Taem Yu Yang Yet, Jusum Blong Mekem Wok Blong Jeova
Taem Yu Yang Yet, Jusum Blong Mekem Wok Blong Jeova
“Yu mas stanap strong long ol samting we yu lanem finis, we man i pulum yu blong yu bilif long hem.”—2 TIM. 3:14, NW.
1. ?Jeova i tingbaot wok blong ol yangfala Witnes blong hem se i olsem wanem?
TABU wok blong God we ol yangfala oli mekem i impoten tumas long lukluk blong Jeova. From samting ya, Jeova i talemaot wan profet tok long saed blong ol yangfala ya. Man blong raetem Sam i singsing se: “Long dei we bambae ol ami blong yu oli rere blong faet, bambae ol man blong yu oli kam joen, oli glad blong mekem wok. Taem i jes brok delaet, bambae yu yu gat kampani blong ol yangfala blong yu, oli kam long yu long fasin we i klingud, i tabu, we olgeta oli olsem ol drop blong wota blong naet.” (Sam 110:3, NW) Yes, Jeova i rili tinghae long ol yangfala we oli wantem mekem wok blong hem.
2. ?Wanem ol samting raonabaot long wan yangfala tede, we i save gat paoa long desisen blong hem long saed blong fiuja?
2 ?Yufala ol yangfala long Kristin kongregesen, yufala i givim laef blong yufala finis long Jeova? Maet plante yangfala oli faenem i had blong tekem desisen ya se bambae oli mekem wok blong God no nogat. Ol bos long wok, ol tija mo samtaem ol memba blong famle mo fren oli leftemap tingting blong ol yangfala blong kasem ol mak long wol ya. Plante taem, ol man oli jikim ol yangfala we oli wantem kasem ol mak long saed blong spirit. Be i klia se beswan samting we yu save mekem long laef blong yu hemia blong mekem wok blong God. (Sam 27:4) From samting ya, i gud yu tingbaot trifala kwestin ya: ?From wanem yu mas mekem wok blong God? ?Olsem wanem yu save kasem mak ya we yu givim laef blong yu i go long God nomata wanem samting we ol narafala oli talem no mekem long yu? ?Wanem sam nambawan janis we yu save gat blong mekem tabu wok blong God?
Wok Blong Jeova, Hemia Nao Samting We i Stret Blong Mekem
3. ?Ol samting we Jeova i wokem oli pusum yumi blong mekem wanem?
3 ?From wanem yu mas mekem wok blong God ya we i tru mo i laef i stap? Revelesen 4:11 i givim stamba risen ya se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” Jeova i nambawan man we i wokem olgeta samting. !Tingbaot naesfala wol ya! Ol tri, ol flaoa, ol anamol, bigfala open solwota, ol hil mo ol wotafol. Jeova nao i mekem olgeta. Ol Sam 104:24 i talem se: “Wol ya i fulap long olgeta samting we [God] i mekem.” !Yumi talem tangkiu tumas we Jeova i soem lav long yumi taem hem i givim wan bodi mo wan tingting we i save givhan long yumi blong haremgud long wol ya mo ol gudfala samting we oli stap long hem! Ol nambawan samting ya we Jeova i wokem oli pusum yumi blong wantem mekem wok blong hem.
4, 5. ?Wanem wok blong God we i pulum Josua blong kam klosap long Jeova?
4 Long ol tok blong lida ya blong Isrel hemia Josua, yumi save faenem wan narafala risen blong mekem wok blong Jeova. Klosap long en blong laef blong hem, Josua i talem long ol man blong God se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan.” ?From wanem Josua i talem tok ya?—Jos. 23:14.
5 Taem Josua i wan pikinini mo i stap gruap long Ijip, i sua se hem i harem ol promes blong Jeova se bambae Hem i givim graon long ol man Isrel blong oli stap long hem. (Jen. 12:7; 50:24, 25; Eks. 3:8) Mo tu, Josua i luk taem ya we Jeova i stat blong mekem ol promes blong hem oli kamtru, hemia taem Hem i mekem ol Ten Trabol oli kamaot long Ijip mo i fosem Fero blong i letem ol man Isrel oli go fri. Josua i wan long olgeta we i sef long Red Si mo hem i bin luk taem solwota i kambak mo i kavremap Fero mo ol ami blong hem. Josua i luk we Jeova i givim evri samting we ol man Isrel oli nidim, taem oli mekem longfala wokbaot ya we i “pastru long bigfala draeples ya we i nogud olgeta,” hemia Draeples ya Sinae. I no gat wan long ol man Isrel we i ded from we hem i tosta no i hanggri. (Dut. 8:3-5, 14-16; Jos. 24:5-7) Taem ol man Isrel oli mas faet blong winim ol kantri blong Kenan mo kasem Promes Lan, Josua i luk olsem wanem God ya we hem mo ol man Isrel oli wosipim, i givhan long olgeta long taem ya.—Jos. 10:14, 42.
6. ?Wanem i save halpem yu blong wokem fasin ya blong wantem mekem wok blong God?
6 Josua i save se Jeova i holem promes blong Hem. From samting ya, Josua i talem se: “Mi, wetem ol famle blong mi, bambae mifala i biaen long [Jeova] nomo.” (Jos. 24:15) ?Olsem wanem long yu? ?Taem yu tingbaot ol promes we trufala God i mekem oli kamtru finis mo ol promes we bambae oli kamtru yet, yu yu wantem blong mekem wok blong Hem olsem we Josua i bin mekem?
7. ?From wanem baptaes i wan impoten step blong tekem?
7 Taem yu tingbaot ol gudfala wok blong Jeova mo yu tingting dip long ol nambawan promes blong hem we yu save trastem olgeta ya fulwan, samting ya i mas pusum yu, i no blong givim laef blong yu long Jeova nomo be blong soemaot samting ya taem yu tekem baptaes. Baptaes i wan impoten step long olgeta we oli wantem mekem wok blong God. Jisas i soemaot klia eksampol long saed ya. Jes bifo we Jisas i statem wok blong hem olsem Mesaea, hem i kam long Jon Baptaes blong i baptaesem hem. ?From wanem Jisas i wantem baptaes? Smoltaem biaen hem i talem se: “Mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.” (Jon 6:38) Ale, Jisas i baptaes blong soemaot se hem i givim laef blong hem blong mekem wil blong Papa blong hem.—Mat. 3:13-17.
8. ?From wanem Timoti i jusum blong wosip long God, mo maet yu yu nidim blong mekem wanem?
8 Tingbaot Timoti, wan yangfala Kristin we biaen Jeova i givim plante wok long hem we sam long ol wok ya oli spesel. ?From wanem Timoti i tekem desisen ya blong mekem wosip long trufala God? Baebol i talem long yumi se ‘hem i lanem samting finis mo hem i bilif long samting ya.’ (2 Tim. 3:14, NW) Sipos yu stadi long Tok blong God mo yu bilif se ol tijing blong hem oli tru, yu olsem Timoti. Naoia yu nidim blong mekem wan desisen. I gud yu toktok wetem papa mama blong yu long saed blong ol samting we yu plan blong mekem. Papa mama blong yu wetem ol elda long kongregesen tu, oli save halpem yu blong kasem save long ol samting we Baebol i talem se man i mas mekem blong hem i naf blong baptaes.—Ridim Ol Wok 8:12.
9. ?Baptaes blong yu i save mekem wanem long ol narafala?
9 Baptaes i wan nambawan stat long laef blong yu blong mekem wok blong trufala God. Taem yu kasem step ya, yu joen long wan longfala resis we i go kasem laef we i no save finis mo yu kasem glad naoia from we yu stap mekem wil blong God. (Hib. 12:2, 3) Bambae yu mekem ol famle mo fren blong yu long Kristin kongregesen, we olgeta tu oli joen finis long resis ya, oli glad. Samting we i moa impoten hemia se yu mekem hat blong Jeova i glad tumas. (Ridim Ol Proveb 23:15.) Yes i tru, maet ol narafala oli no kasem save se from wanem yu jusum blong wosip long Jeova mo maet oli ting se yu mekem wan rong desisen. Maet oli save agensem yu. Be yu save winim ol traem ya.
Taem Ol Narafala Oli Ting Se Desisen We Yu Mekem i Rong Mo Oli Agensem Yu
10, 11. (a) ?Wanem ol kwestin we maet ol man oli askem long yu long saed blong desisen blong yu blong mekem wok blong God? (b) ?Yu save lanem wanem long fasin blong Jisas blong ansa long ol kwestin we ol man oli askem long hem long saed blong trufala wosip?
10 Maet desisen blong yu blong mekem wok blong Jeova i mekem ol fren blong yu long skul, ol man raonabaot long yu mo ol famle blong yu oli konfius. Maet oli askem long yu se from wanem yu jusum blong folem rod ya mo wanem bilif blong yu. ?Bambae yu yu ansa olsem wanem? Yu mas skelem tingting mo filing blong yu blong bambae yu naf blong eksplenem ol risen from wanem yu jusum rod ya. Mo taem yu stap ansarem ol kwestin long saed blong bilif blong yu, i gud we yu folem beswan eksampol blong yumi, hemia Jisas.
11 Taem ol lida blong skul blong ol man Jiu oli askem kwestin long Jisas long saed blong laef bakegen long ded, Jisas i pulum tingting blong olgeta i go long wan vas we oli no bin tingbaot. (Eks. 3:6; Mat. 22:23, 31-33) Taem wan tija blong loa i askem hem se weswan loa nao i hae moa long ol narafala loa, Jisas i talem stret vas long hem. Man ya i glad tumas from we Jisas i givim ansa long hem. (Lev. 19:18; Dut. 6:5; Mak 12:28-34) Jisas i yusum Baebol mo fasin blong hem blong toktok i mekem se “ol man ya oli seraot from Jisas,” mo ol man we oli agensem hem oli no save mekem wan samting long hem. (Jon 7:32-46) Taem yu ansa long ol kwestin we narafala i askem long saed blong bilif blong yu, i gud we yu yusum Baebol mo ansa long fasin we yu ‘toktok gud long man mo yu ona long hem.’ (1 Pita 3:16 [15, NW]) Sipos yu no save ansa blong wan kwestin we man i askem, i gud blong talem stret se yu no save ansa blong kwestin ya mo talem se bambae yu go mekem risej fastaem blong faenem ansa blong hem. Biaen, yu save yusum Watch Tower Publications Index no Watchtower Library long CD-ROM, sipos i gat long lanwis blong yu, blong faenem moa save long saed blong kwestin ya. Taem yu reregud olsem, bambae yu ‘save rod blong givim ansa we i stret gud.’—Kol. 4:6.
12. ?From wanem yu no mas letem fasin agens i daonem tingting blong yu?
12 Ol man bambae oli askem plante kwestin long saed blong desisen blong yu blong mekem wok blong God mo ol bilif blong yu. Yu no mas fogetem se enemi blong God, Devel Setan, i rulum wol ya. (Ridim 1 Jon 5:19.) I no evri man we bambae oli talem ol gudfala toktok long yu mo soem se oli glad long yu. Mo maet bambae sam man oli agensem yu. Maet sam man oli ‘tok nogud long yu,’ mo maet oli gohed blong tok olsem long yu. (1 Pita 4:4) Be yu mas tingbaot se i no yu nomo we yu kasem traem. Jisas Kraes tu i safa from ol man oli agensem hem. Aposol Pita tu i kasem traem mo from samting ya hem i raetem se: “Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem, be plante narafala Kristin man tu oli kasem. I stret blong yufala i harem gud, from we yufala i joen long Kraes, mo yufala i stap kasem haf blong ol samting ya we i mekem hem i harem nogud.”—1 Pita 4:12, 13.
13. ?From wanem ol Kristin oli save haremgud taem ol man oli mekem trabol long olgeta?
13 Taem ol man oli mekem trabol long yu mo oli agensem yu from we yu wan Kristin, yu yu save glad bigwan. ?From wanem? From we sipos ol man blong wol oli glad long yu, hemia i soemaot se fasin blong laef blong yu i laenap wetem tingting blong Setan, i no tingting blong God. Jisas i givim woning ya se: “Sipos ol man oli stap leftemap nem blong yufala, sore tumas long yufala. Fasin ya, i sem fasin nomo we ol olfala blong olgeta oli bin mekem long ol giaman profet blong bifo.” (Luk 6:26) Fasin agens i soemaot se Setan mo ol man blong hem long wol oli kros long yu from we yu mekem wok blong Jeova. (Ridim Matiu 5:11, 12.) Mo yu save glad sipos ‘ol man oli tok nogud long yu from we yu man blong Kraes.’—1 Pita 4:14.
14. ?Wanem gudfala frut i save kamaot taem wan man i stap tru long Jeova nating se hem i kasem trabol?
14 I gat fo gudfala frut i save kamaot taem yu stap tru long Jeova nomata yu kasem trabol. Yu givim witnes long saed blong God mo Pikinini blong hem. Fasin blong yu blong stanap strong longtaem i leftemap tingting blong ol Kristin brata mo sista blong yu. Sam man we oli no save Jeova, be taem oli luk fasin blong yu, maet hemia i pusum olgeta blong wantem save Jeova. (Ridim Filipae 1:12-14.) Mo lav we yu gat long Jeova bambae i gru taem yu luk olsem wanem Jeova i givim paoa long yu blong winim ol traem.
Wan Bigfala “Doa” i Open Long Yu
15. ?Wanem bigfala “doa” ya we i open long aposol Pol?
15 Long saed blong wok blong prij we aposol Pol i mekem long Efesas, hem i raetem se: “Doa i open finis long mi, blong mi mekem wan gudfala wok.” (1 Kor. 16:8, 9) Doa ya i minim se Pol i gat janis blong mekem bigfala wok blong talemaot gud nius mo pulum ol man long taon ya oli kam disaepol. Afta we Pol i tekem janis ya, olsem we hem i pastru long doa ya, hem i halpem plante man blong oli save Jeova mo wosip long Hem.
16. ?Olsem wanem ol tabu Kristin we oli stap yet long wol oli pastru long “doa” ya we i open long 1919?
16 Long 1919, Jisas Kraes we i tekem paoa blong hem finis long heven i ‘openem wan doa’ long ol tabu Kristin we oli stap yet long wol. (Rev. 3:8) Olgeta ya oli pastru long doa ya mo oli stat blong wok strong bitim bifo blong talemaot gud nius, oli stap tijim trutok blong Baebol long ol man. Frut we i kamaot from wok blong olgeta hemia se naoia gud nius i kasem olgeta ples blong wol mo klosap seven milian man oli gat hop ya blong kasem laef olwe long niufala wol blong God.
17. ?Olsem wanem yu save pastru long bigfala “doa” ya we i givim janis long man blong “mekem wan gudfala wok”?
17 “Doa” we i open blong givim janis long man blong “mekem wan gudfala wok” i open bigwan yet long olgeta man blong Jeova. Olgeta we oli pastru long doa ya oli haremgud mo glad taem oli joen fulwan long wok ya blong talemaot gud nius. ?Yufala ol yangfala man blong Jeova, yufala i tinghae long bigfala janis ya blong halpem ol narafala blong oli “bilif long gud nius ya”? (Mak 1:14, 15) ?Yu bin tingbaot blong mekem wok ya blong fultaem paenia no haftaem paenia? Wokem ol Haos Kingdom, wok long Betel, wok olsem misinari mo wok olsem spesel paenia tu i wan narafala janis we maet plante long yufala i save kasem. From we i gat smol taem nomo i stap yet bifo we wol ya blong Setan i lus, i gud blong joen long ol wok ya blong Kingdom. Evri dei, wok ya i kam moa impoten. ?Bambae yu yu pastru long bigfala “doa” ya, naoia we i gat smol taem yet i stap?
“Traem Trastem Jeova, Nao Bambae Yu Luk Se Hem i Gud”
18, 19. (a) ?Wanem i halpem Deved blong wantem tumas blong mekem wok blong Jeova? (b) ?Wanem i soemaot se Deved i neva sore se hem i bin mekem wok blong God?
18 Man blong raetem Sam i singaot ol narafala blong “traem trastem Jeova, nao bambae [oli] luk se hem i gud.” (Sam 34:8, NW) Taem King Deved blong Isrel bifo i wan yangfala boe we i stap lukaot long sipsip, Jeova i protektem hem long ol wael anamol. Jeova i givhan long hem taem hem i faet wetem Golaeat mo i sevem hem long plante narafala trabol. (1 Saml. 17:32-51; Sam 18, smol toktok long stat blong Sam ya) From we Jeova i soemaot lav we i kaengud long Deved, fasin ya i pusum Deved blong raetem se: “[Jeova], yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu.”—Sam 40:5.
19 Lav we Deved i gat long Jeova i kam strong moa mo i pusum hem blong wantem presem Jeova wetem olgeta hat mo tingting blong hem. (Ridim Sam 40:8-10.) Taem ol yia oli stap pas, Deved i neva sore se hem i bin spenem laef blong hem blong wosipim trufala God. Bigfala samting long laef blong hem i blong ona long Jeova—hemia wan stamba samting we i givim glad. I no gat wan narafala samting we i save givim glad olsem. Taem Deved i olfala, hem i talem se: “Mi putum tingting blong mi, i stap long yu nomo [Jeova]. I stat bifo, taem mi mi yangfala yet, mi stap trastem yu. Naoia mi mi olfala, hea blong mi i waet . . . plis . . . yu no lego mi.” (Sam 71:5, 18) Deved i trastem Jeova mo fasin fren we hem i gat wetem Jeova i kam moa strong, nating se hem i no moa gat paoa from we hem i olfala.
20. ?From wanem wok blong God i beswan wok blong mekem long laef blong yu?
20 Josua, Deved mo Timoti oli pruvum long laef blong olgeta se wok blong Jeova i beswan wok blong mekem long laef blong yu. Ol wok blong wol ya oli givim ol samting we yu haremgud long hem blong smoltaem nomo. Oli no save givim ol nambawan blesing we yu save kasem taem yu ‘mekem wok blong Jeova wetem olgeta tingting [hat] mo laef blong yu.’ (Jos. 22:5) Sipos yu no givim laef blong yu long Jeova tru long prea yet, i gud yu tingbaot kwestin ya: ‘?Wanem i blokem mi, blong mi no kam wan Witnes blong Jeova?’ ?Sipos yu baptaes finis olsem man blong God, yu yu wantem kasem moa glad long laef blong yu? Ale, i gud yu mekem moa long wok blong God mo yu gohed blong gru long saed blong spirit. Nekis stadi bambae i soemaot long yu olsem wanem yu save kamgud moa long ol samting ya taem yu folem eksampol blong aposol Pol.
?Bambae Yu Yu Ansa Olsem Wanem?
• Talem tu risen we i soemaot from wanem yumi mas mekem wok blong God.
• ?Wanem i halpem Timoti blong tekem desisen ya blong mekem wok blong God?
• ?From wanem yu mas stanap strong taem samfala oli mekem nogud long yu?
• ?Wanem ol janis we yu save gat blong mekem sam moa wok?
[Kwestin]
[Tok blong pija long pej 23]
Wok blong Jeova i beswan wok we yu save mekem long laef
[Tok blong pija long pej 24]
?Yu yu save ansa long ol kwestin we ol man oli askem long saed blong bilif blong yu?