baebol i givim advaes ya long yumi, hem i talem se: “Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.” (Prov. 15:1, 18) Nekis taem we yumi gat problem wetem narafala, nomata hem i insaed long kongregesen no afsaed, yumi soemaot we yumi gat trufala waes taem yumi ansa long narafala wetem kwaet fasin.—2 Tim. 2:24.

¹⁰ Olsem yumi tokbaot finis, tingting blong wol ya i pulum plante man blong oli no kaen nating, oli no man blong pis, mo oli no kwaet man. Defren olgeta, i gat plante man we oli mekem i strong long narafala mo oli flas. Jemes i save samting ya mo hem i givim woning long ol Kristin long kongregesen blong oli no letem tingting blong wol i spolem fasin blong olgeta. ?Yumi save lanem wanem narafala samting long advaes ya we hem i givim?

Fasin Blong Ol Man We Oli No Waes

11. ?Wanem sam fasin we oli no laenap nating wetem waes blong God?

¹¹ Jemes i tok stret long saed blong ol fasin we oli no laenap nating wetem waes blong God. (Ridim Jemes 3:14.) Man we i jalus mo i wantem oltaem blong kam hae moa long narafala man, hem i no folem ol fasin blong God be i stap folem tingting blong wol. Tingbaot wanem i hapen taem man i folem tingting blong wol. Sikis grup we oli talem se oli Kristin, oli gat paoa antap long sam haf blong wan jos long Jerusalem we oli kolem Holy Sepulchre. Oli talem se oli  bildim jos ya long ples we ol man oli bin kilim Jisas i ded mo berem hem. Longtaem i kam ol sikis grup ya oli stap rao. Long 2006, magasin ya Time i tokbaot olsem wanem ol pris oli bin “rao blong sam aoa, . . . mo oli kilkilim olgeta wetem ol longlongfala aean blong holem kandel.” Oli no save trastem olgeta nating, taswe oli askem long wan Muslim blong holem ki blong jos ya.

12. ?Taem man i no waes, wanem samting i save hapen?

¹² Ol rao olsem, we oli kamaot from man i wantem kam hae moa long narafala, i no mas hapen long trufala Kristin kongregesen. Be i tru se, samtaem, from slak fasin blong yumi wan, maet yumi stronghed lelebet, yumi no wantem jenisim tingting blong yumi. Fasin olsem i save mekem rao i kam insaed long kongregesen. Aposol Pol i luk samting ya long kongregesen blong Korin, taswe hem i raetem leta long olgeta i se: “Taem we yufala i stap jalus, mo yufala nomo i stap rao wetem yufala, i klia we yufala i man blong wol nomo. Yufala i olsem ol narafala man nomo.” (1 Kor. 3:3) Sore tumas, problem ya i gohed longtaem lelebet long kongregesen blong faswan handred yia. Taswe, long taem blong yumi, yumi mas lukaotgud blong meksua se tingting olsem i no kam insaed long wan kongregesen.

13, 14. Talem sam eksampol olsem wanem sam brata oli save gat tingting blong wol.

¹³ ?Olsem wanem tingting olsem i save kam sloslo insaed long kongregesen? I save stat wetem ol smosmol samting. Long taem blong bildim wan Haos Kingdom, maet ol brata oli gat ol defdefren tingting long fasin blong mekem wok. Wan brata i save kam kros from we ol brata oli no folem tingting blong hem, ale hem i tok nogud long ol brata from ol desisen we oli tekem. !Maet hem i no moa gohed blong wok blong bildimap Haos Kingdom! Sipos wan brata i mekem olsem, hem i fogetem se samting we i moa impoten i bitim gudhan blong wok, hemia blong gat pis insaed long kongregesen from we samting ya nao i mekem wok i gohed gud. Jeova i blesem man we i gat kwaet fasin, i no man we i stap rao oltaem.—1 Tim. 6:4, 5.

¹⁴ Wan narafala eksampol we yumi save tingbaot hemia sipos ol elda long wan kongregesen oli luk se wan brata we i mekem wok blong elda plante yia finis, naoia i klia se hem i no moa kasem ol mak long Baebol blong mekem wok blong elda. Taem seket elda i visitim kongregesen, hem tu i luksave se brata ya i bin kasem advaes blong stretem hem be hem i no traehad blong kam gud long fasin blong hem. Ale seket elda i agri wetem ol narafala elda mo oli raetem leta blong talem se i moa gud we brata ya i no moa wok olsem wan elda. ?Bambae elda ya i ting wanem long saed blong desisen ya? ?Bambae hem i gat tingting daon blong letem ol advaes blong Baebol i stretem hem? ?Mo bambae hem i luksave desisen we grup blong ol elda oli mekem? ?Bambae hem i gat strong tingting blong traehad blong kasem ol mak long Baebol blong hem i save mekem wok blong elda bakegen? ?No bambae hem i holem nogud tingting long saed blong ol narafala elda mo i jalus long olgeta from we hem i lusum wok blong hem? ?From wanem bambae wan brata i gohed blong holem tingting se hem i naf blong stap wan elda taem grup blong ol elda oli tekem desisen finis se hem i no naf? !Yes, i moa waes blong gat tingting daon mo traem kasem save long desisen blong olgeta!

15. ?From wanem yu yu harem se advaes we Baebol i givim long Jemes 3:15, 16 i impoten tumas?

¹⁵ I tru se i gat sam narafala samting we oli save lidim man blong jalus mo wantem kam hae moa. Be nomata wanem samting i hapen, yumi mas traehad bigwan blong sakemaot ol fasin olsem. (Ridim Jemes 3:15, 16.) Disaepol Jemes i talem se ol fasin ya oli “kamaot long wol ya” from we oli folem tingting blong man, i no waes we i kam long heven. Ol fasin ya oli blong “man nomo” no olsem sam narafala  Baebol oli talem oli blong ‘anamol’ nomo from we anamol i no skelem samting long tingting blong olgeta oli folem nomo wanem we bodi blong olgeta i wantem. Oli “kamaot long Setan” from we hemia nao ol fasin blong ol rabis enjel ya we oli ol enemi blong God. !Yes i no stret nating blong wan Kristin i gat ol fasin olsem!

16. ?Wanem sam jenis we maet yumi nidim blong mekem, mo olsem wanem yumi save kam naf blong mekem ol jenis ya?

¹⁶ I gud sipos evri memba blong kongregesen oli skelem olgeta wan mo oli wokhad blong sakemaot eni fasin olsem. Ol brata we oli lukaot mo tij long kongregesen, olgeta tu oli mas wekap oltaem blong sakemaot ol nogud fasin mo tingting blong wol. I tru se i no isi blong mekem samting ya from we yumi sinman mo from paoa blong wol ya. I olsem we yumi stap traehad blong klaem long wan hil we i fulap long sofmad. Taem i no gat samting blong yumi holem, i isi blong glis i kam daon. Be sipos yumi holemtaet ol advaes long Baebol, mo wetem help blong Kristin kongregesen we i stap long fulwol, yumi naf blong klaem long hil mo winim ol nogud fasin blong wol ya.—Sam 73:23, 24.

Ol Fasin Blong Man We i Waes

17. ?Man we i waes i tekem wanem aksen taem samting we i rabis i traem hem?

¹⁷ Ridim Jemes 3:17. I gud yumi tokbaot ol fasin we man i soemaot taem hem i “kasem waes we i kam long heven.” Blong gat wan laef we i klin gud, yumi mas klin long olgeta fasin mo tingting blong yumi. Yumi mas kwik blong sakemaot ol samting we oli rabis. Yumi no nid blong tingting se bambae yumi sakemaot samting ya we i rabis no nogat. Sipos yu luk se fingga blong wan man i stap kam stret long ae blong yu, bambae i stikim ae blong yu, ?wantaem nomo yu mekem wanem? Ating yu seftem hed blong yu no yu blokem han blong man ya. Yu no nid blong tingbaot sipos yu mas mekem samting ya no nogat; wantaem nomo yu mekem. Yumi mas mekem sem mak taem wan samting i traem pulum yumi blong mekem rabis fasin. Wantaem nomo klin fasin mo tingting blong yumi we Baebol i trenem i mas pusum yumi blong sakemaot samting we i nogud. (Rom 12:9) Baebol i tokbaot sam man we oli tekem aksen olsemia, sam long olgeta hemia Josef mo Jisas.—Jen. 39:7-9; Mat. 4:8-10.

18. (a) ?Wan man blong pis i no mekem wanem samting? (b) ?Wanem tingting blong man we i mekem pis?

¹⁸ Man we i gat waes i mas wan man blong pis. I min se hem i no man blong faet mo rao, mo hem i no mekem samting blong spolem pis. Jemes i gohed blong tokbaot poen ya taem hem i talem se: “Taem ol man blong mekem pis oli wok long kwaet fasin, i olsem we oli planem sid we frut blong hem, laef we i stret gud.” (Jem. 3:18) Makemgud tok ya “mekem pis.” ?Ol brata sista long kongregesen oli save yumi olsem wan man blong mekem pis no wan man blong spolem pis? ?Yumi luk se plante taem yumi gat problem wetem narafala? ?Yumi stap harem nogud kwiktaem from samting we narafala i mekem? ?Plante taem yumi stap mekem narafala i harem nogud? ?Yumi strong se bambae yumi no jenisim fasin blong yumi, no yumi gat tingting daon blong traem kam gud moa long ol fasin blong yumi we maet oli  mekem narafala i harem nogud? ?Ol man oli save se oltaem yumi traehad blong holem pis wetem narafala, mo yumi rere oltaem blong fogivim mo fogetem ol mastik blong narafala? Sipos yumi skelem yumi wan, samting ya i save givhan long yumi blong luk sipos yumi save kam gud moa long saed ya mo long fasin blong yumi blong soemaot waes blong God.

19. ?Wanem i soemaot se yumi wan man we i rere blong lego tingting blong hem?

¹⁹ Jemes i tokbaot wan kwaet man, olsem wan man we i “rere blong lego tingting blong hem.” (Kingdom Interlinear Translation) Hemia tu wan fasin we Jemes i talem se i soemaot waes we i kamaot long heven. ?Taem narafala i talem tingting blong hem long wan samting we i no brekem ol rul blong Baebol, yumi rere blong lego tingting blong yumi blong folem tingting blong hem? ?Ol man oli save yumi olsem wan man we i kaen mo i isi long olgeta blong toktok wetem yumi? Ol fasin ya oli soemaot klia sipos yumi lan finis blong lego tingting blong yumi.

20. ?Wanem frut bambae i kamaot taem yumi soemaot ol fasin ya blong God we yumi jes tokbaot?

²⁰ Yes, taem yumi ol brata sista, yumi traehad blong soemaot ol fasin blong God we Jemes i tokbaot, yumi evriwan long kongregesen i save haremgud tumas blong kampani tugeta. (Sam 133:1-3) Sipos yumi gat kwaet fasin, yumi man blong pis, mo yumi rere blong lego tingting blong yumi, taem yumi joen wetem ol narafala yumi save sua se ol fasin ya bambae oli givhan long yumi blong joen gud moa tugeta mo bambae i klia we yumi “kasem waes we i kamaot long heven.” Long nekis stadi bambae yumi lanem olsem wanem blong tingbaot narafala olsem we Jeova i stap tingbaot olgeta, mo bambae yumi lanem olsem wanem samting ya i givhan long yumi blong kam gud moa long ol gudfala fasin ya.

[Futnot]

?Yu Yu Save Eksplenem?

• ?Wanem i soemaot we wan Kristin i gat trufala waes?

• ?Olsem wanem yu save kam gud moa long fasin blong yu blong soemaot waes blong God?

• ?Wanem fasin blong man we i no “kasem waes we i kamaot long heven”?

• ?Yu yu gat strong tingting blong kam gud moa long wanem fasin?

[Kwestin]

[Tok blong pija long pej 23]

?Olsem wanem i save gat rao i kamaot tede?

[Tok blong pija long pej 24]

?Yu yu sakemaot rabis fasin wantaem nomo?