?From Wanem God i Glad Long Noa?—?From Wanem Yumi Mas Tingbaot Samting Ya?

PLANTE long yumi i save tingbaot wan taem we yumi bin harem sam impoten nius. Yumi save tingbaot ol smosmol samting long saed blong taem ya—ples we yumi bin stap long hem, wanem we yumi stap mekem, mo tu yumi tingbaot aksen mo filing blong yumi taem yumi bin harem nius ya. Yumi sua se Noa i neva fogetem dei ya we hem i kasem wan nius long Jeova God, King blong heven mo wol. Mo nius ya i impoten moa i bitim ol narafala nius we man i save kasem. Jeova i talem se bambae hem i spolem “olgeta man.” God i talem long Noa blong wokem wan bigbigfala sip blong sevem hem wetem famle blong hem mo olgeta defdefren kaen anamol.—Jenesis 6:9-21.

?Noa i mekem wanem taem hem i harem nius ya? ?Hem i glad, no hem i komplen? ?Olsem wanem hem i talemaot nius ya long waef blong hem mo famle blong hem? Baebol i no talem. Baebol i talem nomo se: “Noa i mekem olgeta samting ya olsem we God i talem.”—Jenesis 6:22.

Poen ya nao i impoten from we hem i soemaot from wanem God i glad long Noa, hemia from we Noa i wantem mekem samting we God i askem hem blong mekem. (Jenesis 6:8) ?Wanem sam narafala samting we oli mekem se God i glad long Noa? Ansa blong kwestin ya i impoten from we yumi mas folem fasin blong Noa blong yumi save sef long taem ya we God bambae i spolem bakegen rabis fasin blong wol ya. Be fastaem, bambae yumi luk se laef blong Noa i olsem wanem bifo we bigfala wota i ron.

Ol Rabis Enjel Oli Kam Stap Long Wol

Noa i stap laef i no longtaem afta we God i wokem man. Hem i bon samwe wan taosen yia afta we God i wokem faswan man. Plante man oli ting se ol man long taem ya oli laef long ol hol blong ston, hea blong olgeta i longlongfala, mo oli no gat save, oli stap wokbaot olbaot wetem nalnal long han blong olgeta. Be oli no olsem. Oli gat ol gudfala tul we oli wokem long aean mo kopa, mo maet Noa i bin yusum ol tul olsem taem hem i wokem bigfala sip ya. Oli gat ol samting tu we oli bin yusum blong plei ol naesfala miusik. Ol man oli mared, oli gat pikinini, oli wokem garen, mo oli lukaot long ol anamol blong olgeta. Oli stap pem ol samting mo salem ol samting. Long taem ya, laef blong olgeta i klosap sem mak long laef blong yumi tede.—Jenesis 4:20-22; Luk 17:26-28.

Be i gat sam samting long laef blong olgeta we oli defren long laef blong yumi tede. Wan samting hemia se laef blong ol man bifo i longfala moa long laef blong yumi tede. Plante man long taem bifo oli bin laef bitim 800 yia. Noa i laef blong 950 yia, Adam i kasem 930 yia mo Metusela  we i olfala bubu blong Noa, hem i laef blong 969 yia. *—Jenesis 5:5, 27; 9:29.

Jenesis 6:1, 2 i tokbaot wan narafala samting long taem bifo we i defren long taem blong yumi. Hem i talem se: “Nao taem ol man oli stat kam plante long wol ya, i gat plante gel tu oli stap bon. Mo taem ol gel ya oli stap kam bigbigwan, ol enjel blong God oli luk we oli gudfala tumas, nao oli stap tekem olgeta olsem we oli wantem.” Ol “enjel blong God” we vas ya i tokbaot, oli ol enjel we oli jenisim bodi blong olgeta nao oli kam stap long medel blong ol man long wol ya. God i no sanem olgeta oli kam long wol, mo olgeta oli no kam blong givhan long ol man tu. Defren olgeta, oli “livim prapa ples blong olgeta” long heven blong oli save slip wetem ol naesfala woman long wol ya. Long rod ya, oli kam ol rabis enjel.—Jud 6.

Ol rabis enjel ya oli rebel agens long God, tingting blong olgeta i doti, mo paoa mo save blong olgeta i winim paoa mo save blong ol man. Taswe oli gat bigfala paoa blong pulum ol man blong mekem ol fasin we oli nogud olgeta. I luk olsem se oli bin rul antap long ol man mo oli bos long olgeta. Oli no mekem samting long fasin haed olsem wan stilman we i traehad blong haedem fes blong hem mo ol rabis samting we hem i mekem. Oli no sem nating blong soemaot long klia ples se oli agensem plan blong God.

Ol spirit pikinini ya blong God oli slip wetem ol woman, nao ol woman oli bonem ol pikinini we oli kam ol bigbigfala man we oli strong tumas. Ol man oli singaot olgeta long wan nem we i kamaot long lanwis Hibru, se “Nefilim.” Baebol i talem se: “Long taem ya, i gat ol bigbigfala man i stap we oli dabolbun. Olgeta ya oli pikinini blong ol woman we ol enjel ya oli stap tekem olgeta. Hemia ol man ya bifo we oli lariken man blong faet, we olgeta man oli savegud nem blong olgeta.” (Jenesis 6:4) Ol man oli fraet bigwan long ol Nefilim. Tok ya “Nefilim” i minim “Ol Man Blong Katemdaon,” no olgeta we oli kilimdaon narafala. Oli man blong kilim man i ded mo maet ol kastom stori blong bifo oli tokbaot ol raf fasin blong ol olgeta.

Stret Man i Harem Nogud Tumas

Baebol i tokbaot ol man we oli laef long taem ya se oli gohed longtaem long nogud fasin blong olgeta, mo nogud fasin ya i kasem olgeta ples. Hem i talem se: “Olgeta man long wol oli stap mekem i nogud tumas, mo oltaem, tingting blong olgeta i fulap nomo long ol rabis fasin. . . . Olbaot long evri ples, oli stap faet mo oli stap kilim man i ded. . . . Wol i kam nogud tumas from ol rabis fasin blong ol man.”—Jenesis 6:5, 11, 12.

Hemia nao laef long wol long taem blong Noa. Be Noa i defren olgeta long ol man raonabaot long hem. “Hem i wan stret man” we “oltaem hem i stap fren gud wetem God.” (Jenesis 6:9) I no isi blong wan stret man i laef wetem ol rabis man. !I sua se Noa i harem nogud tumas long ol toktok mo fasin blong ol man raonabaot long hem! Ating hem i gat sem filing olsem wan narafala stret man we i laef afta long taem we bigfala wota i ron, nem blong man ya se Lot. Lot i stap laef long medel blong ol rabis man long taon ya Sodom. Hem i “harem nogud tumas from ol fasin nogud we ol rabis man long ples ya oli stap mekem. Hem i stap long medel blong olgeta, mo oltaem hem i stap luk rabis fasin blong olgeta, mo i stap harem rabis tok blong olgeta, mo evri dei nomo, hem i stap harem nogud tumas from.” (2 Pita 2:7, 8) I sua se Noa tu i bin harem olsem.

?Olsem wanem? ?Yu yu harem nogud tumas long ol samting we yu harem long nius? ?Yu yu harem nogud long ol rabis fasin blong ol man raonabaot long yu? Sipos yes, yu yu kasem save  long filing blong Noa. Noa i gat 600 yia taem bigfala wota i ron. Yes, blong 600 yia, Noa i stanap strong long wan wol we i fulap long nogud fasin. Tingbaot, samting ya i no isi nating. !Ating hem i wantem tumas we rabis fasin i finis!—Jenesis 7:6.

Noa i No Fraet Blong Stap Defren

Noa i “no gat fol nating long medel blong ol man we oli laef long taem blong hem.” (Jenesis 6:9, NW) Makem we Baebol i no talem se, Noa i no gat fol long tingting blong ol man we oli laef long taem blong hem, be Baebol i talem se Noa i no gat fol long medel blong ol man we oli laef long taem blong hem. I min se long lukluk blong God, Noa i no gat fol nating, be long tingting blong ol man long taem ya, Noa i narakaen. Yumi save sua we Noa i no agri long tingting blong ol man raonabaot long hem, mo hem i no joen long ol pleplei mo long ol narafala samting we oli mekem we God i no laekem. ?Wanem tingting blong ol man taem Noa i stat blong wokem sip ya? Ating oli laf long hem mo jikim hem. Oli no ting se samting we Noa i stap talemaot bambae i kamtru.

Mo tu, Noa i wan man we i gat strong bilif, mo hem i no save haedem bilif blong hem. Baebol i talem se hem i “wan prija we i stap talemaot stret fasin.” (2 Pita 2:5) Noa i save se bambae ol man oli agensem hem. Olfala bubu blong hem, Inok, i wan stret man we i bin talemaot ol jajmen blong God agens long ol rabis man. From samting ya, ol man oli agensem Inok, be God i no letem olgeta oli kilim hem i ded. (Jenesis 5:18; 21-24; Hibrus 11:5, NW; 12:1; Jud 14, 15) Noa i nidim fasin no fraet mo strong bilif long paoa blong Jeova blong sevem hem, from Setan wetem ol rabis enjel, ol Nefilim, mo ol man raonabaot long hem, we plante long olgeta oli no wantem save long tok we hem i talemaot, mo plante oli agensem hem stret.

Longtaem finis i kam, ol man we oli no mekem wok blong God, oli agensem olgeta we oli mekem wok blong hem. Ol man oli no laekem nating Jisas Kraes, mo oli gat sem tingting agensem olgeta we oli biaen long hem. (Matiu 10:22; Jon 15:18) Noa i no fraet blong mekem wok blong God, nating se ol man raonabaot oli no laekem hem from. Hem i kasem save se i moa impoten we God i glad long hem i bitim we ol rabis man raonabaot oli glad long hem. Taswe God i glad long Noa.

Noa i Lesin Long Woning

Olsem yumi tokbaot finis, Noa i no fraet blong prij long ol narafala. ?Olgeta ya oli mekem wanem taem oli harem woning we Noa i talemaot? Baebol i talem se bifo we bigfala wota i ron ol man oli stap “kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya . . . [“oli no wantem lesin,” NW] gogo wota i ron bigwan, i tekemaot olgeta.” Yes, olgeta ya oli no lesin long woning.—Matiu 24:38, 39.

Jisas i talem se bambae i sem mak long taem blong yumi. Bitim wan handred yia nao, ol Witnes blong Jeova oli givim woning se Jeova bambae i tekem aksen blong mekem promes blong hem long saed blong wan niufala wol blong stret fasin, i kamtru. Nating se i gat plante milian man we oli lesin long woning ya, be i gat plante bilian man tu we oli no wantem lesin. “Oli no wantem tingbaot,” we bigfala wota ya i bin kavremap fulwol long taem bifo, mo we samting ya i gat bigfala mining long yumi tede.—2 Pita 3:5, 13.

Be Noa, hem i lesin long woning blong God. Hem i bilif long wanem we Jeova God i talem long hem. From we hem i obei, hem i stap sef. Aposol Pol i raetem se: “From we Noa i stap bilif strong long God, taswe hem i obei long tok blong God long taem ya we God i talemaot ol samting ya long hem fastaem, we i no gat man i luk yet. Taswe hem i obei long God, nao i wokem wan bigfala sip blong sevem olgeta famle blong hem.”—Hibrus 11:7.

Wan Eksampol Blong Yumi Folem

Sip we Noa i wokem i bigwan we i bigwan—longfala blong hem i olsem wan futbol fil mo hae blong hem i olsem wan haos we i gat tri stori blong hem. Longfala blong hem i 30 mita moa i bitim ol narafala sip we ol man oli bin wokem  long wud. I tru se sip ya we Noa i wokem i no luk olsem ol narafala sip. Hem i no blong muf i gotru long wota be i blong flot nomo antap long wota. Nating se i olsem, Noa i mas gat save mo gudhan blong wokem sip ya, klosap sem mak long save mo gudhan we ol man oli mas gat blong wokem ol bigfala sip tede. Mo tu, hem i pentem insaed mo afsaed blong sip ya wetem kolta. Maet Noa i bin tekem bitim 50 yia blong wokem sip ya.—Jenesis 6:14-16.

Be i no hemia nomo we Noa i mekem. Hem i mas hivimap kakae blong famle blong hem mo ol anamol, we i naf blong wan yia. Bifo we bigfala wota i ron, hem i mas hivimap ol anamol mo tekem olgeta oli go insaed long bigfala sip. “Noa i mekem olgeta samting ya we God i talem long hem.” !Ating Noa i glad tumas taem evri samting i rere mo Jeova i satem doa blong sip!—Jenesis 6:19-21; 7:5, 16.

Ale bigfala ren i foldaon mo i gohed blong 40 dei mo 40 naet. Noa wetem famle blong hem mo ol anamol oli mas stap insaed long sip ya wan ful yia, gogo wota i kam drae. (Jenesis 7:11, 12; 8:13-16) Olgeta rabis man oli lus. God i sevem Noa wetem famle blong hem nomo, nao oli kamaot long sip ya blong oli laef long wan wol we i klin.

Baebol i talem se bigfala wota we i ron long taem blong Noa i soemaot wanem we God i “save mekem long ol man we oli kam biaen.” ?Wanem samting we God bambae i mekem? Yumi ridim long Baebol se: “Skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus.” Be olsem long taem blong Noa, bambae i gat sam man long taem blong yumi tu we oli save stap sef. Yumi sua fulwan se “[Jeova] i save sevem ol man we oli bilif long hem, i save tekemaot olgeta long ol samting we i stap traem olgeta.”—2 Pita 2:5, 6, 9; 3:7.

Noa i wan man we i fasgud long God, hem i wan stret man long medel blong ol rabis man blong taem bifo. Hem i obei fulwan long God. Hem i no fraet blong mekem samting we i stret, nating we hem i save se ol man we oli no wantem mekem wok blong God bambae oli daonem hem mo no laekem hem nating. Sipos yumi folem ol fasin ya blong Noa, bambae God i glad long yumi tu, mo bambae yumi gat janis blong go insaed long niufala wol ya we klosap nao bambae i kamtru.—Ol Sam 37:9, 10.

[Futnot]

[Tok blong makem poen long pej 5]

Maet ol kastom stori blong bifo oli tokbaot ol raf fasin blong ol Nefilim

[Tok blong pija long pej 7]

Sipos yumi gat strong bilif olsem Noa, bambae God i glad long yumi

[Credit Line long pej 5]

Alinari/Art Resource, NY