Hem i Haremsave Filing Blong Yumi
Kam Klosap Long God
Hem i Haremsave Filing Blong Yumi
“HAREMSAVE filing blong narafala i minim se yu filim wanem i stap long hat blong hem.” Hemia nao olsem wanem wan olfala Witnes blong Jeova we i wan misinari i eksplenem naesfala fasin ya blong haremsave filing blong narafala. Jeova God i faswan blong soemaot fasin ya. Hem i haremsave soasore blong ol man blong hem taem oli safa. ?Olsem wanem yumi save samting ya? Taem Jisas i bin stap long wol, olgeta toktok mo aksen blong hem oli soemaot long klia ples, fasin ya blong Jeova blong haremsave filing blong narafala. (Jon 5:19) Tingbaot eksampol ya we i tokbaot wanem i hapen long Jon 11:33-35.
Taem fren blong Jisas i ded, hemia Lasros, Jisas i wokbaot i go kasem vilej blong Lasros. I sua se long taem ya, Meri mo Mata, tufala sista blong Lasros, tufala i rili harem nogud. Jisas i lavem tumas famle ya. (Jon 11:5) ?Ale, bambae hem i mekem wanem? Stori i gohed i se: “Taem Jisas i luk we woman ya [Meri] mo olgeta we oli stap wetem hem oli stap krae, hem i harem nogud tumas we i stap pulum win blong hem from. Nao hem i askem long olgeta se, ‘?Yufala i berem hem wea?’ Olgeta oli talem long hem se, ‘Masta, yu kam luk.’ Nao Jisas i krae.” (Jon 11:33-35) ?From wanem Jisas i krae? I tru se gudfala fren blong hem Lasros i ded, be Jisas i save jenisim samting ya taem hem i mekem Lasros ya i laef bakegen mo hemia nao samting we Jisas i kam blong mekem. (Jon 11:41-44) ?I gat sam narafala samting we i rili tajem hat mo ol filing blong Jisas?
Lukluk bakegen long ol tok blong vas we i stap antap. Makem se taem Jisas i luk Meri mo ol narafala oli stap krae, samting ya i mekem hem i “harem nogud tumas” mo hem i “stap pulum win blong hem from.” Long lanwis we oli raetem stori ya long hem, oli yusum ol tok we i blong makemgud ol dip filing. * Wanem we Jisas i luk i rili tajem ol filing long hat blong hem. Ol strong mo dip filing ya we oli stap long hat blong Jisas oli mekem hem i krae. Yes, taem ol narafala oli harem nogud, samting ya i tajem hat blong Jisas. Samtaem ating yu tu yu bin krae taem yu luk wan we yu laekem hem tumas i stap krae.—Rom 12:15.
Fasin blong Jisas blong haremsave filing blong narafala i halpem yumi blong save ol filing mo fasin blong Papa blong hem, Jeova. Rimemba se Jisas i soemaot ol fasin blong Papa blong hem long wan fasin we i stretgud olgeta. From samting ya, hem i talem se: “Man we i luk mi, hem i luk Papa blong mi.” (Jon 14:9) Taswe taem yumi ridim se “Jisas i krae,” yumi sua se Jeova tu i haremsave filing blong ol man we oli wosipim hem. Tru ya, ol narafala man blong raetem Baebol olgeta tu oli tokbaot fasin ya blong Jeova. (Aesea 63:9; Sekaraea 2:8) !Jeova i rili wan God we i keagud long yumi!
Ol man we oli haremsave filing blong narafala, oli save pulum yumi i kam long olgeta. Taem tingting blong yumi i foldaon no yumi harem nogud, yumi glad blong storian wetem wan man we i save kasem save long yumi mo we i save soem sore long yumi. !Samting ya i tru moa long saed blong Jeova! !Yumi wantem tumas blong kam klosap long Jeova, wan God we i gat bigfala sore, we i haremsave soasore blong yumi mo we i kasem savegud from wanem yumi krae!—Sam 56:8.
[Futnot]
^ par. 6 Grik tok we oli tanem i kam “krae,” plante taem i minim “wan kwaet krae,” be tok we oli yusum blong tokbaot fasin blong krae blong Meri mo ol narafala maet i minim “wan hevi, wan bigfala krae.”