Samting We Yumi Lanem Long Jisas

Long Saed Blong Kingdom Blong God

?Wanem ya Kingdom blong God?

Kingdom blong God i wan gavman we God i stanemap. Bambae hem i rul antap long ful wol. Jisas i talem se: “Yufala i mas prea olsem: . . . ‘Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.’”—Matiu 6:9, 10, NW; Daniel 2:44.

?Hu ya olgeta we bambae oli rul long Kingdom blong God?

Jisas i bon blong i kam Man blong Rul long Kingdom blong God. Wan enjel i talem long mama blong Jisas se: “Jeova God bambae i givim bigfala jea blong king long hem, we i bigfala jea blong King Deved, papa blong hem. Bambae hem i king.” (Luk 1:30-33, NW) Mo tu, Jisas i jusum sam long ol man blong hem blong oli rul wetem hem. Hem i talem long ol aposol blong hem se: “Yufala ya, oltaem yufala i bin stap wetem mi long olgeta traem we mi mi bin kasem. Mo mi mi mekem wan kontrak wetem yufala, olsem we Papa blong mi i mekem wan kontrak wetem mi, from wan kingdom.” (Luk 22:28, 29, NW; Daniel 7:27) Ful namba blong ol man blong Jisas we bambae oli rul wetem hem, hemia 144,000.—Revelesen 5:9, 10; 14:1.

?Kingdom blong God bambae i stap wea?

Kingdom blong God bambae i stap long heven mo bambae i rulum olgeta ples long wol. Jisas i talem long ol disaepol blong hem se: “Sipos mi mi go mo mi mi mekem wan ples i rere blong yufala [long heven], bambae mi mi kambak blong tekem yufala i kam stap wetem mi long ples blong mi, blong bambae yufala tu i save stap long ples ya we mi bambae mi stap long hem. . . . Mi mi stap go long Papa blong mi.”—Jon 14:2, 3, 12, NW; Daniel 7:13, 14.

?Bambae Kingdom blong God i mekem wanem long rabis fasin?

Bambae Jisas i klinim wol taem hem i spolem olgeta rabis man. Jisas i se: ‘Long taem ya we mi, mi Pikinini blong Man bambae mi King . . . bambae mi kamtru wetem olgeta  enjel blong heven, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta. . . . Nao olgeta ya [ol rabis man] bambae oli go blong kasem panis ya we i no save finis. Be ol stret man ya bambae oli go blong kasem laef ya we i no save finis.’—Matiu 25:31-34, 46.

?Hu bambae i stap laef long wol aninit long rul blong Kingdom?

Jisas i talem se: “Olgeta we oli kwaet man oli save haremgud, from we God bambae i givim wol ya long olgeta.” (Matiu 5:5, futnot; Ol Sam 37:29; 72:8) Bambae wol i fulap wetem ol man we oli lanem finis blong lavlavem olgeta. Jisas i talem long ol man blong hem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.”—Jon 13:34, 35.

?Kingdom blong God bambae i mekem wanem blong givhan long ol man long wol?

Bambae Jisas i hilim ol man oli no moa sik. Taem hem i stap long wol yet, Jisas i tijim ol man “long [“saed blong Kingdom blong God,” NW] mo hem i mekem ol sikman blong olgeta oli gud bakegen.” (Luk 9:11) Afta we aposol Jon i luk wan vison we i soemaot Jisas we i laef bakegen long ded, hem i talem se: “Nao mi luk niufala heven wetem niufala wol . . . Nao mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man . . . Hem bambae i ravemaot wota blong ae blong olgeta. Nao bambae i no moa gat man i ded.’”—Revelesen 21:1-4.

Bambae Kingdom blong God i mekem wol ya i kam wan Paradaes bakegen. Wan long tufala nogud man we i bin hang long pos klosap long Jisas i talem se: “Jisas, taem we bambae yu kasem kingdom blong yu, plis yu tingbaot mi bakegen.” Jisas i talem long hem se: “Tru mi mi talem long yu tede, bambae yu yu stap wetem mi long Paradaes.”—Luk 23:42, 43, NW; Aesea 11:4-9.

Blong kasem moa save long saed ya, plis lukluk long japta 8 blong buk ya ?Wanem Samting We Baebol i Rili Tijim? *

[Futnot]