Tok Blong Jeova i Wan Samting We i Laef

Ol Bigfala Poen Long Buk Blong Jon

JON—disaepol ya we “Jisas i lavem hem tumas”—i laswan man blong raetem ol stori long saed blong laef blong Kraes mo minista wok blong hem. (Jon 21:20) Jon i raetem Gospel blong hem samwe long yia 98 K.T. * Gospel blong Jon i tokbaot ol samting we ol trifala narafala Gospel i no bin tokbaot.

Aposol Jon i gat wan stret risen taem hem i raetem Gospel blong hem. Long saed blong ol samting we hem i tokbaot long buk blong hem, hem i talem se: “Mi mi raetem ol tok ya blong yufala i save bilif we Jisas ya, hem i Mesaea, hem i Pikinini blong God. Mi mi raetem olsem blong yufala i save kasem laef long nem blong hem, from we yufala i bilif long hem.” (Jon 20:31) Ol tok long buk ya oli impoten tumas long yumi.—Hib. 4:12.

“!OLGETA! MAN YA, HEM I SMOL SIPSIP BLONG GOD”

(JON 1:1–11:54)

Taem Jon Baptaes i luk Jisas, hem i talem se: “!Olgeta! Man ya, hem i smol sipsip blong God, we hem bambae i tekemaot sin blong olgeta man long wol.” (Jon 1:29) Taem Jisas i go long Sameria, Galili, Judia mo long is saed blong Jodan reva, hem i stap prij, i tijim man mo i mekem ol merikel, ale ‘plante man oli stap kam long hem mo oli bilif long hem.’—Jon 10:41, 42.

Wan long ol bigfala merikel we Jisas i mekem hemia taem hem i mekem Lasaros i laef bakegen long ded. Plante man oli bilif long Jisas taem oli luk man ya we i bin ded fo dei finis i laef bakegen. Be ol jif pris mo ol Farisi oli agri se oli mas kilim Jisas i ded. Ale, Jisas i aot mo i go “long wan taon we nem blong hem Efrem. Taon ya i klosap long draeples.”—Jon 11:53, 54.

Ansa Blong Sam Kwestin Long Saed Blong Baebol:

1:35, 40—Andru i wan long tufala disaepol ya we i stanap wetem Jon Baptaes. ?Be hu ya narafala disaepol ya? Man we i talem stori ya, oltaem hem i talem “Jon” blong tokbaot Jon Baptaes mo neva hem i talem nem blong hem wan long Gospel blong hem. From samting ya, disaepol ya we yumi no save nem blong hem i mas Jon nomo we i raetem Gospel ya.

2:20—?Wanem tempol ya we ol man oli stap wokem blong “foti sikis yia finis”? Ol man Jiu oli stap minim tempol blong Serubabel we King Herod blong Judia i stap bildim bakegen. Josephus, man blong raetem histri, i talem se, wok ya blong bildim bakegen tempol ya i stat long namba 18 yia we Herod i stap rul. Hemia long yia 18 mo 17 B.K.T. I tekem 8 yia blong oli bildim ol tabu ples long tempol mo ol nara stamba haf blong hem. Be wok blong bildim haos tempol i gohed yet afta long lafet blong Pasova blong yia 30 K.T. From samting ya nao, ol man Jiu oli talem se i tekem foti sikis yia blong bildim tempol ya.

5:14—?Olsem wanem? ?Man i sik from we hem i mekem sin? No, samtaem i no olsem. Man ya we Jisas i hilim i bin sik blong 38 yia finis from we hem i bon wetem sin. (Jon 5:1-9) Taem Jisas i talem tok ya, hem i minim se naoia we hem i sore long man ya, i mekem hem i kamgud, man ya nao i mas folem rod blong kasem laef mo hem i no mas tanraon blong mekem samting we hem i save se i wan sin. From we sipos hem i mekem olsem bambae hem i save kasem trabol we i moa nogud i bitim sik we hem i bin gat fastaem. Man ya i save mekem sin we God i no save fogivim, ale hem i mas ded we i no moa save laef bakegen.—Mat. 12:31, 32; Luk 12:10; Hib. 10:26, 27.

5:24, 25—?Hu ya olgeta we oli ‘aot finis long ded mo oli kam long laef’? Jisas i stap tokbaot olgeta we oli bin ded long saed blong spirit be taem oli harem ol tok blong hem, oli bilif long hem mo oli no moa gohed blong folem nogud rod blong olgeta. Oli ‘aot finis long ded mo oli kam long laef,’ i min se oli fri long jajmen blong ded, mo oli gat hop blong kasem laef we i no save finis from we oli bilif long God.—1 Pita 4:3-6.

5:26, NW; 6:53—?Wanem mining blong tok ya se man i gat ‘laef long hem’? Long saed blong Jisas,  tok ya i min se God i mekem we Jisas i naf blong mekem tu spesel wok. Hemia se Jisas i naf blong givhan long ol man blong oli gat gudnem long fes blong Jeova mo hem i gat paoa blong mekem man we i ded i laef bakegen. Long saed blong ol man blong Jisas, tok ya ‘gat laef long olgeta’ i minim se oli kasem laef ya we i no save finis. Ol tabu Kristin oli kasem laef ya taem oli laef bakegen long heven. Olgeta we oli stap tru long God mo we oli gat hop blong laef long wol ya, bambae oli kasem laef ya afta we oli go tru long laswan traem we bambae i kamaot jes afta long en blong Taosen Yia Rul blong Kraes.—1 Kor. 15:52, 53; Rev. 20:5, 7-10.

6:64—?Taem Jisas i stap jusum Judas Iskariot, hem i save finis se Judas bambae i letem hem i go long han blong ol enemi blong hem? I luk olsem se nogat. Wan taem long yia 32 K.T., Jisas i talem long ol aposol blong hem se: “Wan long yufala hem i devel.” I sua se long taem ya nao, Jisas i makem se Judas i “stat” (NW) blong folem rong rod.—Jon 6:66-71.

Ol Lesen Blong Yumi:

2:4. Jisas i soemaot long Meri se from we hem i baptaes mo tabu spirit i makemaot hem olsem Pikinini blong God, hem i mas mekem samting we Papa blong hem long heven i talem long hem blong mekem. Nating se Jisas i jes statem minista wok blong hem, hem i save stret taem blong mekem wok blong hem, mo tu, hem i save stret taem we bambae hem i mas givim laef blong hem olsem wan sakrefaes. I no gat wan memba long prapa famle blong hem, olsem Meri, we i save blokem hem blong mekem samting we Papa blong hem long heven i wantem hem blong mekem. Yumi mas mekem wok blong Jeova wetem sem tingting olsem Jisas.

3:1-9. Eksampol blong Nikodimas, wan rula blong ol man Jiu, i tijim tu lesen long yumi. Faswan, hemia se taem Nikodimas i luksave se pikinini blong wan kapenta i wan tija we God i sanem, hem i soemaot we hem i gat tingting daon, i waes mo i luksave nid blong hem blong frengud wetem God. Ol trufala Kristin tede tu oli nidim tingting daon. Namba tu, hemia se Nikodimas i no wantem kam wan disaepol taem Jisas i stap long wol. Hemia from we hem i fraet long man, hem i wantem fasgud long posisen blong hem long hae kot blong Sanhedrin mo hem i laekem tumas ol sas samting blong hem. From samting ya, yumi save lanem wan impoten lesen we i givim woning long yumi, hemia se: Yumi no mas letem ol tingting olsem oli blokem yumi blong no ‘karem pos blong yumi, blong biaen long Jisas.’—Luk 9:23, NW.

4:23, 24. Blong God i save agri long wosip blong yumi, wosip ya i mas laenap wetem trutok blong Hem we i stap long Baebol mo tabu spirit i mas lidim yumi long wosip ya.

6:27. Blong wokhad blong “kasem kakae ya we i save stap longtaem, we i blong laef ya we i no save finis,” yumi mas traehad blong kasem ol samting we yumi nidim long saed blong spirit. Bambae yumi glad tumas taem yumi mekem olsem.—Mat. 5:3.

6:44. Jeova i kea long yumi wanwan. Hem i pulum yumi i kam klosap long Pikinini blong hem, taem hem i faenem yumi wanwan long wok blong prij mo i halpem yumi wetem tabu spirit blong Hem blong yumi kasem mining blong ol trutok blong Baebol mo blong yumi mekem ol trutok ya oli wok long laef blong yumi.

11:33-36. Sipos yumi soemaot filing blong yumi i no min se yumi slak.

 ‘GOHED BLONG FOLEM HEM’

(Jon 11:55–21:25)

Taem lafet blong Pasova blong yia 33 K.T. i kam klosap, Jisas i gobak long Betani. Long Nisan 9, hem i sidaon long wan smol dongki i kam long Jerusalem. Long Nisan 10, Jisas i kam long haos tempol bakegen. Jisas i prea blong leftemap nem blong Papa blong hem, nao blong ansa long prea blong hem, wan voes i kamaot long heven i talem se: “Mi mi leftemap nem blong mi finis, mo bambae mi leftemap bakegen.”—Jon 12:28.

Taem oli stap kakae long lafet blong Pasova, Jisas i givim sam impoten advaes long ol man blong hem mo i prea from olgeta. Biaen, ol man nogud oli holem hem, hem i pas long kot, mo oli nilim hem long pos. Afta, hem i laef bakegen long ded.

Ansa Blong Sam Kwestin Long Saed Blong Baebol:

14:2—?Olsem wanem Jisas bambae i ‘mekemrere wan ples’ long heven blong ol trufala man blong hem? Jisas i mekem samting ya taem hem i givim praes blong blad blong hem i go long God blong stanemap niufala kontrak. Mo tu, blong mekem rere ples blong olgeta, Jisas i mas kasem paoa olsem king mo biaen ol man blong hem oli stat laef bakegen blong go long heven.—1 Tes. 4:14-17; Hib. 9:12, 24-28; 1 Pita 1:19; Rev. 11:15.

19:11—?Olsem wanem? ?Jisas i stap tokbaot Judas Iskariot taem hem i stap toktok long Paelat long saed blong man we i putum Hem long han blong hem? Jisas i no talem stret se hem i stap tokbaot Judas no wan nara man, be i luk olsem we Jisas i tokbaot olgeta man we oli gat fol from sin ya blong kilim hem. Long olgeta ya i gat Judas, “ol jif pris wetem olgeta memba blong Kaonsel” blong Sanhedrin mo “ol man” tu we oli agri blong askem long Paelat blong i letem Barabas i go fri.—Mat. 26:59-65; 27:1, 2, 20-22.

20:17—?From wanem Jisas i talem long Meri Magdala blong i no holem hem? I luk olsem se Meri i holem Jisas from we hem i ting se Jisas i rere blong go antap long heven mo bambae hem i no moa save luk Jisas bakegen. Blong soem long Meri se bambae hem i no go yet long heven, Jisas i talem long hem blong i no holem hem be blong i go mo talemaot nius ya long ol disaepol se Hem i laef bakegen.

Ol Lesen Blong Yumi:

12:36. Blong stap olsem “man blong laet,” no blong saenaot olsem laet, yumi nidim blong kasem stret save blong Tok blong God, Baebol. Biaen yumi mas yusum save ya blong givhan long ol narafala blong olgeta tu oli aot long tudak long saed blong spirit, oli kam long laet blong God.

14:6. Jisas Kraes nomo i rod ya we God i save glad long yumi. Yumi mas bilif long Jisas mo folem eksampol blong hem sipos yumi wantem kam klosap long Jeova.—1 Pita 2:21.

14:15, 21, 23, 24; 15:10. Taem yumi obei long God, samting ya bambae i halpem yumi blong stap oltaem we God i lavem yumi mo Pikinini blong hem tu i lavem yumi.—1 Jon 5:3.

14:26; 16:13. Tabu spirit blong Jeova i save tijim yumi mo mekem se yumi tingbaot bakegen samting we yumi lanem. Hem i wok blong talemaot ol trutok tu. Taswe, hem i save halpem yumi blong gru long save, waes, fasin luksave, fasin blong skelem mo blong tingting gud. From samting ya, yumi mas prea oltaem blong askem spirit ya.—Luk 11:5-13.

21:15, 19, futnot. Jisas i askem long Pita sipos hem i lavem Hem moa i bitim “ol samting ya,” hemia ol fis we oli stap long fored blong olgeta. Taswe, Jisas i wantem soemaot long Pita se Pita i nidim blong jusum blong folem Hem oltaem bitim we hem i jusum blong kam wan man blong pulum fis. Afta we yumi lukluk long ol vas blong Gospel ya, maet yumi mas mekem se lav blong yumi long Jisas i kam strong moa i bitim eni narafala samting we i save pulum yumi. Yes, i gud we yumi gohed blong folem hem wetem fulhat blong yumi.

[Futnot]

[Tok blong pija long pej 31]

?Yumi save lanem wanem long eksampol blong Nikodimas?