Tok Blong Jeova i Wan Samting We i Laef

Ol Bigfala Poen Long Buk Blong Rom

SAMWE long yia 56, taem Pol i stap mekem namba tri misinari trip blong hem, hem i kam long taon blong Korin. Naoia hem i kasem save se long Rom, ol Kristin we oli man Jiu mo ol Kristin we oli blong ol narafala laen oli gat ol defdefren tingting. Taswe blong halpem olgeta blong oli joen long Kraes, Pol i raetem wan leta i go long olgeta.

Long leta ya, hem i eksplenem olsem wanem olgeta man oli save kam stret man long fes blong God, mo wanem ol fasin we oli mas mekem long laef blong olgeta. Leta ya i halpem yumi blong gat moa save long God mo Tok blong hem, i makemaot gladhat mo kaengud fasin blong God, mo i leftemap wok ya blong Jisas blong sevem yumi.—Hibrus 4:12.

KAM STRET MAN LONG FES BLONG GOD—?OLSEM WANEM?

(Rom 1:1–11:36)

Pol i raetem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God. Be long gladhat blong God, hem i stap givhan long olgeta. Hem i stap mekem olgeta oli stret man long fes blong hem, from we oli joen long Jisas Kraes we i pem rod finis.” Hem i gohed moa i se: “God i no save talem se ol man oli stret man long fes blong hem long fasin ya we oli stap obei long Loa ya. Hem i stap mekem ol man oli stret man long fes blong hem from we oli bilif long Jisas.” (Rom 3:23, 24, 28) Taem ol tabu Kristin mo “bigfala kampani” blong ol “narafala sipsip” oli mekem stret samting, ‘God i mekem oli stret man long fes blong hem’—ol tabu Kristin oli save go long heven blong rul wetem Kraes, mo bigfala kampani oli save kam fren blong God, mo oli gat hop blong laef tru long “bigfala trabol.”—Rom 5:18; Rev. 7:9, 14, NW; Jon 10:16; Jem. 2:21-24; Mat. 25:46.

Pol i askem se: “Naoia yumi no moa stap aninit long loa we God i givim long Moses bifo, yumi stap aninit long han blong God ya we i stap givhan long yumi long gladhat blong hem. ?From samting ya, yufala i ting se i gud yumi gohed blong mekem sin?” Nao hem i ansa se: “!Nogat!” Hem i eksplenem se: “Sipos fasin blong sin i bos long yufala, bambae yufala i ded from. Be sipos fasin blong obei long God i bos long yufala, God bambae i mekem yufala i stret man long fes blong hem.” (Rom 6:15, 16) Hem i talem se: “Sipos long paoa blong Tabu Spirit, yufala i kilimaot ol rabis fasin ya we i kamaot long tingting blong yufala, bambae yufala i save laef.”—Rom 8:13.

Ansa Blong Sam Kwestin Long Saed Blong Baebol:

1:24-32—?Ol vas ya we oli tokbaot ol rabis fasin, oli stret long ol man Jiu no ol man blong narafala laen? Maet ol tok ya oli stret long tufala grup ya, be Pol i stap tokbaot ol man Isrel we oli no moa folem Loa blong plante handred yia finis. Nating we oli savegud ol stret loa blong God, be “oli no wantem bilif se God hem i tru.” From samting ya, i stret we oli kasem panis.

3:24, 25—?Olsem wanem ‘blad blong Jisas i save tekemaot ol sin’ blong ol man we oli bin mekem sin, bifo we Jisas i kam long wol mo i ded? Faswan profet tok long saed blong Mesaea we i stap long Jenesis 3:15, i kamtru long yia 33 K.T. taem oli kilim Jisas i ded long wan pos. (Gal. 3:13, 16) Taem Jeova i talemaot profet tok ya, i olsem we hem i pemaot ransom ya finis from we i no gat wan samting nating we i save blokem God blong mekem stamba tingting blong hem i kamtru. Ale from ransom sakrefaes we Jisas bambae i givim, Jeova i save fogivim sin blong olgeta we oli kam biaen long Adam, we oli soem bilif long promes ya. Mo tu, ransom ya i save mekem se ol man we oli ded bifo long taem blong Jisas, oli laef bakegen.—Wok 24:15.

6:3-5—Baptaes blong joen long Jisas Kraes mo baptaes blong joen long ded blong hem. ?Tufala tok ya oli minim wanem? Taem Jeova i makemaot ol man blong Jisas wetem tabu spirit, oli joen wetem Jisas nao oli kam memba blong kongregesen blong ol tabu Kristin. Kongregesen ya i olsem bodi blong Kraes, mo Kraes i olsem Hed blong hem. (1 Kor. 12:12, 13, 27; Kol. 1:18) Hemia nao mining blong tok ya baptaes blong joen long Jisas Kraes. Mo tu, ol tabu Kristin ‘oli baptaes blong joen long ded blong Jisas.’ Oli mekem olsem taem oli lego fulap samting long laef blong olgeta mo oli sakemaot tingting ya blong laef olwe long wol ya. Taswe, ded blong olgeta i olsem ded blong Jisas, hem i wan sakrefaes, be i no gat  praes blong ransom long ded blong olgeta. Baptaes ya blong joen long ded blong Kraes i kamtru fulwan taem oli ded mo oli laef bakegen blong go long heven.

7:8-11—?Olsem wanem ‘sin i yusum tok blong Loa?’ Loa i givhan long ol man blong oli kasem save se wanem ya sin, mo i mekem olgeta oli save se oli ol sinman. Frut we i kamaot se, oli luksave moa se ol samting we oli mekem, i kamaot from we oli sinman nomo, mo plante moa man oli kasem save nao se oli sinman. Taswe i stret blong talem se ‘sin i yusum tok blong Loa.’

Ol Lesen Blong Yumi:

1:14, 15. I gat plante risen from wanem yumi talemaot gud nius wetem strong tingting. Wan long ol risen ya hemia se yumi gat kaon long ol man ya we Jisas i pemaot olgeta wetem blad blong hem, mo hemia i wok blong yumi blong givhan long olgeta blong oli kasem save long God mo stamba tingting blong hem.

1:18-20. Ol man ya we oli no save obei long God mo oli stap mekem rabis fasin oli “no gat wan tok nating blong talem, “from we ol fasin ya blong [God] we yumi no save luk stret long ae blong yumi, oli kamaot klia long ol samting we hem i mekem long wol ya.

2:28; 3:1, 2; 7:6, 7. Pol i talem sam tok we maet i save mekem ol man Jiu oli harem nogud, be biaen hem i ademap sam toktok blong kwaetem tingting blong olgeta. Eksampol ya i givhan long yumi blong gat gudhan blong toktok wetem kaen mo waes fasin taem yumi tokbaot sam samting we i save mekem ol man oli kros.

3:4. Taem tok blong man i no laenap wetem wanem we God i talem long Baebol, yumi mas trastem tok blong Baebol mo mekem ol samting we God i wantem oli wok long laef blong yumi. Long rod ya, yumi soem se “God i no save giaman.” Strong tingting we yumi gat long wok blong talemaot Kingdom mo mekem disaepol, i save halpem ol man blong faenemaot we God i tru oltaem nomo.

4:9-12. From we Ebraham i bilif, God i luk hem olsem wan stret man, nating se hem i no sakomsaes gogo kasem we hem i gat 99 yia blong hem. (Jen. 12:4; 15:6; 16:3; 17:1, 9, 10) Taswe, long bigfala fasin ya, God i soemaot olsem wanem wan man i save kam stret man long fes blong hem.

4:18. Fasin blong putum tingting blong yumi i stap strong long ol promes blong God i wan impoten haf blong bilif. Bilif blong yumi i stanap long strong tingting we yumi gat long saed blong fiuja.—Hib. 11:1.

5:18, 19. Long klia mo smol tok nomo, Pol i eksplenem olsem wanem Jisas i sem mak long Adam, nao long rod ya hem i soem olsem wanem wan man i save ‘givim laef blong hem blong pem rod blong plante man oli go fri.’ (Mat. 20:28) Taswe, fasin blong yusum smol tok nomo taem yumi tijim man i wan eksampol we yumi mas folem.—1 Kor. 4:17.

7:23. Ol haf blong bodi blong yumi olsem han, leg mo tang oli save lidim yumi blong ‘agens long Loa mo yumi kam olsem slef blong fasin blong sin.’ Taswe, yumi mas lukaot blong yusum gud ol haf ya blong bodi long fasin we i stret.

8:26, 27. Taem yumi fesem sam samting we i fasfas nao yumi no moa save wanem samting blong talem long prea, “tabu spirit ya, hem nomo i stap prea long God oltaem from yumi.” Ale Jeova we hem i “stap ansa long ol prea,” i save lesin long prea blong yumi sipos i laenap long Tok blong hem Baebol.—Sam 65:2.

8:38, 39. Ol trabol, ol rabis spirit mo ol gavman blong man oli no save blokem Jeova blong i lavem yumi, no blong yumi lavem Jeova.

9:22-28; 11:1, 5, 17-26. Plante profet tok long saed blong ol man Isrel we bambae oli gobak long ples blong olgeta afta we oli kam fri long Babilon, oli kamtru long kongregesen blong ol tabu Kristin we sam long ol memba blong olgeta oli “laen blong Isrel, mo sam oli no laen blong Isrel.”

10:10, 13, 14. Taem yumi lavem Jeova mo ol man, mo yumi gat strong bilif long Jeova mo ol promes blong hem, hemia i save pusum yumi blong gohed strong long Kristin wok blong prij.

11:16-24, 33. ‘God i save mekem i gud long yumi, mo hem i save mekem i strong long yumi tu.’ !I gud tumas blong luk we hem i skelemgud tufala fasin ya blong hem! I tru, “Hem i Bigfala Ston ya, ol wok blong hem oli stret gud olgeta, from we ol fasin blong hem oli stret .”—Dut. 32:4, NW.

LAEF OLSEM STRET MAN LONG FES BLONG GOD

(Rom 12:1–16:27)

Pol i talem se: “[“From samting ya, gladhat blong God i pulum mi blong askem strong long yufala, ol brata,” NW] se plis yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. “(Rom 12:1) “From samting ya,” no from we ol Kristin oli kam stret man finis  long fes blong God tru long bilif blong olgeta, ol tok blong Pol we oli kam biaen i mas gat paoa long fasin we oli mekem long ol narafala Kristin, long ol narafala man mo long ol haeman blong gavman.

Pol i raetem se: “Mi mi talem long yufala evriwan, se yufala i no mas letem tingting blong yufala i go antap. . . . Yufala i mas lavem ol man, we yufala i no giaman.” (Rom 12:3, 9) Hem i gohed i se: “Yumi evriwan i mas ona long gavman.” (Rom 13:1) Long sam desisen, ol wanwan Kristin oli mas lesin long tingting blong olgeta we oli trenem folem Baebol, taswe Pol i leftemap tingting blong ol Kristin blong oli “no jajem narafala man.”—Rom14:13.

Ansa Blong Sam Kwestin Long Saed Blong Baebol:

12:20—?Olsem wanem yumi ‘mekem enemi blong yumi i sem we i sem [“hivimap sakol we i hot we i hot antap long hed blong hem,” NW]’? Long taem blong Baebol, taem ol man oli wantem klinim ol aean, oli mas bonem long faea. Taswe, blong mekem faea i kam hot moa oli mas putum ol sakol antap mo aninit long ol aean ya. Faea we i stap antap i mas hot olgeta blong mekem ol aean ya oli ronaot, mo ol doti oli save kamkamaot. Long sem fasin, yumi hivimap ol sakol we i hot we i hot antap long hed blong wan we i enemi, taem yumi soem ol gudfala fasin long hem, nao hem i save lego ol strong fasin blong hem mo i mekem ol gudfala fasin.

12:21—?Olsem wanem yumi ‘mas holemstrong ol stret fasin blong yumi, blong winim ol rabis fasin?’ Wan rod blong mekem olsem i blong no fraet blong fasgud long wok ya we God i givim long yumi blong talemaot gud nius blong Kingdom, gogo kasem mak we Jeova i wantem.—Mak 13:10.

13:1 (NW)—?Long wanem rod ol haeman we oli stap rul “oli stap long prapa ples blong olgeta from God?” Ol lida blong wol we oli stap rul “oli stap long prapa ples blong olgeta from God,” hemia i minim se God nomo i givim raet long olgeta blong rul mo samtaem, God i save finis se hu bambae i rul. Samting we Baebol i tokbaot long saed blong sam long ol man we oli rul i givim klia pruf long saed ya.

Ol Lesen Blong Yumi:

12:17, 19. Taem we yumi givimbak nogud fasin we man i mekem long yumi, yumi stap mekem samting we Jeova nomo i gat raet blong mekem. !Sipos yumi ‘givimbak’ nogud fasin we man i mekem, yumi stap traem blong tekem ples blong Jeova!

14:14, 15. Yumi no mas mekem brata blong yumi i harem nogud no i foldaon from kakae no dring we yumi givim long hem.

14:17. Blong wan man i gat gudfala fasin fren wetem God, hemia i no dipen long wanem samting we hem i kakae no dring, no long wanem samting we hem i jusum blong no kakae mo no dring. Be fasin fren ya i joen wetem stretfasin, pis mo glad.

15:7. Yumi mas mekem i sem mak long olgeta we oli laekem trutok mo pulum olgeta blong oli kam insaed long kongregesen, mo yumi mas talemaot mesej blong Kingdom long olgeta man we yumi mitim long wok blong prij.

[Tok blong pija long pej 31]

?Olgeta we oli mekem sin bifo we Jisas i ded, blad blong hem i save tekemaot sin blong olgeta?