!‘God Nomo i Stap Mekem Ol Kakae i Gru’!

“Man we i planem kakae, mo man we i klinim garen, tufala i olsem nating nomo. Stamba blong wok ya i stap long God, from we hem nomo i stap mekem ol kakae i gru.”—1 KOR. 3:7.

1. ?Olsem wanem ‘yumi stap joen wetem God blong mekem wok blong hem’?

‘YUMI stap joen wetem God blong mekem wok blong hem.’ Aposol Pol i talem olsem taem hem i tokbaot wan spesel wok we yumi evriwan i save mekem. (Ridim 1 Korin 3:5-9.) Wok we Pol i stap tokbaot, hemia wok blong pulum ol man oli kam disaepol blong Kraes. Pol i talem se wok ya i olsem wok blong sakem sid long garen mo klinim garen. Sipos yumi wantem karem frut long impoten wok ya, yumi nidim we Jeova i givhan long yumi. Pol i mekem yumi tingbaot se ‘God nomo i stap mekem ol kakae i gru.’

2. ?Taem yumi tingbaot se ‘God nomo i stap mekem ol kakae i gru,’ olsem wanem samting ya i save givhan long yumi blong gat stret tingting long wok blong prij?

² Tok ya i mekem yumi luksave se yumi smol nomo, yumi no gat paoa blong mekem kakae i gru. God nomo i naf blong mekem samting ya. Save ya i halpem yumi blong gat stret tingting long saed blong wok blong prij. Maet yumi wok strong blong prij long ol man mo tijim olgeta, be olgeta ona i go long Jeova taem yumi karem frut long wok ya. ?From wanem? From we, i no gat wan long yumi we i naf blong kasem save olsem wanem wan man i kam disaepol blong Kraes, nating se yumi traehad  blong kasem save. Taswe i klia se yumi no naf blong mekem frut i kamaot. King Solomon i talem tru nomo taem hem i raetem se: “God i stap wokem olgeta samting, be i had blong yumi makem fasin blong hem.”—Pri. 11:5.

3. ?Olsem wanem wok blong sakem sid long garen i sem mak long wok blong pulum man i kam disaepol blong Kraes?

³ I tru, yumi no naf blong kasem save stret olsem wanem wan man i kam wan disaepol. ?Be samting ya i mekem se yumi harem nogud long wok ya? Nogat. Defren olgeta, samting ya i mekem we yumi glad long wok ya mo yumi intres gud long hem. King Solomon i talem se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.” (Pri. 11:6) Tru ya, taem yumi sakem sid long garen, yumi no save weswan bambae i gru, no maet i no gat wan sid nating i gru. Yumi no save bos long samting we i hapen long sid ya. Sem mak long saed blong wok blong pulum man i kam disaepol blong Kraes. Jisas i makem poen ya long tufala parabol we hem i givim. Yumi save ridim tufala ya long Gospel blong Mak, japta 4. Naoia, bambae yumi luk wanem samting yumi save lanem long tufala parabol ya.

Ol Defren Kaen Graon

4, 5. Talem ol bigfala poen long parabol blong Jisas long saed blong man we i sakem sid.

⁴ Long Mak 4:1-9, Jisas i tokbaot wan man we i sakem sid, nao sid ya i folfoldaon long ol defren graon. Hem i se: “Yufala i lesin gud. I gat wan man i go blong planem wit long garen blong hem. Taem hem i planem ol wit ya, hem i stap saksakem ol sid i go olbaot long graon, nao sam sid oli folfoldaon long rod. Biaen, ol pijin oli kam, oli kakae evriwan. Mo sam sid oli folfoldaon long ples we i gat ston daon, be i no gat tumas graon antap. Nao oli gru kwik from we graon i smol nomo. Be taem san i kam antap, i bonem olgeta, nao oli drae wantaem, from we rus blong olgeta i no godaon gud. Mo sam narafala sid oli folfoldaon long ples blong ropnil. Biaen rop ya i kam bigwan, i kavremap ol wit ya, nao oli no karem kakae. Mo sam narafala sid bakegen oli folfoldaon long gudfala graon. Nao oli gru, oli kam bigwan, oli karem kakae. Sam oli karem toti frut, sam oli karem sikisti, mo sam oli karem handred.”

⁵ Long taem ya we oli raetem Baebol, ol man blong wokem garen oli saksakem sid i go olbaot long graon taem oli wantem planem kakae. Maet oli karem sid ya long wan poket long klos blong olgeta, no maet oli karem long wan graonpot. Nao oli slingim ol sid ya i go longwe, stat long lefsaed go kasem raetsaed. Taswe, long parabol ya, man ya i no minim blong sakem ol sid i go long ol defren kaen graon, olsem we i sakem sam i go long wan kaen graon mo sam i go long narafala graon. Taem hem i sakem ol sid ya, olgeta nomo oli go folfoldaon olbaot long ol defren kaen graon ya.

6. ?Jisas i talem wanem mining blong parabol ya blong man we i sakem sid?

⁶ I no nid blong yumi traem talem mining blong parabol ya folem prapa tingting blong yumi, from we Jisas i gohed blong eksplenem mining blong hem. Mak 4:14-20 i talem se: “Man ya we i planem sid blong wit, hem i olsem man we i talemaot tok blong God. Sam man we oli kasem tok ya, oli olsem graon ya long rod we sid i foldaon long hem.  Hemia olgeta we oli harem tok, be wantaem nomo, Setan i kam i tekemaot tok ya we oli harem. Mo sam man we oli kasem tok ya, oli olsem ples blong ston we sid i foldaon long hem. Hemia olgeta we oli harem tok ya, mo wantaem nomo oli glad long hem. Be tok ya i no go insaed gud long tingting blong olgeta, nao oli save stap smoltaem nomo. Mo sipos oli gat hadtaem, no ol man oli mekem i strong tumas long olgeta from tok ya, bambae oli foldaon wantaem. Mo sam narafala man we oli kasem tok ya, oli olsem ples blong ropnil we sid i foldaon long hem. Hemia olgeta we oli harem tok ya, be oli tingting tumas from laef blong olgeta long wol ya, mo oli wantem tumas blong kam rijman, mo oli wantem ol narafala samting tu. Nao ol fasin ya oli kam blokem tok ya, i no karem frut long laef blong olgeta. Be sam narafala man bakegen we oli kasem tok ya, oli olsem gudfala graon ya we sid i foldaon long hem. Hemia olgeta we oli harem tok ya, nao oli kasemgud, mo oli gat frut blong hem long laef blong olgeta. Sam long olgeta oli gat olsem toti frut, mo sam oli gat olsem sikisti frut, mo sam oli gat olsem handred frut long laef blong olgeta.”

7. ?Wanem mining blong sid mo ol defren kaen graon?

⁷ Makemgud we Jisas i no talem se man ya i sakem ol defdefren kaen sid, nogat. Hem i tokbaot wan kaen sid nomo we i foldaon long ol defren kaen graon, mo i gat ol defdefren frut i kamaot. Faswan graon i strong tumas, seken graon i no dip, namba tri graon i fulap long ropnil, mo namba fo graon i gud mo i karem gudfala frut. (Luk 8:8) ?Sid ya i minim wanem? Hemia ol tok blong Kingdom we yumi faenem long Baebol. (Mat. 13:19, NW) ?Wanem mining blong ol defren kaen graon? Hemia ol man we hat blong olgeta i defdefren.—Ridim Luk 8:12, 15.

8. (a) ?Man blong sakem sid i minim hu? (b) ?From wanem ol frut we i kamaot long wok blong prij i defdefren?

⁸ ?Man blong sakem sid i minim hu? Hem i minim ol man we oli joen wetem God blong mekem wok blong hem, olgeta we oli talemaot gud nius blong Kingdom. Olgeta ya oli mekem sem mak olsem Pol mo Apolos, oli planem sid mo oli klinim garen. Be nating se oli wok had, i no olgeta sid we oli karem frut. ?From wanem? From we ol man we oli harem tok ya blong Kingdom, hat blong olgeta i defdefren. Long parabol ya, man we i sakem sid i no save mekem sid ya i karem frut. !I gud tumas blong save samting ya! !Antap moa, save ya i leftemap tingting blong plante gudfala brata mo sista blong yumi we oli bin wok had blong plante yia, samfala blong ful laef blong olgeta, be oli no luk plante frut blong wok blong olgeta! * ?From wanem samting ya i leftemap tingting blong olgeta?

9. ?Aposol Pol mo Jisas, tufala tugeta i talem wanem trutok we i mekem yumi haremgud?

⁹ God i no makem bilif blong wan man we i sakem  sid from frut blong wok blong hem. Pol i soemaot samting ya taem hem i talem se: “Bambae God i givim pei long [“wanwan man,” NW], stret long ol wok we [oli] mekem.” (1 Kor. 3:8) Oli kasem pei folem wok we oli mekem, i no folem ol frut blong wok blong olgeta. Jisas tu i talem samting ya long ol disaepol blong hem taem oli kambak long wan wokbaot we oli mekem blong prij long ol man. Ol disaepol ya oli glad tumas from we taem oli yusum nem blong Jisas, ol devel tu oli obei long olgeta. Be nating se oli glad from, Jisas i talem long olgeta se: “I nogud yufala i stap glad nomo, from we ol devel ya oli stap obei long yufala. I moa gud yufala i glad from we God i raetemdaon nem blong yufala, i stap long heven finis.” (Luk 10:17-20) Maet wan man blong sakem sid blong Kingdom i no pulum plante man oli kam disaepol blong Kraes, be samting ya i no min se hem i bin les mo se bilif blong hem i slak moa long ol narafala, nogat. Frut we i kamaot i dipen bigwan long hat blong man we i harem tok blong Kingdom. !Mo long en blong bisnes ya, God nomo i save mekem sid ya i gru!

Wok Blong Olgeta We Oli Harem Tok Blong Kingdom

10. ?Wanem i mekem se wan man we i harem tok blong Kingdom bambae i olsem gudfala graon no nogat?

¹⁰ ?Olsem wanem long olgeta we oli harem tok blong Kingdom? ?God i makemaot finis fasin we bambae oli mekem taem oli harem? Nogat. Olgeta nomo oli mas jusum sipos bambae oli olsem gudfala graon no nogat. Hat blong wan man i save jenis i kam gud no i save jenis i kam nogud. (Rom 6:17) Long parabol blong Jisas, hem i talem long saed blong samfala we oli harem tok ya, se “wantaem nomo” Setan i kam tekemaot tok ya. Be samting ya i no nid blong hapen. Jemes 4:7 i leftemap tingting blong ol Kristin blong “blokem Setan,” nao hem bambae i ronwe long olgeta. Jisas i talem se sam narafala man we oli harem tok ya, oli glad long hem fastaem, be biaen oli foldaon from we “rus blong olgeta i no godaon gud.” Be ol man blong God oli kasem advaes se oli mas stanap strong, “olsem we rus blong tri i holemtaet graon, olsem we haos i fas strong long graon we i stanap long hem.” Long rod ya, bambae oli naf blong kasem save long “fasin ya blong Kraes we hem i lavem yumi tumas,” mo blong kasem save se fasin ya “i bigwan olsem wanem, mo i longfala olsem wanem, mo i hae olsem wanem, mo i dip olsem wanem.”—Efes. 3:17-19; Kol. 2:6, 7.

11. Tok blong Kingdom i no save karem frut taem man i tingting tumas from laef long wol ya mo i wantem kam rijman. ?Olsem wanem blong blokem samting ya?

¹¹ Jisas i talem se samfala we oli harem tok ya “oli tingting tumas from laef blong olgeta long wol ya, mo oli wantem tumas blong kam rijman.” From samting ya, tok ya i no save karem frut long laef blong olgeta. (1 Tim. 6:9, 10) ?Olsem wanem blong blokem samting ya? Aposol Pol i ansa se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’”—Hib. 13:5.

12. ?From wanem samfala we oli olsem gudfala graon oli karem plante frut be samfala oli karem smol frut nomo?

¹² Nao Jisas i tokbaot sid we i foldaon long gudfala graon mo i karem frut, se “sam long olgeta oli gat olsem toti frut, mo sam oli gat olsem sikisti frut, mo sam oli gat olsem handred frut.” Nating se sam man oli gat gudfala hat mo tok blong Kingdom i karem frut, be maet sam long olgeta oli save wok plante blong talemaot gud nius mo samfala oli save wok smol. ?From wanem? From we laef blong olgeta wanwan i defdefren. Olgeta we oli olfala mo olgeta we oli sik, oli no save prij plante olsem ol narafala. (Skelem wetem Mak 12:43, 44.) Bakegen, man we i sakem sid i no save bos long ol samting ya, be hem i glad tumas taem hem i luk we Jeova i mekem sid ya i gru.—Ridim Ol Sam 126:5, 6.

Man We i Planem Sid, Nao Biaen Hem i Slip

13, 14. (a) Talem ol bigfala poen long parabol blong Jisas long saed blong wan man we i planem sid long garen blong hem. (b) ?Man we i planem sid ya i minim hu? ?Sid ya i minim wanem?

¹³ Long Mak 4:26-29 i gat wan narafala parabol long saed blong wan man we i planem sid, i se: “[“Kingdom blong God,” NW] i olsem we wan man i planem sid long garen blong hem. Long naet, man ya i stap slip, mo long dei, hem i stap wokbaot. Nao sid ya i gru, i stap kam bigwan, be hem i no save se samting ya i hapen olsem wanem. Graon nomo i mekem we sid i gru, mo i gat lif blong hem, mo biaen i gat flaoa blong hem, mo i  gat frut blong hem. Be taem frut blong hem i raep, man ya i save go karem, from we taem blong hem i stret.”

¹⁴ ?Hu ya man ya we i planem sid? Samfala long ol giaman Kristin skul oli ting se man ya hem i Jisas. ?Be yu ting se Jisas i stap slip mo i no save se wan sid i gru olsem wanem? Nogat. !Jisas i save gud olsem wanem sid i stap gru! Taswe, man ya we i planem sid i sem mak long narafala man blong sakem sid we yumi tokbaot antap. Hem tu i minim ol wanwan man blong talemaot Kingdom, we oli wok strong blong prij mo sakem sid blong Kingdom. Sid we man ya i planem i minim tok blong Kingdom we oli talemaot. *

15, 16. ?Parabol blong man we i planem sid i soemaot wanem trutok long saed blong ol prapa sid mo sid blong Kingdom?

¹⁵ Jisas i talem se man ya we i planem sid, ‘i stap slip long naet, mo long dei, hem i stap wokbaot.’ Hemia i no min se man ya i no kea long sid ya we hem i planem. Tok ya i soemaot nomo wanem program we bighaf blong ol man oli folem evri dei long laef blong olgeta. Vas ya i givim tingting se taem i pas, nao man ya i gohed nomo blong wok long dei mo slip long naet. Jisas i talem samting we i hapen long taem ya we i stap pas, i se: “Nao sid ya i gru, i stap kam bigwan.” Jisas i talem tu se: “Be [man ya] i no save se samting ya i hapen olsem wanem.” Jisas i makem se “graon nomo i mekem we sid i gru,” yes, sid ya i gru hem wan nomo. *

¹⁶ ?Jisas i wantem soemaot wanem? Hem i wantem makem fasin ya we sid i stap gru, mo se i stap gru sloslo nomo. “Graon nomo i mekem we sid i gru, mo i gat lif blong hem, mo biaen i gat flaoa blong hem, mo i gat frut blong hem.” (Mak 4:28) Sid ya i gru sloslo, mo i gat ol defren mak we hem i kasem taem hem i stap gru. I no gat wan man we i save fosem sid ya blong gru mo mekem i hareap. Samting ya i sem mak long ol man we oli kam disaepol blong Kraes. Taem Jeova i mekem trutok i gru long wan man we hat blong hem i gud, i gat ol defren mak we man ya bambae i kasem.—Wok 13:48, NW; Hib. 6:1.

17. ?Hu olgeta we oli kasem glad taem sid blong trutok i karem frut?

¹⁷ ?Olsem wanem man we i planem sid i joen long wok blong karem kakae “taem frut blong hem i raep”? Taem Jeova i mekem trutok blong Kingdom i gru long hat blong ol niufala disaepol, sloslo oli lavem God, nao lav ya i pusum olgeta blong givim laef blong olgeta i go long God. Oli soemaot desisen ya taem oli tekem baptaes. Ol brata we oli  gohedgud, sloslo oli save kam naf blong mekem moa wok long kongregesen. Man we i sakem sid ya blong Kingdom fastaem i kasem frut blong sid ya, mo ol narafala man blong talemaot Kingdom tu oli kasem frut taem man ya i kam wan disaepol blong Kraes, nating we olgeta evriwan oli no bin joen blong sakem sid we i gru long hat blong man ya. (Ridim Jon 4:36-38.) Tru ya, “man we i go blong planem garen, wetem man we i go blong karem kakae i kam, tufala evriwan i . . . glad.”

Ol Samting We Yumi Lanem We i Givhan Long Yumi Tede

18, 19. (a) ?Olsem wanem stadi ya long saed blong tufala parabol blong Jisas i leftemap tingting blong yu? (b) ?Nekis stadi i tokbaot wanem?

¹⁸ ?Yumi lanem wanem long tufala parabol ya long Mak japta 4? Yumi luksave klia se yumi gat wan wok blong mekem, hemia blong planem sid blong Kingdom. Yumi no mas mekem eskius, mo yumi no mas letem ol trabol mo hadtaem oli blokem yumi blong mekem wok ya. (Pri. 11:4) Yumi mas tingbaot bigfala blesing we yumi gat blong joen wetem God blong mekem wok blong hem. Jeova nao i mekem ol man oli kam disaepol blong Kraes, hem i blesem traehad blong yumi mo traehad blong olgeta we oli harem tok blong Kingdom. Yumi luksave se yumi no save fosem wan man blong i kam wan disaepol. Mo yumi save tu se yumi no mas letem tingting blong yumi i foldaon mo harem nogud sipos wan man i slo no sipos i no gohed nating. I gud tumas blong save se Jeova i makem frut we yumi karem from fasin blong yumi blong holemstrong long hem, mo from fasin blong holemstrong long wok we hem i givim long yumi olsem wan blesing, hemia blong talemaot “gud nius ya blong Kingdom, . . . blong [yumi] witnes long hem long fes blong olgeta man.”—Mat. 24:14, NW.

¹⁹ ?Jisas i tijim yumi long wanem samting moa long saed blong fasin blong ol niufala disaepol blong gru mo fasin blong wok blong Kingdom blong gru? Yumi faenem ansa blong kwestin ya long sam narafala parabol we oli stap long ol Gospel. Long nekis stadi bambae yumi tokbaot olgeta.

[Ol futnot]

?Yu Yu Save Tingbaot?

• ?Olsem wanem wok blong planem sid long garen i sem mak long wok blong talemaot Kingdom?

• ?Jeova i makem bilif blong wan man blong talemaot Kingdom, folem wanem samting?

• ?Jisas i soemaot gud se prapa sid mo sid blong Kingdom, tufala tugeta i gru long wanem fasin?

• ?Olsem wanem “man we i go blong planem garen, wetem man we i go blong karem kakae i kam, tufala evriwan i . . . glad”?

[Kwestin]

[Tok blong pija long pej 23]

?From wanem Jisas i talem se wan man blong talemaot Kingdom blong God i olsem wan man blong sakem sid?

[Tok blong pija long pej 24]

Olgeta we oli olsem gudfala graon oli joen long wok blong talemaot Kingdom wetem fulhat blong olgeta, stret olsem oli naf blong mekem

[Tok blong pija long pej 26]

God nao i stap mekem sid ya i gru