Gohed Blong ‘Lavem God Olsem We Yumi Lavem Hem Fastaem’
Gohed Blong ‘Lavem God Olsem We Yumi Lavem Hem Fastaem’
“Yufala i mas holemgud ol samting ya we yufala i kasem finis.”—REV. 3:11.
1, 2. ?Yu yu harem olsem wanem taem yu luksave se samting we yu lanem long saed blong Jeova, hem i tru?
?YU YU rimemba long taem ya we yu jes kasem save long nambawan fiuja we Jeova i promes blong givim long ol man we oli obei long hem? Ating bifo yu bin stap long wan narafala jos. Sipos i olsem, ?yu yu harem olsem wanem taem wan narafala i yusum Baebol blong eksplenem plan blong God long yu? ?Yu yu harem olsem wanem taem narafala i eksplenem klia nomo wan tijing blong Baebol we fastaem i hadwok long yu blong kasem save long hem? Ating long taem ya yu bin kasem save se save ya we yu gat long saed blong God i no stret. !Be naoia we yu yu kasem save long trutok, yu glad we yu glad! ?Olsem wanem? ?Yu yu gruap long wan Kristin famle? Sipos i olsem, ?yu yu tingbaot se yu harem olsem wanem taem yu luksave fulwan se ol samting we yu lanem long saed blong Jeova oli tru, ale yu tekem desisen blong folem trutok ya?—Rom 12:2.
2 Plante long ol Kristin brata sista blong yu bambae oli talem se oli bin harem we oli glad tumas, oli harem se oli kam klosap long Jeova, mo oli talem tangkiu long Hem from we hem i pulum olgeta oli kam long kongregesen blong hem. (Jon 6:44) Glad ya we oli kasem i pulum olgeta blong joen long ol Kristin wok. Glad i fulap long olgeta, ale oli wantem se ol narafala tu oli kasem sem glad ya. ?Olsem wanem long yu? ?Yu tu yu harem olsem?
3. ?Taem Jisas i sanem wan leta i go long kongregesen blong Efesas, kongregesen ya i stap olsem wanem?
3 Taem Jisas i toktok long ol Kristin long kongregesen blong Efesas long faswan handred yia, hem i tokbaot we olgeta ‘oli no moa lavem God olsem we oli lavem hem fastaem.’ Ol Kristin long Efesas oli gat plante gudfala fasin, be lav ya we oli bin gat fastaem long Jeova, i godaon. Taswe, Jisas i talem long olgeta se: “Mi mi save finis fasin blong yufala long Efesas. Mi save we yufala i stap hadwok tumas, mo yufala i mekem tingting blong yufala i longfala. Mi save we yufala i no save glad nating long ol man nogud, mo mi save we yufala i luklukgud finis long olgeta ya we oli stap talem se oli aposol, be yufala i faenemaot se oli stap giaman nomo, oli no aposol. Mo mi save tu we yufala i gat longfala tingting. Ol man oli mekem yufala i harem nogud long bodi blong yufala from nem blong mi, be tingting blong yufala i no foldaon. Be i gat wan fasin we yufala i mekem we i no stret long fes blong mi. Yufala i no moa lavem mi olsem we yufala i lavem mi fastaem.”—Rev. 2:2-4.
4. ?From wanem advaes we Jisas i talem long ol Kristin long Efesas i impoten long yumi tede?
4 Jisas i givim advaes we i stap long buk blong Revelesen, long kongregesen blong Efesas mo long sam narafala kongregesen. Advaes ya i stret nomo long ol Kristin we tabu spirit i makemaot olgeta stat long 1914 i kam, from samting we i bin hapen long olgeta blong smoltaem. (Rev. 1:10) Be naoia tu, sam Kristin oli save kam we oli ‘no moa lavem [Jeova] God olsem we oli lavem hem fastaem’ mo oli no moa lavem Kristin trutok tu. I gud yumi tingbaot samting ya, mo long semtaem yumi save tingtingbak mo tingting dip long samting we i hapen long laef blong yumi wan. Bambae yumi tokbaot olsem wanem hemia i save mekem yumi holemtaet lav mo strong tingting we yumi bin gat long Jeova mo long trutok fastaem, mo olsem wanem yumi save mekem lav mo strong tingting ya i kam niuwan bakegen mo i kam strong moa.
?Wanem Samting i Pruvum Long Yu Se Hemia Nao Trutok?
5, 6. (a) ?Wanem samting we wanwan Kristin i mas pruvum? (b) ?Wanem samting i pruvum long yu se ol Witnes blong Jeova oli tijim trutok? (c) ?Wanem i save halpem wan Kristin blong mekem lav we hem i gat fastaem, i kam niuwan bakegen?
5 Olgeta we oli promes blong givim laef blong olgeta i go long Jeova oli mas “pruvum” fastaem se wanem nao “ol samting we God i wantem [we] oli gud, oli mekem man i glad, mo oli stret gud olgeta.” (Rom 12:1, 2, NW) Wan rod blong mekem olsem, hemia blong lanem trutok blong Baebol. Maet wan man i lanem wan tijing blong Baebol we i pruvum long hem se ol Witnes blong Jeova oli stap tijim trutok, be wan narafala i lanem wan narafala tijing blong Baebol we i pruvum samting ya long hem. Samfala oli tingbaot se oli luksave trutok taem oli ridim nem blong God long Baebol, no taem oli kasem save se wanem i hapen taem man i ded. (Sam 83:18, NW; Pri. 9:5, 10) Samting we i gat paoa long sam narafala, hemia taem oli luk we ol man blong Jeova oli lavlavem olgeta. (Jon 13:34, 35) Sam narafala bakegen oli tingting gud se i minim wanem blong no joen long wol. Oli kasem save se ol trufala Kristin oli no save joen long ol raorao blong politik mo long ol faet blong ol neson.—Aes. 2:4; Jon 6:15; 17:14-16.
6 Plante man oli stat blong lavem God taem oli kasem save long ol trutok we yumi tokbaot antap, mo long sam narafala trutok bakegen. I gud we yu tekem smol taem blong tingtingbak long wanem samting we i mekem se yu yu luksave trutok. Laef blong ol man wanwan i no sem mak, mo fasin blong olgeta tu i no sem mak. Taswe, ating risen from wanem yu yu lavem Jeova mo bilif long ol promes blong hem, i no sem mak long hemia blong narafala. Mo ating risen from wanem yu bilif long trutok tede i sem mak long faswan risen from wanem yu bilif long trutok. Trutok i stap sem mak yet. Taswe, taem yu tingtingbak long ol tingting mo filing blong yu blong fastaem, hemia i save mekem se lav we yu yu bin gat fastaem long saed blong trutok i kam niuwan bakegen.—Ridim Ol Sam 119:151, 152; 143:5.
Mekem Lav Ya We Yu Gat Fastaem i Kam Strong Moa
7. ?From wanem yumi mas mekem lav ya we yumi gat fastaem i kam strong moa? ?Olsem wanem yumi save mekem olsem?
7 Ating plante samting long laef blong yu oli jenis afta we yu givim laef blong yu i go long Jeova. Lav ya we yu yu gat fastaem long saed blong trutok, i wan bigfala samting. Be taem ol yia oli stap pas, yu mas mekem lav ya i kam strong moa, blong yu kam naf blong fesem ol niufala samting we oli kam blong traem bilif blong yu. Be Jeova i givhan long yu blong mekem olsem. (1 Kor. 10:13) Taswe, ol samting we yu yu fesem long ol yia we oli pas finis oli sas tumas long yu. Oli givhan long yu blong mekem lav ya we yu yu gat fastaem, i kam strong moa, mo oli givhan long yu tu blong pruvum se ol samting we God i wantem oli gud, oli mekem man i glad, mo oli stret gud olgeta.—Jos. 23:14; Sam 34:8.
8. ?Olsem wanem Jeova i talemaot hem wan long Moses? ?Olsem wanem ol man Isrel oli kasem save moa long God?
8 Tingbaot taem ya we Jeova i talem plan blong hem long ol man Isrel we oli wok olsem ol slef long Ijip, se bambae hem i mekem oli kam fri. God i talemaot hem wan long Moses i se: “Bambae mi soemaot mi olsem we bambae mi soemaot mi.” (Eks. 3:7, 8, 13, 14, NW) I olsem we Jeova i stap talem se bambae hem i save mekem enikaen wok we i nidim blong hem i mekem, blong ol man blong hem oli kam fri. Biaen, ol man Isrel oli luk we Jeova i mekem ol wok we hem i nidim blong mekem, we oli soemaot ol defdefren fasin blong hem. Hem i soemaot hem wan se hem i God we i gat Olgeta Paoa, Jaj, Lida, God blong Sevem man, God blong Faet, mo God we i Givim ol samting we man i nidim.—Eks. 12:12; 13:21; 14:24-31; 16:4; Neh. 9:9-15.
9, 10. ?Wanem samting we i save hapen long laef blong wan man, we i givhan long hem blong i kasem save long God? ?From wanem i gud blong tingtingbak long ol samting ya we i hapen?
9 Laef blong yu i defren olgeta long hemia blong ol man Isrel bifo. Nating se i olsem, maet yu bin luk sam samting we i hapen long yu, we i mekem yu yu sua se God i intres long yu, mo i mekem bilif blong yu i kam strong moa. Ating long sam rod, Jeova i soemaot se hem i God we i Givim ol samting we man i nidim, God we i Mekem Tingting blong man i haremgud bakegen, no wan Tija. (Ridim Aesea 30:20b, 21.) Sipos no, maet yu luksave klia we God i ansa long wan prea blong yu. Maet yu bin fesem wan traem, nao wan Kristin i givhan long yu blong yu winim traem ya. Sipos no, maet yu stap mekem prapa stadi blong yu, nao yu makem sam vas blong Baebol we oli stret gud long traem ya we yu yu stap fesem.
10 Sipos yu tokbaot samting we i hapen long yu long ol narafala, maet samfala bambae oli no intres. Maet oli ting se samting ya i no wan merikel. Be long tingting blong yu, samting ya i gat bigfala mining. Yes, Jeova i soemaot hem long yu long wan fasin we yu yu nidim. I gud yu tingtingbak long ol yia we yu yu stap long trutok. ?Olsem wanem? ?Yu yu save tingbaot wan no tu taem we yu harem se Jeova i lukaotgud long yu? Sipos yes, taem yu tingbaot ol samting ya mo filing blong yu long taem ya, hemia i save wekemap filing ya blong lav bakegen long hat blong yu, blong yu filim semfala lav long Jeova we yu bin gat fastaem. Yu mas gat tangkiu from ol samting ya we oli hapen long laef blong yu. Tingting dip long olgeta. Oli pruvum se Jeova i intres long yu wan, mo i no gat wan man we i save tekemaot bilif ya long yu.
Jekem Yu Wan Bakegen
11, 12. ?Wanem samting we maet i save mekem se wan Kristin i no moa lavem trutok olsem fastaem? ?Wanem advaes we Jisas i givim?
11 Sipos yu no moa harem se yu lavem God mo trutok olsem we yu bin harem fastaem, hemia i no from we sam samting long saed blong Jeova i jenis. Jeova i no save jenis samtaem. (Mal. 3:6; Jem. 1:17) Jeova i intres long yu taem yu jes kam long trutok, mo hem i intres long yu yet. Be maet yu harem se wan samting i jenis long fasin fren blong yu wetem Jeova. Sipos i olsem, ?wanem samting nao we i jenis? ?Yu yu harem se tingting blong yu i trabol moa from ol wari blong laef? Ating long ol yia we i pas, ol prea blong yu oli bin strong moa, yu bin stadi moa, mo yu bin tingting dip moa. ?Olsem wanem? ?Long taem ya, yu yu strong moa long wok blong prij mo yu joen moa long ol miting blong kongregesen, i bitim we yu stap mekem tede?—2 Kor. 13:5.
12 Ating bambae yu luk se i no gat wan long ol samting ya we i jenis long laef blong yu. Be sipos yu faenem sam samting we i jenis, ?wanem nao i mekem se ol jenis ya oli kamaot? Ating yu yu bisi long sam wok we oli stret nomo blong mekem, olsem wok blong kasem samting we i naf blong fidim famle, mekem ol samting blong lukaotgud long helt blong yu, no sam narafala wok olsem. ?Be olsem wanem? ?Ol wok ya oli mekem se yu yu no moa harem se dei blong Jeova i klosap? Jisas i talem long ol aposol blong hem, i se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap, from we dei ya bambae i kasem olgeta man long wol. Be oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya.”—Luk 21:34-36.
13. ?Jemes i talem se Tok blong God i sem mak long wanem samting?
13 Jemes, we tabu spirit i pusum hem blong raetem sam tok long Baebol, i pulum ol Kristin blong oli yusum Tok blong God blong jekem gud olgeta wan bakegen. Hem i raetem se: “I nogud yufala i stap giaman nomo long yufala, we yufala i stap lesin long tok ya blong God, be yufala i no mekem. Yufala i mas mekem ol samting we tok ya i talem. Man we i stap lesin long tok ya be i no stap mekem ol samting we tok ya i talem, hem i olsem man we i stap lukluk fes blong hem long glas. Hem i save luklukgud fes blong hem, be taem hem i gowe, wantaem nomo hem i no moa save tingbaot we fes blong hem i olsem wanem. Be loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem.”—Jem. 1:22-25.
14, 15. (a) ?Olsem wanem Baebol i save halpem yu blong yu kamgud moa long laef blong yu olsem wan Kristin? (b) ?Wanem ol kwestin we i gud yu tingting strong long olgeta?
14 Wan man i save yusum wan glas blong mekem sua se klos mo hea blong hem oli stret. Olsem nao, sipos wan man i luk se nektae blong hem i no stret, hem i save stretem. Sipos wan woman i luk se hea blong hem i olbaot, hem i save komem hea blong hem. Long sem fasin, Baebol i givhan long yumi blong jekemgud yumi wan se yumi olsem wanem. Taem yumi skelem ol fasin blong yumi wan wetem ol fasin we Baebol i talem se yumi mas gat, yumi stap yusum Baebol olsem wan glas we yumi lukluk yumi long hem. Be i blong nating nomo sipos yumi lukluk yumi long glas mo yumi no stretem samting we yumi luk se i no stret. Yumi waes sipos yumi wok folem samting we yumi luk long ‘loa [blong God] we i stret olgeta.’ Long rod ya, yumi “mekem” samting we loa ya i talem. Taswe, sipos man we i kasem save se lav ya we hem i gat fastaem long Jeova mo long trutok i stap godaon, i gud hem i askem ol kwestin ya: ‘?Wanem ol wari blong mi? ?Wanem tingting blong mi long ol wari ya? ?Long ol yia we i pas, mi bin tingting olsem wanem long ol wari ya? ?I gat wan samting long saed blong mi we i jenis?’ Sipos ol ansa blong ol kwestin ya oli soemaot se yu yu kam slak, yu no mas mekem olsem we evri samting i oraet nomo. Sipos yu mas jenisim sam samting long laef blong yu, ale i gud we yu jenisim olgeta kwiktaem.—Hib. 12:12, 13.
15 Taem yu tingting dip olsem, samting ya i save halpem yu blong yu putum ol mak we yu yu naf blong kasem, blong yu save gohed gud olsem wan Kristin. Tabu spirit i pusum aposol Pol blong givim advaes long Timoti we i stap wok wetem hem, blong hem i kam gud moa long wok blong prij. Pol i talem long yangfala Timoti se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” I gud we yumi tu yumi yusum Tok blong God blong tingting strong blong faenemaot wanem samting nao we yumi save mekem blong gohed gud.—1 Tim. 4:15.
16. ?Taem yu yusum Baebol blong jekem yu wan, yu mas tingbaot wanem denja?
16 Taem yu stap jekem yu wan bakegen, bambae yu faenemaot se yu gat sam slak fasin. Hemia i save mekem tingting i foldaon. Be yu no mas letem tingting blong yu i foldaon, from we samting we i pusum yu blong yu jekem yu wan bakegen, hemia blong faenemaot wanem samting we yu save kamgud moa long hem. Setan i wantem we wan Kristin i ting nating long hem wan from ol slak fasin blong hem. Blong talem stret, Setan i talem finis se God i ting nating long ol traehad blong ol man we oli mekem wok blong Hem. (Job 15:15, 16; 22:3) Hemia i wan giaman tok we Jisas i strong blong agensem; God i luk se yumi wanwan i sas tumas long ae blong hem. (Ridim Matiu 10:29-31.) Taem yu kasem save long ol slak fasin blong yu, hemia i mas mekem se yu gat tingting daon blong traehad blong kamgud moa, wetem help blong Jeova. (2 Kor. 12:7-10) Sipos yu no save mekem plante samting from we yu stap siksik no yu kam olfala, yu no mas stop mo yu no mas letem lav blong yu i godaon. I gud we yu putum sam mak we oli no strong tumas blong kasem.
I Gat Plante Samting We Yumi Save Soemaot Tangkiu From
17, 18. ?Sipos yu mekem lav ya we yu yu gat fastaem i kam strong moa, olsem wanem samting ya i save givhan long yu?
17 Taem yu gohed blong mekem lav ya we yu gat fastaem i kam strong moa, hemia bambae i givhan bigwan long yu. Save blong yu long saed blong God mo tangkiu we yu yu gat long hem from we hem i lidim yu wetem lav, bambae i kam bigwan moa. (Ridim Ol Proveb 2:1-9; 3:5, 6.) Man blong raetem ol Sam i talem se: “[Jeova i] stap givim pei long mi, from we mi stap obei long [ol loa blong hem].” Hem i talem bakegen se: “Ol tok we [“Jeova,” NW] i putum, yumi save bilif long hem, mo i stap givim waes long olgeta we oli no waes.” Mo tu, hem i talem se: “Ol man we laef blong olgeta i stret, we oltaem oli stap folem Loa blong [“Jeova,” NW] bambae oli save harem gud.”—Sam 19:7, 11; 119:1.
18 I sua we yu yu agri se i gat plante gudfala samting we yu save gat tangkiu from. Yu yu kasem save from wanem ol samting oli stap hapen long wol tede. God i mekem plante samting blong lukaot gud long Kristin laef blong ol man blong hem tede, mo samting ya i givhan long yu tu. I sua se yu yu gat tangkiu from we Jeova i pulum yu i kam insaed long kongregesen blong hem we i stap long fulwol, mo hem i givim blesing ya long yu blong yu kam wan Witnes blong hem. !I gud we yu gat tangkiu from ol gudfala samting we oli kamaot long laef blong yu! Sipos yu mas raetem wan lis blong ol gudfala samting ya, i sua se lis ya bambae i longfala. Sipos sam samtaem yu mekem wan lis olsem, hemia bambae i givhan long yu blong folem advaes ya: ‘Yu mas holemgud ol samting ya we yu kasem finis.’—Rev. 3:11.
19. Yu mas tingting dip long fasin fren blong yu wetem God. ?Be antap long hemia, wanem ol impoten samting we oli save givhan long yu blong gohed gud long Kristin laef blong yu?
19 I gat plante samting we yu save mekem blong holemtaet lav ya we yu yu gat fastaem. Fasin ya blong tingting dip long bilif blong yu se i gru olsem wanem long ol yia we oli pas finis, hemia wan samting we yu save mekem. Plante taem, magasin ya i pulum tingting blong yumi i go long ol narafala impoten samting we oli save givhan long yumi blong holemtaet fasin blong yumi blong frengud wetem God. Sam long ol impoten samting ya, hemia prea, go long ol Kristin miting mo joen blong givim ol ansa, mo wok strong long wok blong prij. Olgeta samting ya oli save givhan long yu oltaem blong mekem lav ya we yu yu gat fastaem i kam niuwan bakegen, i kam strong, mo i kam bigwan.—Efes. 5:10; 1 Pita 3:15; Jud 20, 21.
?Bambae Yu Yu Ansa Olsem Wanem?
• ?Taem yu tingtingbak long ol risen from wanem yu lavem Jeova fastaem, olsem wanem hemia i save givhan long yu tede?
• ?Sipos yu tingtingbak long ol samting we oli hapen long yu long ol yia we oli pas, bambae yu save sua long wanem samting?
• ?From wanem yu mas jekem gud lav ya we yu yu gat long God?
[Kwestin]