Kam Klosap Long God

?I Gat Wan Samting We i Save “Tekemaot Yumi Long Lav We God i Soem Long Yumi”?

Rom 8:38, 39, NW

YUMI evriwan i nidim lav. Mo i tru se taem ol famle mo fren blong yumi oli lavem yumi, yumi haremgud tumas. Sore tumas, be samtaem lav we ol man oli gat long ol narafala i no strong mo i save lus kwiktaem. Samtaem, olgeta we yumi lavem olgeta tumas, oli save mekem yumi harem nogud, oli save lego yumi mo oli no moa wantem yumi. Be nating, i gat wan man we lav blong hem i no save jenis. Rom 8:38, 39 (NW) i yusum ol naesfala tok blong tokbaot lav we Jeova i gat long ol man we oli wosipim hem.

Pol i talem se: “Mi mi save finis.” ?Wanem samting we hem i save? Hem i save se i no gat wan samting nating we i save “tekemaot yumi long lav we God i soem long yumi.” Pol i no talem tok ya long saed blong hem wan nomo, be long saed blong yumi evriwan—hemia olgeta we oli stap tru long God mo long wok blong hem. Blong Pol i makem poen ya strong, hem i talemaot sam samting we oli no save blokem lav we Jeova i gat long ol man blong hem.

“Ded no laef.” Lav we Jeova i gat long ol man blong hem i no finis taem oli ded. God i pruvum se hem i lavem olgeta taem hem i stap tingbaot olgeta yet, mo bambae hem i mekem olgeta oli laef bakegen long niufala wol, we stretfasin nomo bambae i stap long hem. (Jon 5:28, 29; Revelesen 21:3, 4) Nomata wanem trabol ol man blong wosipim God we oli stap tru long hem oli fesem long wol ya, samting ya i no save tekemaot lav we God i gat long olgeta. Lav ya i stap oltaem nomo.

“Ol enjel no ol gavman.” I isi blong ol man oli fraet long sam man mo gavman we oli gat paoa antap long olgeta, be i no olsem long saed blong Jeova. Ol spirit man we oli gat paoa olsem enjel ya we i kam Setan, oli no save pulum God blong i no moa lavem ol man we oli wosipim hem. (Revelesen 12:10) Mo ol gavman tu, we maet oli agensem ol trufala Kristin, oli no save jenisim tingting we God i gat long saed blong ol man blong hem.—1 Korin 4:13.

“Ol samting we oli stap naoia, no we bambae oli kam.” Lav we God i gat long yumi i no save godaon taem ol yia oli pas. I no gat wan samting we i save hapen long ol man blong hem naoia mo long fiuja we bambae i mekem se God i no moa lavem olgeta.

“Ol samting we oli gat paoa.” Pol i tokbaot finis ol bigfala paoa long heven mo wol—ol “enjel” mo ol “haeman”—be naoia hem i stap tokbaot ol “paoa.” Grik tok ya we oli yusum long ples ya i gat plante mining. Be nomata wanem stret mining blong tok ya, yumi save sua long wan samting, hemia se i no gat wan paoa long heven no long wol we i save mekem se Jeova i no moa lavem ol man blong hem.

“Ol samting we oli hae no dip.” Jeova i lavem ol man blong hem nomata wanem samting we i hapen long laef blong olgeta, ol gudfala samting no ol samting we i nogud olgeta.

“Eni narafala samting we God i wokem.” Long tok ya, Pol i stap tokbaot olgeta samting we God i wokem. Hem i stap talem se i no gat wan samting nating we i save tekemaot yumi long lav blong Jeova, sipos yumi stap tru long hem mo mekem wosip long hem.

Lav we man i gat i save jenis mo i save lus. Be lav we God i gat long ol man we oli lukluk i go long hem wetem bilif, i no save jenis. Lav ya i no save finis samtaem. Taem yumi save samting ya, hemia i mas pusum yumi blong kam klosap moa long Jeova, mo blong traem bes blong yumi blong pruvum se yumi lavem hem.