Winim Ol Traem Taem Yumi Prij Long Ol Haos Wanwan

“God blong yumi i mekem tingting blong mifala i strong blong kam talemaot gud nius blong hem long yufala, [“wetem bigfala fasin traehad,” NW].”—1 TES. 2:2.

1. ?Wanem ol traem we Jeremaea i kasem? ?Mo olsem wanem hem i naf blong winim ol traem ya?

JEREMAEA i wan man we i gat ol semfala filing olsem yumi. Taem Jeova i talem long Jeremaea se bambae hem i ‘kam wan profet blong talemaot tok blong Hem long ol man blong olgeta kantri long wol,’ Jeremaea i krae i go long Jeova i se: “Hae God. Yu yu Masta blong mi. Mi mi no save toktok, from we mi mi yangfala nomo.” Nating se i olsem, Jeremaea i agri blong mekem wok ya from we hem i trastem Jeova. (Jer. 1:4-10) Bitim 40 yia, Jeremaea i gohed blong mekem wok ya nating se ol man oli no intres, oli sakemaot tok blong hem, oli jikim hem, mo oli wipim hem tu. (Jer. 20:1, 2) Samtaem, Jeremaea i harem se hem i wantem stop long wok ya. Be hem i no mekem olsem. Hem i gohed blong talemaot wan nius we bighaf blong ol man oli no wantem harem. Long paoa blong God,  Jeremaea i naf blong finisim wan wok we hem i neva save mekem long prapa paoa blong hem.—Ridim Jeremaea 20:7-9.

2, 3. ?Olsem wanem ol man blong God tede oli fesem ol traem we oli klosap sem mak long hemia blong Jeremaea?

² Plante man blong God tede oli harem i sem mak olsem Jeremaea. I gat wan taem we sam long yumi oli bin tingbaot wok blong prij long ol haos wanwan, nao oli bin talem se: “Hemia wan samting we mi neva save mekem.” Be taem yumi kasem save se Jeova i wantem we yumi talemaot gud nius, ale yumi winim fraet blong yumi mo yumi bisi long wok blong prij. Nating se i olsem, plante long yumi oli fesem sam samting long laef blong olgeta we i mekem se samtaem, i had blong oli gohed blong prij. I tru se i no isi blong stat long wok ya blong prij long ol haos wanwan mo blong gohed long wok ya gogo kasem en.—Mat. 24:13.

³ ?Olsem wanem sipos yu yu stap stadi longtaem lelebet wetem ol Witnes blong Jeova mo yu joen long ol miting blong kongregesen, be yu fraet blong stat long wok ya blong prij long ol haos wanwan? ?Olsem wanem sipos yu yu baptaes finis olsem wan Witnes blong Jeova, be yu luk se i had long yu blong prij long ol haos wanwan, nating we yu yu gat wan strong bodi? Yu mas save se plante man we oli kamaot long ol defdefren fasin blong laef, oli stap winim ol traem we oli joen wetem wok blong prij long ol haos wanwan. Wetem help blong Jeova, yu tu yu save winim ol traem ya.

 Mekem Tingting i Strong

4. ?Wanem i givhan long Pol blong mekem tingting blong hem i strong blong talemaot gud nius?

⁴ I sua se yu yu luksave we wok blong prij i stap gohed long fulwol from paoa we spirit blong God nomo i givim, be i no from paoa no waes blong man. (Sek. 4:6) Hemia i tru tu long saed blong wok blong prij we ol wanwan Kristin oli mekem. (2 Kor. 4:7) Tingbaot aposol Pol. I gat wan taem we ol man blong agens oli mekem i nogud long Pol wetem ol misinari fren blong hem. Pol i tingbaot taem ya mo i raetem se: “Taem mifala i stap yet long Filipae, ol man oli mekem i nogud long mifala, mo oli tok nogud tumas long mifala tu. Be God blong yumi i mekem tingting blong mifala i strong blong kam talemaot gud nius blong hem long yufala, [“wetem bigfala fasin traehad,” NW].” (1 Tes. 2:2; Wok 16:22-24) Pol i gohed strong long wok ya blong talemaot gud nius, taswe maet yumi neva ting se samtaem hem i harem se i had long hem blong go prij. Be hem i mekem olsem we yumi evriwan i mas mekem. Hem i trastem Jeova blong givhan long hem, nao hem i naf blong mekem tingting blong hem i strong blong talemaot gud nius. (Ridim Efesas 6:18-20.) ?Olsem wanem yumi save folem eksampol blong Pol?

5. Talem wan rod blong mekem tingting blong yumi i strong blong prij.

⁵ Wan rod blong yumi mekem tingting blong yumi i strong blong prij, hemia tru long prea. Wan paenia i talem se: “Mi mi prea long God blong i givhan long mi blong toktok wetem strong tingting. Mi prea blong mi save kasem hat blong ol man, mo mi prea blong mi save kasem glad long wok blong prij. Wok ya i blong Jeova, i no blong yumi, taswe sipos hem i no givhan long yumi, be bambae yumi no naf blong mekem wok ya.” (1 Tes. 5:17) Yumi evriwan i mas askem God oltaem blong givim tabu spirit blong hem long yumi, blong givhan long yumi blong mekem tingting blong yumi i strong blong prij.—Luk 11:9-13.

6, 7. (a) ?Wanem vison we Esikel i kasem? ?Wanem mining blong vison ya? (b) ?Vison blong Esikel i tijim wanem long ol man blong God tede?

⁶ Buk blong Esikel i soem wan narafala samting we i save givhan long yumi blong mekem tingting blong yumi i strong blong prij. Long wan vison, Jeova i givim wan skrol long Esikel we long tufala saed blong hem, oli raetem “krae blong ol man we oli sore, mo krae blong olgeta we oli krae bigwan, mo krae blong olgeta we oli stap harem nogud tumas long bodi blong olgeta.” Jeova i talem long Esikel blong i kakae skrol ya, mo i se: “Pikinini blong man, yu mas mekem bel blong yu i kakae, blong yu save fulumap ol gat blong yu wetem skrol ya we mi givim long yu.” (NW) ?Wanem mining blong vison ya? Esikel i mas putum ol toktok ya we bambae hem i talemaot, oli stap fulwan long tingting mo hat blong hem. Ol toktok ya oli mas kam olsem haf blong hem, mo long rod ya, oli save gat paoa long ol dip filing blong hem. Profet ya i gohed i se: “Mi stat blong kakae, mo i swit olsem hani long maot blong mi.” (NW) Esikel i harem se wok ya blong talemaot tok blong God long olgeta man i gud tumas, olsem we hani i swit long maot blong hem. Hem i harem se hemia i wan blesing blong mekem wok long nem blong Jeova mo blong finisim wok ya we God i givim long hem, nating sipos hem i mas talemaot ol strong tok long ol man we oli no wantem harem.—Ridim Esikel 2:8–3:4, 7-9.

⁷ Long vison ya i gat ol nambawan tijing we oli gud long ol man blong God tede. Yumi tu yumi gat wan strong tok blong talemaot long ol man we plante taem oli no tinghae long traehad blong yumi. Yumi mas gohed blong lukluk Kristin wok ya blong prij olsem wan blesing we God i givim long yumi. Blong mekem olsem, yumi mas gohed blong ridim mo stadi long tok blong God. Sipos yumi no gat fasin blong stadi dip mo yumi stadi wanwan taem nomo, bambae yumi no naf blong mekem Tok blong God i go insaed fulwan long tingting mo hat blong yumi. ?Olsem wanem? ?Yu yu save mekem se yu kamgud moa long fasin blong yu blong ridim Baebol oltaem mo stadi long hem? ?Yu yu save mekem se yu gohed long fasin ya oltaem? ?Yu save mekem se yu tingting dip moa long ol samting we yu stap ridim?—Sam 1:2, 3.

Statem Wan Storian Long Baebol

8. ?Wanem rod we i bin givhan long sam pablisa blong Kingdom blong oli statem wan storian long saed blong Baebol taem oli prij long ol haos wanwan?

⁸ Plante pablisa oli harem se taem oli prij long ol haos wanwan, samting we i hadwok long olgeta,  hemia ol faswan tok we oli mas talem long man blong haos. I tru, long sam ples i no isi blong statem wan storian wetem ol man. Be sam pablisa oli harem se oli no fraet blong toktok sipos oli talem wan sot tok nomo long stat we oli tingting gud finis long hem, ale biaen oli givimaot wan smol pepa long man blong haos, olsem we bokis we i joen wetem stadi ya, i soem. Stamba tok blong smol pepa ya, no ol pija blong hem we oli kalakala, oli save pulum tingting blong man blong haos, mo hemia i save givim janis long yumi blong talemaot kwiktaem risen from wanem yumi kam long haos blong hem, mo blong yumi stanemap wan kwestin. Wan narafala rod, hemia blong soem tri no fo defren smol pepa long man blong haos mo askem long hem blong i jusum wan we hem i intres long hem. I tru, mak blong yumi i no blong givimaot ol smol pepa nomo, mo i no blong yusum olgeta long evri doa nomo, nogat. Yumi wantem statem wan storian wetem ol man long saed blong Baebol mo gohed kasem we oli stadi long Baebol.

9. ?From wanem i impoten blong reregud?

⁹ Nomata wanem rod we yu yusum, sipos yu reregud, hemia bambae i givhan long yu blong toktok gud we yu no fraet, mo toktok wetem glad, taem yu stap prij long ol haos wanwan. Wan paenia i talem se: “Mi mi glad moa taem mi rere gud. Mi harem se mi wantem talemaot ol tok ya we mi rere finis long olgeta.” Wan narafala paenia i talem se: “Taem mi savegud ol samting we i stap insaed long ol buk no magasin we mi wantem seremaot, mi mi glad moa blong yusum olgeta.” Samfala oli luk se i gud taem oli tingbaot ol toktok we bambae oli talem. Be plante oli faenem se i givhan moa long olgeta taem oli mekem pleplei mo talem long bigfala voes ol toktok we bambae oli talemaot. Taem oli mekem olsem, hemia i givhan long olgeta blong oli givim bes blong olgeta i go long Jeova.—Kol. 3:23; 2 Tim. 2:15.

10. ?Olsem wanem blong mekem se ol miting blong prij oli save givhan gud mo soemaot rod long ol pablisa?

¹⁰ Ol miting blong prij we oli soemaot gud ol rod we yumi save yusum, oli givhan long yumi blong karem gudfala frut mo blong kasem glad taem yumi prij long ol haos wanwan. Sipos vas blong dei i laenap wetem wok blong prij, brata we i lidim miting ya i save tekem smol taem nomo blong ridim vas ya mo tokbaot. Be brata ya i mas tekem naf taem blong tokbaot ol isi fastok we oli stret gud long ol man long ples blong yumi mo hem i save mekem pleplei folem ol fastok ya. Mo tu, hem i save tokbaot sam gudfala save we yumi save yusum taem yumi go long wok blong prij. Hemia tu i save givhan long olgeta we oli stap long miting ya blong oli prij long fasin we i karem frut. Sipos ol elda mo ol narafala we oli stap lidim miting blong prij oli reregud fastaem, oli naf blong mekem ol samting ya mo oli no bitim taem blong olgeta.—Rom 12:8.

Samting We i Kamaot Taem Yumi Lesingud

11, 12. ?Taem yumi lesin mo yumi soem se yumi sore long man, olsem wanem samting ya i save givhan long yumi blong kasem hat blong ol man wetem gud nius? Talem wan stori.

¹¹ Yumi mas rerem ol toktok blong yumi, mo antap long samting ya, yumi mas soem intres long ol narafala. Samting ya nao i save givhan long yumi blong statem wan storian long saed blong Baebol mo kasem hat blong man long wok blong prij. Wan rod blong soem long man se yumi intres long hem, hemia taem yumi lesin gud long hem. Wan seket elda i talem se: “Taem yumi gat longfala tingting mo yumi soem se yumi glad blong lesin long ol man, samting ya i gat bigfala paoa blong pulum intres blong olgeta, mo i wan nambawan rod tu blong soem se yumi intres long olgeta.” Taem yumi lesin mo yumi soem sore long ol man, hemia i olsem wan ki we i openem hat blong olgeta. Stori we i kam biaen i soemaot samting ya.

¹² Wan leta i kamaot long wan niuspepa (Le Progrès) we oli wokem long Saint-Étienne, Franis. Woman we i raetem leta ya i tokbaot we smol gel blong hem i ded taem i gat tri manis nomo. Nao smoltaem biaen, tu woman oli kam noknok long doa blong hem. Woman ya i raetem se: “Mi luksave se tufala i Witnes blong Jeova. Mi wantem talem gud long tufala se tufala i go, be mi luk we tufala i stap holem wan smol buk we i tokbaot from wanem God i letem man i safa. Ale mi letem tufala i kam insaed long haos. Tingting blong mi se bambae mi pruvum we ol tok blong olgeta oli rong. . . . Tufala Witnes ya oli stap bitim wan aoa. Tufala i lesin  long mi wetem sore, mo taem tufala i aot long haos, mi harem gud mo mi glad we bambae tufala i kam luk mi bakegen.” (Rom 12:15) Biaen, woman ya i agri blong stadi long Baebol. Samting we woman ya i tingbaot long saed blong faswan taem we tufala Witnes ya i go long haos blong hem, i no ol toktok we tufala i talem, be hem i rimemba se tufala i bin lesin gud long hem.

13. ?Taem yumi talemaot gud nius, olsem wanem yumi save jenisim toktok blong yumi blong mekem i laenap wetem ol wanwan man we yumi mitim?

¹³ Taem yumi lesin long ol man mo yumi soem se yumi gat sore long olgeta, i olsem se yumi stap openem rod long olgeta blong oli talemaot from wanem oli nidim Kingdom. Samting ya i mekem se yumi gat moa janis blong talemaot gud nius long olgeta. Maet yu bin luksave se ol man blong talemaot gud nius we oli karem gudfala frut long wok blong olgeta, oli stap lesingud long ol man. (Prov. 20:5) Oli soem se oli rili intres long ol man we oli mitim long wok blong prij. Oli raetemdaon nem mo adres blong ol man ya be i no hemia nomo. Oli raetem tu ol samting we ol man oli intres long hem mo ol nid blong olgeta. Taem wan man i talemaot wanem samting stret we i mekem hem i wari, ol pablisa ya oli go lukaotem moa save long saed ya mo oli gobak kwiktaem blong talemaot save ya long man ya. Oli mekem olsem aposol Pol. Taem oli talemaot gud nius blong Kingdom, oli jenisim toktok blong olgeta blong mekem i laenap wetem ol wanwan man we oli mitim. (Ridim 1 Korin 9:19-23.) Taem oli intres olsem long man, hemia i pulum man ya blong i lesin long gud nius, mo long rod ya ol pablisa oli soemaot nambawan fasin blong God blong yumi, we “hem i kaen tumas mo hem i gat sore long yumi.”—Luk 1:78.

Holemtaet Wan Gudfala Tingting

14. ?Taem yumi mekem wok ya blong prij, olsem wanem yumi save soemaot ol fasin blong Jeova?

¹⁴ Jeova i soemaot se hem i tinghae long yumi wanwan taem hem i letem we yumi fri blong jusum samting we yumi wantem. Nating se hem i God ya we i gat Olgeta Paoa, be hem i no fosem ol man blong oli wosipim hem. Defren olgeta, hem i pulum ol man blong oli wosipim hem taem hem i soem lav long olgeta, mo hem i blesem olgeta we oli gat tangkiu from ol nambawan rod blong hem. (Rom 2:4) Yumi we yumi olsem ol man blong wok blong hem, yumi mas rere blong talemaot gud nius long wan fasin we i soemaot sore ya we God blong yumi i gat. Mo yumi mas mekem olsem long evri taem we yumi prij long wan man. (2 Kor. 5:20, 21; 6:3-6) Taswe, yumi mas holem wan gudfala tingting long saed blong ol man long ples blong yumi. ?Wanem i save givhan long yumi blong winim traem ya?

15. (a) ?Jisas i talem se ol aposol blong hem oli mas mekem wanem sipos ol man oli sakemaot tok blong olgeta? (b) ?Wanem samting i save givhan long yumi blong wok nomo blong faenem ol gudfala man?

¹⁵ Jisas i talem long ol man blong hem se oli no mas wari sipos samfala oli sakemaot toktok blong olgeta, be oli mas traehad nomo blong faenem ol gudfala man we oli glad blong oli go stap wetem olgeta. (Ridim Matiu 10:11-15.) Yumi save mekem olsem sipos yumi putum ol mak we oli smol nomo mo we oli no strong tumas blong kasem. Wan brata i talem se taem hem i prij, hem i tingbaot se hem i olsem wan man we i stap digim graon blong lukaot ol sas samting olsem gol. Taswe, oltaem hem i talem toktok ya se: “Tede bambae mi faenem gol.” Wan narafala brata i putum mak ya se “evri wik hem i mas mitim wan man we i intres, mo sam dei biaen, hem i mas gobak blong luk man ya blong mekem se intres blong hem i gru.” Sam pablisa oli traehad blong ridim wan vas long evri man we oli mitim long wok blong prij. ?Olsem wanem long yu? ?Wanem mak we yu yu save putum we i no strong tumas blong kasem?

16. ?Wanem ol risen from wanem yumi mas gohed nomo blong prij?

 ¹⁶ Blong yumi karem gudfala frut long wok blong prij long ol haos wanwan, hemia i no dipen nomo long samting we ol man oli mekem taem oli harem gud nius. I tru se wok blong prij i givhan bigwan blong sevem ol man we hat blong olgeta i stret, be wok ya i mekem plante narafala samting tu. Kristin wok ya i givim janis long yumi blong soemaot se yumi lavem Jeova. (1 Jon 5:3) Wok ya i mekem se yumi no gat fol from ol man we bambae oli lus. (Wok 20:26, 27) Wok ya i givim woning long ol man we oli no obei long God se “taem i kam finis blong [God] i jajem olgeta man.” (Rev. 14:6, 7) Antap moa, ol man we oli talemaot gud nius oli presem nem blong Jeova long olgeta ples long wol. (Sam 113:3) Taswe, nating sipos ol man oli lesin no nogat, yumi mas gohed nomo blong talemaot gud nius blong Kingdom. Yes, olgeta traehad we yumi mekem blong talemaot gud nius oli gud tumas long ae blong Jeova.—Rom 10:13-15.

17. ?Wanem samting we klosap nao ol man oli mas luksave?

¹⁷ Nating se tede plante man oli no tinghae long wok blong prij we yumi mekem, klosap nao bambae oli gat defren tingting long saed blong wok ya. (Mat. 24:37-39) Jeova i mekem Esikel i save se taem ol jajmen we hem i stap talemaot oli kamtru, stronghed neson ya blong Isrel ‘bambae i mas save se i gat wan profet i stap wetem olgeta.’ (Esik. 2:5) Long sem fasin, taem God bambae i mekem jajmen blong hem i kamtru long rabis wol ya, ol man oli mas luksave se tok we ol Witnes blong Jeova oli bin talemaot long ol pablik ples mo long ol haos wanwan, i rili kamaot long Jeova we hem nomo i trufala God, mo se ol Witnes oli rili ol man blong wok blong trufala God ya. !Yumi gat bigfala blesing ya blong karem nem blong hem mo talemaot tok blong hem long impoten taem ya we yumi stap long hem! Long paoa blong hem, i gud we yumi gohed blong winim ol traem we oli kamaot taem yumi prij long ol haos wanwan.

?Bambae Yu Yu Ansa Olsem Wanem?

• ?Olsem wanem yumi save mekem tingting blong yumi i strong blong go prij?

• ?Wanem i save givhan long yumi blong statem wan storian taem yumi prij long ol haos wanwan?

• ?Olsem wanem yumi save soemaot se yumi rili intres long ol narafala?

• ?Wanem i save givhan long yumi blong holem wan gudfala tingting long saed blong ol man long ples blong yumi?

[Kwestin]

[Bokis blong pija long pej 18]

Wan Rod Blong Statem Wan Storian Long Baebol

Blong statem:

◼ Afta we yu talem halo long man blong haos, yu save givim wan smol pepa long hem mo talem se: “Mi mi kam luk yu tede from we mi wantem serem wan gudfala tingting wetem yu long saed blong impoten poen ya.”

◼ Sipos no, yu save givim wan smol pepa mo talem se: “Mi mi tekem smol taem tede blong kam luk yu from we mi wantem save tingting blong yu long saed blong poen ya.”

Sipos man blong haos i tekem wan smol pepa:

◼ Yu no mas wet longtaem tumas, be i gud yu askem wan isi kwestin long hem blong faenemaot wanem tingting blong hem long saed blong stamba tok blong smol pepa ya.

◼ Lesin gud long hem, mo traem blong kasem save long tingting blong hem. Talem tangkiu from ol toktok blong hem mo tingbaot ol samting ya we hem i talem taem yu gohed blong storian wetem hem.

Blong mekem se storian ya i gohed:

◼ Ridim mo tokbaot wan no tu vas blong Baebol, mekem tok blong yu i laenap wetem nid blong man mo poen we hem i intres long hem.

◼ Sipos hem i intres, givimaot magasin no buk long hem, mo traem soem olsem wanem blong stadi Baebol. Mekem plan blong gobak luk hem bakegen.