Ol Bigfala Poen Long Buk Blong Luk
Tok Blong Jeova i Wan Samting We i Laef
Ol Bigfala Poen Long Buk Blong Luk
PLANTE man oli bilif se Gospel blong Matiu, taem oli raetem fastaem, hem i blong ol man Isrel nomo, mo Gospel blong Mak hem i blong olgeta we oli no man Jiu. Be Gospel blong Luk, oli raetem blong olgeta man long olgeta neson. Oli raetem buk blong Luk samwe long yia 56 K.T.-58 K.T., * mo buk ya i kavremap fulwan laef stori blong Jisas mo wok blong hem long wol.
Luk i wan dokta we i gat fasin ya blong lukluk gud evri samting mo i lukaotgud blong mekem evri samting long fasin we i stret gud. Taswe hem i lukluk gud long evri samting, ‘i stat long stat blong hem, mo i raetem stori blong hem we evri tok blong hem oli stret.’ Buk blong hem i kavremap 35 yia, stat long 3 B.K.T. go kasem 33 K.T. (Luk 1:3) Bitim stret haf (klosap 60 pesen) blong ol samting we Luk i raetemdaon long Gospel ya, oli no raetem long ol narafala Gospel.
STAT BLONG WOK BLONG JISAS LONG WOL
Afta we Luk i tokbaot taem ya we Jon Baptaes mo Jisas tufala i bon, hem i talemaot se Jon i stat blong prij long namba 15 yia blong rul blong Taebirias Sisa, klosap long stat blong yia 29 K.T. (Luk 3:1, 2) Mo klosap long en blong semfala yia ya, Jon i baptaesem Jisas. (Luk 3:21, 22) Long yia 30 K.T., Jisas i kambak long Galili mo “hem i stap tijim ol man insaed long ol haos blong prea blong olgeta.”—Luk 4:14, 15.
Jisas i statem wok blong prij fastaem long Galili. Hem i talem long hip man we oli stap se: “Mi mi mas talemaot gud nyus bilong kingdom bilong God, long ol narafala taon tu.” (Luk 4:43, Gud Nyus Bilong Jisas Krais) Nao Jisas i tekem Saemon, we i man blong pulum fis, mo ol narafala, oli go wetem hem. Hem i talem se: “Yu yu man blong pulum fis, be i stat naoia, bambae yu yu man blong pulum man.” (Luk 5:1-11; Mat. 4:18, 19) Long namba tu trip we Jisas i go prij long Galili, ol 12 aposol blong hem oli stap wetem hem. (Luk 8:1) Mo long namba tri trip blong hem, hem i sanem ol 12 aposol oli go “bilong oli talemaot nyus bilong kingdom bilong God, mo bilong oli wokem ol sik man oli gud bakegen.”—Luk 9:1, 2, Gud Nyus Bilong Jisas Krais.
Ansa Blong Sam Kwestin Long Saed Blong Baebol:
1:35—?Eg blong Meri i mekem wan wok blong pikinini ya Jisas i save gru insaed long bel blong hem? Blong soemaot se pikinini ya blong Meri i wan trufala bubu blong Ebraham, Juda, mo Deved, olsem God i promes finis, eg blong Meri i mas wok tu blong mekem pikinini ya i gru insaed long bel blong hem. (Jen. 22:15, 18; 49:10; 2 Saml. 7:8, 16) Nating se i olsem, tabu spirit blong Jeova nao i tekem laef blong Pikinini ya blong God, we i stret gud olgeta, mo i putum i go insaed long bel blong Meri. (Mat. 1:18) I luk olsem we tabu spirit i blokem sin we i stap long eg blong Meri, mo i protektem pikinini ya taem i stat blong gru long bel blong Meri, blong i no gat wan samting i save spolem hem.
1:62—?Sekaraea i gat tugeta problem ya we i no moa save toktok mo sora blong hem i fas? Nogat. Voes blong hem nomo i lus. Ol man oli “mekem saen” long Sekaraea blong askem long hem wanem nem hem i wantem putum long pikinini blong hem, be oli no mekem samting ya from we sora blong hem i fas, nogat. Ating hem i harem finis samting we waef blong hem i bin talem long saed blong nem blong boe blong tufala. Maet sam narafala oli mekem saen long Sekaraea blong askem long hem long saed blong nem ya. I nidim nomo se Sekaraea i save toktok bakegen, samting ya i soemaot we sora blong hem i no fas nating.—Luk 1:13, 18-20, 60-64.
2:1, 2—?Olsem wanem ‘faswan sensas’ i givhan long yumi blong save wetaem Jisas i bon? Long taem blong rul blong Sisa Ogastas, i bin gat moa long wan sensas—oli mekem faswan sensas long yia 2 B.K.T., stret olsem profet tok blong Daniel 11:20 i talem, mo namba tu sensas oli mekem samwe long yia 6 no 7 K.T. (Wok 5:37) Kwaerinias hem i hed gavman blong Siria long taem ya we oli mekem tufala sensas ya. I luk olsem we tu taem hem i bin holem wok ya blong hed gavman. Tok blong Luk long saed blong faswan sensas i soemaot se Jisas i bon long yia 2 B.K.T.
2:35—?Wanem mining blong “naef blong faet” we i mas stikim Meri? Hemia i tokbaot ol filing blong Meri blong harem nogud, taem bambae hem i luk we plante man oli sakemaot Jisas olsem Mesaea, mo taem oli nilim hem long wan pos blong i ded.—Jon 19:25.
9:27, 28— Jisas i talem long ol disaepol blong hem se, sam long olgeta bambae oli “no save ded” gogo oli luk we hem i kam long Kingdom blong hem. Luk i raetem se “eit dei” (NW) afta we Jisas i talem tok ya, fes mo bodi blong hem i jenis i kam narafala. Be Matiu mo Mak tufala i raetem se samting ya i hapen “sikis dei biaen.” ?From wanem namba blong ol dei ya i no sem mak? (Mat. 17:1; Mak 9:2) I luk olsem we Luk i ademap tu narafala dei, dei we Jisas i mekem promes ya, mo dei we bodi blong Jisas i jenis.
9:49, 50—?From wanem Jisas i letem wan man we i no man blong hem, i ronemaot devel long ol man? Jisas i no blokem man ya from we long taem ya, Kristin kongregesen i no stat yet. Taswe i no nid blong man ya i wokbaot wetem Jisas, blong hem i save bilif long nem blong Jisas mo ronemaot ol devel.—Mak 9:38-40.
Ol Lesen Blong Yumi:
1:32, 33; 2:19, 51. Meri i no fogetem olgeta tok mo olgeta samting we oli hapen blong mekem ol profet tok oli kamtru. ?Olsem wanem? ?Yumi stap tingbaot yet ol samting we Jisas i talem long saed blong taem ya jes bifo we “wol ya i finis”? ?Yumi stap skelem ol tok blong hem wetem ol samting we oli stap hapen long taem blong yumi tede?—Mat. 24:3.
2:37. Eksampol blong Ana i tijim yumi se oltaem yumi mas holemstrong long wosip blong Jeova, “prea oltaem,” mo go oltaem long “ol [Kristin] miting.”—Rom 12:12; Hib. 10:24, 25.
2:41-50. Josef i putum wosip blong Jeova i kam faswan samting long laef blong hem, mo hem i givim ol samting we famle blong hem i nidim long saed blong bodi, mo long saed blong spirit. Long fasin ya, hem i soem wan nambawan eksampol long olgeta hed blong famle.
4:4. Yumi neva mas letem wan dei i pas we yumi no tingbaot Tok blong God.
6:40. Man we i wan tija blong Tok blong God, hem i mas soem wan gudfala eksampol long ol studen blong hem. I minim se, tija ya i mas mekem olgeta samting we hem i stap tijim ol man long hem.
8:15. Blong ‘holemstrong [tok blong God] long tingting blong yumi, mekem tingting blong yumi i longfala, mo gat frut blong tok ya long laef blong yumi,’ yumi mas kasem mining blong Tok blong God, lavem tok ya, mo tekem i kam long laef blong yumi oltaem. I impoten we yumi prea taem yumi tingting dip long ol samting we yumi ridim long Baebol, mo long ol narafala buk we oli eksplenem Baebol.
LASHAF BLONG WOK BLONG JISAS LONG WOL
Jisas i jusum 70 narafala man blong hem bakegen. Hem i sanem olgeta oli go fastaem, hem i kam biaen. Olgeta ya oli go long ol vilej mo ol narafala ples long Judia. (Luk 10:1) Nao Jisas i stap wokbaot, i stap pas “long ol taon mo ol vilej, i stap tijim ol man.”—Luk 13:22.
Faef dei bifo long Pasova long yia 33 K.T., Jisas i sidaon long wan dongki mo i go insaed long Jerusalem. Samting ya i mekem wan profet tok i kamtru we Jisas i bin talem long ol disaepol blong hem, i se: “Mi, Pikinini blong Man, bambae mi harem nogud long plante samting. Ol elda blong ol laen blong Isrel wetem ol jif pris mo ol tija blong Loa, bambae oli no wantem mi, bambae oli kilim mi mi ded. Be long namba tri dei blong hem, bambae God i mekem mi mi laef bakegen.”—Luk 9:22, 44.
Ansa Blong Sam Kwestin Long Saed Blong Baebol:
10:18—?Jisas i stap tingbaot wanem, taem hem i talem long ol seventi disaepol se: “Mi mi luk Setan i aot long heven, i foldaon olsem we laetning i sut i kamdaon?” Jisas i no talem se oli sakemaot Setan finis long heven i kamdaon long wol, from we samting ya i jes hapen smoltaem afta we Kraes i kam King long heven long 1914. (Rev. 12:1-10) Yumi no save sua gud long wan samting we i no kamtru yet, yumi no save mekem olsem we i hapen finis. Be Jisas i stap makemgud se samting ya bambae i sua blong kamtru.
17:34-37, NW—?“Ol igel” oli pija blong hu, mo wanem “dedbodi” ya we oli joen wanples long hem? Olgeta ya we Jisas i “tekemaot” olgeta, no i sevem olgeta, oli olsem ol igel we oli save lukluk i go longwe. Mo “dedbodi” we oli joen wanples long hem, hem i trufala Mesaea no Kraes long taem we hem i stap olsem King long heven. Mo hem i minim tu ol save blong Baebol we Jeova i stap givim long olgeta.—Mat. 24:28.
22:44—?From wanem Jisas i harem nogud tumas? Samting ya i hapen from plante risen. Jisas i tingbaot se from we oli kilim hem i ded olsem oli kilim ol rabis man, samting ya i save daonem Jeova God mo haenem blong hem. Mo tu, Jisas i save gud se wan rod nomo blong hem mo olgeta man we oli stap tru long hem oli kasem laef we i no save finis, se hem i mas stanap strong.
23:44—?Taem ples i tudak blong tri aoa, samting ya i kamaot from mun i kavremap san? Nogat. Long ol taem ya we mun i kavremap san, samting ya i hapen long taem blong niu mun nomo, i no long taem blong ful mun, olsem long taem blong Pasova. Tudak long taem blong ded blong Jisas i wan merikel blong God.
Ol Lesen BLong Yumi:
11:1-4. Taem yumi jekemap ol advaes ya long saed blong prea, ol tok ya oli defren lelebet long Prea blong Masta we i kamaot 18 manis bifo, long ol tok blong Jisas antap long wan hil. Samting ya i soemaot klia se, taem yumi prea, yumi no mas talem bakegen mo bakegen ol semfala tok.—Mat. 6:9-13.
11:5, 13. I tru se, Jeova i glad blong harem prea blong yumi, be yumi mas askem bakegen mo bakegen.—1 Jon 5:14.
11:27, 28. Trufala glad i kamaot taem yumi stap tru long Jeova mo yumi mekem samting we hem i wantem, be i no from ol famle blong yumi, mo from ol samting we yumi gat.
11:41. Yumi givim presen long puaman from we yumi gat lav, mo from we hat blong yumi i pusum yumi blong wantem mekem olsem.
12:47, 48. Man we i save bigfala wok we hem i mas mekem be hem i no wantem mekem, hem i gat bigfala fol moa i bitim man we i no kasem save wok we hem i mas mekem.
14:28, 29. Yumi waes sipos yumi skelem gud fasin blong yumi blong yusum mane mo yumi no mekem bigfala kaon.
22:36-38. Jisas i no askem long ol disaepol blong hem blong oli karem wan tul blong faet blong protektem olgeta. Be i gat gud samting i kamaot taem ol disaepol oli karem tul blong faet long naet ya we Judas i putum Jisas long han blong ol enemi blong hem, from we i givim janis long Jisas blong tijim ol disaepol blong hem long wan impoten lesen: “Man we i stap tekem naef blong faet, hem bambae i ded long naef blong faet.”—Mat. 26:52.
[Futnot]
^ par. 3 K.T. i minim Kristin Taem.
[Tok blong pija long pej 31]
Josef i givim nambawan eksampol olsem hed blong famle