Gohed Blong Holemtaet “Tri Rop” Long Mared Blong Yu

“Rop ya we oli tantanem tri rop i go wanples, hem i no save brok kwik.”​—PRI. 4:12.

1. ?Hu i joenem faswan man mo woman long mared?

TAEM Jeova God i wokem ol tri mo anamol finis, hem i wokem faswan man, Adam. Biaen, God i mekem Adam i slip we i slip ded, nao hem i tekem wan rib blong Adam mo i wokem wan woman we i stretgud olgeta. God i wokem woman ya blong hem i save givhan long Adam. Taem Adam i luk woman ya, hem i talem se: “Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi.” (Jen. 1:27; 2:​18, 21-23) Jeova i soem se hem i glad long woman ya we hem i wokem blong i fren blong Adam, ale hem i joenem faswan man mo woman ya long mared mo i blesem tufala.​—Jen. 1:28; 2:24.

2. ?Olsem wanem Setan i mekem se problem i kasem fasin fren blong Adam mo Iv?

² Sore tumas, i no longtaem biaen, mared ya we God i stanemap i kasem trabol. ?Olsem wanem samting ya i hapen? Wan rabis enjel we i karem nem ya Setan, i trikim Iv, mekem se hem i kakae frut blong wan tri ya nomo we God i putum tabu long hem mo man blong hem, blong tufala i no kakae. Ale, Adam tu i joenem waef blong hem blong brekem loa blong God, mo tufala i rebel agensem raet blong God blong rulum mo lidim ol man. (Jen. 3:​1-7) Taem Jeova i askem long tufala se tufala i mekem wanem, i klia se long taem ya fasin fren blong Adam mo Iv i gat problem finis, from we Adam i putum fol i go long waef blong hem, i se: “Woman ya we yu yu givim long mi blong i stap wetem mi, hem nao i givim frut blong tri ya long mi, nao mi kakae.”​—Jen. 3:​11-13.

3. ?Sam man Jiu oli stat blong gat wanem tingting we i no stret?

³ Long ol yia we oli pas afta long taem ya, Setan i yusum plante defren trik blong pulum moa trabol i kam long ol mared. Samtaem hem i yusum ol lida blong skul blong oli leftemap ol tingting long saed blong mared we oli no stret folem Baebol. Sam lida blong ol man Jiu oli bin daonem ol loa blong God taem oli letem ol hasban oli divos long waef blong olgeta from ol smolsmol rong nomo, olsem taem waef i putum tumas sol long kakae. Be Jisas i talem klia se: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.”​—Mat. 19:9.

4. ?Olsem wanem mared blong man wetem woman i stap kasem trabol tede?

⁴ Setan i stap traehad yet blong spolem mared blong man wetem woman. Hemia ol samting we oli soemaot se ol traehad blong hem oli karem frut: Long sam ples, man i mared wetem man bakegen mo woman i mared wetem woman, man mo woman i stap wanples be tufala i no mared, mo i isi nomo long olgeta we oli mared blong oli divos. (Ridim Hibrus 13:4.) ?Yumi ol Kristin, yumi save mekem wanem blong ol tingting ya we oli no stret long saed blong mared, oli no save gat paoa long tingting blong yumi? Bambae yumi tokbaot sam fasin we oli stap long wan mared we i wokgud mo we i gat glad long hem.

 Oltaem Tingbaot Jeova Long Mared Blong Yu

5. ?Long saed blong mared, “rop ya we oli tantanem tri rop i go wanples” i minim wanem?

⁵ Blong wan mared i stapgud, Jeova i mas stap insaed long mared ya. Tok blong hem i talem se: “Rop ya we oli tantanem tri rop i go wanples, hem i no save brok kwik.” (Pri. 4:12) “Rop ya we oli tantanem tri rop i go wanples” i wan pijatok. Taem yumi yusum pijatok ya blong eksplenem wan mared, hem i min se hasban mo waef oli olsem tu rop, mo Jeova God i olsem namba tri rop we tufala narafala rop ya oli tantanem tufala long hem. Yes Jeova nao i stamba blong mared. Taem hasban mo waef tufala i frengud wetem God, samting ya i mekem se tufala i strong long saed blong spirit nao oli save winim ol problem we tufala i kasem, mo hemia i stamba samting blong tufala i kasem bigfala glad long mared blong tufala.

6, 7. (a) ?Ol Kristin oli save mekem wanem blong meksua se oli tingbaot God long mared blong olgeta? (b) ? Wan sista i talem se hem i laekem wanem samting long saed blong hasban blong hem?

⁶ ?Hasban mo waef i save mekem wanem blong tufala i sua se mared blong tufala i olsem rop ya we oli tantanem tri rop i go wanples? Deved we i man blong raetem Ol Sam, i singsing se: “God blong mi. . . . Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” (Sam 40:8) Olsem Deved, lav we yumi gat long God i pusum yumi blong mekem wok blong hem wetem fulhat blong yumi. From samting ya, i gud we ol wanwan hasban mo waef oli wokem wan gudfala fasin fren wetem Jeova mo oli kasem glad taem oli mekem samting we God i wantem. Mo oli mas wokhad tu blong bildimap lav we hasban no waef blong olgeta i gat long God.​—Prov. 27:17.

⁷ Sipos yumi rili holem loa blong God long tingting blong yumi, bambae yumi gat ol fasin olsem bilif, hop, mo lav. Ol fasin ya bambae oli givhan blong mekem mared i stapgud oltaem. (1 Kor. 13:13) Wan Kristin we nem blong hem Sandra, i mared blong 50 yia, mo hem i talem se: “Wanem we mi laekem moa long saed blong hasban blong mi i bitim ol narafala samting, hemia se hem i yusum Baebol blong lidim mo givim advaes long mi, mo hem i gat bigfala lav long Jeova. Lav ya i bigwan moa long lav we hem i gat long mi.” ?Ol hasban, ol waef blong yufala oli save talem sem toktok olsem long saed blong yufala?

8. ?Hasban mo waef i mas mekem wanem sipos oli wantem gat wan mared we i “gohed gud moa”?

⁸ ?Hasban mo waef, fasin fren blong yutufala wetem Jeova i wan samting we i impoten tumas long laef blong yutufala? ?Mo ol wok blong Kingdom oli stap long fasples long laef blong yutufala? ?Yu yu tingbaot hasban no waef blong yu olsem fren blong yu we yu wok wetem blong mekem wok blong Jeova? (Jen. 2:24) Waes man ya King Solomon i raetem se: “Fasin ya we tu man we i stap joen wanples blong mekem wan wok, hem i moa gud, i winim we wan man nomo i stap wok, from we wok i save gohed gud moa.” (Pri. 4:9) Tru ya, wan hasban mo waef tufala i mas wokhad blong mared blong tufala i “gohed gud moa,” i min se tufala i lavlavem tufala mo mared blong tufala i stapgud longtaem wetem blesing blong God.

9. (a) ?Ol hasban oli gat wanem wok? (b) ?Folem Kolosi 3:​19, wanem fasin we wan hasban i mas gat long waef blong hem?

⁹ Traehad we hasban mo waef tufala i mekem blong folem ol rul blong God long laef blong tufala, i wan rod blong luksave sipos tufala i stap tingbaot Jeova long mared blong tufala. Ol hasban oli gat bighaf blong wok ya blong lukaot long ol nid blong famle blong olgeta, hemia ol samting long saed blong bodi mo spirit. (1 Tim. 5:8) Oli kasem advaes tu se oli mas tingbaot ol nid we waef blong olgeta i gat long saed blong filing. Kolosi 3:19 i talem se: “Yufala ol man we i mared, yufala i mas lavem ol woman blong yufala. Yufala i no mas mekem i strong long olgeta, oltaem yufala i mas mekem i gud long olgeta.” Wan man blong stadi long ol tok blong Baebol i eksplenem se tok ya “mekem i strong” i min se hasban i “tok strong no kilim waef blong hem, i no holemtaet hem blong soem filing long hem, i no kea, i no lukaot, protektem mo givhan long hem.” I klia se i no stret blong wan Kristin famle i gat ol fasin olsem. Taem wan hasban i hed long waef blong hem long fasin we i gat lav, hem i pulum waef blong hem blong i wantem obei long hem.

10. ?Ol Kristin waef oli mas gat wanem tingting?

¹⁰ Ol Kristin waef we oli traehad blong tingbaot Jeova long mared blong olgeta, olgeta tu oli mas folem ol rul we God i stanemap. Aposol Pol i raetem  se: “Yufala ol woman we i mared. Yufala i mas ona long ol man blong yufala, olsem we yufala i stap ona long Masta blong yumi, from we man i hed blong woman blong hem, olsem we Kraes i hed blong [“kongregesen,” NW ].” (Efes. 5:​22, 23) Blong trikim Iv, Setan i giaman se sipos hem i stap independen long God bambae hem i gat glad we i no save finis. Yumi luk klia se long plante mared tede i gat tingting ya blong wantem stap independen. Be ol woman we oli gat tingting blong God long saed blong mared, oli glad nomo blong obei long hasban blong olgeta we i lavem olgeta. Oli tingbaot se Jeova i wokem Iv, blong hem i stap olsem “wan fren” blong hasban blong hem. Yes i klia se Jeova i tinghae long posisen ya. (Jen. 2:18) Tru ya, wan Kristin waef we i glad blong mekem wok ya we God i givim long hem, hem i olsem “wan naesfala hat” we i flasem hasban blong hem.​—Prov. 12:​4, NW.

11. ?Wan brata i talem se wanem samting i givhan long mared blong hem?

¹¹ Wan narafala samting we i save givhan long hasban mo waef blong tingbaot Jeova long mared blong tufala, hemia blong tufala i stadi tugeta long Tok blong God. Wan man we nem blong hem Gerald, i haremgud long mared blong hem blong 55 yia, mo hem i talem se: “Long wan mared we i wokgud, samting we i impoten moa i bitim eni narafala samting, hemia blong ridim mo stadi tugeta long Baebol.” Gerald i talem tu se: “Taem hasban mo waef i mekem samting tugeta, speseli ol samting we oli joen wetem wosip, hemia i pulum tufala blong frengud tugeta, mo wetem Jeova.” Taem famle i stadi tugeta long Baebol, ol rul blong Jeova oli save stap klia oltaem long tingting blong olgeta, oli kam klosap moa long Jeova mo oli gohed gud oltaem.

12, 13. (a) ?From wanem i impoten tumas we hasban mo waef tufala i prea tugeta? (b) ?Wanem sam narafala Kristin wok we oli save mekem mared i stap strong?

¹² Ol man mo woman we oli glad long mared blong olgeta, oli prea tugeta tu. Taem wan hasban i “talemaot ol trabol” we i stap long hat blong hem mo i askem samting we i stret long laef blong tufala, samting ya i gat bigfala paoa blong mekem mared blong tufala i strong moa. (Sam 62:8) Tingbaot sipos hasban mo waef i stap rao. !I sua se afta we tufala i plis long God ya we i gat Olgeta Paoa, blong hem i lidim tufala mo givim advaes long tufala, bambae i isi moa blong tufala i lego eni samting we tufala i stap rao from! (Mat. 6:​14, 15) Folem prea we tufala i mekem, i stret we tufala i mekem wan promes long tufala blong givgivhan long tufala mo blong ‘tufala i no hareap blong kros long tufala mo tufala i rere oltaem blong fofogivim tufala.’ (Kol. 3:​13, NW ) Tingbaot tu se prea i soemaot se tufala i trastem God blong i givhan long tufala. King Deved i talem se: “Olgeta samting we yu yu mekem, oli stap lukluk long yu.” (Sam 145:15) Taem yumi lukluk i go long God long prea mo yumi putum tingting blong yumi i stap long hem, ol wari blong yumi oli godaon from we yumi save se “oltaem hem i stap tingbaot” yumi.​—1 Pita 5:7.

¹³ Wan narafala rod blong hasban mo waef i tingbaot Jeova long mared blong tufala, hemia taem tufala i go long ol miting blong kongregesen mo tufala i prij tugeta. Long ol miting blong yumi, ol hasban mo waef oli lanem olsem wanem blong blokem ol “giaman trik” we Setan i yusum blong seraotem ol famle. (Efes. 6:11) Mo sipos hasban mo waef oli prij tugeta oltaem, oli lanem blong ‘stanap strong mo no kam slak.’​—1 Kor. 15:58.

Taem i Gat Trabol

14. ?Wanem sam samting we i save mekem hasban mo waef i wari tumas?

¹⁴ I tru, ol advaes ya we yumi jes tokbaot oli no niu. Be i gud yu tokbaot olgeta wetem hasban no waef blong yu. Traem luksave sipos i gat sam samting we yutufala i nidim blong stretem, blong mekem se yutufala i folem advaes ya moa long mared blong yutufala. Be nating se God i stap long mared blong yutufala, Baebol i talem se bambae i gat “trabol long laef” blong yutufala. (1 Kor. 7:28) From sin we yumi gat, paoa blong rabis wol ya, mo ol trik blong Setan, ol Kristin hasban mo waef tu oli gat bigfala wari. (2 Kor. 2:11) Be Jeova i save mekem se yumi naf blong winim ol wari ya. Yes, yumi save winim olgeta. Tingbaot wan man blong strong bilif, hemia Job. Hem i lusum olgeta anamol blong hem, ol enemi oli kilim i ded olgeta man blong wok blong hem, mo ol pikinini blong hem tu oli ded. Be Baebol i talem long saed blong hem se: “Nating we ol trabol ya i kasem Job olsem, be hem i no mekem sin nating, mo i no tok nogud long God from ol samting ya.”​—Job 1:​13-22.

15. ?Taem wan hasban no waef i wari bigwan, samting ya i save pulum hem blong mekem wanem? ?Mo wanem beswan samting we hasban no waef blong hem i save mekem long taem olsem?

 ¹⁵ Be waef blong Job i talem long hem se: “?From wanem tingting blong yu i stap strong yet long God olsem? !I moa gud yu tok nogud long hem blong yu yu ded!” (Job 2:9) Tru ya, taem wan bigfala trabol i hapen no wan hasban mo waef oli fesem sam hadtaem, tufala i save wari bigwan nao wan long tufala i save mekem sam samting we hem i no tingting gud long hem fastaem. Waes man ya Solomon, i talem se: “Nating se man i waes, fasin blong daonem hem oltaem i save pusum hem blong mekem ol krangke samting.” (Pri. 7:​7, NW ) Sipos hasban no waef blong yu i sakem sam strong tok long yu from we hem i stap kasem wan hadtaem no narafala i stap “daonem hem oltaem,” yu mas traehad blong stap kwaet. Sipos yu tu yu sakem sam strong tok i gobak long hem, maet hem, no yutufala tugeta, i save talem sam samting we bambae i mekem trabol i kam mowas. (Ridim Ol Sam 37:8.) Taswe, i nogud yu “sek long ol tok” we narafala i talem taem hem i harem nogud, no taem tingting blong hem i foldaon. Long taem olsem, i gud we yu no tingting tumas long toktok blong hem.​—Job 6:3.

16. (a) ?Olsem wanem hasban mo waef i save mekem toktok blong Jisas long Matiu 7:​1-5 i wok long mared blong tufala? (b) ?From wanem i impoten we hasban mo waef tufala i gat stret tingting long tufala?

¹⁶ Hasban mo waef i mas gat stret tingting long saed blong tufala. Maet wan long tufala i luk se narafala i gat sam smosmol slak fasin mo i tingting se, ‘Mi mi save jenisim hem.’ Wetem lav mo longfala tingting, maet yu save givhan long hasban no waef blong yu blong hem i kam gud moa long sam fasin blong hem. Be yu no mas fogetem toktok blong Jisas long saed blong man we i faenem poen long narafala from ol smosmol samting we hem i mestem. Jisas i talem se man olsem, hem i olsem wan man we i stap lukluk “smol doti” we i stap long ae blong brata blong hem, be i no luk se wan “bigfala wud” i stap long ae blong hem. Jisas i givim advaes ya long yumi se: “Bambae yufala i no jajem narafala man, i nogud God i jajem yufala.” (Ridim Matiu 7:​1-5.) Hemia i no min se hasban mo waef i no nid blong wokhad blong kam gud moa long ol bigfala slak fasin blong tufala. Nogat. Robert we hem i mared klosap 40 yia nao, i talem se: “Maet hasban mo waef tufala i mas jenisim tingting blong tufala blong tufala i save toktok tugeta long fasin we i klia mo tru, mo blong tufala i glad blong lesin long  samting we narafala i talem long saed blong fasin blong hem.” Taswe, yu mas gat stret tingting long saed ya. Bitim we yu tingting tumas long ol fasin we yu wantem se hasban no waef blong yu i gat, yu mas lanem blong gat tangkiu from ol gudfala fasin we hem i gat naoia mo yu harem gud long olgeta.​—Pri. 9:9.

17, 18. ?Taem ol trabol oli kam bigwan tumas, yumi save lukluk i go long hu blong kasem help?

¹⁷ Yumi save kasem ol traem taem sam samting long laef blong yumi i jenis. Maet hasban mo waef i kasem sam traem taem tufala i gat pikinini. Wan long tufala no wan pikinini i save kasem wan bigfala sik. Maet papa mama blong hasban mo waef i stap kam olfala nao tufala i mas lukaot long olgeta. Taem ol pikinini oli kam bigwan, maet oli muv i go long wan ples we i longwe long papa mama. I save gat sam narafala jenis tu taem hasban no waef i gat moa wok blong mekem long kongregesen. Ol jenis olsem oli save mekem se hasban mo waef i wari nao fasin fren blong tufala i kasem traem.

¹⁸ ?Sipos yu yu harem se trabol we i kasem mared blong yu i bigwan tumas mo klosap nao bambae yu lego evri samting, yu yu save mekem wanem? (Prov. 24:10) !Yu mas gohed blong traehad! Setan bambae i glad tumas sipos wan man blong wok blong God i lego trufala wosip. Mo bambae glad blong hem i bigwan moa sipos hasban mo waef tugeta i mekem olsem. From samting ya, yu yu mas mekem evri samting we yu naf blong mekem blong gohed blong holemtaet trifala rop long mared blong yu. Long Baebol i gat plante stori blong ol man we oli stap tru long Jeova, nating se oli kasem ol bigbigfala traem. Tingbaot Deved. Wan taem, hem i stap talemaot long Jeova wanem i stap long hat blong hem, i se: “God, yu yu hae we yu hae. Plis yu sore long mi, from we ol man we oli stap kam mekem faet long mi oli plante we plante.” (Sam 56:1) ?Olsem wanem? ?Samtaem yu yu harem se “ol man” oli stap mekem faet long yu? Nating se olgeta we oli stap mekem trabol long yu oli ol man we yu no savegud olgeta no oli ol man we yu yu lavem olgeta tumas, oltaem yu mas tingbaot samting ya: Deved i kasem paoa blong stanap strong mo yu tu yu save mekem olsem hem. Deved i talem se: “Mi mi prea long [Jeova], nao hem i ansa long mi, i tekemaot mi long ol man we oli stap mekem mi mi fraet.”​—Sam 34:4.

Sam Moa Blesing

19. ?Olsem wanem yumi save blokem ol traehad blong Setan?

¹⁹ Naoia we yumi stap long taem blong en, ol hasban mo waef oli mas gohed blong ‘toktok gud tugeta blong mekem tingting blong olgeta i strong, mo oli mas givgivhan long olgeta.’ (1 Tes. 5:11) Yumi no fogetem se Setan i stap gohed blong talem se yumi stap tru long Jeova from we yumi wantem kasem samting nomo. Bambae hem i yusum eni rod we hem i naf blong faenem, blong pulum yumi blong lego God. Wan long ol rod ya, hemia blong spolem mared. Blong blokem ol traehad blong Setan, yumi mas trastem Jeova fulwan. (Prov. 3:​5, 6) Pol i raetem se: “Mi mi naf blong mekem evri samting long paoa blong Hemia we i stap givim paoa long mi.”​—Fil. 4:​13, NW.

20. ?Wanem ol blesing we yumi save kasem taem yumi tingbaot Jeova oltaem long mared blong yumi?

²⁰ Ol blesing we yumi kasem from we yumi tingbaot God long mared blong yumi, oli plante. Samting ya i tru tumas long saed blong Joel mo waef blong hem. Tufala i mared 51 yia finis. Hem i se: “Oltaem mi stap talem tangkiu long Jeova from waef blong mi mo glad we mitufala i save gat long fasin fren blong mitufala. Waef blong mi i nambawan fren blong mi.” ?Olsem wanem mared blong tufala i stap strong oltaem? “Oltaem mitufala i traehad blong gat kaen fasin, longfala tingting mo lav long mitufala.” Long olfala wol ya, i no gat wan long yumi we i save mekem samting ya long fasin we i stretgud olgeta. Be yumi save wokhad blong folem ol rul blong Baebol mo blong tingbaot Jeova oltaem long mared blong yumi. Sipos yumi mekem olsem, bambae mared blong yumi i olsem “rop ya we oli tantanem tri rop i go wanples, hem i no save brok kwik.”​—Pri. 4:12.

?Yu Yu Save Tingbaot?

• ?I minim wanem blong tingbaot Jeova long mared blong yu?

• ?Taem i gat trabol, hasban mo waef tufala i save mekem wanem?

• ?Olsem wanem blong save sipos wan hasban mo waef i stap tingbaot God long mared blong tufala?

[Kwestin]

[Tok blong pija long pej 22]

Taem hasban mo waef tufala i prea tugeta, samting ya i givhan long tufala blong winim ol hadtaem we tufala i kasem long laef