!I No Longtaem Kingdom Blong God Bambae i Sevem Yumi!

“Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.”—MAT. 6:10, NW.

1. ?Wanem stamba samting we Jisas i tijim ol man long hem?

TAEM Jisas i tijim ol man antap long hil, hem i talem Lodsprea olsem wan eksampol blong prea. Prea ya i tokbaot stamba samting we Jisas i stap tijim ol man long hem. Hem i se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Mat. 6:9-13, NW) Jisas i “wokbaot, i goraon long olgeta taon mo olgeta vilej, nao hem i stap prij, mo i stap talemaot gud nius blong kingdom blong God.” (Luk 8:1, NW) Jisas i pulum ol man blong hem blong folem tok ya se: “Yufala i mas gohed blong lukaot kingdom mo stret fasin blong [God] fastaem.” (Mat. 6:33, NW) I gud yu traem luksave olsem wanem blong yusum save long stadi ya long wok blong prij. Maet yu traem ansa long ol kwestin ya: ?Gud nius blong Kingdom i impoten olsem wanem? ?From wanem ol man oli nidim we God i sevem olgeta? ?Mo olsem wanem Kingdom blong God bambae i sevem yumi?

2. ?Gud nius blong Kingdom i impoten olsem wanem?

² Jisas i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Mat. 24:14, NW) Gud nius blong Kingdom blong God i impoten tumas. !Yes, hem i moa impoten i bitim olgeta narafala nius we man i save talemaot! Long bitim 100,000 kongregesen blong ol Witnes blong Jeova long wol, samwe long seven milian man blong God oli stap mekem wok ya blong prij, long fasin we i bigwan moa i bitim olgeta yia bifo. Oli stap talemaot se Kingdom blong God i stanap finis. Hemia i gud nius from we i min se God i putumap finis wan gavman long heven blong rulum fulwol. Aninit long rul blong Kingdom ya, samting we Jeova i wantem, bambae i kamaot long wol ya olsem i kamaot long heven.

3, 4. ?Taem ol samting we God i wantem oli kamaot long wol, wol bambae i olsem wanem?

³ ?Taem ol samting we God i wantem oli kamaot long wol, olsem wanem long ol man? Jeova bambae i “ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” (Rev. 21:4) Ol man bambae oli no moa sik mo ded from sin we oli kasem long Adam. Ol dedman we God i stap tingbaot olgeta yet, bambae oli gat janis blong kasem laef we i no save finis, from we Baebol i talem se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Wok 24:15) Bambae i no moa gat faet, sik, hanggri, mo wol ya bambae i kam paradaes. Ol anamol we oli denja, bambae oli kam kwaet, bambae oli frengud wetem man mo wetem ol narafala anamol.—Sam 46:9; 72:16; Aes. 11:6-9; 33:24; Luk 23:43, NW.

⁴ !Ol blesing ya we bambae oli kamaot from rul blong Kingdom, oli nambawan tumas! Taswe, profet tok blong Baebol i talem ol gudfala toktok long saed blong laef long taem ya, i se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” ?Be olsem wanem long ol man we oli mekem trabol? Baebol i talem se: “Bambae i no longtaem, ol man nogud oli lus.” Be “olgeta we oli trastem Hae God bambae oli tekem graon ya i blong olgeta.”—Sam 37:9-11.

5. ?Wanem bambae i hapen long wol ya?

⁵ Blong mekem se samting we God i wantem i kamaot long wol, ol defdefren gavman, jos, mo  big bisnes, oli mas lus. Mo hemia nao samting we gavman blong God long heven bambae i mekem. God i pulum profet Daniel blong raetem se: “Long taem blong ol king ya [we oli stap naoia], God blong heven bambae i stanemap wan kingdom [long heven] we neva i save foldaon. Mo bambae kingdom ya i no save go long han blong narafala man. Bambae hem i smasem mo i finisim olgeta narafala kingdom [we oli stap naoia], mo hem nomo bambae i stanap olwe.” (Dan. 2:44, NW) Niufala gavman ya long heven, Kingdom blong God, bambae i rul antap long wan niufala kampani blong man long wol. Bambae i gat “niufala skae mo niufala wol, we stret fasin nomo bambae i stap long hem.”—2 Pita 3:13.

Tede Yumi Nidim Moa We God i Sevem Yumi

6. ?Baebol i talem wanem long saed blong ol nogud fasin blong wol ya?

⁶ Setan, Adam, mo Iv, trifala i agensem God taem trifala nomo i wantem jusum wanem samting i stret mo wanem samting i no stret. Long taem ya, trifala i stat long wan rod we i lidim ol man blong kasem bigfala trabol. Moa long 1,600 yia afta long stronghed fasin ya long Iden, jes bifo we bigfala wota i kavremap wol, “olgeta man long wol oli stap mekem i nogud tumas, mo oltaem, tingting blong olgeta i fulap nomo long ol rabis fasin.” (Jen. 6:5) Samwe long 1,300 yia afta long taem ya, Solomon i luk se ol samting long wol ya i nogud tumas, ale i raetem se: “Mi luk se olgeta we oli ded finis oli laki, oli stap gud, i winim olgeta we oli stap laef yet. Be ol man we oli no bon yet oli laki moa, i winim olgeta we oli ded finis, wetem olgeta we oli stap laef, from we oli no luk ol fasin nogud blong ol man ya we oli stap spolem ol narafala man long wol ya.” (Pri. 4:2, 3) Naoia, 3,000 yia afta long taem blong Solomon, yumi luk se fasin nogud ya i stap kam antap yet.

7. Naoia bitim bifo, yumi nidim we God i sevem yumi. ?From wanem?

⁷ I tru se longtaem finis fasin nogud i stap long wol. Be naoia bitim olgeta taem bifo, yumi nidim we Kingdom blong God i sevem yumi. Long 100 yia we i jes pas, ol samting i kam moa nogud bitim bifo, mo i stap kam moa nogud yet. Wan ripot (Worldwatch Institute) i talem se: “Namba blong ol man we oli ded long olgeta faet we oli kamaot long ol yia 1900, i tri taem antap long namba blong olgeta man we oli ded long ol faet stat long yia 100 i kam kasem yia 1899.” !Yes, bitim 100 milian man oli ded long ol faet stat long yia 1914 kam kasem naoia! Wan insaeklopedia i talem se maet namba blong ol man we oli ded long Wol Wo Tu i kasem 60 milian. Sam neson oli stap hivimap ol niuklia tul blong faet, mekem se naoia ol man oli naf blong kilim i ded wan bigfala haf blong ol man blong wol wantaem nomo. Mo tu, nating we ol saentis mo ol dokta oli stap faenem plante niufala samting blong givhan long ol man, be evri yia i gat faef milian pikinini we oli ded from hanggri.—Lukluk japta 9 blong buk ya ?Wanem Samting We Baebol i Rili Tijim?

8. ?Ol taosen yia we man i rul finis oli soemaot wanem?

⁸ Ol traehad blong man oli no save stopem ol nogud fasin. Long olgeta yia we i pas, politik, big bisnes, mo ol jos, oli neva givim ol stamba samting we man i nidim, hemia pis, plante samting, mo gud helt. Oli no save rod nating blong stretem  ol bigfala problem we ol man oli fesem, oli jes ademap moa problem bakegen. Yes, ol taosen yia we man i rul finis, oli soemaot se tok blong Baebol i tru, taem hem i talem se: “Man blong graon i no masta blong rod blong hem. Man i no naf blong jusum wanem rod hem i mas wokbaot long hem.” (Jer. 10:23, NW) Tru ya, “sam man oli gat paoa, mo ol narafala man oli stap aninit long olgeta, oli stap harem nogud.” (Pri. 8:9) Mo tu, “olgeta samting ya we God i mekem oli stap krae, from we olgeta oli stap harem nogud.”—Rom 8:22.

9. ?Ol Kristin oli save se laef bambae i olsem wanem long “ol las dei”?

⁹ Baebol i tokbaot taem blong yumi, i se: “Long taem [“blong ol las dei,” NW], laef long wol ya bambae i kam strong tumas.” Afta we profet tok ya i talemaot ol trabol we rul blong man bambae i mekem long ol las dei, hem i se: “Ol man nogud wetem ol man blong giaman, bambae oli save gohed blong mekem i mowas olgeta.” (Ridim 2 Timoti 3:1-5, 13.) Ol Kristin oli save se bambae i olsem, from we “olgeta man blong wol ya oli stap long paoa blong Setan.” (1 Jon 5:19) Be i gat gud nius i stap. I no longtaem God bambae i sevem olgeta we oli lavem hem. Bambae hem i sevem olgeta oli aot long ol nogud fasin blong wol ya we i stap gohed blong kam mowas.

Wan Man Nomo We Yumi Save Trastem Blong Sevem Yumi

10. ?From wanem yumi save trastem Jeova nomo blong sevem yumi?

¹⁰ Taem yu stap talemaot gud nius, i gud blong mekem i klia long ol man se yumi save trastem Jeova nomo blong sevem yumi. Hem nomo we i wantem tumas blong sevem ol man blong hem oli aot long ol trabol. Mo hem nomo we i gat paoa blong sevem olgeta. (Wok 4:24, 31; Rev 4:11) Yumi save se Jeova bambae i sevem ol man blong hem mo mekem ol plan blong hem oli kamtru, from we hem i promes se: “Mi mi talem tru. !Plan blong mi bambae i mas kamtru!” Bambae tok blong hem “i mekem olgeta samting we [hem i] mekem plan se i mas mekem, we i no mestem wan long olgeta.”—Ridim Aesea 14:24, 25; 55:10, 11.

11, 12. ?Wanem promes we God i mekem long ol man blong hem?

¹¹ Jeova i promes finis se bambae hem i sevem ol man blong hem taem hem i mekem jajmen blong hem i kamtru long ol rabis man. Taem hem i sanem profet Jeremaea blong tok strong long ol man we oli stap mekem ol bigfala sin, hem i talem long Jeremaea se: “Yu no mas fraet long olgeta.” ?From wanem? “From we mi bambae mi stap wetem yu blong blokemgud yu.” (Jer. 1:8) Sem mak long taem ya we Jeova i spolem ol man Sodom mo Gomora from rabis fasin blong olgeta. Hem i sanem tu enjel i go fastaem blong lidim Lot mo famle blong hem oli go long wan sef ples. Biaen, “Hae God i mekem salfa we i laet . . . i folfoldaon olsem ren long tufala taon ya Sodom mo Gomora.”—Jen. 19:15, 24, 25.

¹² Jeova i naf blong sevem ol man blong hem long olgeta ples blong wol, evriwan wantaem. Tingbaot taem ya we hem i bin mekem bigfala wota i kavremap wol blong spolem ol rabis man. “Hem i sevem Noa we i wan prija we i stap talemaot stret fasin, wetem seven narafala man.” (2 Pita 2:5) Bambae Jeova i sevem ol stret man bakegen, taem hem i spolem rabis wol blong naoia. Taswe, Tok blong hem i talem se: “Yufala long ples ya, we tingting blong yufala i stap daon, . . . i gud yufala i [“lukaot Jeova,” NW]. Yufala i mas mekem ol samting we i stret, mo yufala i mas mekem tingting blong yufala i stap daon long fes blong hem. Sipos yufala i mekem olsem, taem dei blong kros blong hem i kamtru, maet hem i no save givim panis long yufala.” (Sef. 2:3) Samting we bambae i kamaot from jajmen blong God long fulwol ya, hemia: “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya.”—Prov. 2:21, 22.

13. ?Olsem wanem Jeova bambae i sevem ol man blong hem we oli ded finis?

¹³ Be plante man blong God oli ded finis, maet from sik, no from we ol narafala oli ronem mo kilim olgeta, no from wan narafala samting. (Mat. 24:9) ?Olsem wanem God bambae i sevem olgeta ya? Olsem yumi luk finis, “God bambae i mekem olgeta [stret] man we oli ded oli laef bakegen.” (Wok 24:15) !I no gat wan samting we i save blokem Jeova blong sevem ol man blong hem! !Samting ya i mekem yumi haremgud tumas!

 Wan Gavman We i Stret

14. ?From wanem yumi sua se Kingdom blong God i wan gavman we i stret?

¹⁴ Long wok blong prij, yu save eksplenem long ol man se Kingdom blong Jeova long heven i wan gavman we i stret. Hemia from we Kingdom ya i stanap long ol nambawan fasin blong God, olsem stret fasin blong jajem man, ol narafala stret fasin, mo lav. (Dut. 32:4; 1 Jon 4:8) God i putum Kingdom ya long han blong Jisas Kraes. I no gat wan man we i moagud long Jisas blong rulum wol ya. Mo tu, Jeova i yusum tabu spirit blong makemaot 144,000 Kristin we bambae oli go laef long heven wetem Kraes blong rulum wol ya.—Rev. 14:1-5.

15. ?Olsem wanem rul blong Kingdom blong God i defren long rul blong man?

¹⁵ !Rul blong Jisas mo ol 144,000 ya bambae i defren olgeta long rul blong ol sinman! Plante taem ol rula blong wol ya oli mekem i nogud tumas long ol man, oli lidim ol man blong mekem ol faet we plante milian man oli ded from. Taswe Baebol i talem se yumi no mas trastem ol man blong wol ya, from we “olgeta oli no save sevem [yumi].” (Sam 146:3) !Be Kraes bambae i rul long nambawan fasin! Jisas i talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”—Mat. 11:28-30.

!I No Longtaem Ol Las Dei Bambae Oli Finis!

16. ?Bambae ol las dei ya oli finis olsem wanem?

¹⁶ Ol las dei no “lashaf blong fasin blong laef long wol ya,” i stat long yia 1914. (Mat. 24:3, NW) I no longtaem nating, “bigfala trabol” we Jisas i tokbaot bambae i kamtru. (Ridim Matiu 24:21.) Bigfala trabol ya we i bitim olgeta trabol bifo, bambae i finisim wol blong Setan. ?Be wanem bambae i makem stat blong bigfala trabol ya? ?Mo wanem bambae i makem en blong hem?

17. ?Baebol i talem wanem long saed blong stat blong bigfala trabol ya?

¹⁷ Bigfala trabol ya bambae i stat wantaem nomo. Taem ol man oli talem se “!Pis mo seftaem!” bambae oli sek we “dei blong Jeova” i stat. “Yufala i save gud finis we dei blong Jeova [bambae] i kam stret olsem man blong stil i kam long naet. Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.” (Ridim 1 Tesalonaeka 5:2, 3, NW) Taem ol neson oli ting se klosap oli stretem finis sam bigfala problem blong olgeta, long taem ya nao bigfala trabol ya bambae i stat. Olgeta man long wol bambae oli sek we wantaem nomo, olgeta giaman skul blong wol, hemia ‘Bigfala Babilon,’ bambae i lus. Ol king mo plante narafala bakegen bambae oli sapraes we oli sapraes taem God i mekem jajmen blong hem i kamtru long Bigfala Babilon ya.—Rev. 17:1-6, 18; 18:9, 10, 15, 16, 19.

18. ?Taem Setan i agensem ol man blong Jeova, wantaem nomo Jeova bambae i mekem wanem?

¹⁸ Long wan spesel taem, bambae i gat “ol saen long san, mo long mun mo long ol sta,” mo tu, ‘saen blong Pikinini blong Man bambae i kamaot long skae.’ Long taem ya, yumi save ‘stanap stret mo leftemap hed blong yumi, from we i no longtaem God bambae i sevem yumi.’ (Luk 21:25-28, NW; Mat. 24:29, 30) Setan, we narafala nem blong hem Gog, bambae i tanem ful paoa blong hem agens long ol man blong God. Bambae Setan i yusum ol man blong hem blong agensem strong ol trufala man blong Jeova. Be Jeova i talem long ol  man blong hem se: “Taem wan man i kilim yufala, i olsem we man ya i kilim ae blong mi stret.” (Sek. 2:8) Taswe, nating we Setan i traehad, be bambae hem i no save spolem ol man blong Jeova. ?From wanem? From we wantaem nomo, Haefala King mo Masta ya Jeova bambae i tekem aksen blong sevem ol man blong hem.—Esik. 38:9, 18.

19. ?From wanem yumi save bilif strong se ol ami blong God bambae oli spolem wol blong Setan?

¹⁹ Taem God i girap agensem ol neson, ‘bambae oli save se hem i Jeova.’ (Esik. 36:23, NW) Bambae hem i sanem ol ami blong hem—plante milian enjel we Jisas Kraes i lidim olgeta—blong spolem ol laswan haf blong wol blong Setan. (Rev. 19:11-19) Tingbaot se long taem bifo, wan enjel i bin “kilim wan handred eiti faef taosen [enemi blong God] oli ded” long wan naet. Taswe, yumi save se bambae i isi nomo long ol ami blong Jeova long heven blong spolem olgeta haf blong wol blong Setan long Amagedon, faet ya we bambae i finisim bigfala trabol ya. (2 King 19:35; Rev. 16:14, 16) Nao Setan mo ol rabis enjel blong hem bambae oli go kalabus blong wan taosen yia long bigfala hol ya we i godaon we i godaon. Biaen bambae oli lus blong olwe.—Rev. 20:1-3.

20. ?Jeova bambae i yusum Kingdom blong hem blong mekem wanem?

²⁰ Long rod ya nao, heven mo wol bambae i kam klin, bambae i no moa gat ol nogud fasin, mo ol stret man bambae oli laef long wol ya gogo i no save finis. Jeova bambae i pruvum se hem i Bigfala Man Blong Sevem Man. (Sam 145:20) Bambae hem i yusum Kingdom blong hem blong mekem hae rul blong hem i win, mo blong leftemap tabu nem blong hem, mo blong mekem bigfala plan blong hem i kamtru long wol ya. !I gud yumi kasem bigfala glad long wok blong prij, taem yumi gohed blong talemaot gud nius long olgeta we “oli stret blong kasem laef blong olwe,” mo taem yumi halpem olgeta blong kasem save se i no longtaem, Kingdom blong God bambae i sevem yumi!—Wok 13:48, NW.

?Yu Yu Save Tingbaot?

• ?Olsem wanem Jisas i makem se Kingdom i impoten?

• Naoia bitim bifo, yumi nidim we God i sevem yumi. ?From wanem?

• ?Bambae yumi save luk wanem samting i kamaot long taem blong bigfala trabol?

• ?Olsem wanem Jeova i soemaot se hem i Bigfala Man Blong Sevem Man?

[Kwestin]

[Tok blong pija long pej 18]

Jeova i sevem Noa mo famle blong hem, taswe Hem i save sevem yumi tu