Prij Long Ol Haos Wanwan—?From Wanem i Impoten Tede?

“Evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas.”—OL WOK 5:42.

1, 2. (a) ?Wanem stamba rod we ol Witnes blong Jeova oli yusum blong prij, we i mekem se ol man oli save long olgeta? (b) ?Bambae yumi tokbaot wanem long stadi ya?

KLOSAP olgeta man long evri ples long wol oli stap luk ol man mo woman we klos blong olgeta i stret mo i klingud, oli stap go tutu long ol haos blong ol man mo oli tekem smol taem blong tokbaot tok blong Baebol long saed blong Kingdom blong God. Sipos man blong haos i intres, ale tufala we i toktok wetem hem tufala i soem wan buk we i eksplenem Baebol, mo tufala i askem sipos hem i wantem stadi Baebol fri nomo long haos blong hem. Biaen, tufala i aot mo tufala i go mekem sem mak long nekis haos. Sipos yu tu yu stap joen long wok ya, ating yu luk se bifo we yu toktok, be ol man oli luksave finis se yu yu wan Witnes blong Jeova. I tru, ol man oli savegud ol Witnes blong Jeova from wok blong olgeta blong prij long ol haos wanwan.

² Jisas i givim oda long yumi blong go prij mo givhan long ol man blong oli kam disaepol, mo yumi yusum ol defren rod blong folem oda ya. (Mat. 28:19, 20) Yumi prij long ples blong maket, long rod, mo long ol narafala ples we ol man oli stap long hem. (Wok 17:17) Yumi prij long plante man taem yumi raetem leta long olgeta mo yumi toktok long olgeta long telefon. Yumi tokbaot ol trutok blong Baebol long olgeta we yumi mitim olgeta evri dei. Mo tu, long Intenet ol Witnes oli gat wan web saet we ol man oli save go long hem mo kasem ol save blong Baebol long bitim 300 lanwis. * Plante gudfala frut oli kamaot taem yumi yusum olgeta rod ya blong prij. Nating se i olsem, long plante ples, stamba rod we yumi yusum blong talemaot gud nius, hemia blong prij long ol haos wanwan. ?Fasin ya blong prij long ol haos wanwan i stat wea? ?From wanem ol man blong God tede oli yusum rod ya moa? ?Mo from wanem wok ya i impoten tede?

Rod We Ol Aposol Oli Yusum

3. ?Wanem advaes long saed blong wok blong prij we Jisas i givim long ol aposol? ?Advaes ya i soem se oli mas prij olsem wanem?

³ Wok ya blong prij long ol haos wanwan i stanap long Baebol. Taem Jisas i sanem ol aposol oli go blong prij, hem i talem long olgeta se: “Taem yufala i go long wan taon no wan vilej, yufala i mas faenem wan gudfala man we i glad blong yufala i go stap wetem hem.” ?Olsem wanem oli save faenem wan gudfala man olsem? Jisas i talem long olgeta se oli mas go long haos blong ol man, mo i se: “Taem yufala i go stap long wan haos, yufala i mas toktok gud long olgeta se, ‘Pis i stap wetem yufala.’ Sipos olgeta long haos ya oli glad blong tekem yufala, pis ya i save stap long olgeta.” ?Olsem wanem? ?Ol aposol ya oli mas wet fastaem blong ol man oli singaot olgeta oli kam long haos? Makem ol narafala tok ya blong Jisas: “Sipos sam man oli no wantem tekem yufala i go long haos blong olgeta, no oli no save lesin long tok blong yufala, taem yufala i aot long haos blong olgeta no ples blong olgeta, yufala i mas ravemaot graon long leg blong yufala.” (Mat. 10:11-14) Ol advaes ya oli mekem i klia se taem ol aposol ‘oli stap pas long ol vilej, oli stap talemaot gud nius,’ olgeta nao oli mas go luk ol man long haos blong olgeta, i no ol man we oli mas kam luk olgeta.—Luk 9:6.

4. ?Wanem ol vas blong Baebol we oli tokbaot wok blong prij long ol haos wanwan?

⁴ Baebol i talem klia se ol aposol oli prij long ol haos wanwan. Olsem nao, Ol Wok 5:42 i tokbaot olgeta i se: “Evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas.” Samwe long 20 yia biaen, aposol Pol i mekem ol elda long kongregesen blong Efesas oli tingtingbak, i se: “Yufala i save we taem mi stap talemaot gud nius, mo taem mi stap tijim yufala long fes blong ol man, mo long ol haos blong yufala, mi mi no haedem sam  samting we i save givhan long yufala. Mi talemaot evri samting long yufala.” ?Olsem wanem? ?Pol i bin stap visitim ol elda ya long haos blong olgeta taem oli no kam Kristin yet? Yes, i luk olsem. Yumi save samting ya from we hem i bin tijim olgeta long plante samting, mo wan long ol samting ya, hemia blong oli “tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.” (Wok 20:20, 21) Wan buk (Robertson’s Word Pictures in the New Testament) i tokbaot Ol Wok 20:20, i se: “I gud we yumi makem se man ya we i bigwan moa bitim ol narafala long saed long wok blong prij, hem i go long ol haos wanwan blong prij.”

Bigfala Hip Blong Man Tede We Oli Olsem Ol Lokis

5. ?Profet Joel i tokbaot wok blong prij olsem wanem?

⁵ Wok blong prij long faswan handred yia i soemaot long smol fasin, wan bigfala wok we bambae i gohed long taem blong yumi. Profet Joel i talem se wok blong prij blong ol Kristin we tabu spirit i makemaot olgeta, i sem mak long bigfala trabol we ol bebet olsem ol lokis, oli mekem. (Joel 1:4) Ol lokis oli go fored olsem wan ami, i no gat wan samting we i save blokem olgeta, oli go insaed long ol haos, mo oli kakae evri samting we oli faenem. (Ridim Joel 2:2, 7-9.) !Pijatok ya i soemaot fasin blong ol man blong God tede blong gohed strong long wok blong talemaot gud nius mo blong traem kasem evri man wetem gud nius ya! Ol Kristin we tabu spirit i makemaot olgeta, wetem ol fren blong olgeta “ol narafala sipsip,” oli yusum plante rod blong mekem profet tok ya blong Joel i kamtru. Be stamba rod we oli yusum moa, hemia blong prij long ol haos wanwan. (Jon 10:16) ?Olsem wanem yumi, ol Witnes blong Jeova, yumi stat blong folem fasin blong ol aposol blong prij long ol haos wanwan?

6. ?Long 1922, wanem advaes i kamaot we i leftemap tingting blong ol pablisa blong oli prij long ol haos wanwan? ?Be samfala oli mekem wanem?

⁶ Stat long 1919 i kam, ol Kristin oli kasem strong advaes se olgeta wanwan oli mas talemaot gud nius. Olsem nao, i gat wan haf blong Wajtaoa blong Ogis 15, 1922 (Inglis), we stamba tok blong hem se “I Impoten Blong Prij.” Haf ya i mekem ol Kristin we tabu spirit i makemaot olgeta, oli tingbaot se i impoten we oli “wok strong blong go long haos blong ol man blong karem ol buk mo magasin mo blong tokbaot long olgeta se Kingdom blong heven i stap klosap.” Insaed long smol pepa ya Bulletin (we naoia yumi kolem Kingdom Wok Blong Yumi), i bin gat ol fastok we ol pablisa oli save yusum long wok blong prij. Nating se i olsem, namba blong ol  man we oli prij long ol haos wanwan i smol yet. Samfala oli no wantem prij, mo oli talem plante eskius blong no mekem wok ya. Be stamba problem we i blokem olgeta blong no prij long ol haos wanwan, hemia se oli gat flas tingting, taswe oli ting se wok ya i daonem olgeta. Taem plante moa advaes i kamaot blong ol pablisa oli prij long ol haos wanwan, sloslo olgeta ya we oli no gat stret tingting long wok blong prij oli no moa joen long ogenaesesen blong Jeova.

7. ?Long ol yia afta long 1950, i klia se ol pablisa oli nidim wanem?

⁷ Long ol yia biaen, plante moa man oli joen long wok blong prij. Be i klia se oli nidim moa trening long wok ya blong prij long ol haos wanwan. Tingbaot samting we i hapen long Yunaeted Stet long samwe 50 yia bifo. I gat samwe 150,000 pablisa long kantri ya, be klosap 42,000 long olgeta oli jes seremaot ol smosmol pepa mo oli stanap nomo long rod wetem ol magasin. Bitim 60,000 long olgeta oli no joen oltaem long wok blong prij, mo oli save letem sam manis i pas we oli no prij nating. ?Wanem samting i save givhan long olgeta Kristin we oli givim laef blong olgeta i go long Jeova finis, blong oli prij long ol haos wanwan?

8, 9. ?Long 1953, wanem program i stat? ?Wanem frut i kamaot from program ya?

⁸ Long 1953, long wan intenasnal asembli long New York, ol tok we oli kamaot oli tokbaot plante long saed blong wok ya blong prij long ol haos wanwan. Brata Nathan H. Knorr i talem se ol elda long Kristin kongregesen oli mas givhan long evri Witnes blong oli prij oltaem long ol haos wanwan, hemia nao bigfala wok we oli mas mekem. Brata ya i talem se: “Evriwan oli mas naf blong talemaot gud nius long ol haos wanwan.” Wan program i stat long fulwol blong trenem ol pablisa blong oli kasem mak ya. Olgeta we oli no stat yet blong prij long ol haos wanwan oli kasem trening blong oli save toktok long ol man long haos blong olgeta, yusum Baebol blong mekem ol man oli tingting, mo ansa long ol kwestin blong olgeta.

⁹ Frut we i kamaot from program ya i nambawan tumas. Long ten yia nomo, namba blong ol pablisa mo blong ol Baebol stadi long fulwol i kam dabol mo i go antap moa bakegen. Tede, klosap seven milian pablisa blong Kingdom oli stap talemaot gud nius long olgeta ples long wol. Bigfala namba ya i pruvum se Jeova i blesem traehad blong ol man blong hem taem oli prij long ol haos wanwan.—Aes. 60:22, NW.

Putum Mak Long Fored Blong Ol Man Blong Oli No Ded

10, 11. (a) ?Wanem vison we Esikel i luk we i stap long buk blong Esikel japta 9? (b) ?Vison ya i kamtru olsem wanem tede?

¹⁰ Wan vison we profet Esikel i luk, i soem se wok ya blong prij long ol haos wanwan i impoten tumas. Long vison ya, Esikel i luk sikis man we oli karem ol samting blong faet, mo wan man bakegen, hemia namba seven man, we i werem wan gudfala klos we oli wokem long linen, mo i gat wan paos we i gat ol samting blong raet i stap long hem, i hang long strap blong hem. God i talem long namba seven man ya blong i ‘go long evri ples long taon ya, mo putum mak long fored blong olgeta man we oli trabol, oli stap harem nogud from ol samting nogud ya we ol narafala man ya oli stap mekem insaed long taon ya.’ Biaen long wok ya blong putum mak long fored blong ol man, ol sikis man we oli karem ol samting blong faet oli kasem oda blong kilim i ded olgeta man we oli no gat mak ya long fored blong olgeta.—Ridim Esikel 9:1-6.

¹¹ Taem profet tok ya i kamtru, yumi kasem save se man ya we i “werem gudfala klos we oli wokem long linen” i pija blong ol Kristin we tabu spirit i makemaot olgeta, we oli stap yet long wol. Taem grup ya blong ol tabu Kristin oli prij mo oli givhan long ol man blong oli kam ol disaepol, oli mekem wan wok we i olsem se oli putum mak long fored blong olgeta we oli kam ol “narafala sipsip” blong Kraes. (Jon 10:16) ?Wanem mak ya? Mak ya i olsem ol samting we oli pruvum se ol sipsip ya oli ol disaepol blong Jisas Kraes we oli givim laef blong olgeta i go long God finis, oli baptaes, mo oli putum niufala fasin blong laef we i folem fasin blong Kraes. I olsem se ol man oli save luk mak ya klia long fored blong olgeta. (Efes. 4:20-24) Ol man ya we oli olsem sipsip oli joen wetem ol Kristin we tabu spirit i makemaot olgeta, mo olgeta evriwan oli kam olsem wan grup nomo. Oli  givhan long ol tabu Kristin ya long impoten wok ya blong putum mak long fored blong sam moa man bakegen.—Rev. 22:17.

12. ?Olsem wanem vison blong Esikel long saed blong putum mak long fored blong man, i soemaot se wok ya blong lukaotem ol man we oli olsem sipsip, i impoten tumas?

¹² Vison blong Esikel i soemaot wan risen from wanem yumi mas kwik blong go lukaotem ol man we oli stap “harem nogud.” Laef blong ol man i dipen long samting ya. Ol sikis man ya we oli karem ol samting blong faet oli pija blong ol ami blong Jeova long heven. Klosap nao ol ami ya bambae oli spolemgud olgeta we oli no gat mak ya long fored blong olgeta. Long saed blong jajmen ya we i stap kam, aposol Pol i raetem se Masta Jisas, wetem “ol strong enjel blong hem,” bambae oli “givim panis long olgeta we oli no save . . . God, mo long olgeta we oli no save obei long gud nius blong Jisas, Masta blong yumi.” (2 Tes. 1:7, 8) Makemgud se Jisas bambae i jajem ol man folem samting we oli mekem taem oli harem gud nius ya. Taswe, wok ya blong talemaot tok blong God i mas gohed gogo kasem en. (Rev. 14:6, 7) Samting ya i mekem se olgeta man we oli givim laef blong olgeta i go long Jeova finis, oli gat wan wok blong mekem we i impoten tumas.—Ridim Esikel 3:17-19.

13. (a) ?Wanem wok we Pol i harem se hem i mas mekem? ?From wanem? (b) ?Wanem wok we yu yu harem se yu mas mekem long ol man ples blong yu?

¹³ Aposol Pol i harem se wok ya blong talemaot gud nius long ol man i wan wok we hem i mas mekem. Hem i raetem se: “Mi harem olsem we mi gat bigfala kaon blong mi we mi mas pemaot, se mi mas givhan long olgeta man, long ol man blong taon, wetem ol man blong bus, mo long ol man we oli gat save, wetem ol man we oli no save samting. From samting ya, mi mi wantem tumas blong talemaot gud nyus ya long yufala tu, long Rom.” (Rom 1:14, 15, Nyutesteman wetem Ol Sam long Bislama) God i gat sore long Pol mo i givhan long Pol long gladhat blong Hem. Pol i gat tangkiu from samting ya, mo hemia i pulum hem blong traem halpem ol narafala, blong God i givhan gud long olgeta tu long gladhat blong hem. (1 Tim. 1:12-16) I olsem se hem i gat kaon long evri man we hem i mitim, mo blong pemaot kaon ya, hem i mas talemaot gud nius long olgeta. ?Olsem wanem long yu? ?Yu tu yu harem se yu gat kaon long ol man long ples blong yu?—Ridim Ol Wok 20:26, 27.

14. ?Wanem faswan risen blong yumi prij long ol pablik ples mo long ol haos wanwan?

¹⁴ I impoten we yumi prij long ol haos wanwan blong sevem laef blong ol man. Be i gat wan narafala risen we i impoten moa. Long profet tok long Malakae 1:11 (NW), Jeova i talem se: “Bambae ol man long olgeta neson oli leftemap nem blong mi, i stat long is, i go kasem long wes, mo . . . bambae oli givim wan presen i go long nem blong mi, yes wan presen we i tabu, from we ol man long olgeta neson bambae oli leftemap nem blong mi.” Blong mekem se profet tok ya i kamtru, ol man we oli givim laef blong olgeta i go long Jeova, oli leftemap nem blong hem long fored blong ol man long olgeta ples long wol taem oli mekem wok ya blong talemaot gud nius wetem tingting daon. (Sam 109: 30; Mat. 24:14, NW) Faswan risen from wanem yumi prij long ol pablik ples mo long ol haos wanwan, hemia blong ‘leftemap nem blong God olsem we yumi mekem sakrefaes blong givim long hem.’—Hib. 13:15.

Ol Bigfala Impoten Samting We Bambae Oli Kamtru

15. (a) ?Taem ol man Isrel oli stap maj i goraon long Jeriko long namba seven dei, olsem wanem oli spid moa? (b) ?Hemia i soemaot wanem long saed blong wok blong prij?

¹⁵ ?Wanem ol samting we bambae oli kamtru yet long saed blong wok blong prij? Yumi save tingbaot taem ya we ol man Isrel oli bin raonem taon blong  Jeriko, olsem we buk blong Josua i tokbaot. Tingbaot se jes bifo we God i spolem Jeriko, hem i talem long ol man Isrel se wan taem long wan dei, oli mas maj i goraon long taon ya, mo oli mas mekem olsem blong sikis dei. Be long namba seven dei, oli mas spid moa. Jeova i talem long Josua se: “Long namba seven dei, bambae yufala i mas maj i goraon long taon ya seven taem. Mo long taem ya, ol pris ya bambae oli mas stap blu long pupu blong olgeta. Nao taem yufala i harem se oli blu bigwan mo oli pulum i longfala, long semtaem, bambae yufala evriwan i mas singaot bigwan [“olsem ol soldia long taem blong faet,” NW]. Nao bigfala stonwol blong taon ya bambae i brobrok i foldaon.” (Jos. 6:2-5) Long sem fasin, maet bambae i gat wan taem we yumi spid moa long wok blong prij. I sua se, long taem ya we ol rabis fasin blong wol ya oli lus, bambae yumi luk se yumi bin witnes long nem blong God mo Kingdom blong hem long fasin we i bigwan moa i bitim ol narafala taem long histri blong wol.

16, 17. (a) ?Wanem samting bambae i kamtru bifo we “bigfala trabol” i kasem en blong hem? (b) ?Bambae yumi tokbaot wanem long nekis stadi?

¹⁶ Bambae i save gat wan taem we tok we yumi stap talemaot i kam olsem we plante man oli “singaot bigwan,” olsem ol soldia long taem blong faet. Buk blong Revelesen i talem se ol strong tok blong jajmen oli olsem ‘ol ston blong aes we oli folfoldaon olsem ren. Ol ston ya, oli bigbigwan, we sipos man i skelem, bambae hevi blong wan i samwe long fifti kilo.’ * Mo Revelesen 16:21 i talem se: “Trabol ya i nogud we i nogud olgeta.” Yumi no save yet se wok ya blong prij long ol haos wanwan bambae i joen olsem wanem wetem wok ya blong talemaot ol bigfala jajmen ya blong God. Be yumi save sua se bifo we “bigfala trabol” i finis, bambae olgeta man long wol oli save long nem blong Jeova i bitim we oli bin save long hem long olgeta yia bifo.—Rev. 7:14; Esik. 38:23.

¹⁷ Taem yumi stap wet long ol impoten samting ya we bambae oli kamtru i no longtaem, i gud we yumi gohed strong blong talemaot gud nius blong Kingdom. ?Wanem ol traem we yumi fesem taem yumi prij long ol haos wanwan? ?Olsem wanem yumi save winim ol traem ya? Bambae yumi tokbaot ol kwestin ya long nekis stadi.

[Ol futnot]

?Bambae Yu Yu Ansa Olsem Wanem?

• ?Wanem ol vas blong Baebol we oli sapotem wok blong prij long ol haos wanwan?

• ?Long taem blong yumi, olsem wanem plante tok oli bin kamaot long saed blong wok blong prij long ol haos wanwan?

• ?From wanem ol man we oli givim laef blong olgeta i go long Jeova, oli mas mekem wok blong prij?

• ?Wanem ol impoten samting we bambae oli kamtru yet?

[Kwestin]

[Tok blong pija long pej 14]

?Olsem aposol Pol, yu yu harem se wok blong prij i wan wok we yu mas mekem?

[Tok blong pija long pej 15]

Brata Knorr, 1953