Eksampol Blong Pol i Halpem Yumi Blong Gohed Gud Long Trutok
Eksampol Blong Pol i Halpem Yumi Blong Gohed Gud Long Trutok
“Mi mi faet strong finis long gudfala faet ya we yumi stap faet long hem. Mi mi kamtru finis long en blong resis ya, mo mi stap holem yet fasin blong bilif.”—2 TIM. 4:7, NTB.
1, 2. ?Wanem jenis we Sol blong Tasas i mekem long laef blong hem, mo wanem impoten wok we hem i mekem?
SOL BLONG TASAS i wan man we i gat hed mo i hareap blong tekem desisen. Be hem i ‘mekem ol samting we tingting blong hem i wantem.’ (Efes. 2:3) Biaen hem i tokbaot hem wan se hem i ‘stap tok agens long ol man blong Kraes, mo i stap mekem i nogud long olgeta, mo i stap tok nogud long olgeta blong spolem olgeta.’—1 Tim. 1:13.
2 Sam taem biaen, Sol i mekem bigfala jenis long laef blong hem. Hem i lego ol fasin blong hem blong bifo mo i wokhad blong no moa ‘mekem ol samting we oli gud long hem nomo, be blong mekem ol samting we oli gud long ol narafala man tu.’ (1 Kor. 10:33) Hem i mekem i isi long olgeta we hem i bin spolem olgeta mo hem i gat filing long olgeta olsem wan mama wetem pikinini blong hem. (Ridim 1 Tesalonaeka 2:7, 8.) Hem i raetem se: ‘Mi mi kam man blong wok blong gud nius.’ Mo hem i gohed i se: “Mi mi no haeman, mi daon moa long ol narafala man blong God. Be long gladhat blong God, hem i givhan long mi blong mi mekem gudfala wok ya. Hem i putumap mi blong mi go long ol man we oli no laen blong Isrel blong talemaot gud nius blong ol gudgudfala samting ya blong Kraes, we i no gat man i save kaontem.”—Efes. 3:7, 8.
3. ?Taem yumi stadi long ol leta mo long wok blong prij blong Pol, samting ya i halpem yumi olsem wanem?
3 Taem Sol, we biaen oli singaot hem se Pol, i kasem save long trutok, hem i gru kwiktaem nomo. (Wok 13:9) Wan rod we i sua blong mekem se yumi gru hareap long trutok, hemia taem yumi stadi long ol leta mo long wok blong prij blong Pol nao yumi folem fasin blong hem blong bilif. (Ridim 1 Korin 11:1; Hibrus 13:7.) Bambae yumi luk olsem wanem, taem yumi mekem olsem, samting ya bambae i pulum yumi blong wokem wan gudfala program blong stadi Baebol yumi wan oltaem, blong lavem moa ol man, mo blong gat wan stret tingting long saed blong yumi wan.
Program Blong Pol Blong Stadi
4, 5. ?Olsem wanem fasin blong Pol blong stadi Baebol hem wan i halpem hem?
4 Pol i wan Farisi mo hem i ‘skul long nambawan tija ya Gamaliel. Gamaliel i tijimgud hem long Loa ya blong ol olfala blong olgeta.’ From samting ya, Pol i gat sam save finis long saed blong Baebol. (Wok 22:1-3; Fil. 3:4-6) Stret afta we hem i baptaes, hem i ‘aot, i go long Arebia’—maet hemia Draeples blong Siria no wan narafala ples we i kwaet long kantri blong Arebia blong hem i save stap mo tingting dip. (Gal. 1:17) Maet Pol i go long ples ya from we hem i wantem tingting dip long ol haf blong Baebol we i pruvum se Jisas i Mesaea. Mo tu, Pol i wantem rerem hem from wok ya we bambae hem i mekem. (Ridim Ol Wok 9:15, 16, 20, 22.) Pol i tektaem blong tingting dip long ol samting long saed blong spirit.
5 Save blong Baebol mo fasin luksave we Pol i kasem taem hem i stap stadi hem wan, i halpem hem blong tijim gud trutok. Eksampol, long haos prea blong Antiok long Pisidia, Pol i yusum toktok we i kamaot stret long samwe faef vas long Hibru haf blong Baebol blong pruvum se Jisas i Mesaea. Mo plante taem hem i talemaot ol tok we oli stap long Hibru haf blong Baebol. Fasin blong hem blong yusum ol vas blong Baebol i pulum plante man, mekem se ‘plante man oli biaen long Pol mo Banabas’ from we oli wantem save moa. “Ol man ya, sam oli laen blong Isrel, mo sam oli man blong narafala kantri we oli lego bilif blong olgeta, oli folem bilif blong ol laen blong Isrel.” (Wok 13:14-44) Sam yia biaen, taem wan grup blong ol man Rom oli kam luk Pol long haos blong hem, Pol i eksplenem ol samting long olgeta, ‘i givim witnes long olgeta long saed blong kingdom blong God, mo hem i yusum ol tok we oli stap long loa blong Moses mo ol Profet blong pulum olgeta blong bilif long Jisas.’—Wok 28:17, 22, 23, NW.
6. ?Wanem i halpem Pol blong stanap strong oltaem long trutok taem hem i fesem ol traem?
6 Taem Pol i fesem ol traem, hem i gohed blong jekemgud ol vas blong Baebol mo blong kasem paoa long ol tok blong Baebol we oli kamaot long tabu spirit. (Hib. 4:12) Bifo we oli kilim hem i ded, long taem we hem i stap kalabus long Rom, Pol i askem long Timoti blong tekem ol “buk” no skrol mo “olgeta [buk] ya we oli wokem long skin blong nani.” (2 Tim. 4:13) Ol buk ya oli ol hanraet blong Hibru haf blong Baebol we Pol i bin yusum blong mekem ol dip stadi blong hem. Fasin blong stadi oltaem long Baebol blong kasem ol save we oli stap long hem, hemia wan impoten samting tumas long Pol, samting ya nao i halpem hem blong i save stanap strong.
7. Tokbaot ol gudfala samting we yu save kasem taem yu stadi Baebol oltaem.
7 Fasin blong stadi Baebol oltaem mo tingting dip long hem bambae i halpem yumi blong gru long save. (Hib. 5:12-14) Man blong raetem Sam i mekem singsing ya blong tokbaot olsem wanem Tok blong God i save givhan long man, hem i se: “Long mi, Loa blong yu i gud moa, i winim olgeta mane long wol ya. Tok ya we yu yu putum i stap oltaem long tingting blong mi, i stap mekem mi mi waes moa, i winim ol enemi blong mi. Mi mi no save folem ol fasin nogud, from we mi wantem obei long ol tok blong yu.” (Sam 119:72, 98, 101) ?Yu yu gat wan program blong stadi Baebol yu wan? ?Yu yu stap rerem yu blong kasem moa wok long wok blong God taem yu ridim Baebol evri dei mo tingtinggud long wanem we yu stap ridim?
Sol i Lanem Blong Lavem Ol Man
8. ?Sol i mekem wanem long ol man we oli no joen long skul blong ol man Jiu?
8 Bifo we hem i kam wan Kristin, Sol i bin strong blong mekem ol wok blong skul blong hem, hemia skul blong ol man Jiu, be hem i no kea long ol man we oli no joen long skul ya. (Wok 26:4, 5) Hem i bin wajem mo i glad taem ol man Jiu oli stonem Steven i ded. Taem Sol i wajem oli stonem Steven i ded, maet hem i ting se i stret nomo we Steven ya i kasem panis blong ded, mo maet samting ya i givim strong tingting long hem se olgeta Kristin oli mas ded. (Wok 6:8-14; 7:54–8:1) Baebol i talem se: “Sol i stap mekem i strong tumas long ol man blong jos. Hem i stap go long ol haos, i stap karemaot ol man mo ol woman we oli bilif long Jisas, mo i stap go putum olgeta long kalabus.” (Wok 8:3) Hem i “stap ronem olgeta oltaem, gogo oli go stap long ol narafala taon longwe, be [hem i] biaen long olgeta yet.”—Wok 26:11.
9. ?Wanem samting i hapen long Sol we i mekem se hem i jekemap hem wan bakegen blong luk wanem fasin hem i stap mekem long ol man?
9 Taem Masta Jisas i kamtru long Sol, Sol i stap wokbaot i go long Damaskes blong mekem trabol long ol disaepol blong Kraes. Bigfala laet ya we i saen i kamaot long Jisas i mekem se Sol i blaen mo hem i nidim we narafala i givhan long hem. Long taem ya, Jeova i yusum Ananaeas blong i mekem ae blong Sol i kamgud bakegen. Stat long taem ya, Sol i no moa mekem nogud long ol man. (Wok 9:1-30) Afta we hem i kam wan man blong Kraes, hem i wokhad blong mekem i gud long ol man olsem Jisas i mekem. Hemia i min se hem i no moa faet be hem i “gat pis wetem olgeta man.”—Ridim Rom 12:17-21.
10, 11. ?Olsem wanem Pol i soemaot trufala lav long ol man?
10 Pol i no jes glad nomo from we hem i gat pis wetem ol man, nogat. Hem i wantem soemaot trufala lav long ol man tu mo Kristin wok blong prij nao i givim janis long hem blong mekem olsem. Long faswan misinari trip blong hem, hem i talemaot gud nius long Esia Maena. Nomata se i gat bigfala fasin agens, Pol mo ol fren blong hem oli putum tingting blong olgeta i stap nomo long wok blong olgeta blong halpem ol man we oli gat tingting daon blong oli kam Kristin. Oli visitim bakegen Listra mo Ikoniam, nating se ol man blong agens long tufala taon ya oli traem blong kilim Pol i ded.—Wok 13:1-3; 14:1-7, 19-23.
11 Biaen, Pol mo ol fren blong hem oli go long Masedonia long taon ya Filipae blong faenem ol man we oli stret blong kasem laef. Wan proselaet blong ol man Jiu we nem blong hem Lidia i lesin long gud nius mo i kam wan Kristin. Ol haeman blong gavman oli kilim Pol mo Saelas mo oli putum tufala long kalabus. Be Pol i prij long gad blong kalabus mo biaen, gad ya wetem famle blong hem oli baptaes mo oli kam ol man we oli wosip long Jeova.—Wok 16:11-34.
12. ?Wanem i pulum Sol we i no gat respek nating blong i jenis i kam wan aposol blong Jisas Kraes we i gat lav?
12 ?From wanem Sol we fastaem i stap kilim ol Kristin, i joen long bilif blong ol Kristin ya bakegen? ?Wanem i pulum Sol we i no gat respek nating, blong i jenis i kam aposol Pol, we i kaen, i gat lav mo we i rere blong lusum laef blong hem blong givhan long ol man blong oli lanem trutok long saed blong God mo Kraes? Pol hem wan i eksplenem se: “Long gladhat blong [God], hem i singaot mi blong mi man blong hem. Mo long gudfala tingting blong hem, hem i soemaot Pikinini blong hem long mi.” (Gal. 1:15, 16) Pol i raet long Timoti se: “God i gat sore long mi, from we Jisas Kraes i wantem yusum laef blong mi, blong soemaot fasin blong hem long olgeta man we bambae oli save bilif long hem blong kasem laef ya we i no save finis. Hem i wantem soemaot we oltaem tingting blong hem i longfala, we i no gat en blong hem.” (1 Tim. 1:16) Jeova i fogivim Pol. Gladhat mo fasin sore blong God i pusum Pol blong soemaot lav long ol narafala, taem hem i talemaot gud nius long olgeta.
13. ?Wanem i mas pusum yumi blong soemaot lav long ol narafala, mo olsem wanem blong mekem olsem?
13 Jeova i fogivim ol sin mo ol mastik blong yumi olsem we hem i mekem long Pol. (Sam 103:8-14) Man blong raetem Sam i askem long Jeova se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Sam 130:3) Sipos God i no gat sore, i no gat wan long yumi we i save haremgud blong mekem wok blong God mo yumi no save gat hop blong kasem laef we i no save finis. God i soemaot gladhat blong hem long yumi evriwan. From samting ya, olsem Pol, yumi mas wantem blong soemaot lav long ol narafala taem yumi talemaot mo tijim trutok long olgeta, mo taem yumi mekem tingting blong ol brata sista blong yumi i strong moa.—Ridim Ol Wok 14:21-23.
14. ?Olsem wanem yumi save mekem moa long wok blong prij?
14 Pol i wantem mekem moa long wok blong prij mo blong gat gudhan blong tijim gud nius. Eksampol blong Jisas i tajem hat blong hem. Wan long ol rod we Jisas i folem blong soemaot lav long ol man hemia taem hem i mekem wok blong prij. Jisas i talem se: “I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:35-38) Pol i wok folem ol prea we maet hem i mekem blong askem Jeova blong sanem moa man blong wok oli kam. Hem i mekem olsem taem hem i wok strong long wok blong prij mo tij. ?Olsem wanem long yu? ?Yu yu save kamgud moa long wok blong prij? ?Yu yu save mekem moa long wok blong talemaot Kingdom, olsem maet faenem taem blong mekem wok olsem paenia? I gud yumi soemaot trufala lav long ol narafala taem yumi halpem olgeta blong oli “holemtaet tok blong laef.”—Fil. 2:16, NW.
Tingting We Pol i Gat Long Saed Blong Hem Wan
15. ?Pol i tingting olsem wanem long saed blong hem wan wetem ol narafala Kristin?
15 Pol i soemaot wan narafala nambawan eksampol long yumi taem hem i mekem ol Kristin wok blong hem. Nating se hem i kasem plante wok insaed long Kristin kongregesen, Pol i savegud se ol wok ya oli no blong hem mo se hem i no kasem ol wok ya from we hem i gat gudhan blong mekem olgeta. Pol i luksave se ol blesing ya oli soemaot gladhat we Jeova i gat long hem. Pol i luksave se ol narafala Kristin tu oli ol gudfala man blong talemaot gud nius. Nomata se hem i gat wan bigfala wok insaed long kongregesen, be hem i gat tingting daon.—Ridim 1 Korin 15:9-11.
16. ?Olsem wanem Pol i soemaot tingting daon taem hem i stap stretem bisnes ya long saed blong sakomsaes?
16 Tingbaot olsem wanem Pol i stretem problem we i kamaot long taon ya Antiok long Siria. Kristin kongregesen long ples ya i seraot from bisnes ya long saed blong sakomsaes. (Wok 14:26–15:2) From we Pol nao i kasem wok blong prij long ol Hiten man we oli no sakomsaes, maet Pol i save gat tingting ya se hem i savegud ol bisnes blong olgeta we oli no man Jiu, mo from samting ya hem nao i nafgud blong stretem problem ya. (Ridim Galesia 2:8, 9.) Be taem ol traehad blong Pol oli no stretem bisnes ya, hem i gat tingting daon mo i luksave se hem i no naf blong mekem evri samting hem wan. Hem i folem plan blong go luk hed kampani long Jerusalem blong tokbaot bisnes ya wetem olgeta. Long Jerusalem, hed kampani i lesingud long bisnes ya, mo i mekem desisen, ale oli jusum Pol olsem man we i wok long nem blong olgeta blong go talemaot desisen ya long ol kongregesen. Pol i soem se hem i rere fulwan blong wokgud wetem olgeta ya. (Wok 15:22-31) Yes, ‘long saed blong fasin blong ona long narafala, Pol fastaem i soemaot rod’ blong ol Kristin brata blong hem oli folem.—Rom 12:10b, NW.
17, 18. (a) ?Pol i soemaot wanem filing long olgeta insaed long kongregesen? (b) ?Fasin we ol elda long Efesas oli mekem long Pol taem hem i aot, i tijim wanem long yumi long saed blong Pol?
17 Pol, we i gat tingting daon, i joengud wetem ol brata sista long kongregesen. Hem i frengud wetem olgeta. Long en blong laswan leta we hem i raetem i go long ol man Rom, hem i talem nem blong bitim 20 man taem hem i talem halo long olgeta. Plante long olgeta ya, Baebol i no moa tokbaot olgeta bakegen long ol narafala vas mo sam long olgeta ya oli mekem sam spesel wok. Be oli ol man we oli stap tru long Jeova, mo Pol i lavem olgeta tumas.—Rom 16:1-16.
18 Tingting daon blong Pol mo fasin blong hem blong frengud wetem narafala i leftemap tingting blong ol brata sista long kongregesen. Afta we hem i joen laswan wetem ol elda long Efesas, “oli stap holem Pol, oli kis long hem blong talem tata long hem. Olgeta oli stap harem nogud tumas, from tok ya we hem i talem, se bambae oli no moa save luk fes blong hem bakegen samtaem.” Sipos Pol i wan flas man, bambae ol man oli no save mekem wan samting olsem long hem.—Wok 20:37, 38.
19. ?Olsem wanem yumi save soemaot ‘tingting daon’ taem yumi stap joen wetem ol narafala Kristin brata mo sista?
19 Olgeta we oli wantem gohed gud long trutok oli mas soemaot tingting daon olsem Pol i mekem. Pol i talem long ol Kristin brata sista se: “I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala.” (Fil. 2:3) ?Olsem wanem yumi save folem advaes ya? Wan rod hemia blong wokgud wetem ol elda long kongregesen blong yumi, folem ol advaes we oli talem blong lidim yumi, mo wok folem ol desisen we oli tekem. (Ridim Hibrus 13:17.) Wan narafala rod hemia blong tinghae long ol Kristin brata mo sista blong yumi. Kongregesen blong ol man blong Jeova i fulap wetem wanwan man blong defren kantri, kalja, kala blong skin, kastom. Yumi mas mekem olsem Pol blong mekem i sem mak long evri man mo soemaot lav tu. (Wok 17:26; Rom 12:10a) Yumi kasem advaes blong ‘tekem ol narafala Kristin man oli kam joen wetem yumi, olsem we Kraes i glad blong tekem yumi i kam joen wetem hem. Yumi mas mekem olsem blong ol man oli leftemap nem blong God.’—Rom 15:7.
“Mekem Tingting Blong Yumi i Strong, Blong Yumi Resis” Blong Kasem Laef
20, 21. ?Wanem bambae i halpem yumi blong winim resis ya blong kasem laef?
20 Laef blong wan Kristin i olsem wan longfala resis. Pol i raetem se: “Mi mi kamtru finis long en blong resis ya, mo mi stap holem yet fasin blong bilif. Nao praes blong ol man we oli win, hem i stap wet blong mi go tekem. Praes ya we Masta blong yumi bambae i givim long mi blong ona long mi, hemia we hem i talem se mi mi wan stret man. Masta ya blong yumi, hem i wan stret jaj. Nao long dei ya we hem bambae i jajem olgeta man, hem bambae i givim praes ya long mi. Mo i no long mi nomo. Bambae hem i givim praes olsem long olgeta man we oli laekem hem tumas, nao oli stap wet blong hem bambae i kamtru bakegen.”—2 Tim. 4:7, 8, NTB.
21 Taem yumi folem eksampol blong Pol, samting ya bambae i halpem yumi blong winim resis ya blong yumi blong kasem laef. (Hib. 12:1) From samting ya, i gud we yumi gohed gud long trutok taem yumi gat wan gudfala program blong stadi Baebol yumi wan, taem yumi wokem wan dip lav long narafala man, mo taem yumi gat tingting daon.
?Bambae Yu Yu Ansa Olsem Wanem?
• ?Olsem wanem fasin blong Pol blong stadi Baebol hem wan i halpem hem?
• ?From wanem i impoten we ol trufala Kristin oli soem dip lav long ol man?
• ?Wanem fasin i save halpem yu blong mekem i sem mak long olgeta man?
• ?Olsem wanem eksampol blong Pol i halpem yu blong wokgud wetem ol elda long kongregesen blong yu?
[Kwestin]