Ol Sta Oli Soemaot Paoa Blong God

“!Yufala i traem luk antap long skae! Ol sta ya we yufala i stap luk, [God] nomo i wokem olgeta. Oltaem hem i stap lidim olgeta i kam, olsem we komanda i lidim ol soldia blong hem. Hem i savegud hamas sta i stap, mo i stap singaot olgeta wanwan long nem blong olgeta. Mo from we paoa blong hem i strong we i strong, neva wan sta i mestem ples blong hem.”—AESEA 40:26.

I TRU se i gat plante sta we oli bigwan moa i bitim san. Be nating se i olsem, san i bigwan we i bigwan. Tingbaot: Sipos i gat 330,000 sta we wanwan long olgeta oli bigwan olsem wol ya, olgeta evriwan oli mas joen wanples blong mekem wan sta we i bigwan olsem san. Bighaf blong ol sta we oli no stap longwe tumas long yumi, oli smol moa long san. Be sam narafala sta oli bigwan moa long san, olsem sta ya we nem blong hem V382 Cygni. Sipos 27 sta we wanwan long olgeta oli bigwan olsem San, oli joen tugeta, hemia nao saes blong sta ya V382 Cygni.

?San i stap givimaot hamas paoa? Traem tingbaot sipos yu stanap 15 kilometa longwe long wan faea, be yu save harem hot blong faea ya yet. !Hemia i min se faea ya i mas bigwan bitim mak! Be san i stap 150 milian kilometa longwe long yumi long wol. !Nating se i olsem, taem san i strong, hem i save bonem skin blong yumi! !Yumi sapraes bigwan long paoa blong san! Traem tingbaot: Sipos yumi save seraotem paoa blong san i go long wan bilian pis, be paoa blong san we i kasem wol blong yumi hem i stap long wan nomo long ol pis ya. Nating se i olsem, san ya i naf blong sapotem olgeta laef samting long wol.

Ol saentis oli faenemaot se fulpaoa blong san hem i naf blong sapotem 31,000,000,000,000 planet we oli sem saes olsem wol ya. Web saet blong Space Weather Prediction Center (SWPC) i talem wan narafala rod blong eksplenem bigfala paoa blong san. Tingbaot sipos man i save holemtaet paoa blong san blong wan seken nomo. Hemia bambae i naf “blong givim lektrik [long Yunaeted Stet] blong 9 milian yia, sipos ol man oli gohed blong yusum lektrik ya olsem oli stap yusum naoia.”

Long medel blong san stret, hemia nao stamba ples blong paoa blong hem. Long ples ya, san i olsem wan niuklia enjin we i stap saksakem ol atom olbaot blong oli kilkilim olgeta mo wokem paoa. Be from we san i bigwan we i bigwan mo medel blong hem i tik tumas, paoa we i stap long medel blong san i tekem plante milian yia blong kamaot. Web saet blong SWPC i talem se: “!Stat tede, sipos San i no moa wokem paoa, bambae i tekem 50 milian yia blong yumi long Wol ya yumi haremsave samting ya!”

Nao tingting gud long samting ya: Taem yu lukluk i go antap long skae long wan naet we ples i kliagud, yu save luk plante taosen sta. Evriwan long olgeta oli stap givimaot bigfala paoa, klosap sem mak long paoa we san i givimaot. !Mo ol saentis oli kaontem se i gat plante plante milian sta we oli stap mekem olsem!

?Ol sta ya oli kamaot olsem wanem? Tede, bighaf blong ol man we oli stadi long bisnes ya oli bilif se skae mo wol i stat wantaem nomo, samwe long 14 bilian yia bifo. Be oli no kasem save gud olsem wanem samting ya i bin hapen. Baebol i talem nomo se: “Bifo we bifo olgeta, God i mekem skae mo graon.” (Jenesis 1:1) Yes, God nao i mekem ol bigbigfala enjin blong wokem paoa we yumi kolem olgeta ol sta. Tru ya, “paoa blong [God] i strong we i strong.”—Aesea 40:26.

?God i Stap Yusum Paoa Blong Hem Long Wanem Rod?

Jeova God i stap yusum paoa blong hem blong givhan long ol man we oli mekem wok blong hem. Tingbaot aposol Pol we i wok had blong tijim ol narafala long saed blong God. Pol i wan man olsem yumi nomo, be hem i naf blong mekem plante gudfala wok nating we fulap man oli agensem hem. ?Olsem wanem hem i naf blong mekem wok ya? Hem i luksave se God i stap givim paoa long hem we ‘i bigwan tumas, i no blong man.’—2 Korin 4:7-9.

 Jeova God i yusum paoa blong hem tu blong spolem ol man we oli minim nomo blong brekem ol loa blong hem. Jisas Kraes i tokbaot Sodom mo Gomora mo Bigfala Wota we i kavremap wol long taem blong Noa. Long tufala taem ya, Jeova i yusum paoa blong hem blong spolem ol rabis man. Jisas i talem wan profet tok se i no longtaem, bambae Jeova i yusum paoa blong hem bakegen blong spolem ol man we oli sakemaot ol stret rul blong hem.—Matiu 24:3, 37-39; Luk 17:26-30.

?Save Ya i Mekem Wanem Long Yu?

Taem yu tingting dip long paoa blong God we ol sta oli soemaot, maet yu gat filing olsem King Deved, we i talem se: “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu lukaot gud long hem.”—Ol Sam 8:3, 4.

Yes, taem yumi skelem yumi wetem bigfala skae mo ol sta blong hem we oli soemaot bigfala paoa blong God, yumi harem se yumi nating nomo. Be yumi no mas letem filing ya i winim yumi. Jeova i pulum profet Aesea blong raetem ol tok we i leftemap tingting blong yumi, i se: “Olgeta we oli taed, [God] i stap givim paoa long olgeta, mo olgeta we oli no strong, hem i stap mekem olgeta oli strong bakegen. Ol yangfala oli save kam slak we oli taed olgeta, mo ol yang man oli save foldaon we oli taed nogud. Be olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.”—Aesea 40:29-31.

Sipos yu yu wantem tumas blong mekem wok blong God, yu save sua se hem bambae i givim tabu spirit long yu blong givhan long yu. Be yu mas askem hem blong i givim spirit ya long yu. (Luk 11:13) Sipos God i givhan long yu, bambae yu yu naf blong stanap strong mo winim enikaen hadtaem, mo yu save kam strong moa tu blong mekem samting we i stret.—Filipae 4:13.

[Tok blong makem poen long pej 7]

Sipos God i givhan long yu, bambae yu save kam strong moa blong mekem samting we i stret

[Tok blong pija long pej 7]

I stat long lefsaed antap, i finis long lefsaed daon: Whirlpool galaksi, grup blong ol sta we oli kolem Pleiades, Orion Nebula, Andromeda galaksi

[Tok blong pija long pej 7]

Sipos i gat 330,000 sta we wanwan long olgeta oli bigwan olsem wol ya, olgeta evriwan oli mas joen wanples blong mekem wan sta we i bigwan olsem san

[Credit Lines long pej 7]

Pleiades: NASA, ESA and AURA/Caltech; all others above: National Optical Astronomy Observatories