Amagedon Faet Blong God Blong Finisim Olgeta Faet

“Long tingting blong [ol man Grinlan], fasin blong kilim man i ded i nogud olgeta, taswe long lukluk blong olgeta, faet i wan samting we oli no kasem save long hem, i nogud tumas blong tingbaot, mo i no stap long lanwis blong olgeta.”—FRIDTJOF NANSEN, WAN MAN NOWEI WE I WOKBAOT BLONG FAENEM OL NIUFALA PLES, I TALEM TOK YA LONG SAED BLONG OL MAN GRINLAN LONG YIA 1888.

YUMI evriwan i glad sipos yumi save laef wetem ol man we ‘oli no kasem save long faet,’ mo we faet i wan samting we “i nogud tumas blong tingbaot.” Yumi evriwan i wantem laef long wan wol we i no gat tok ya faet, from we faet i neva hapen. I hadwok blong bilivim se i save gat wan wol olsem, antap moa, sipos yumi trastem ol man blong oli putum pis.

Nating we i olsem, profet tok blong Aesea i talem promes blong God se: “Ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.”—Aesea 2:4.

I klia se ol 20 milian soldia we oli stap faet long ol defren ples long wol, wetem klosap 20 bigbigfala faet we oli stap gohed naoia, oli mas jenis bigwan blong mekem se promes ya blong God i save kamtru. Yumi no sapraes se Jeova God we i gat olgeta paoa, bambae hem i mas go insaed long bisnes  blong olgeta man long wol. Taem Jeova i mekem olsem, samting we bambae i kamaot hemia nao wanem we Baebol i kolem se Amagedon.—Revelesen 16:14, 16.

Nating we ol man tede oli stap yusum tok ya “Amagedon” blong tokbaot wan niuklia faet we bambae i kamaot long olgeta ples blong wol, wan diksonari i eksplenem bigfala mining blong tok ya se: “Ples blong laswan bigfala faet bitwin ol paoa we oli gud mo ol paoa we oli nogud.” ?Olsem wanem? ?Ol paoa we oli gud oli save winim ol paoa we oli nogud, no hemia i wan drim nomo?

Tingting blong yumi i save glad se Baebol i tokbaot bakegen mo bakegen, en blong olgeta rabis fasin. Man blong raetem Sam i talem se: “Hem bambae i brumumaot ol man nogud oli gowe long wol ya, we bambae i no moa gat wan long olgeta i stap.” (Ol Sam 104:35) Buk blong Ol Proveb i talem se: “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.”—Ol Proveb 2:21, 22.

Baebol i makem klia tu se ol rabis man ya bambae oli no wantem lego paoa blong olgeta long wan fasin we i kwaet, taswe i nidim wan laswan faet blong God blong karemaot olgeta rabis fasin wetem rabis fasin ya blong faet tu. (Ol Sam 2:2) Baebol i givim wan spesel nem blong impoten faet ya se Amagedon, mo nem ya i gat bigfala mining.

Ol Faet Klosap Long Megido Long Taem Bifo

Tok ya “Amagedon” i minim “Bigfala Hil long Megido.” Olfala taon blong Megido mo Levelples blong Jisrehel, oli ples blong ol bigfala faet long taem bifo, we oltaem wan saed i winimgud enemi blong olgeta. Wan man blong histri, Eric H. Cline, i raetem wan buk (The Battles of Armageddon) we i talem se: “Ol faet we oli kamaot long tufala ples ya Megido mo Levelples blong Jisrehel, oli mekem bigfala jenis long histri blong man.”

Cline i talem se, long ol faet we oli kamaot klosap long Megido, plante taem wan saed i winimgud enemi blong olgeta. Ol ami blong Mongolia oli winim plante faet long kantri blong Esia long ol yia 1200, be faswan faet we oli lusum, hemia long Megido. Mo klosap long Megido tu, ami blong Briten we Komanda Edmund Allenby i lidim, i winim ami blong Teki long taem blong Wol Wo Wan. Wan man blong raetem histri blong ol ami, i tokbaot faet ya we Allenby i winim se, “i wan faet we hem i winimgud enemi blong hem, klosap i neva gat wan faet olsem long histri.”

Plante bigfala faet blong Baebol we wan saed i winimgud enemi blong olgeta, oli kamaot klosap long Megido. Long ples ya nao Jaj Barak i winim ol ami blong Kenan we Siseraha i lidim. (Jajes 4:14-16; 5:19-21) Long ples ya tu, Gideon wetem 300 man blong hem nomo, oli winim bigfala ami blong Midian. (Jajes 7:19-22) King Sol mo pikinini blong hem Jonatan tufala i ded klosap long Hil blong Gilboa, ples ya we ol ami blong Filistia oli winim faet agens long ol ami blong Isrel.—1 Samuel 31:1-7.

Megido mo levelples raonabaot i wan gudfala ples blong ol ami oli save trikim ol enemi blong olgeta, taswe i bin gat plante faet oli kamaot long ples ya long ol 4000 yia we i pas. !Wan man we i raetem histri i talem se i bin gat samwe long 34 faet evriwan!

From ol samting we i hapen long Megido mo from we i wan gudfala ples blong trikim ol enemi, ating hemia nao risen from wanem Baebol i joenem ples ya wetem tok ya “Amagedon.” Nating we tok ya i kamaot wan taem nomo long Baebol, ol tok raonabaot long hem long buk blong Revelesen i makem klia se Amagedon bambae i gat paoa long laef blong evriwan long wol.

Amagedon We Baebol i Tokbaot

I tru se, long plante faet long Megido wan saed i winimgud enemi blong olgeta, be i no gat wan we i karemaot olgeta rabis fasin long wol. I no gat wan faet we olgeta paoa we oli gud oli agensem olgeta paoa we oli nogud. Wan faet nomo we i save mekem olsem, hemia faet we bambae i kamaot long God. Jisas i bin talem bifo se: “I no gat man we i gud. God nomo, hem i gud.” (Luk 18:19) Mo tu, Baebol i tokbaot Amagedon se hem i faet blong God.

 Long buk blong Revelesen, Baebol i talem se, “ol king blong evri ples long wol” bambae oli stap wanples “blong oli mekem faet long bigfala Dei blong God ya we i gat olgeta paoa.” (Revelesen 16:14) Mo profet tok ya i gohed se: “Ol king oli kam wanples long ples ya we long lanwis blong ol laen blong Isrel nem blong hem “Amagedon.” * (Revelesen 16:16) Biaen, Revelesen i eksplenem se “ol king blong wol wetem ol soldia blong olgeta” oli “kam wanples blong kilim man ya we i stap sidaon long hos, mo blong kilim ol soldia blong hem.” (Revelesen 19:19) Man ya we i stap sidaon long hos hem i Jisas Kraes.—1 Timoti 6:14, 15; Revelesen 19:11, 12, 16.

?Yumi lanem wanem long ol vas ya? Amagedon i faet blong God blong agensem rabis paoa blong ol man we oli no obei. ?From wanem Jeova mo Pikinini blong hem Jisas Kraes, bambae tufala i mekem faet olsem? Wan risen se, Amagedon bambae i “spolem ol man ya we oli stap spolem wol.” (Revelesen 11:18) Antap long hemia, bambae faet ya i putum pis long wol, hemia wan “niufala wol” we yumi stap wet long hem folem promes blong God, “we stret fasin nomo bambae i stap long hem.”—2 Pita 3:13.

?From Wanem Yumi Nidim Amagedon?

?Olsem wanem? ?I had blong bilivim se Jeova God “we i lavem ol man tumas,” bambae i putumap Pikinini blong hem we i “Prins blong pis” blong mekem wan faet? (2 Korin 13:11; Aesea 9:6, NW) Taem yu kasem save tingting blong tufala, bambae samting ya i halpem yu blong save risen blong faet ya. Buk blong Ol Sam i tokbaot Jisas olsem wan soldia we i sidaon long hos. ?From wanem hem i faet? Buk blong Ol Sam i eksplenem we Kraes i sidaon long hos blong “faet from fasin ya we man i gat sore long narafala man mo from trutok mo stret fasin.” Hem i faet from we hem i laekem ol fasin we i stret, be ol fasin we i nogud hem i agens long olgeta.—Ol Sam 45:4, 7.

Long sem fasin, Baebol i tokbaot tingting we Jeova i gat long ol man we oli mekem i no stret long ol narafala man tede. Profet Aesea i talem se: “MASTA i luk ol fasin ya we ol narafala man oli stap mekem long man, mo hem i no glad nating taem oli mekem i no stret long olgeta. Bambae hem i werem spesel kot ya blong faet olsem stret fasin blong hem, mo hat we i olsem paoa blong hem blong sevem man. Mo bambae hem i werem kaliko ya we i olsem strong tingting blong wantem stretem ol fasin we oli no stret, mo blong panisim ol man mo givimbak ol fasin we oli no stret we oli stap mekem long ol narafala man.”—Aesea 59:15, 17, Today’s English Version.

Taem ol rabis man oli rul, ol stret man oli no gat pis mo seftaem. (Ol Proveb 29:2; Prija 8:9) Yumi no  save seraotem ol kruked mo rabis fasin long ol man we oli stap mekem ol fasin ya. Taswe, trufala pis mo stret fasin bambae i kamtru nomo afta we ol rabis man oli lus. King Solomon i raetem se: “Oltaem ol man nogud oli stap traem blong mekem ol gudfala man oli kasem trabol be trabol ya i stap kasem olgeta bakegen nomo.”—Ol Proveb 21:18.

From we God nomo bambae i jajem ol man, yumi suagud se olgeta jajmen we hem i mekem long ol rabis man bambae oli stret nomo. Ebraham i talem long God se: “Yu yu man blong jajem olgeta man blong wol. !Yu yu stap jajem man long stret fasin nomo!” Ebraham i lanem se oltaem Jeova i stap mekem i stret nomo. (Jenesis 18:25) Mo Baebol i talem tu se, Jeova i no haremgud nating blong spolem ol rabis man, be hem i mas mekem olsem blong finisim olgeta trabol.—Esikel 18:32; 2 Pita 3:9.

Luksave Se Amagedon i Wan Trufala Faet

?Bambae yu yu stap long saed blong hu long taem blong bigfala faet ya? Plante long yumi i ting se yumi stap sapotem ol paoa we oli gud. ?Be olsem wanem yumi save sua long samting ya? Profet Sefanaea i talem se: “Yufala i mas mekem ol samting we i stret, mo yufala i mas mekem tingting blong yufala i stap daon long fes blong hem.” (Sefanaea 2:3) Aposol Pol i talem se: “[God] i wantem sevem olgeta man mo i wantem we olgeta man bambae oli save trutok blong hem.”—1 Timoti 2:4.

Faswan rod we yumi mas folem blong God i sevem yumi, hemia blong lanem trutok long saed blong Jeova mo stamba tingting blong hem blong finisim ol rabis man long wol ya. Namba tu rod, hemia blong mekem fasin we i stret blong God i save glad long yumi mo lukaotgud long yumi.

Sipos yumi folem ol rod ya, bambae yumi no nid blong fraet long Amagedon, yumi save glad long faet ya we bambae i finisim olgeta faet blong man. Taem faet ya i finis, ol man long olgeta ples blong wol bambae oli luk faet olsem wan samting we oli no kasem save long hem mo we i nogud tumas blong tingbaot. “Neva bambae oli save mekemrere bakegen blong go mekem faet.”—Aesea 2:4.

[Futnot]

[Tok blong makem poen long pej 5]

Amagedon i rod we God i yusum blong kam insaed long ol bisnes blong man

[Tok blong pija long pej 6]

Gideon mo ol man blong hem oli winimgud enemi blong olgeta klosap long Megido

[Tok blong pija long pej 6]

Megido

[Tok blong pija long pej 7]

Taem Amagedon i finis, ol man long olgeta ples blong wol bambae oli luk faet olsem wan samting we oli no kasem save long hem mo i nogud tumas blong tingbaot