Jeova Bambae i No Lego Ol Man We Oli Stap Tru Long Hem

‘[Jeova] i no save lego ol stret man ya we tingting blong olgeta i stap strong long hem. Hem bambae i stap lukaot gud long olgeta gogo i no save finis.’—SAM 37:28.

1, 2. (a) ?Wanem ol samting we i hapen long ol yia 900 B.K.T., we i traem fasin blong ol man blong God blong stap tru long hem? (b) ?Jeova i lukaotgud long ol man blong hem we oli stap tru long hem long wanem trifala traem?

LONG ol yia 900 B.K.T., * ol man blong Jeova oli mas tekem wan desisen. Klosap ol laen blong Isrel oli faet, be wan samting nomo i blokem olgeta, hemia taem ol laen blong Isrel long not we oli no save stap kwaet, oli seraot long ol laen long saot. Niufala king blong olgeta, hemia Jeroboam, i tekem aksen kwiktaem blong mekem se paoa blong hem i kam strong moa. Hem i stanemap wan niufala wosip we olgeta man long ples we hem i rul long hem oli mas folem. King ya i talem long ol man se oli mas obei fulwan long hem. ?Olsem wanem long ol man blong Jeova? ?Bambae oli mekem wanem? ?Bambae oli stap tru long God ya we oli wosipim? Plante taosen long olgeta oli mekem olsem, mo Jeova i lukaotgud long olgeta taem oli gohed blong holemstrong long hem.—1 King 12:1-33, 2 Kron. 11:13, 14.

² Tede tu, ol man blong God oli fesem plante samting we i traem fasin blong olgeta blong stap tru long hem. Baebol i givim woning se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.” ?Olsem wanem? ?Yumi naf blong ‘stanap strong long bilif blong yumi, blong blokem hem’? (1 Pita 5:8, 9) I gud yumi lukluk long sam samting we oli hapen raonabaot long taem we King Jeroboam i stat blong rul long yia 997 B.K.T., mo yumi tokbaot wanem samting we yumi save lanem from. Long ol hadtaem ya, king i mekem i strong tumas long ol man blong Jeova, mo ol man blong apostasi * tu oli traem blong pulum olgeta. Mo long sem taem, ol man blong Jeova oli traehad blong mekem wok we Jeova i givim long olgeta, nating se i no isi. Long olgeta traem ya, Jeova i no lego ol man we oli stap tru long hem, mo long taem blong yumi tu, bambae hem i gohed blong mekem olsem.—Sam 37:28.

Taem Ol Haeman Oli Mekem i Strong Long Ol Man Blong God

3. ?From wanem King Deved i rul long fasin we i no strong tumas?

³ Fastaem i gud yumi luk wanem samting i mekem se Jeroboam i kam king. Ol Proveb 29:2 i talem se: “Sipos man we fasin blong hem i no stret i kam lida, ol man blong hem bambae oli stap harem nogud nomo.” Ol man Isrel bifo, oli haremgud taem oli stap aninit long rul blong King Deved. I tru, Deved i no stretgud olgeta, be hem i stap tru long God mo i trastem God. Deved i rul long fasin we i no strong tumas. Jeova i mekem wan kontrak wetem Deved, i se: “Olgeta ya we bambae oli stap kamaot biaen long yu, oltaem bambae mi mekem olgeta oli stap gud, mo bambae mi mekem kingdom blong yu i stap oltaem, gogo i no save finis. Mo oltaem, ol king blong yufala bambae oli stap kamaot long olgeta ya we bambae oli stap kamaot biaen long yu.”—2 Saml. 7:16.

4. ?Ol blesing we oli kamaot taem Solomon i stap rul, oli dipen long wanem samting?

⁴ Taem pikinini blong Deved, nem blong hem Solomon, i stat blong rul, ol man we oli stap aninit long hem oli gat pis mo oli gat plante samting, hemia i mekem se rul blong Solomon i kam olsem pija blong Wan Taosen Yia Rul blong Jisas Kraes. (Sam 72:1, 17) Long taem ya, i no gat wan long ol 12 laen blong Isrel we i gat risen blong girap agensem king. Be blong Solomon mo ol man blong hem oli gohed blong kasem ol blesing ya, oli mas mekem sam samting. Jeova i talem long Solomon se: “Sipos yu obei long ol loa mo ol tok blong mi, bambae mi mi mekem long yu olsem we mi promes finis long papa blong yu, King Deved. Yufala ol laen blong Isrel, yufala i man blong mi, mo mi no save lego yufala samtaem, oltaem bambae mi mi stap long medel blong yufala.”—1 King 6:11-13.

5, 6. ?Taem Solomon i no moa stap tru long Jeova, wanem samting i kamaot?

 ⁵ Taem Solomon i kam olfala, hem i no moa stap tru long Jeova, hem i stat blong wosipim ol giaman god. (1 King 11:4-6) Sloslo, Solomon i no moa obei long ol loa blong Jeova mo hem i stat blong mekem i strong tumas long ol man. Strong fasin ya blong Solomon i mekem se taem we hem i ded finis, be ol man oli stap komplen yet long pikinini blong hem, Rehoboam, we i rul long ples blong papa blong hem, mo oli askem long Rehoboam blong i mekem i moa isi long olgeta. (1 King 12:4) ?Jeova i mekem wanem taem Solomon i no moa stap tru long hem?

⁶ Baebol i talem se: “Hae God i God blong ol laen blong Isrel, mo i nomata we hem i kamtru long King Solomon tu taem finis, . . . be [Solomon] i girap, i gowe long hem, i no obei long hem nating. Nao from samting ya, Hae God i kros tumas long hem.“ Jeova i talem long Solomon se: “From we yu yu . . . brekem promes blong yumitu, mo yu no obei long ol tok blong mi, naoia mi mi promes se bambae mi tekemaot raet long yu blong yu no moa rul long ol man ya, nao bambae mi givim long wan haeman blong yu.”—1 King 11:9-11.

7. ?Nating we Jeova i sakemaot Solomon, olsem wanem hem i lukaot long ol man blong Hem we oli stap tru long hem?

⁷ Biaen, Jeova i sanem profet Ahia i go blong makemaot hemia we bambae i sevem ol man oli aot long strong rul blong Solomon. Man ya hem i Jeroboam, wan man we i gat gudhan blong wok mo i stap wok blong Solomon taem Solomon i king. Jeova i stap tru long kontrak blong Kingdom we i mekem wetem Deved, be Hem i agri se ol 12 laen blong Isrel oli seraot long tu grup. Bambae Jeroboam i rul long ten laen, mo King Rehoboam, we i rul long nem blong famle blong Deved, i king blong tu narafala laen. (1 King 11:29-37; 12:16, 17, 21) Jeova i talem long Jeroboam se: “Sipos yu mekem olgeta samting we mi mi talem, mo yu folem ol fasin we mi mi wantem, mo yu mekem ol samting we i stret long fes blong mi, mo yu obei long ol loa mo ol tok blong mi, olsem we King Deved i bin mekem bifo, bambae mi mi stap wetem yu oltaem nomo. Bambae mi mekem yu yu king blong haf blong kantri ya saed i go long not, mo biaen, bambae mi mekem we oltaem nomo, wan long olgeta we bambae oli stap kamaot biaen long yu, bambae i tekem ples blong yu, i king, olsem we mi bin mekem long King Deved bifo.“ (1 King 11:38) Jeova i tekem aksen blong givhan long ol man blong hem mo hem i openem rod blong oli kamaot long strong rul blong Solomon.

8. ?Wanem ol trabol we oli spolem ol man blong God tede?

⁸ Tede tu, ol haeman oli mekem i strong tumas long ol man, mo fasin blong mekem i no stret i kam plante. Prija 8:9 i talem se: “Long wol ya, sam man oli gat paoa, mo ol narafala man oli stap aninit long olgeta, oli stap harem nogud.” Ol bisnesman we oli gat fasin griri mo ol lida we oli gat kruked fasin oli mekem se ol man oli gat hadtaem long saed blong mane. Plante taem ol lida blong gavman, bisnes, mo jos, oli soem nogud eksampol taem oli mekem ol rabis fasin. Taswe, olsem stret man ya Lot, ol man tede we oli stap tru long God oli ‘stap harem nogud tumas from ol fasin nogud we ol rabis man oli stap mekem.’ (2 Pita 2:7) Mo tu, yumi stap traehad blong folem ol rul blong God long laef blong yumi mo long semtaem yumi no spolem ol narafala.  Be plante taem ol flas lida we oli stap rul oli agensem yumi yet, mo oli mekem trabol long yumi.—2 Tim. 3:1-5, 12.

9. (a) ?Wanem samting we Jeova i mekem finis blong ol man blong hem oli kam fri? (b) ?From wanem yumi save sua se Jisas bambae i stap tru long God oltaem?

⁹ Be yumi save sua long stamba trutok ya: !Jeova bambae i no save lego ol man we oli stap tru long hem! Tingbaot ol samting we hem i mekem finis blong jenisim ol lida blong wol ya we oli gat kruked fasin. Kingdom blong God we i stap long han blong Mesaea Jisas Kraes i stanap finis. Klosap handred yia finis we Jisas Kraes i rul long heven. Klosap nao bambae hem i mekem ol man we oli ona long nem blong God oli kam fri fulwan. (Ridim Revelesen 11:15-18.) Jisas i soemaot finis se hem i stap tru long God gogo kasem ded. Bambae hem i neva mekem ol man blong hem oli harem nogud, olsem we Solomon i mekem.—Hib. 7:26; 1 Pita 2:6.

10. (a) ?Olsem wanem yumi save soemaot se yumi gat tangkiu from Kingdom blong God? (b) ?Taem yumi kasem traem, yumi save sua long wanem samting?

¹⁰ Kingdom blong God i wan trufala gavman we bambae i finisim olgeta fasin blong rul we oli mekem i strong long ol man. Yumi mas obei mo sapotem Jeova God mo Kingdom blong hem. Yumi trastem fulwan Kingdom ya, yumi sakemaot ol rabis fasin blong wol ya mo yumi strong blong mekem ol gudfala wok. (Taet. 2:12-14, NW) Yumi traehad blong gat wan laef we i klin, i no gat wan doti blong wol ya i spolem. (2 Pita 3:14) Nomata wanem traem we yumi stap fesem naoia, yumi save trastem se Jeova bambae i lukaotgud long yumi blong wan samting i no save spolem bilif blong yumi. (Ridim Ol Sam 97:10.) Mo tu, Ol Sam 116:15 (NW) i mekem yumi sua se: “Ded blong man we i stap tru long Jeova i sas long ae blong hem.” Ol man blong Jeova oli sas tumas long ae blong hem, taswe hem i no save letem fulwan grup blong olgeta i lus.

Taem Ol Man Blong Apostasi Oli Wantem Pulum Yumi

11. ?Olsem wanem Jeroboam i no moa stap tru long Jeova?

¹¹ Rul blong King Jeroboam i sud mekem ol man blong God oli haremgud. Be i no olsem. Ol samting we king ya i mekem i traem fasin blong olgeta moa blong stap tru long God. Jeroboam i no haremgud long ona mo janis we Jeova i givim finis long hem blong rul olsem king, be hem i girap i stat blong lukaot sam rod bakegen blong mekem se hem i gat moa paoa antap long ol man. Hem i tingting se: “Sipos ol man ya blong mi oli stap go oltaem long Jerusalem blong mekem sakrefaes long Hae God long haos blong hem, bambae oli jenisim tingting blong olgeta. Bambae oli go biaen long King Rehoboam blong Juda, mo bambae oli kilim mi.” Taswe, Jeroboam i stanemap wan niufala jos we i stanap long wosip blong tu pija blong bul we oli wokem long gol. “Nao hem i putum wan long tufala long Betel, mo i putum narawan long Dan. Nao samting ya i mekem ol man ya oli mekem sin, from we oli stap go long Betel mo long Dan blong mekem wosip long tufala god ya. Long taem ya, King Jeroboam i wokem ol ples blong mekem wosip antap long ol hil, mo i jusumaot ol man long ol famle we oli no laen blong Livae, i putumap olgeta oli pris.” Mo tu, Jeroboam i stanemap prapa dei blong hem blong mekem “lafet ya we hem i putum blong ol man blong hem,” mo long dei ya hem i “mekem sakrefaes long olta ya we hem i wokem.”—1 King 12:26-33.

12. ?Ol man long Kingdom blong not we oli stap tru long God, oli mekem wanem taem Jeroboam i stanemap wosip blong pija blong bul long Isrel?

¹² ?Ol man long kingdom ya blong not we oli stap tru long God bambae oli mekem wanem? Ol man Livae we oli laef long ol taon we God i bin givim long olgeta long kingdom ya blong not, oli folem fasin blong ol bubu blong olgeta bifo. Oli no tektaem blong mekem wan samting. (Eks. 32:26-28; Nam. 35:6-8; Dut. 33:8, 9) Oli lego graon mo haos blong olgeta, nao oli tekem famle blong olgeta mo oli muvaot i go long Juda long saot. Long ples ya, oli save gohed blong wosipim Jeova mo man i no save blokem olgeta. (2 Kron. 11:13, 14) Sam narafala man Isrel we oli bin stap long Juda blong smoltaem, oli jusum blong stap long ples ya nomo, oli no wantem gobak long ples blong olgeta. (2 Kron. 10:17) Jeova i meksua se rod blong trufala wosip i stap open, blong ol pikinini we bambae oli kamaot biaen long olgeta we oli stap long kingdom blong not, oli save lego wosip blong pija blong bul mo gobak long Juda.—2 Kron. 15:9-15.

13. ?Tede, olsem wanem ol man blong apostasi oli traem blong gat paoa long ol man blong God?

¹³ Tede ol man blong apostasi oli traem blong pulum mo spolem ol man blong God. Sam lida oli traem blong stanemap prapa wosip blong olgeta long kantri we oli rul long hem, mo oli fosem ol man blong folem wosip ya. Ol lida blong Krisendom mo ol narafala we oli gat flas tingting oli traem blong talem se olgeta nao oli ol pris blong God. Be ol trufala man we God i makemaot olgeta, oli stap long medel blong ol trufala Kristin nomo, mo olgeta nao oli ol “pris mo king” blong God.—1 Pita 2:9, NW; Rev. 14:1-5.

14. ?Yumi mas mekem wanem long saed blong ol tingting blong ol man blong apostasi?

 ¹⁴ Olsem ol gudfala man Livae long ol yia 900 B.K.T., ol man tede we oli stap tru long God oli no letem tingting blong ol man blong apostasi i trikim olgeta. Olgeta we tabu spirit i makemaot olgeta mo ol Kristin fren blong olgeta, oli kwik blong sakemaot mo ronwe long ol tingting blong apostasi. (Ridim Rom 16:17.) Nating we yumi no joen long ol raorao blong wol mo yumi glad nomo blong obei long ol haeman blong gavman long evri dei laef blong yumi, be yumi stap tru fastaem long Kingdom blong God. (Jon 18:36; Rom 13:1-8) Yumi sakemaot toktok blong ol man blong giaman we oli talem se oli mekem wok blong God be long sem taem ol fasin blong olgeta oli stap sakem doti long nem blong hem.—Taet. 1:16.

15. ?From wanem yumi mas stap tru long “slef ya we i stret mo waes”?

¹⁵ Tingbaot tu se Jeova i openem rod blong ol man we hat blong olgeta i stret, blong oli save kamaot long rabis wol ya mo go insaed long paradaes long saed blong spirit we Hem i wokem. (2 Kor. 12:1-4) Hat blong yumi i fulap long tangkiu, ale yumi stap klosap long “slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem.” Kraes i jusum slef ya “blong lukaot long olgeta samting blong hem.” (Mat. 24:45-47, NW) Taswe, nating sipos wanwan long yumi i no kasem save long sam samting we grup ya we i olsem slef i mekem, hemia i no wan risen blong yumi sakemaot grup ya mo gobak long wol blong Setan, nogat. Defren olgeta, fasin blong stap tru long God bambae i pusum yumi blong gat tingting daon mo wet long Jeova blong i mekem ol samting oli kam klia.

Taem Yumi Mekem Wok We God i Givim Long Yumi

16. ?Wanem wok we Jeova i givim long wan profet blong Juda?

¹⁶ Jeova i tok agensem Jeroboam from fasin blong hem blong tanemraon mo agensem trufala wosip. God i jusum wan profet blong Juda blong i go long Betel, we i stap long not, blong go luk Jeroboam taem hem i stap mekem wosip long fored blong olta blong hem. Profet ya i mas talemaot wan strong jajmen blong Jeova long Jeroboam. I klia se wok ya i no wan isi wok.—1 King 13:1-3.

17. ?Olsem wanem Jeova i lukaotgud long man we i karem mesej blong hem?

¹⁷ Taem Jeroboam i harem jajmen blong Jeova long hem, hem i kros we i kros. Hem i poenem profet ya we God i sanem, mo i singaot strong i go long ol man we oli stap klosap long hem, i se: “!Holem man ya!” Be wantaem nomo, bifo we ol man ya oli muv, “han blong [Jeroboam] i ded, hem i no moa save benem. Mo semtaem nomo, olta ya i brobrok mo asis blong hem i folfoldaon i go long graon.” Samting ya i fosem Jeroboam blong askem long profet ya blong i prea long Jeova from hem, blong God i no moa kros mo i mekem han ya we i ded i kamgud bakegen. Profet ya i mekem olsem, mo han blong Jeroboam i kamgud bakegen. Long rod ya, Jeova i lukaotgud long man blong wok blong hem, blong wan samting i no save spolem hem.—1 King 13:4-6.

18. ?Olsem wanem Jeova i lukaot long yumi taem yumi mekem tabu wok blong hem we yumi no fraet?

¹⁸ Yumi mekem wok blong talemaot Kingdom blong God mo givhan long ol man blong oli kam disaepol blong Kraes, mo yumi fasgud long wok ya. Be samtaem yumi mitim man we i no wantem lesin long yumi, mo maet i agensem yumi. (Mat. 24:14, NW; 28:19, 20) Be yumi neva mas letem samting ya i mekem yumi fraet nao yumi no moa gohed strong long wok blong prij. Sem mak olsem profet ya long taem blong Jeroboam we yumi no save nem blong hem, yumi gat janis ya se ‘oltaem long laef blong yumi bambae yumi mekem wok blong [Jeova] we yumi no fraet.’ * (Luk 1:74, 75) Tede Jeova i no mekem ol merikel blong sevem yumi, be hem i yusum tabu spirit mo ol enjel blong hem blong lukaotgud mo protektem grup blong ol Witnes blong hem, mo yumi tu yumi stap insaed long grup ya. (Ridim Jon 14:15-17 *; Revelesen 14:6.) Jeova  bambae i neva save lego olgeta we oli no fraet blong gohed blong talemaot tok blong hem.—Fil. 1:14, 28.

Jeova Bambae i Lukaotgud Long Ol Man We Oli Stap Tru Long Hem

19, 20. (a) ?From wanem yumi save sua se Jeova bambae i neva lego yumi? (b) ?Bambae yumi tokbaot ol wanem kwestin long nekis stadi?

¹⁹ Jeova i God blong yumi we i gat fasin blong stap tru. “Long olgeta wok blong hem, oltaem hem i stap tru.” (Sam 145:17, NW) Mo Baebol i mekem yumi sua se hem “i stap gad gud long olgeta we tingting blong olgeta i stap strong long hem.” (Prov. 2:8) Ol man we oli stap tru long God oli fesem ol traem, mo i gat ol tingting blong ol man blong apostasi tu we oli agensem olgeta, mo tu, sam wok we God i askem olgeta blong mekem oli no isi. Be oli save trastem se Jeova bambae i lidim olgeta mo i sapotem olgeta.

²⁰ Naoia i gud we yumi wanwan i tingtinggud long ol kwestin ya: ?Wanem bambae i givhan long mi blong mi gohed blong stap tru long Jeova nomata wanem fasin agens mo traem we mi fesem? Blong talem long sotfala tok nomo, ?olsem wanem mi save mekem se fasin blong mi blong stap tru long God i kam strong moa?

[Ol futnot]

?Bambae Yu Yu Ansa Olsem Wanem?

• ?Olsem wanem Jeova i bin soemaot se hem i no lego ol man we oli stap tru long hem taem ol haeman oli mekem i strong tumas long olgeta?

• ?Yumi mas mekem wanem long saed blong ol man blong apostasi mo ol tingting blong olgeta?

• ?Olsem wanem Jeova i lukaotgud long ol man we oli stap tru long hem taem oli stap mekem Kristin wok blong prij?

[Kwestin]

[Map/Foto blong pija long pej 11]

(Lukluk niuspepa

KINGDOM BLONG NOT (Jeroboam)

Dan

SEKEM

Betel

KINGDOM BLONG SAOT (Rehoboam)

JERUSALEM

[Foto]

Jeova i no lego ol man we oli stap tru long hem taem Jeroboam i statem wosip blong pija blong bul