Mared Mo Gat Pikinini Long Taem Ya Blong En
Mared Mo Gat Pikinini Long Taem Ya Blong En
“Taem we i stap yet i sot nomo.”—1 KOR. 7:29, NW.
1. (a) ?Long taem blong yumi, wanem jenis i haf blong ol trabol we oli “had blong winim”? (b) ?From wanem yumi mas tingbaot ol jenis we oli kamaot insaed long famle laef?
BAEBOL i talem se long “taem blong en” bambae i gat faet, graon i seksek, hadtaem blong kasem kakae mo ol strong sik. (Dan. 8:17, 19, NW; Luk 21:10, 11) Baebol i givim woning tu se hadtaem ya i wan taem long histri blong man we fasin blong laef blong ol man bambae i jenis bigwan. Ol raorao insaed long famle i wan haf blong ol jenis we bambae i hapen long “ol las dei“ ya we laef i strong tumas mo we i “had blong winim ol trabol.” (1 Tim. 3:1-4, NW) ?From wanem yumi mas tingbaot ol jenis ya? Hemia from we ol jenis ya oli kamaot long laef blong plante man mo oli kam antap bigwan mekem se oli save gat paoa long tingting we wan Kristin i gat long saed blong mared mo pikinini. ?Olsem wanem ol jenis ya oli save gat paoa long ol Kristin?
2. ?Plante man long wol oli tingbaot mared mo divos olsem wanem?
2 Tede, plante man oli tingbaot divos olsem wan isi rod blong stretem ol problem long mared, mo long plante kantri namba blong divos i kam antap bigwan. Be oltaem yumi mas tingbaot se tingting blong Jeova God long saed blong mared mo divos i defren olgeta long tingting blong ol man blong wol. ?Wanem nao tingting blong Jeova?
3. ?Wanem tingting blong Jeova mo Jisas long saed blong mared?
3 Jeova i wantem se ol man mo woman we oli mared oli mas stap tru long promes blong mared blong olgeta. Taem Jeova i joenem faswan man mo woman long mared, Jeova i talem se, “man . . . i mas go joen wetem woman blong hem, nao tufala bambae i kam olsem wan bodi nomo.” Samtaem biaen, Jisas Kraes i talem bakegen ol tok ya mo tu hem i talem se: “From we God i joenem tufala olsem, man i no mas brekem mared blong tufala.” Jisas i gohed i se: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.” (Jen. 2:24; Mat. 19:3-6, 9) Yes, long tingting blong Jeova mo Jisas, man mo woman we i mared i mas stap tugeta long ful laef blong tufala gogo kasem we wan long tufala i ded. (1 Kor. 7:39) From we mared i wan samting we i tabu, yumi no mas ting nating long divos. Baebol i talem se Jeova i no laekem nating fasin we man i mekem divos from wan risen we i no stanap long Baebol. *—Ridim Malakae 2:13-16; 3:6.
Tinghevi Long Mared Blong Yu
4. ?From wanem sam yangfala Kristin we oli hareap blong mared oli sore biaen?
4 Long rabis wol ya we yumi laef long hem, ol man oli krangke long saed blong seks. Evri dei, yumi fesem ol rabis pija we oli plante tumas olsem ol bigfala wef. Yumi no save talem se ol pija ya oli no save gat paoa long yumi, mo speseli long ol gudfala yangfala blong yumi insaed long kongregesen. Nating se ol yangfala Kristin oli traehad blong blokem ol tingting mo filing we oli no stret, ol rabis pija ya oli save mekem ol filing blong seks oli kam strong long olgeta. ?Oli save mekem wanem long taem olsem? Blong traem winim ol filing ya, samfala oli mared we oli yang nomo. Long rod ya, oli ting se bambae i blokem olgeta blong no foldaon long nogud fasin long saed blong seks. Be smoltaem afta we oli mared, samfala oli sore from desisen we oli mekem. ?From wanem oli sore? Taem glad blong niufala mared ya i godaon, tufala ya we i mared i luksave se tufala i no gat sem tingting long ol samting we oli hapen long laef evri dei. I klia se mared man mo woman olsem i kasem bigfala problem.
5. ?Wanem i save halpem ol mared man mo woman blong oli stap tru long promes blong mared blong olgeta? (Lukluk futnot.)
5 Nomata se yu mared long wan Kristin brata no sista, bambae i had tumas taem yu faenemaot se fasin blong hem i defren olgeta long wanem we yu yu bin tingbaot fastaem. (1 Kor. 7:28) Be nating se mared laef i had olsem wanem, ol trufala Kristin oli save se fasin blong mekem divos we i no stanap long Baebol i no stret rod blong winim ol problem insaed long wan mared we i no joengud. From risen ya, i gud we Kristin kongregesen i respektem olgeta we oli wokhad blong mekem mared blong olgeta i strong from we oli wantem stap tru long promes blong mared. Mo i gud tu we kongregesen i soemaot lav taem i halpem olgeta. *
6. ?Ol yangfala Kristin oli mas gat wanem tingting long saed blong mared?
6 ?Yu yu wan yangfala we yu no mared yet? Sipos yes, ?wanem tingting yu yu mas gat long saed blong mared? Sipos yu wet kasem taem ya we yu rere long saed blong bodi, tingting mo spirit, nao yu jes stat blong fren blong mared long wan Kristin brata no sista, bambae yu blokem plante problem we oli save mekem yu yu harem nogud tumas. I tru se, Baebol i no talem wan stret yia blong man i save mared. * Be Baebol i soemaot se i gud we yu wet kasem we yu gotru long taem ya we filing blong seks i strong tumas. (1 Kor. 7:36, NW) ?From wanem? From we strong filing blong seks i save lidim yu blong mekem wan desisen we i no waes nao biaen, yu save harem nogud tumas from. Tingbaot se ol waes advaes blong Jeova we Baebol i givim long saed blong mared, oli stap blong givhan long yu mo blong mekem yu harem gud.—Ridim Aesea 48:17, 18.
Tinghevi Long Wok Blong Yu Olsem Papa Mama
7. ?Wanem samting we sam yangfala hasban mo waef oli fesem, mo from wanem samting ya i save mekem tufala i harem nogud long mared blong tufala?
7 Samfala mared man mo woman oli yangfala nomo taem oli gat pikinini. Papa mo mama we oli yangfala olsem, tufala i no gat janis blong savegud tufala yet bifo we tufala i gat pikinini. Antap moa, i nidim 24 aoa evri dei blong lukaot long wan pikinini. Taem wan niu bebi i bon, i stret nomo we mama i tingbaot bebi ya fastaem, be maet yangfala hasban i save jalus. Mo tu, taem papa mo mama ya oli no save slip gud long naet from we oli mas lukaot long bebi, samting ya i save mekem se oli wari nao oli save harem nogud long mared blong tufala. Kwiktaem nomo, yangfala papa mo mama oli luksave se oli no moa fri blong mekem samting olsem we oli wantem. Naoia taem tufala i wantem go samples no mekem sam samting, i no moa isi long tufala olsem bifo we tufala i no gat pikinini yet. ?Wanem tingting we tufala i mas gat taem laef blong tufala i jenis olsem?
8. ?Wanem tingting yumi mas gat long wok blong papa mama, mo from wanem?
8 Olsem we yumi mas tinghevi long mared, yumi mas tinghevi long wok blong papa mama tu from we hem i wan wok mo blesing we i kam long God. Nomata wanem jenis i hapen long laef blong Kristin papa mo mama taem tufala i gat wan bebi, tufala i mas traem bes blong mekem laef blong tufala i laenap wetem ol jenis ya be long rod we i stret. Jeova i mekem we man mo woman i naf blong wokem pikinini. From samting ya, ol papa mo mama oli mas tingbaot ol bebi we oli jes bon olsem wan “presen we [Jeova] i givim.” (Sam 127:3) Kristin papa mo mama i mas traehad blong mekem wok blong tufala olsem ol papa mama we oli “joen long Masta.”—Efes. 6:1.
9. (a) ?I minim wanem blong lukaot long wan pikinini? (b) ?Hasban i save mekem wanem blong halpem waef blong hem blong i stap strong long saed blong spirit?
9 Blong lukaot long wan pikinini, papa mo mama i mas lego samting we tufala nomo i wantem, mo i nidim plante yia blong mekem olsem. I nidim plante taem mo paoa. Wan Kristin hasban i mas kasem save se afta we tufala i gat bebi, bambae i had long waef blong hem blong lesin gud long taem blong ol miting mo maet waef i no gat tumas taem blong mekem stadi hem wan mo tingting dip. Samting ya i save gohed olsem blong sam yia afta we bebi i bon mo i save mekem fasin fren we waef i gat wetem Jeova i no moa strong. Blong tinghevi long wok blong papa mama, wan hasban i mas mekem wanem we hem i naf blong mekem blong halpem waef blong hem blong lukaot long pikinini. Taem oli stap long haos, hasban i save traehad blong tokbaot bakegen ol poen we maet waef i mestem long ol miting. Mo tu, hem i save givhan blong lukaot long pikinini blong mekem se waef blong hem i save joen fulwan long wok blong prij.—Ridim Filipae 2:3, 4.
10, 11. (a) ?Olsem wanem blong ‘trenem pikinini blong hem i save gat ‘tingting olsem we Jeova i wantem’? (b) ?From wanem i gud we yumi talem ol gudfala toktok long ol Kristin papa mama?
10 Tinghevi long wok blong papa mama i no minim nomo se pikinini i gat kakae, klos, ples blong slip mo gudfala helt. Taem blong en i denja tumas, taswe ol yangfala oli nidim blong lanem blong laef folem ol stretfala rul. Oli mas lanem ol samting ya taem oli smol yet. Taem ol pikinini oli stap gruap, papa mama i mas ‘stretem olgeta, mo trenem tingting blong olgeta olsem we Jeova i wantem.’ (Efes. 6:4) “Trenem tingting” i minim putum ol tingting blong Jeova i go long hat blong pikinini taem hem i wan bebi nomo go kasem we hem i gotru long ol hadtaem blong yangfala.—2 Tim. 3:14, 15.
11 Taem Jisas i talem long ol man blong hem se oli mas ‘go long ol man long olgeta ples long wol, blong pulum olgeta oli kam man blong hem,’ i sua se hem i minim tu we ol papa mo mama oli mas halpem ol pikinini blong olgeta blong oli kam ol man blong Kraes. (Mat. 28:19, 20) Hemia i no wan isi samting from we ol samting blong wol ya oli gat paoa long ol yangfala. Taswe, i gud we evriwan insaed long kongregesen i talem ol gudfala toktok long ol papa mo mama we oli bin tijimgud ol pikinini blong olgeta nao ol pikinini ya oli kam ol Kristin man mo woman we oli givim laef blong olgeta i go long Jeova. Ol papa mo mama ya oli “winim” paoa blong wol from bilif blong olgeta mo fasin blong olgeta blong holemstrong long wok blong olgeta olsem papa mo mama.—1 Jon 5:4.
No Mared Mo No Gat Pikinini From Wan Impoten Risen
12. ?From wanem sam Kristin oli jusum blong no mared fastaem?
12 ‘Taem we i stap yet i sot nomo’ mo “fasin blong wol ya i stap jenis,” taswe Baebol i pulum yumi blong tingbaot ol gudfala samting we oli kamaot taem man i no mared. (1 Kor. 7:29-31, NW) From samting ya, sam Kristin oli jusum blong no mared ful laef blong olgeta mo samfala oli jusum blong no mared fastaem blong sam yia. I gud tumas we oli no yusum fri taem ya blong olgeta blong ronem ol samting we olgeta nomo oli wantem. Plante oli no mared from we oli wantem mekem wok blong Jeova we i “no gat narafala tingting i pulum” olgeta. (Ridim 1 Korin 7:32-35.) Samfala Kristin we oli no mared, oli mekem wok olsem ol paenia no oli wok long ol haos Betel. Plante oli wantem we ogenaesesen blong Jeova i yusum olgeta moa, ale, oli kasem ol mak blong oli joen long Ministeriol Trening Skul. Tru ya, olgeta we oli mekem wok blong Jeova fultaem ale biaen oli jes mared, oli harem se mared blong olgeta i kasem blesing from ol gudfala samting we oli bin lanem long ol yia ya we oli mekem wok blong Jeova fultaem.
13. ?From wanem sam Kristin hasban mo waef oli plan blong no gat pikinini?
13 Long sam haf blong wol, i gat wan narafala jenis i hapen long laef blong ol mared man mo woman, hemia se plante mared man mo woman oli jus blong no gat pikinini. Samfala oli tekem desisen olsem from we oli trabol long saed blong mane no maet from we oli no wantem wan samting i blokem olgeta blong kasem wan wok we i givim bigfala mane. I gat sam Kristin tu we oli plan blong no gat pikinini. Be oli plan olsem blong oli save fri moa blong mekem wok blong Jeova. Hemia i no min se hasban mo waef ya, tufala i no haremgud long laef insaed long mared. Tufala i haremgud. Be tufala i wantem putum ol wok blong Kingdom fasples, bifo long ol blesing blong mared. (1 Kor. 7:3-5) Sam long ol mared man mo woman ya oli mekem wok blong Jeova mo givhan long ol brata sista taem oli mekem seket mo distrik wok, no oli wok long Betel. Sam narafala oli wok olsem ol paenia mo misinari. Jeova bambae i no save fogetem wok blong olgeta mo lav we oli soem long nem blong hem.—Hib. 6:10.
“Trabol Long Laef”
14, 15. ?Ol Kristin papa mama oli save fesem wanem “trabol long laef blong olgeta”?
14 Aposol Pol i talem long ol Kristin we oli mared se bambae oli gat “trabol long laef blong olgeta.” (1 Kor. 7:28) Maet hemia i minim ol problem long saed blong helt blong tufala we i mared, ol pikinini mo ol olfala papa mo mama blong tufala. Maet i minim tu ol hadtaem we oli kasem mo ol nogud samting we i hapen taem tufala i stap tijim ol pikinini blong tufala. Olsem stat blong stadi ya i talem, Baebol i bin talem se long “ol las dei” bambae “laef i strong tumas mo i had blong winim ol trabol.” Wan long ol trabol ya we i had blong winim, hemia se ol pikinini bambae oli “no obei long papa mama blong olgeta.”—2 Tim. 3:1-3, NW.
15 I no isi nating blong ol Kristin papa mama oli tijim pikinini blong olgeta. Yumi no save blokem ol trabol we oli kamaot tede from we “laef i strong tumas.” From samting ya, ol Kristin papa mama oli mas faet strong blong agensem ol nogud “fasin blong wol ya” we oli save gat paoa long laef blong ol pikinini blong olgeta. (Efes. 2:2, 3) !I no oltaem we oli winim faet ya! Yes, taem wan boe no wan gel long wan Kristin famle i lego Jeova, hemia i rili wan “trabol” long papa mo mama we oli bin traehad blong mekem se pikinini ya i gruap long trutok.—Prov. 17:25.
“Bambae i Gat Bigfala Trabol Tumas”
16. ?Wanem “trabol” we Jisas i bin talemaot?
16 I gat wan nara trabol we i bigwan moa i bitim eni “trabol” we i kamaot insaed long mared laef mo long wok ya blong lukaot long pikinini. Long profet tok blong hem long saed blong taem we hem i stap mo lashaf blong fasin blong laef blong wol, Jisas i talem se: “Bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Mat. 24:3, 21) Biaen Jisas i talemaot se wan bigfala kampani blong man bambae i laef i pastru long “bigfala trabol” ya. Be gogo kasem taem ya, wol ya blong Setan bambae i traehad fulwan long ol laswan janis ya blong hem blong faet agensem ol gudfala man blong Jeova. Tru ya, bambae i wan hadtaem blong yumi evriwan—ol bigman mo ol pikinini tu.
17. (a) ?From wanem yumi no mas fraet long fiuja? (b) ?Wanem save i mas gat paoa long desisen we yumi tekem long saed blong mared mo pikinini?
17 Nating se i olsem, yumi no mas fraet tumas long fiuja. Ol papa mama we oli stap tru long Jeova oli save sua se Jeova bambae i protektem olgeta wetem ol pikinini blong olgeta. (Ridim Aesea 26:20, 21; Sef. 2:2, 3; 1 Kor. 7:14) Naoia we yumi savegud se laef blong ol lasdei ya bambae i strong tumas, i gud we yumi letem save ya i gat paoa long desisen we yumi tekem long saed blong mared mo gat pikinini, long taem ya blong en. (2 Pita 3:10-13) Long rod ya, laef blong yumi—nomata yumi mared no nogat, nomata yumi gat pikinini no nogat—bambae i presem mo givim ona i go long Jeova mo long Kristin Kongregesen.
[Ol futnot]
^ par. 3 Lukluk buk ya Live With Jehovah’s Day in Mind aninit long smol stamba tok ya “He Has Hated a Divorcing,” long pej 125.
^ par. 5 Olgeta we oli stap traem winim ol problem long saed blong mared bambae oli haremgud taem oli ridim ol haf ya long saed blong mared we i stap long Wajtaoa blong Septemba 15, 2003, mo Wekap! blong Jenuware 8, 2001 (Franis mo Inglis).
^ par. 6 Lukluk buk ya, Ol Kwestin We Ol Yangfala Oli Askem —Ol Ansa We Oli Wok Gud, long japta 30 we i talem se “?Mi Mi Rere Blong Mared?”
Rod Blong Tingtingbak
• ?From wanem ol yangfala Kristin oli no mas hareap blong mared?
• ?I minim wanem blong lukaot long wan pikinini?
• ?From wanem sam Kristin oli no mared mo sipos oli mared, from wanem oli plan blong no gat pikinini?
• ?Wanem “trabol” we maet ol Kristin papa mo mama oli kasem?
[Kwestin]
[Tok blong pija long pej 21]
?From wanem i waes we ol yangfala Kristin oli no hareap blong mared?
[Tok blong pija long pej 23]
?From wanem sam Kristin hasban mo waef oli plan blong no gat pikinini?