Long Olgeta Samting, Lukluk i Go Long God Blong i Lidim Yumi

“God ya . . . bambae i God blong yumi oltaem, mo bambae hem i lidim yumi, gogo i no save finis.”—SAM 48:14.

1, 2. ?From wanem yumi mas lukluk i go long Jeova blong i lidim yumi, i bitim we yumi trastem prapa waes blong yumi? ?Wanem ol kwestin we oli stanap?

I ISI nomo blong ting se wan wok we i no gat frut blong hem i wan gudfala wok. (Prov. 12:11) Sipos yumi ol Kristin yumi wantem mekem samting we i no stret, hat blong yumi bambae i pulum yumi blong tingbaot sam risen from wanem i oraet blong mekem samting ya. (Jer. 17:5, 9) Taswe, man blong raetem Ol Sam i waes taem hem i prea long Jeova se: “Plis yu sanem laet blong yu mo trutok blong yu i kam. Mi wantem blong tufala i lidim mi.” (Sam 43:3) Man ya i no trastem smol waes we hem nomo i gat, be hem i trastem Jeova. I no gat wan waes we i moagud blong lidim hem i winim waes blong Jeova. I gud yumi mekem olsem man ya we i raetem Sam ya, yumi lukluk i go long God blong i lidim yumi.

² ?Be from wanem yumi mas trastem Jeova blong lidim yumi, i bitim we yumi trastem ol narafala waes? ?Wetaem yumi mas lukluk i go long Jeova blong i lidim yumi? ?Wanem ol fasin we yumi mas gat, blong Jeova i save lidim yumi? ?Olsem wanem Jeova i stap lidim yumi tede? Long stadi ya, bambae yumi tokbaot ol impoten kwestin ya.

 ?From Wanem Yumi Save Trastem Jeova Blong Lidim Yumi?

3-5. ?From wanem yumi save trastem Jeova fulwan blong lidim yumi?

³ Jeova i Papa blong yumi we i stap long heven. (1 Kor. 8:6) Hem i savegud yumi wanwan, mo hem i save luk evri samting we i stap long hat mo tingting blong yumi. (1 Saml. 16:7; Prov. 21:2) King Deved i talem long God se: “Yu yu save evri samting we mi stap mekem. Yu stap longwe, be yu save olgeta tingting blong mi. Nating we mi no tok yet, be yu yu save finis ol samting ya we bambae mi talem.” (Sam 139:2, 4) Yes, Jeova i savegud yumi, taswe yumi sua se hem i save wanem we i moagud long yumi. Mo tu, Jeova i gat olgeta waes. Hem i save luk evri samting, wetem ol samting we oli haed tu we ol man oli no save luk. Taem wan plan i jes stat nomo, be hem i save se bambae i finis olsem wanem. (Aes. 46:9-11; Rom 11:33) Hem i God ya “we hem nomo i waes gud.”—Rom 16:27.

⁴ Antap long hemia, Jeova i lavem yumi, mo oltaem hem i wantem mekem samting we i gud long yumi. (Jon 3:16; 1 Jon 4:8) From we God i lavem yumi, hem i givim plante samting long yumi. Disaepol Jemes i raetem se: “Evri samting we oli gud mo evri presen we oli nambawan we yumi kasem, oli kamaot long heven nomo. God i mekem olgeta laet blong skae, mo hem i stap givim ol gudgudfala samting ya long yumi.” (Jem. 1:17) Olgeta we oli letem God i lidim olgeta, oli kasem plante gudfala samting.

⁵ Wan narafala samting, hemia se Jeova i gat olgeta paoa. Long saed ya, man blong raetem Ol Sam i talem se: “Hae God i hae we i hae, mo hem i gat olgeta paoa. Mo man we i stap aninit long han blong hem, mo i stap trastem hem blong i lukaot gud long hem, hem i save talem se, ‘Yu yu God blong mi, mo mi mi trastem yu. Yu yu stap lukaot gud long mi, mo yu stap blokemgud mi.’” (Sam 91:1, 2) Taem yumi lukluk i go long Jeova blong i lidim yumi, yumi stap lukaot help long beswan rod, from we hem i no save mestem blong givhan long yumi. Taem ol narafala oli agensem yumi, long taem ya tu Jeova i save givhan long yumi. Hem i no save livim yumi blong yumi harem nogud. (Sam 71:4, 5; ridim Ol Proveb 3:19-26.) Yes, Jeova i save wanem we i moagud long yumi, hem i wantem samting we i moagud long yumi, mo hem i gat paoa blong givim samting we i moagud long yumi. !Sipos yumi no wantem we hem i lidim yumi, yumi krangke nomo! ?Be wetaem yumi nidim se God i lidim yumi?

?Wetaem Yumi Nidim Se God i Lidim Yumi?

6, 7. ?Wetaem yumi nidim se Jeova i lidim yumi?

⁶ Blong talem stret, yumi nidim we God i lidim yumi oltaem long laef blong yumi, stat taem yumi yangfala go kasem we yumi olfala. Man blong raetem Ol Sam i talem se: “God ya . . . bambae i God blong yumi oltaem, mo bambae hem i lidim yumi, gogo i no save finis.” (Sam 48:14) Ol Kristin we oli waes oli mekem olsem man blong raetem Sam ya, oli lukluk i go long God oltaem blong i lidim olgeta.

⁷ Be i gat sam spesel taem we yumi harem se yumi nidim help kwiktaem. Maet yumi “stap long bigfala trabol,” ating ol man oli kilim yumi, wan strong sik i kasem yumi, no yumi lusum wok blong yumi. (Sam 69:16, 17) Long ol taem olsem, yumi mas lukluk i go long Jeova wetem strong tingting se bambae hem i givim paoa long yumi blong stanap strong, mo bambae  hem i lidim yumi blong mekem ol gudfala desisen. Olsem nao, yumi save haremgud. (Ridim Ol Sam 102:17.) Be i gat plante narafala taem tu we yumi nidim se God i givhan long yumi. Tingbaot wok blong talemaot gud nius blong Kingdom long ol man raonabaot long yumi. Blong karem frut long wok ya, Jeova i mas lidim yumi. Mo sipos yumi wantem tekem wan desisen we i waes—maet long saed blong pleplei, klos, hea, ol fren, wok, edukesen, no wan narafala samting—yumi mas folem advaes we Jeova i givim blong lidim yumi. Tru ya, long evri samting long laef blong yumi, yumi nidim we Jeova i lidim yumi.

Trabol i Kamaot Taem Yumi No Lukluk i Go Long God Blong i Lidim Yumi

8. ?Aksen we Iv i tekem blong kakae frut we God i putum tabu long hem, i soemaot wanem?

⁸ Yumi mas tingbaot se, yumi nomo i mas wantem blong folem tok we Jeova i talem blong lidim yumi. God bambae i no fosem yumi. Faswan we i no wantem folem tok blong Jeova we i blong lidim hem, hemia Iv. Samting we i hapen long hem i soemaot rabis frut we i kamaot taem man i mekem nogud jus ya. Mo tu, tingbaot wanem samting we aksen blong Iv i soemaot long yumi. Hem i kakae frut ya we God i putum tabu long hem from we hem i wantem “kam olsem [God], we i save ol fasin we i nogud mo ol fasin we i gud.” (Jen. 3:5) Aksen ya i soem se hem i wantem putum hem wan long ples blong God. Hem i wantem mekem prapa desisen blong hem long wanem samting we i gud mo wanem samting we i nogud, i no wantem folem ol tok we Jeova i talem blong lidim hem. Long rod ya, hem i agensem hae rul blong Jeova. Hem i wantem bos long hem wan. Man blong hem Adam, hem tu i mekem sem stronghed fasin ya.—Rom 5:12.

9. ?Sipos yumi no wantem obei long ol tok we Jeova i talem blong lidim yumi, yumi stap mekem wanem? ?From wanem fasin ya i no waes nating?

⁹ Sipos yumi no wantem folem tok blong Jeova we i save lidim yumi tede, yumi olsem Iv we i no wantem luksave hae rul blong Jeova. Tingbaot sipos wan long yumi i stat blong lukluk ol doti pija blong seks. Sipos hem i stap joen wetem Kristin kongregesen, hem i save finis ol tok we Jeova i talem long saed ya. Jeova i talem se yumi no mas tokbaot nating ol doti fasin blong seks, moawas lukluk olgeta wetem tingting ya we yumi wantem olgeta. (Efes. 5:3) Sipos wan man i no wantem obei long ol tok ya we Jeova i talem blong lidim yumi, hem i agensem hae rul blong Jeova, hem i no wantem we Jeova i hed blong hem. (1 Kor. 11:3) Fasin ya i no waes nating. Olsem Jeremaea i talem: “I no gat man i save kam bos long laef blong hem.”—Jer. 10:23.

10. ?From wanem yumi mas lukaot blong yusumgud fasin ya we yumi fri blong jusum rod blong yumi?

¹⁰ Maet samfala oli no agri wetem tok ya blong Jeremaea. Maet oli talem se, Jeova nao i putum fasin ya long yumi we yumi fri blong jusum rod blong yumi, taswe hem i no save agensem yumi from. Be yumi no mas fogetem se fasin ya we yumi fri blong jusum rod blong yumi, i no wan presen nomo. Yumi mas rere blong karem frut blong jus blong yumi tu. Evri aksen mo tok blong yumi, yumi talem mo mekem long fes blong God, mo hem i save jajem yumi from. (Rom 14:10) Jisas i talem se: “Taem man i tok, hem i stap talemaot ol samting we tingting [“hat,” NW] blong hem i fulap long hem.” Mo bakegen, Jisas i talem se: “Long tingting [“hat,” NW] blong man nao, ol rabis tingting olsem, oli save kamaot. Ol tingting olsem oli save mekem man i kilim man i ded, mo man i mekem i nogud wetem woman, mo i save mekem ol narafala fasin nogud olsem. Mo i save mekem man i stil, mo i giaman, mo i tok nogud blong spolem nem blong narafala man.” (Mat. 12:34; 15:19) Taswe, ol tok mo aksen blong yumi oli soemaot wanem i stap long hat blong yumi. Oli soemaot se yumi rili wanem kaen man. From samting ya, wan Kristin we i waes bambae i lukluk i go long Jeova blong i lidim hem long evri samting long laef blong hem. Olsem nao, Jeova bambae i faenem se ‘hat blong hem i stret’ mo bambae i “mekem i gud” long hem.—Sam 125:4.

11. ?Yumi lanem wanem from fasin blong ol man Isrel bifo?

¹¹ Tingbaot ol man Isrel bifo. Taem neson ya i jusum stret rod mo i obei long ol tok blong Jeova, Jeova i lukaotgud long olgeta. (Jos. 24:15, 21, 31) Be plante taem oli no yusumgud fasin ya we oli fri blong jus. Long taem blong Jeremaea, Jeova i talem long saed  blong olgeta se: “Oli no lesin long ol tok we mi mi talem long olgeta, mo oli no obei long mi nating. Oli girap, oli gohed, oli folem stronghed blong olgeta, mo fasin blong olgeta i go nogud moa, i no kam gud nating.” (Jer. 7:24-26) !Sore tumas! !Oli mekem stronghed mo oli ronem ol samting we olgeta nomo oli wantem! !Oli no lesin long ol tok we Jeova i talem blong lidim olgeta, be oli folem ol prapa waes blong olgeta nomo! From samting ya, “fasin blong olgeta i go nogud moa, i no kam gud nating.” !Yumi neva mas folem fasin olsem!

?Blong Folem Advaes Blong God, Yumi Mas Gat Wanem Fasin?

12, 13. (a) ?Wanem fasin i mekem se yumi wantem we Jeova i lidim yumi? (b) ?From wanem yumi nidim bilif?

¹² Sipos yumi lavem Jeova, samting ya bambae i mekem we yumi wantem folem ol advaes we hem i givim blong lidim yumi. (1 Jon 5:3) Be Pol i talem wan narafala fasin we yumi nidim tu, i se: “Yumi stap wokbaot folem bilif, i no folem ol samting we yumi stap luk.” (2 Kor. 5:6, 7, NW) ?From wanem bilif i impoten? From we, “ol stret rod” we Jeova i lidim yumi long olgeta, bambae oli no lidim yumi blong kam rijman no blong kasem haenem long wol ya. (Sam 23:3) From samting ya, bilif i mas pulum yumi blong putum tingting blong yumi fastaem long ol nambawan blesing we Jeova i stap givim long wok blong hem. (Ridim 2 Korin 4:17, 18.) Mo tu, bilif bambae i givhan long yumi blong haremgud long smol samting we yumi gat long saed blong mane mo olting.—1 Tim. 6:8.

¹³ Jisas i talem se blong mekem trufala wosip, yumi mas blokem ol samting we yumi nomo i wantem. Taswe, yumi nidim bilif bakegen. (Luk 9:23, 24) Sam man blong God oli bin stanap strong tru long plante bigfala trabol. Oli bin sot long plante samting long saed blong bodi, ol narafala oli bin mekem i strong tumas long olgeta, agensem olgeta, mo kilim olgeta. (2 Kor. 11:23-27; Rev. 3:8-10) Strong bilif nao i mekem se oli naf blong stanap strong wetem glad. (Jem. 1:2, 3) Strong bilif i mekem yumi suagud se beswan rod blong folem oltaem, i blong lesin long ol tok we Jeova i talem blong lidim yumi. Oltaem hem i lidim yumi long rod we bambae i mekem i gud long yumi blong olwe. Yumi suagud se enikaen trabol we yumi kasem i blong smoltaem nomo, be sipos yumi stanap strong mo stap tru long God bambae yumi kasem blesing we i bigwan olgeta.—Hib. 11:6.

14. ?From wanem Hega i mas gat tingting daon?

¹⁴ Tingbaot tu olsem wanem tingting daon i save halpem yumi blong letem Jeova i lidim yumi. Haosgel blong Sera, we nem blong hem Hega, hem i soemaot poen ya. Taem Sera i no save karem pikinini, hem i talem long Hega blong slip wetem Ebraham. Hega i gat bel, nao biaen, hem i kam flas mo i daonem misis blong hem we i no save karem pikinini. Ale, Sera i “mekem i strong tumas long Hega” gogo Hega i girap, i ronwe. Be wan enjel blong Jeova i kamtru long Hega mo i talem long hem se: “Yu mas gobak long hem. Yu mas kam slef blong hem [“putum yu yu stap daon aninit long han blong hem,” NW] bakegen.” (Jen. 16:2, 6, 8, 9) Ating Hega i no glad tumas long advaes ya. Blong folem tok blong enjel ya, hem i mas sakemaot flas tingting. Ale, hem i mekem tingting blong hem i stap daon mo i folem advaes we enjel i givim. Nao hem i stap sef nomo taem i bonem pikinini blong hem, Ismael, insaed long haos blong papa blong smol boe ya.

15. ?Wetaem long laef blong yumi we yumi mas mekem tingting blong yumi i stap daon blong letem Jeova i lidim yumi?

¹⁵ Tede tu, blong folem advaes we Jeova i givim blong lidim yumi, yumi mas mekem tingting blong yumi i stap daon. Maet sam long yumi oli mas mekem tingting blong olgeta i stap daon blong lesin long advaes ya se Jeova i no glad long sam kaen pleplei we oli laekem. Maet wan Kristin i bin mekem narafala i harem nogud, ale hem i mas mekem tingting blong hem i stap daon blong talem sore. Maet wan Kristin i mekem mastik ale hem i mas mekem tingting blong  hem i stap daon blong talemaot mastik ya. ?Olsem wanem sipos wan Kristin i mekem bigfala sin? Hem i mas mekem tingting blong hem i stap daon blong talemaot sin ya long ol elda. Maet kongregesen i mas putumaot hem. Blong kambak insaed long kongregesen, hem i mas mekem tingting blong hem i stap daon, i mas tanem tingting blong hem from sin ya mo jenisim fasin blong hem. Long ol taem olsem, tok blong Ol Proveb 29:23 i leftemap tingting blong yumi, se: “Sipos yu stap flas, yu stap leftemap yu, mo yu stap tingting nogud long ol narafala man, bambae yu foldaon. Be sipos yu mekem tingting blong yu i stap daon, ol narafala man bambae oli tinghae long yu.”

?Olsem Wanem Jeova i Lidim Yumi?

16, 17. ?Olsem wanem yumi save kasem olgeta gudfala advaes blong Baebol we Jeova i yusum blong lidim yumi?

¹⁶ Bigfala samting we Jeova i yusum blong lidim yumi, hemia Tok blong hem, Baebol. (Ridim 2 Timoti 3:16, 17.) Blong kasem ol gudfala save long Tok blong God, i no waes blong wet gogo wan trabol i kamaot nao yumi jes lukaot advaes blong Baebol. I moagud we yumi ridim Baebol evri dei. (Sam 1:1-3) Olsem nao, bambae yumi savegud ol tok we i stap long Baebol. Tingting blong yumi bambae i kam olsem tingting blong God, nao yumi rere blong fesem enikaen problem we i save kamaot.

¹⁷ Mo tu, i impoten blong tingting dip long ol tok we yumi ridim long Baebol, mo prea long saed ya. Taem yumi tingting dip long ol vas blong Baebol, yumi mas tingbaot olsem wanem yumi save folem ol tok ya long laef blong yumi. (1 Tim. 4:15) Taem yumi fesem wan bigfala trabol, yumi mas prea long Jeova mo askem long hem blong i givhan long yumi blong faenem advaes we i save lidim yumi. Spirit blong Jeova bambae i mekem yumi tingbaot sam tok we yumi bin ridim long Baebol no long sam buk we oli eksplenem Baebol.—Ridim Ol Sam 25:4, 5.

18. ?Olsem wanem Jeova i yusum kampani blong ol Kristin blong lidim yumi?

¹⁸ Wan narafala bigfala samting we i givhan long yumi blong lukaot advaes blong Jeova blong lidim yumi, hemia kampani blong ol Kristin brata sista. Wan impoten haf blong kampani ya, hemia ‘slef we i stret mo waes’ wetem Hed Kampani blong hem. Oltaem “slef ya” i givim gudfala save we i olsem kakae blong yumi, long ol buk we i printim mo long ol miting mo asembli. (Mat. 24:45-47, NW; skelem wetem Ol Wok 15:6, 22-31.) Mo tu, long kampani blong ol trufala Kristin, i gat olgeta we oli bigman long ol Kristin fasin, antap moa ol elda. Olgeta ya oli naf blong givhan long ol wanwan Kristin we oli nidim help, mo givim advaes we i kamaot long Baebol. (Aes. 32:1) Ol yangfala long ol Kristin famle oli gat wan narafala samting we i gud tumas. God i givim Kristin papa mama long olgeta, we ol yangfala ya oli save lukluk i go long olgeta blong kasem advaes blong lidim olgeta.—Efes. 6:1-3.

19. ?Wanem ol blesing we yumi stap kasem from we yumi lukluk i go oltaem long Jeova blong i lidim yumi?

¹⁹ Yes, Jeova i rere blong lidim yumi long evri samting, mo i gud yumi letem hem i lidim yumi. King Deved i tokbaot taem ya we Isrel i stap tru long God, i se: “Ol bubu blong mifala bifo oli putum tingting blong olgeta i stap long yu, oli trastem yu, nao yu yu tekemaot olgeta long trabol. Oli krae i kam long yu, nao yu yu sevem olgeta, oli trastem yu, nao tingting blong olgeta i no foldaon.” (Sam 22:3-5) Yumi tu, sipos yumi trastem Jeova blong i lidim yumi, bambae yumi “no foldaon.” Bambae tingting blong yumi i no save foldaon long saed blong ol promes we God i mekem blong fiuja. Naoia tu yumi save kasem plante bigfala blesing, sipos yumi askem long Jeova blong ‘lukluk gud long ol rod blong yumi,’ i bitim we yumi trastem prapa waes blong yumi. (Sam 37:5, NW) Mo sipos yumi gohed nomo long rod ya mo yumi stap tru long Jeova, bambae ol blesing ya oli stap kasem yumi gogo i no save finis. King Deved i raetem se: “Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem. Hem bambae i stap lukaot gud long olgeta gogo i no save finis . . . Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Sam 37:28, 29.

?Yu Yu Save Eksplenem?

• ?From wanem yumi trastem Jeova blong lidim yumi?

• ?Sipos yumi no wantem we Jeova i lidim yumi, i olsem we yumi stap talem wanem?

• Talem sam taem long laef blong wan Kristin we hem i nidim tingting daon.

• ?Jeova i yusum wanem blong lidim yumi tede?

[Kwestin]

[Tok blong pija long pej 12]

?Yu yu lukluk i go long Jeova blong i lidim yu long evri samting long laef blong yu?

[Tok blong pija long pej 13]

Iv i agensem hae rul blong Jeova

[Tok blong pija long pej 14]

?Hega i mas gat wanem fasin, blong folem tok we enjel i talem?