?Olsem Wanem Ded Blong Jisas i Save Sevem Yu?

KLOSAP 2000 yia bifo, long taem blong Pasova blong ol man Jiu long yia 33, wan man we i no gat fol i ded blong ol narafala oli save laef. ?Hu ya man ya? Hemia Jisas blong Nasaret. ?Mo hu i kasem blesing from ded blong hem? Hemia olgeta man long fulwol. Wan vas we plante man oli savegud i tokbaot sakrefaes ya blong sevem ol man, hem i se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:16.

Nating se plante man oli savegud vas ya, i gat smol man nomo we oli rili kasem save long mining blong hem. Plante man oli askem se: ‘?From wanem yumi nidim sakrefaes blong Jisas? ?Olsem wanem ded blong wan man i save sevem olgeta man blong oli no ded blong olwe?’ Baebol i givim ol klia mo trufala ansa long ol kwestin ya.

?Olsem Wanem Ded i Stat Blong Rul Long Ol Man?

Sam man oli bilif se God i wokem ol man blong oli laef sot taem nomo long wol, blong oli kasem ol traem, oli haremgud mo oli glad long sam samting, mo biaen oli ded, oli go laef long wan ples we i moa gud. Sipos i olsem, hemia i min se ded i haf blong plan blong God. Be Baebol i soemaot se ded i kasem ol man from wan defren risen. Hem i talem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Vas ya i soemaot se frut blong sin hemia ded. ?Be, hu ya “wan man” we i mekem ded i kasem olgeta man?

The World Book Encyclopedia i talem se bighaf blong ol man blong stadi long saens oli bilif se olgeta man oli kamaot long semfala laen nomo, mo Baebol i talemaot klia hu i stamba blong laen ya—hemia “wan man” ya nao. Long Jenesis 1:27, yumi ridim se: “[God] i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.” Taswe Baebol i talem se faswan man mo woman tufala i nambawan wok blong God ya we i gat Olgeta Paoa.

Stori blong Jenesis i givim moa save long saed blong laef blong ol man afta we Jeova God i wokem faswan man. I gud blong makem we long ful stori ya long Jenesis, God i tokbaot ded long taem ya nomo we hem i talem panis blong man we i no obei long hem. (Jenesis 2:16, 17) God i wantem se ol man oli laef long wan naesfala paradaes long wol we oli glad mo oli gat gudfala helt blong olwe. Hem i no wantem se oli safa long ol trabol blong olfala, mo biaen oli ded. ?Sipos hemia nao tingting blong God, olsem wanem ded i kam bos long ol man?

Jenesis japta 3 i tokbaot olsem wanem faswan man mo woman tufala i jusum blong no obei long Jeova God, Man ya we i Givim Laef long tufala. Taswe, folem woning we God i bin givim long tufala, hem i panisim tufala. Hem i talem long Adam se: “Mi mi wokem yu long graon fastaem, mo bambae yu yu kam graon bakegen. (Jenesis 3:19) Stret olsem God i talem, tufala ya we oli no obei long hem oli ded.

Be frut blong panis ya i no kasem tufala ya nomo. Fasin blong tufala blong no obei long God i spolem fiuja blong ol pikinini blong tufala tu, we oli no moa save haremgud long wan laef we i stretgud olgeta. Jeova i tokbaot ol man we oli no bon yet se oli stap long plan blong hem tu, hemia long taem ya we hem i talem long Adam mo Iv se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” (Jenesis 1:28) Yes Jeova i plan se sloslo bambae famle blong Adam mo Iv i fulumap wol, mo oli save haremgud long  wan laef we i fulap long glad mo we bambae oli no save ded samtaem. Be bubu blong olgeta, Adam, hem i “wan man” ya we i salem olgeta oli kam slef blong sin wetem ded nomo long fiuja blong olgeta. Aposol Pol, wan man blong laen blong Adam, i raetem se: “Mi mi man nomo, mi no gat paoa. Mi mi olsem slef nomo we fasin blong sin i masta blong mi.”—Rom 7:14.

Adam i olsem ol man long taem blong yumi we oli spolem ol sas pija we man i pentem. Taem Adam i mekem sin, sin blong hem i spolem wan nambawan wok we God i wokem hemia ol man. Ol pikinini blong Adam oli gat pikinini, ale oli gat bubu, mo olgeta ya oli gohed blong bonem ol pikinini. Evritaem we ol niufala pikinini i bon, oli gruap, oli gat pikinini blong olgeta, biaen oli ded. ?From wanem olgeta oli ded? From we olgeta evriwan oli kamaot long Adam. Baebol i talem se: “Sin ya we wan man nomo i mekem, hem i wan bigfala samting, we ol man oli stap ded from.” (Rom 5:15) Yumi kasem ol sik, yumi kam olfala, oltaem yumi wantem mekem samting we i no stret, mo yumi ded, hemia nao ol nogud frut we i kamaot from fasin blong Adam blong spolem prapa famle blong hem. Yumi evriwan i memba blong famle ya.

Long wan leta we aposol Pol i raetem long ol kristin long Rom, hem i tokbaot olsem wanem hem mo olgeta man oli harem nogud from we oli sinman, mo oli mas faet oltaem agensem ol rabis frut blong sin. Hem i talem se: “Mi mi no save harem gud nating. ?Hu man we bambae i save pulumaot mi long laef ya we i stap holemtaet mi, we bambae mi ded from?” ?Yu yu agri se hemia wan gudfala kwestin? ?Hu bambae i sevem Pol mo ol narafala man we oli wantem tumas blong kam fri long sin mo ded? Pol hem wan i givim ansa, i se: “Mi mi talem tangkiu tumas long God, we hem bambae i mekem. Masta blong yumi Jisas Kraes bambae i wokem samting ya.” (Rom 7:14-25) Yes, God we i Wokem yumi i mekem rod finis blong yusum Pikinini blong hem, Jisas Kraes, blong sevem yumi.

Wok Blong Jisas Long Plan Blong God Blong Sevem Ol Man

Jisas i tokbaot wok we hem i mas mekem blong sevem ol man we oli slef long sin mo ded. Hem i se: “Mi mi Pikinini blong Man, . . . mi mi kam . . . blong givim laef blong mi blong pem rod blong plante man oli go fri.” (Matiu 20:28) ?Olsem wanem laef blong Jisas i save stap olsem wan ransom we i naf blong pemaot plante man oli go fri? ?Olsem wanem ded blong hem i givhan long yumi?

Baebol i tokbaot Jisas se “hem i no mekem sin” mo “hem i narafala olgeta long ol man nogud.” Long ful laef blong hem, hem i obei long Loa blong God long fasin we i stretgud olgeta. (Hibrus 4:15; 7:26) Taswe, ded blong Jisas i defren long ded blong Adam, from we hem i no sin mo i no brekem loa blong God olsem Adam i mekem. (Esikel 18:4) Defren olgeta, Jisas i agri blong ded, nating se hem i no mekem wan samting we i rong. Hem i mekem samting ya from we hem i wantem folem plan blong Papa blong hem blong mekem ol man oli fri long sin mo ded. Olsem yumi talem finis, Jisas i glad blong kam long wol blong “givim laef blong hem blong pem rod blong plante man oli go fri.” Lav nao i pusum Jisas blong i rere blong “ded blong tekem ples blong olgeta man.” Yes i no gat wan narafala man samtaem we lav blong hem i bigwan olsem.—Hibrus 2:9.

Laef we Jisas i givim olsem wan sakrefaes i sem mak long laef ya we Adam i lusum taem hem i sin. ?Wanem i kamaot from ded blong Jisas? Jeova i agri long sakrefaes ya olsem “wan ransom, mo praes ya i stret blong pemaot olgeta man.” (1 Timoti 2:6, NW) I olsem we God i yusum praes blong laef blong Jisas blong pemaot ol man long sin mo ded.

Plante taem, Baebol i talem se rod ya we God i jusum blong sevem yumi i soemaot bigfala lav blong God ya we i Wokem yumi. Pol i talem bakegen long ol Kristin se God i ‘pemaot olgeta finis long bigfala praes.’ (1 Korin 6:20; 7:23) Pita i raetem se God i no yusum gol mo silva blong pemaot ol Kristin be hem i yusum blad blong Pikinini blong hem blong pemaot olgeta, oli fri long laef ya we i blong ded. (1 Pita 1:18, 19) Wetem ransom sakrefaes ya blong Kraes, Jeova i mekem rod blong sevem ol man, blong oli save kam fri long laef ya we i blong ded olwe.

?Bambae Ransom Blong Jisas Kraes i Givhan Long Yu?

Aposol Jon i tokbaot olsem wanem ol blesing blong ransom blong Jisas oli kasem fulwol, hem i raetem se: “Kraes ya, hem i man we i ded blong mekem rod blong God i tekemaot ol sin blong yumi.  Mo i no blong yumi nomo, i blong olgeta man long wol.” (1 Jon 2:2) Yes, ransom blong Jisas i givhan long olgeta man. ?Olsem wanem? ?Hemia i min se olgeta man bambae oli kasem ol blesing we oli kamaot from sas presen ya? Nogat. Tingbaot stori we yumi tokbaot long faswan haf blong magasin ya. Ol man we oli kam blong sevem ol naen man ya we oli fas long maen, oli sanem wan kej i godaon blong sevem olgeta, be wanwan long ol naen man ya i mas go insaed long kej ya sipos hem i wantem sef. Long sem fasin ol man we oli wantem kasem ol blesing blong ransom sakrefaes blong Jisas, oli no save wet olsem nomo blong kasem ol blesing blong God. Oli mas mekem sam samting.

?God i wantem se yumi mekem wanem samting? Jon 3:36 i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem. Mo man olsem, God bambae i stap kros long hem olwe nomo.” God i wantem we yumi bilif long sakrefaes blong Jisas. Be i gat moa samting yet. “Sipos yumi stap folem ol tok blong [Jisas], fasin ya i soemaot we yumi savegud se yumi man blong hem.” (1 Jon 2:3) Yes, i klia se sipos yumi wantem fri long sin mo ded, samting we i impoten hemia blong bilif long ransom sakrefaes blong Jisas mo obei long ol tok blong hem.

Wan impoten rod blong soemaot we yumi bilif long ransom sakrefaes blong Jisas, hemia blong soemaot tangkiu from ded blong hem. Yumi mekem olsem taem yumi tingbaot ded blong hem, olsem hem i bin talem. Bifo we Jisas i ded, hem i mekem wan kakae wetem ol gudfala aposol blong hem, mo i talem long olgeta se: “Oltaem yufala i mas mekem samting ya blong tingbaot mi bakegen.” (Luk 22:19) Ol Witnes blong Jeova oli tinghae long fasin fren we oli gat wetem Pikinini blong God, mo oli obei long tok ya we hem i talem. Long yia ya, Memoriol blong ded blong Jisas Kraes bambae i stap long Sarede, Maj 22, afta we san i godaon. Mifala i glad blong singaot yu blong kam long spesel miting ya, blong yu tu yu save obei long tok ya blong Jisas. Ol Witnes blong Jeova long ples blong yu oli save talem long yu stret taem mo ples we bambae oli mekem spesel miting ya. Long Memoriol ya bambae yu lanem moa long saed blong samting we yu mas mekem blong ransom blong Jisas i save mekem yu yu fri long sin mo ded we Adam i pasem long yumi.

Tede, smol man nomo oli kasem save mo tangkiu fulwan from bigfala sakrefaes we God ya we i Wokem yumi mo Pikinini blong hem, tufala i mekem blong sevem yumi blong yumi no lus. Olgeta we oli soemaot bilif long ransom ya, oli haremgud long wan glad we i kamaot from wan spesel samting. Long leta we Aposol Pita i raetem long ol brata sista, hem i se: “Yufala i stap bilif long [Jisas], nao yufala i stap harem gud tumas, we yufala i glad we i glad, we i no blong talem. Yufala i stap glad olsem from we yufala i stap kasem samting ya we yufala i bilif se bambae yufala i kasem, we God bambae i sevem laef blong yufala.” (1 Pita 1:8, 9) Sipos yu yu mekem lav blong yu long Jisas Kraes i kam strong mo yu wokem strong bilif long ransom sakrefaes, samting ya i save givim glad long laef blong yu naoia, mo bambae yu save putum tingting blong yu i stap long taem ya we God bambae i sevem yu long sin mo ded.

[Tok blong pija long pej 6]

Praes blong laef blong Jisas i stret blong pemaot yumi long ol nogud frut blong sin blong Adam