Kwestin Blong Olgeta We Oli Ridim Magasin Ya

?Bigfala Wota Long Taem Blong Noa i Rili Kavremap Olgeta Ples Long Wol?

Bigfala wota we i foldaon long taem blong Noa, i bin hapen i bitim 4,000 yia bifo. Ol man we oli bin stap taem bigfala wota ya i ron oli ded finis, taswe oli no save tokbaot stori ya long yumi. Be i gat wan buk we i tokbaot bigfala trabol ya, mo buk ya i talem se bigfala wota ya i kavremap ol hil we oli hae moa long ol narafala hil long taem ya.

Buk ya i talem se: “Wota ya i stap kam bigwan moa, i stap kavremap graon ya, gogo kasem foti dei. . . . Gogo wota ya i kavremap olgeta hil ya we i hae we i hae. Wota ya i dip tumas, we i stat antap i godaon kasem top blong ol hil, klosap i kasem seven meta.”—Jenesis 7:17-20.

Maet samfala oli stap asaskem sipos stori ya blong bigfala wota we i kavremap olgeta ples long wol i wan kastom stori, no i wan tru stori we oli ademap sam samting long hem. !Tingting ya i no stret nating! I gat plante wota i stap long wol ya yet. Solwota i kavremap samwe 71 pesen blong ol ples long wol. Taswe, blong talem stret, bigfala wota ya i stap yet. Mo sipos ol bigbigfala aes we oli stap antap long ol bigfala hil mo ol bigfala aes we oli stap antap olgeta long not blong wol ya mo daon olgeta long saot blong wol ya, oli ronaot, level blong solwota bambae i go antap mo i save kavremap ol bigfala taon olsem New York mo Tokyo.

Ol man blong stadi long graon, oli stadi long ol ples long notwes blong Yunaeted Stet, mo oli bilif se stat longlongtaem bifo i kam, ol bigbigfala wota i bin kavremap ol ples ya i bitim 100 taem finis. Oli talem se wan taem, wan bigbigfala wota we i bin ron long spid blong 105 kilometa long wan aoa, i kamtru long ol ples ya, mo wota ya i dip kasem 600 meta. Ol narafala saentis oli faenem sam narafala ples we i olsem, mo from samting ya oli bilif se i tru, wan bigfala wota i bin kavremap olgeta ples blong wol.

Olgeta we oli bilif se Baebol hem i tok blong God, oli bilif fulwan se wan bigfala wota i bin kavremap fulwol, oli no ting se maet i tru nomo. Jisas i talem long God i se: “Tok blong yu i tru.” (Jon 17:17) Aposol Pol i raetem se stamba tingting blong God hemia se “hem i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:3, 4) Sipos i gat sam giaman stori insaed long Tok blong God, ?olsem wanem Pol i save tijim ol man blong Jisas long ol trutok blong God?

Jisas i bilif fulwan se bigfala wota i bin ron long taem blong Noa, mo hem i bilif tu se bigfala wota ya i bin kavremap fulwol. Long bigfala profet tok blong Jisas long saed blong taem ya we bambae hem i stap mo long saed blong ol laswan dei blong ol rabis fasin long wol, Jisas i talem se fasin blong laef blong ol man long taem ya bambae i sem mak long fasin blong laef blong ol man long taem blong Noa. (Matiu 24:37-39) Aposol Pita tu i tokbaot bigfala wota long taem blong Noa, mo hem i talem se: “Long sem fasin, [God] i yusum wota bakegen blong spolem, long taem ya we hem i spolem wol ya we i stap bifo, long wota ya we i ron bigwan.”—2 Pita 3:6.

Sipos stori blong Noa mo bigfala wota i wan kastom stori nomo, bambae woning we Pita mo Jisas tufala i givim long olgeta we oli laef long ol las dei, i no gat mining. Stori ya bambae i no givim woning long man, be bambae i mekem tingting blong man i fasfas nomo. Samting ya bambae i spolem janis we man i gat blong laef tru long bigfala trabol ya we i bigwan moa i bitim bigfala wota long taem blong Noa.—2 Pita 3:1-7.

Taem God i tokbaot bigfala sore we hem i gohed blong soemaot long ol man blong hem, hem i talem se: “Bifo olgeta, long taem blong Noa, mi mi mekem wan promes wetem ol man, se neva bambae mi save mekem bakegen, we wota i kam bigwan, i draonem olgeta ples long wol. Mo naoia, mi mekem promes bakegen long yufala, se bambae mi mi no moa kros long yufala bakegen, bambae mi no moa tok strong long yufala, mo bambae mi no moa panisim yufala.” Yes, yumi save sua se bigfala wota i bin kavremap olgeta ples long wol long taem blong Noa, mo yumi save sua tu se, God bambae i kaengud bakegen long olgeta we oli trastem hem.—Aesea 54:9.