Stap Tru Oltaem Wetem Wan Tingting Nomo Long Hat Blong Yumi

“Bambae mi wokbaot oltaem long trutok blong yu. Plis yu mekem we mi mi gat wan tingting nomo i stap long hat blong mi, hemia blong fraet long nem blong yu.”—SAM 86:11, NW.

1, 2. (a) ?Folem Ol Sam 86:2, 11, wanem i save givhan long yumi blong stap tru long Jeova nomata wanem traem mo trabol we yumi fesem? (b) ?Wetaem yumi mas wokem fasin blong stap tru long God wetem fulhat blong yumi?

SAMFALA Kristin oli bin stanap strong blong plante yia, nomata se ol man oli mekem trabol long olgeta mo oli go long kalabus from bilif blong olgeta. Be sam yia afta, ol semfala Kristin ya oli foldaon long trap ya blong ronem ol sas samting. ?From wanem samting ya i hapen? Ansa blong kwestin ya i dipen long wanem we i rili stap long hat blong yumi. Ol Sam 86 i soem se man we i stap tru long God i gat wan tingting nomo long hat blong hem, tingting blong hem i no hafhaf. Deved i prea se: “Mi mi man blong wok blong yu, mi trastem yu. Oltaem tingting blong mi i stap strong long yu [“mi mi stap tru long yu,” NW]. Plis yu sevem mi, yu no letem mi mi ded.” Deved i prea bakegen se: “O Jeova, tijim mi long rod blong yu. Bambae mi wokbaot oltaem long trutok blong yu. Plis yu mekem we mi mi gat wan tingting nomo i stap long hat blong mi, hemia blong fraet long nem blong yu.”—Sam 86:2, 11, NW.

² Sipos yumi no trastem Jeova wetem fulhat blong yumi, sloslo ol narafala samting we yumi tingbaot mo we yumi laekem oli save spolem fasin blong yumi blong stap tru long trufala God. Ol samting we tingting blong yumi nomo i wantem oli olsem ol bom we man i berem long rod we yumi stap wokbaot long hem. Nating sipos yumi bin stap tru long Jeova taem yumi kasem ol strong traem, be yumi save foldaon yet long ol trap mo trik blong Setan. !Taswe i impoten tumas we naoia, bifo we yumi fesem ol traem mo trabol, yumi wokem fasin ya blong stap tru long Jeova wetem fulhat blong yumi! Baebol i talem se: “Samting we yu mas lukaot moa long hem i bitim ol narafala samting, hemia hat blong yu.” (Prov. 4:23, NW) Long saed ya, stori blong wan profet blong Juda we Jeova i sanem hem i go luk King Jeroboam long Isrel, i save tijim yumi long sam impoten samting.

“Bambae Mi Givim Smol Presen Long Yu”

3. ?Jeroboam i mekem wanem taem hem i harem jajmen we profet blong God i talemaot?

³ Traem tingbaot stori ya. King Jeroboam i bin stanemap  wosip blong pija blong bul long ol ten laen blong kingdom blong Isrel we oli stap long not, mo wan man blong God i jes talemaot strong jajmen long hem. King ya i kros we i kros. Hem i givim oda long ol man blong hem blong oli holem man ya we i stap talemaot tok blong God. Be Jeova i stap wetem man blong wok blong Hem. Taem king ya i kros mo i stretem han blong hem blong poenem man ya, wantaem nomo Jeova i mekem wan samting. Han ya i ded mo olta ya we hem i yusum blong mekem wosip long giaman god ya i brokbrok. Fasin blong Jeroboam i jenis kwiktaem nomo. Hem i askem strong long man blong God, se: “Plis yu prea long [Hae God], blong hem i mekem han blong mi i gud bakegen.” Profet ya i prea, nao han blong king i kamgud bakegen.—1 King 13:1-6.

4. (a) ?From wanem samting we king i wantem givim long profet ya i traem fasin blong hem blong stap tru long God? (b) ?Wanem ansa blong profet ya?

⁴ Biaen, Jeroboam i talem long man ya blong trufala God se: “Yu kam wetem mi, yumitu go kakae smol long haos, mo bambae mi givim smol presen long yu.” (1 King 13:7) ?Profet ya i mekem wanem? ?I stret we hem i go kakae wetem king ya afta we hem i jes talemaot jajmen blong God long hem? (Sam 119:113) ?No i stret we hem i no lesin long king ya, nating we i luk olsem se king ya i sore from sin blong hem? I tru se Jeroboam i rij mo hem i naf blong givim ol sas presen long ol fren blong hem. Taswe, sipos profet ya blong God i stap laekem tumas ol sas samting, ating toktok ya blong king i save kam olsem wan bigfala traem long hem. Be Jeova i bin talem long profet ya se: ‘Bambae yu no kakae mo yu no dring long ples ya, mo bambae yu no gohom long sem rod ya we yu kam long hem.’ Taswe, profet ya i ansa strong mo i talem klia se: “King, nating sipos yu givim stret haf blong ol gudgudfala samting blong yu long mi, be bambae mi no save go wetem yu. Bambae mi no save kakae wetem yu, mo mi no save dring wan samting wetem yu tu.” Nao profet ya i pas long wan narafala rod blong goaot long Betel. (1 King 13:8-10) ?Desisen blong profet ya i tijim wanem long yumi long saed blong fasin blong stap tru long God wetem fulhat blong yumi?—Rom 15:4.

“Yumi Save Harem Gud”

5. ?Sipos yumi ronem ol sas samting, olsem wanem samting ya i soem se yumi no stap tru long God?

⁵ ?Sipos yumi ronem ol sas samting, hemia i soem se yumi no stap tru long God? Si, i olsem nao. Traem tingbaot: ?Yumi trastem promes blong Jeova se bambae hem i givim ol samting we yumi rili nidim? (Mat. 6:33; Hib. 13:5) Bitim we yumi traehad long evri rod blong kasem sam samting we oli save mekem se laef blong yumi i kam isi moa, ?yumi naf blong lego ol samting ya mo laef olsem nomo? (Ridim Filipae 4:11-13.) ?Yumi wantem lego ol janis we yumi gat blong mekem moa long wok blong God mo long kongregesen, jes blong kasem ol samting we yumi wantem naoia nomo? ?Yumi putum ol wok blong Jeova oli stap long fasples long laef blong yumi mo yumi fasgud long ol wok ya? Ansa we yumi givim long ol kwestin ya bambae i dipen bigwan long fasin blong yumi blong mekem wok blong God, se yumi mekem wetem fulhat blong yumi, no nogat. Aposol Pol i raetem se: “[“Rod ya we man i onagud long God mo hem i naf blong kasem ol samting we hem i nidim long laef, hemia nao rod blong man i win bigwan,” NW]. Taem yumi bon i kam long wol ya, yumi no karem wan samting, mo taem yumi ded, bambae yumi no karem wan samting i go wetem yumi. Be sipos yumi gat kakae blong yumi mo klos blong yumi, hemia i naf, yumi save harem gud.”—1 Tim. 6:6-8.

6. ?Wanem ol “presen” we maet yumi save kasem? ?Mo wanem i save givhan long yumi blong luksave sipos i stret blong agri long olgeta, no nogat?

⁶ Traem tingbaot, maet bos blong yumi i wantem givim wan hae posisen long yumi long wok, we i save mekem se yumi kasem wan gudfala pei mo sam narafala gudfala samting bakegen. Sipos no, maet yumi ting se bambae yumi kasem moa mane sipos yumi muv i go long wan narafala kantri, no wan narafala ples, blong faenem wok. Ating fastaem yumi ting se ol janis ya oli ol blesing we oli kam long Jeova. Be bifo we yumi tekem wan desisen long saed ya, i gud we yumi jekemgud yumi se wanem tingting nao i stap pusum yumi. Faswan impoten samting we yumi mas tingbaot hemia se: “?Sipos mi talem ‘yes’ long ol samting ya, bambae desisen blong mi i save gat paoa olsem wanem long fasin fren we mi mi gat wetem Jeova?”

7. ?Sipos yumi wantem tumas ol sas samting, from wanem i impoten we yumi rutumaot tingting ya long hat blong yumi?

⁷ Rabis wol ya blong Setan i gohed strong blong pulum ol man blong oli ronem ol sas samting. (Ridim 1 Jon 2:15, 16.) Setan i wantem spolem hat blong yumi. Taswe, yumi mas lukaotgud. Yumi mas luksave sipos yumi wantem tumas ol sas samting, mo yumi mas rutumaot tingting ya fulwan long hat blong yumi. (Rev. 3:15-17) Setan i wantem givim olgeta kingdom blong wol long Jisas, be Jisas i no faenem i had blong sakemaot tok blong hem. (Mat. 4:8-10) Jisas i givim woning ya se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stamba blong prapa laef blong man i no stap long ol  samting ya.” (Luk 12:15) Fasin blong stap tru long Jeova bambae i givhan long yumi blong dipen long hem nomo, be i no long prapa paoa blong yumi.

Wan Olfala Profet i “Giaman” Long Hem

8. ?Olsem wanem fasin blong profet blong God blong stap tru long Hem i kasem traem?

⁸ Sipos profet ya blong God i bin gohed long rod blong hem mo i gohom, bambae ol samting i gud nomo. Be nogat. Kwiktaem nomo, hem i fesem wan narafala traem. Baebol i talem se: “I gat wan olfala profet i stap long Betel, mo ol pikinini blong hem oli kam stori long hem long ol samting” we oli bin hapen long dei ya. Taem olfala man ya i harem stori ya, hem i askem long olgeta blong oli mekemrere wan dongki, blong hem i save biaen long profet ya blong God. I no longtaem afta, hem i faenem profet ya we i stap spel aninit long wan bigfala tri mo i talem long hem se: “Yu kam, yumitu gobak long haos, yu kakae smol.” Taem man blong trufala God i no wantem mekem olsem, olfala man ya i ansa se: “Mi tu mi wan profet olsem yu. Mo Hae God i givim tok long wan enjel blong hem, nao hem i kam talem long mi, se mi mas tekem yu yu kam long haos blong mi, blong givim kakae long yu.” Be Baebol i talem se olfala profet ya “i stap giaman nomo.”—1 King 13:11-18.

9. ?Baebol i talem wanem long saed blong ol man blong trik, mo oli save spolem hu?

⁹ Yumi no save wanem tingting i pusum olfala profet ya blong mekem olsem, be hem i giaman. Ating bifo, olfala man ya i bin wan profet we i stap tru long Jeova. Be long stori ya, olfala ya i trikim profet blong God. Baebol i tok strong agensem fasin olsem, i se: “Jeova i no laekem nating man we ol rod blong hem oli kruked, be Hem i frengud wetem olgeta we oli mekem stret fasin.” (Prov. 3:32, NW) Ol man blong trik oli stap spolem prapa fasin fren blong olgeta wetem Jeova mo oli save spolem fasin fren we ol narafala tu oli gat wetem Jeova.

Hem i “Go Wetem” Olfala Man Ya

10. ?Profet blong God i mekem wanem taem olfala man ya i singaot hem? ?Mo wanem samting i kamaot from?

¹⁰ Profet ya blong Juda i sud luksave se olfala profet ya i stap trikim hem. Hem i save tingting mo askem se: ‘?From wanem Jeova bambae i sanem wan enjel i go long wan narafala man bakegen blong i talemaot ol niufala save we mi mi mas folem?’ Profet ya i save askem stret long Jeova blong i soemaot klia wanem samting we hem i mas mekem, be Baebol i no talem se hem i mekem olsem. Defren olgeta, “profet ya i go wetem [olfala man ya], mo i kakae wetem hem.” Jeova i no glad long samting ya. Taem profet ya i stap gobak long rod blong hem blong go long Juda, wan laeon i faenem hem mo i kilim hem i ded. !Wok blong profet ya i finis long wan fasin we i nogud olgeta!—1 King 13:19-25. *

11. ?Wanem gudfala eksampol we Ahia i soemaot?

¹¹ Nao, traem tingbaot profet Ahia we Jeova i sanem hem i go blong makemaot Jeroboam blong i kam king. Profet ya i fasgud long Jeova kasem we hem i kam olfala mo i ded. Taem Ahia i olfala mo i blaen, boe blong Jeroboam i sik, ale Jeroboam i sanem woman blong hem i go luk Ahia long saed blong pikinini ya. Ahia i no fraet blong talemaot se boe blong Jeroboam bambae i ded. (1 King 14:1-18) Ahia i kasem plante blesing, mo wan long olgeta, hemia se hem i gat janis blong givhan long ol man we God i pusum olgeta blong oli raetem Baebol. ?Hem i givhan olsem wanem? Taem pris ya Esra i raetem buk blong hem, hem i yusum ol save we Ahia i bin raetemdaon.—2 Kron. 9:29.

12-14. (a) ?Samting we i hapen long profet ya i tijim yumi long wanem? (b) Talem sam eksampol we oli soem se yumi mas prea mo tingting gud long ol advaes blong Baebol we ol elda oli givim.

¹² Baebol i no talemaot from wanem profet ya i no bin toktok wetem Jeova bifo we hem i tanemraon blong go kakae mo dring wetem olfala man ya. Ating profet ya i wantem nomo blong mekem samting we olfala man ya i talem long hem. ?Samting ya i tijim wanem long yumi? Yumi mas bilif fulwan se ol tok we Jeova i wantem yumi blong folem, oli stretgud. Mo yumi mas gat strong tingting blong folem ol tok ya, nomata wanem samting we yumi fesem long laef blong yumi.

¹³ Taem samfala oli kasem advaes, oli folem smolhaf ya nomo we oli laekem. Tingbaot, maet wan pablisa i kasem wan wok. Be wok ya bambae i mekem we hem i gat smoltaem nomo blong spenem wetem famle blong hem mo mekem ol tiokratik wok. Pablisa ya i save askem advaes long wan elda. Maet fastaem elda i talem se i no wok blong hem blong talem long pablisa wanem samting we hem i mas mekem blong lukaot long famle blong hem. Biaen, elda i save tokbaot ol trabol we i save kasem brata ya long saed blong bilif blong hem sipos hem i agri blong tekem wok ya. ?Olsem wanem? ?Brata ya bambae i tingbaot faswan toktok nomo blong elda ya, no bambae hem i tingting gud long ol narafala tok blong hem tu? I klia se brata ya i mas kasem save wanem beswan rod we i save givhan long hem blong i gohed blong gat gudfala fasin fren wetem Jeova.

¹⁴ Yumi save tingbaot wan narafala samting we i save  hapen. Maet wan sista i askem long wan elda sipos hem i save seraot long man blong hem we i no bilif. I sua se elda bambae i eksplenem se sista ya nomo i mas tekem desisen ya se bambae hem i seraot long man blong hem, no nogat. Biaen, hem i save tokbaot ol advaes we Baebol i talem long saed ya. (1 Kor. 7:10-16) ?Olsem wanem? ?Sista ya bambae i tingting gud long ol samting we elda ya i talem? ?No hem i mekemap tingting blong hem finis blong lego man blong hem? Taem sista ya i tekem desisen blong hem, hem i waes sipos hem i prea mo i tingting gud long ol advaes we oli kamaot long Baebol.

No Trastem Yumi Wan

15. ?Mastik blong profet blong God i tijim yumi long wanem samting?

¹⁵ ?Wanem narafala samting we yumi save lanem from mastik blong profet ya blong Juda? Ol Proveb 3:5 i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.” Long stori ya, profet blong Juda i no moa trastem Jeova olsem bifo, be hem i trastem prapa waes blong hem nomo. Mastik ya i mekem se hem i lusum laef blong hem mo hem i no moa gat gudnem long fes blong God. !Stori ya i soem se i impoten tumas we yumi no trastem yumi wan mo yumi stap tru long Jeova taem yumi stap mekem wok blong hem!

16, 17. ?Wanem i save givhan long yumi blong stap tru long Jeova?

¹⁶ I isi nomo blong hat blong yumi i pulum yumi blong wantem ol samting we yumi nomo yumi wantem, ale yumi save gorong. “Oltaem nomo, [“hat,” NW] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” (Jer. 17:9) Blong yumi stap tru long Jeova, yumi mas wokhad blong karemaot ol olfala fasin blong yumi we oli save pulum yumi blong kam flas mo stanap long prapa waes blong yumi, mo yumi mas gohed oltaem blong mekem olsem. Mo yumi mas putum niufala fasin blong laef we “i folem trutok blong [God] mo i stret gud, i tabu, i blong hem nomo.”—Ridim Efesas 4:22-24.

¹⁷ Ol Proveb 11:2 (NW) i talem se: “Waes i stap wetem ol man we oli no flas.” Sipos yumi no trastem yumi wan tumas be yumi trastem Jeova, hemia bambae i givhan long yumi blong no mekem ol bigfala mastik. Tingbaot sipos tingting blong yumi i foldaon, i isi nomo blong yumi no moa tingting stret. (Prov. 24:10) Maet yumi save kam taed blong mekem wan haf blong ol tabu wok blong God mo yumi stat blong tingting se yumi mekem naf wok finis long ol yia we i pas, mo naoia i taem blong ol narafala oli wok. Sipos no, maet yumi wantem se laef blong yumi i kam sem mak olsem ol man raonabaot long yumi. Be sipos yumi “traehad” wetem ful paoa blong yumi, mo oltaem yumi “wok strong long ol wok blong Masta,” samting ya bambae i lukaotgud long hat blong yumi.—Luk 13:24; 1 Kor. 15:58.

18. ?Yumi save mekem wanem sipos yumi no save wanem desisen we yumi mas tekem?

¹⁸ Samtaem, yumi mas tekem sam desisen we oli had, mo maet yumi no luksave wanem stret rod we yumi mas folem. ?Olsem wanem? ?Bambae yumi traem blong folem prapa tingting blong yumi nomo? Sipos samting olsem i hapen long yumi, yumi mas waes mo askem long Jeova blong i givhan long yumi. Jemes 1:5 i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem.” Papa blong yumi long heven bambae i givim tabu spirit we yumi nidim, blong yumi save tekem ol gudfala desisen.—Ridim Luk 11:9, 13.

Gat Strong Tingting Blong Stap Tru Long God

19, 20. ?Yumi mas gat strong tingting blong mekem wanem?

¹⁹ Long ol yia afta we Solomon i lego trufala wosip, i gat plante trabol i kamaot we i traem fasin blong ol man blong God blong stap tru long hem. I tru se plante oli lego bilif blong olgeta. Be samfala oli stap tru long Jeova.

²⁰ Evri dei, yumi mas jusum sam samting mo tekem sam desisen we oli traem fasin blong yumi blong stap tru long Jeova. Yumi tu yumi save soemaot se yumi stap tru long God. I gud we yumi stap tru long Jeova oltaem, mo yumi gat wan tingting nomo long hat blong yumi, mo yumi trastem fulwan se “man we i stap tru long [Jeova], bambae [Jeova i] stap tru long hem tu.”—2 Saml. 22:26, NW.

[Futnot]

?Bambae Yu Yu Ansa Olsem Wanem?

• ?From wanem yumi mas wokhad blong rutumaot enikaen tingting long hat blong yumi blong wantem ol sas samting?

• ?Wanem bambae i givhan long yumi blong stap tru long Jeova?

• ?Olsem wanem fasin blong no trastem yumi wan i save givhan long yumi blong stap tru long God?

[Kwestin]