Wan Kwestin

Aposol Pol i talem se “bambae God i sevem olgeta laen blong Isrel.” (Rom 11:26) ?Pol i minim se i gat taem we olgeta man Jiu evriwan bambae oli kam Kristin?

Nogat, Pol i no minim olsem. Neson ya Isrel we i kamaot long famle laen blong Ebraham, i sakemaot Jisas, i no wantem luksave se hem i Mesaea. Mo long ol yia afta we Jisas i ded, i kam klia se i no olgeta man Jiu evriwan we bambae oli kam Kristin. Be yet, tok blong Pol se ‘bambae God i sevem olgeta laen blong Isrel’ hem i tru. ?I tru olsem wanem?

Jisas i talem long ol lida blong skul blong ol man Jiu long taem blong hem se: “God bambae i tekemaot kingdom blong Hem long yufala, mo bambae i givim i go long wan neson we bambae i karem frut we i stret.” (Mat. 21:43, NW) From we ol man Isrel, olsem wan neson, oli sakemaot Jisas, Jeova bambae i lukluk i go long wan niufala neson long saed blong spirit. Pol i kolem neson ya se “Isrel blong God.”—Gal. 6:16, NW.

Ol narafala vas long Kristin Grik haf blong Baebol oli pruvum se i gat 144,000 Kristin we tabu spirit i makemaot olgeta, oli mekemap “Isrel blong God.” (Rom 8:15-17; Rev. 7:4) Revelesen 5:9, 10 i pruvum se insaed long grup ya i gat ol man tu we oli no man Jiu from we vas ya i talem se ol Kristin we tabu spirit i makemaot olgeta oli kamaot “long olgeta kala, mo long olgeta kantri, mo long olgeta laen, mo long olgeta lanwis.” God i jusumaot olgeta ya we oli mekemap Isrel long saed blong spirit blong oli ‘pris mo king mo bambae oli rul long olgeta man long wol.’ Nating se Jeova i sakemaot Isrel, oli no moa wan spesel neson blong hem, wanwan man Isrel i save kam fren blong Hem yet. Taswe ol aposol mo plante narafala faswan Kristin we oli man Isrel, God i glad blong tekem olgeta oli kam man blong hem. Yes, God i mas pemaot ol man Isrel ya wetem blad blong Jisas Kraes, sem mak olsem we hem i mekem long ol narafala man.—1 Tim. 2:5, 6; Hib. 2:9; 1 Pita 1:17-19.

Nating se bighaf blong ol prapa man Isrel long faswan handred yia oli lusum janis ya blong rul wetem Jisas, samting ya i no blokem stamba tingting blong Jeova. I no gat wan samting i save blokem stamba tingting blong Jeova from we hem i talem tru long profet blong hem se: “Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”—Aes. 55:11.

Tok ya i tru nomo long saed blong stamba tingting blong God blong jusumaot 144,000 man blong oli rul wetem Pikinini blong hem long heven. Baebol i talemaot klia se God bambae i makemaot wan stret namba blong 144,000 man. !I no gat wan we bambae i mestem!—Rev. 14:1-5.

Taswe, taem Pol i raetem se “bambae God i sevem olgeta laen blong Isrel,” hem i no stap talem se olgeta man Isrel bambae oli kam Kristin, nogat. Hem i minim nomo se stamba tingting ya blong God se i mas gat 144,000 man Isrel long saed blong spirit we bambae oli rul long heven wetem Pikinini blong hem, Jisas Kraes, bambae i kamtru. Long stret taem blong God, fulwan namba ya—“olgeta laen blong Isrel”— bambae oli sefgud, mo bambae oli rul olsem ol king mo pris long Kingdom blong Mesaea.—Efes. 2:8.