!I No Longtaem Wan Paradaes Wol!

“Papa blong mifala long heven, plis holem nem blong yu i stap tabu, kingdom blong yu i kam, wil blong yu i kamtru, long wol olsem we i kamaot long heven.”—Matiu 6:9, 10, The Jerusalem Bible.

PLANTE man oli savegud prea ya mo oli kolem prea ya se Prea blong Masta. Prea ya i givim wan hop long ol man. ?Olsem wanem hem i givim hop?

Olsem prea ya i soem, Kingdom blong God bambae i mekem se samting we God i wantem, no wil blong hem, i kamtru long wol ya olsem we i stap kamtru naoia long heven. Mo wil blong God hemia blong putumbak Paradaes long wol. (Revelesen 21:1-5) ?Wanem ya Kingdom blong God mo olsem wanem bambae hem i putumbak Paradaes long wol?

Wan Trufala Gavman

Kingdom blong God i wan trufala gavman. Blong ol gavman oli save mekem wok blong olgeta, i mas gat ol man we oli rul, ol loa mo ol man we oli stap aninit long ol gavman ya. ?Olsem wanem? ?Kingdom blong God i gat ol samting ya? Tingbaot ansa we Baebol i givim long ol trifala kwestin ya we i kam biaen:

?Hu ya ol man we oli rul long Kingdom blong God? (Aesea 33:22) Jeova God i jusumaot Pikinini blong hem Jisas Kraes blong i rul long Kingdom. (Matiu 28:18) Jeova i givhan long Jisas blong i jusum wan stret namba blong ol man we oli kamaot long “olgeta kala, mo long olgeta kantri, mo long olgeta laen, mo long olgeta lanwis” we bambae oli rul wetem hem mo bambae “oli king, oli rul long olgeta man long wol.”—Revelesen 5:9, 10.

?Wanem loa we Kingdom blong God i putum blong ol man we oli stap aninit long Kingdom ya oli obei long hem? Sam long ol loa ya i pusum man blong tekem aksen. Jisas i tokbaot wan long ol loa ya we i impoten moa long ol narafala loa, hem i se: “’Yu mas lavem [Jeova] . . . we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem. Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’”—Matiu 22:37-39.

Sam narafala loa oli blokem ol man we oli stap aninit long Kingdom blong God blong oli no mekem sam nogud fasin. Eksampol, Baebol i talemaot klia se: “Yufala i mas tingting gud long samting ya. Yufala i mas save se man we i stap ronem woman, mo man we i stap prea long ol narafala god, bambae oli no save go insaed long niufala wol ya. Man we i stap slip wetem woman blong narafala man mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman. . . . Man we i stap stil, mo man we i wantem plante samting tumas, mo man we i stap dring we i lusum hed, mo man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed. Ol man olsem bambae oli no save go insaed samtaem long niufala wol ya.”—1 Korin 6:9, 10.

?Hu ya olgeta we oli stap aninit long Kingdom blong God? Jisas i tokbaot ol man we oli stap aninit long Kingdom ya olsem ol sipsip. Hem i talem se: “Bambae oli save harem voes blong mi,  nao bambae olgeta sipsip ya evriwan oli kam wan kampani nomo, we i gat wan man nomo blong lukaot long olgeta.” (Jon 10:16) Blong save stap aninit long Kingdom blong God, man i mas mekem samting we Jisas, Gudfala Man blong Lukaot long ol Sipsip, i askem hem blong mekem. I no naf blong hem i talem nomo se hem i folem Jisas. Jisas i talem se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.”—Matiu 7:21.

From samting ya, olgeta man we oli stap aninit long Kingdom blong God, oli yusum mo ona long nem blong God, Jeova, olsem we Jisas tu i bin mekem. (Jon 17:26, NW) Oli obei long oda blong Jisas blong tijim ol narafala long saed blong ‘gud nius ya blong Kingdom.’ (Matiu 24:14; 28:19, 20) Mo oli soemaot trufala lav long narafala.—Jon 13:35.

Spolem “Ol Man Ya We Oli Stap Spolem Wol”

Ol samting we oli stap hapen long wol oli soemaot se i no longtaem Kingdom blong God bambae i mekem sam bigfala jenis long wol ya. ?Olsem wanem yumi save samting ya? Tu taosen yia bifo, Jisas i tokbaot sam samting we oli olsem wan saen blong soemaot se “kingdom blong God i klosap.” (Luk 21:31, NW) Olsem las haf i tokbaot finis, ol samting ya we oli haf blong saen ya, yumi stap luksave klia nomo raonabaot long wol.

?Wanem bambae i hapen biaen? Jisas i ansa se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Matiu 24:21) Hemia i no wan bigfala trabol we man i save mekem. Defren olgeta, hemia taem we God i tekem aksen “blong spolem ol man ya we oli stap spolem wol.” (Revelesen 11:18) Ol rabis man we oli tingbaot olgeta nomo nao oli mekem ol samting we klosap i spolem wol ya fulwan, “bambae God i tekemaot olgeta oli gowe long [wol] ya.” Be ol stret man we oli mekem wok blong God olsem we hem i wantem, “bambae oli save stap gud” long wol.—Ol Proveb 2:21, 22.

I stret nomo we Jeova i tekem strong aksen olsem. ?From wanem? Tingbaot pijatok ya. Yu yu gat sam smol renhaos we yu stap rentem. Sam long ol man we oli rentem olgeta oli gat gudfala fasin; oli pem ren mo oli lukaotgud long haos we oli stap long hem. Be sam narafala oli no kea nating, oli tingbaot olgeta nomo; oli no wantem pem ren blong olgeta mo oli spolemgud haos we oli stap long hem. Oli gohed nomo blong mekem ol rabis fasin ya nating se yu givim plante woning finis long olgeta. ?Bambae yu yu mekem wanem? Olsem man blong haos, ating bambae yu strong long ol rabis man ya blong oli muvaot long haos blong yu.

Long sem fasin, Jeova God we i Wokem wol ya mo olgeta samting we oli stap long hem, i gat raet blong talem hu i save stap long wol ya. (Revelesen 4:11) Jeova i talem se plan blong hem hemia blong tekemaot ol rabis man we oli no wantem folem wanem we hem i wantem olgeta blong mekem mo olgeta we oli no tingbaot raet we narafala man i gat.—Ol Sam 37:9-11.

Paradaes i Stap Bakegen

I no longtaem, Kingdom blong God we Jisas Kraes i rul long hem, bambae i rulum wol ya. Jisas i kolem taem ya we Kingdom i stat blong rulum wol se hem i taem we “olgeta samting oli kam niuwan bakegen.” (Matiu 19:28, New International Version) ?Laef long wol ya bambae i olsem wanem long taem ya? Tingbaot ol promes ya blong Baebol:

Ol Sam 46:9. “Hem i stap mekem ol faet i finis long olgeta ples long wol.”

Aesea 35:1. “I gat taem i stap kam, we draeples bambae i harem gud, i glad. Ples we ol samting i no save gru long hem, ol flaoa bambae oli stap gru long hem.”

Aesea 65:21-23. “Ol samting we [ol man blong mi we mi mi jusumaot olgeta finis] oli hadwok long hem, bambae oli save harem gud long hem longtaem. Ol wok we bambae oli stap mekem, bambae  oli save go gud, mo bambae i no gat trabol i kasem ol pikinini blong olgeta.”

Jon 5:28, 29. “I gat taem i stap kam we ol dedman bambae oli harem voes blong [Jisas], nao bambae oli aot long beregraon.”

Revelesen 21:4. “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”

Ol Risen Blong Bilif

?Yu yu bilif long ol promes blong Baebol? Baebol i bin talemaot se plante man bambae oli no bilif long ol promes ya. Hem i se: “Long taem blong [ol las dei], bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, oli talem se: ‘?Olsem wanem nao? ?Hem i promes finis blong kam, be hem i stap wea? Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.’” (2 Pita 3:3, 4) Be ol man ya blong jik oli mestem bigwan. Tingbaot fofala risen ya nomo, from wanem yu save bilif long wanem we Baebol i talem:

(1) I bin gat sam taem bifo we God i bin tekem aksen agensem ol rabis man long wol ya. Bigfala Wota long taem blong Noa i wan gudfala eksampol long samting ya.—2 Pita 3:5-7.

(2) Tok blong God i bin talemaot longtaem finis ol samting we oli stap hapen tede long wol.

(3) Olgeta samting oli no ‘stap sem mak nomo olsem taem we God i mekem wol ya fastaem.’ Fasin we man i mekem long narafala, ol rabis fasin mo problem ya we man i stap spolem ol samting raonabaot long yumi, i stap kam mowas i bitim eni narafala taem long histri blong man.

(4) “Gud nius ya blong Kingdom” i kasem olgeta ples long wol, mo hemia i soemaot se i no longtaem nao bambae “en i save kam.”—Matiu 24:14, NW.

Ol Witnes blong Jeova oli singaot yu blong stadi wetem olgeta long Tok blong God, Baebol, blong bambae yu save lanem moa long saed blong promes ya blong laef olwe aninit long rul blong Kingdom blong God. (Jon 17:3) Yes, wan nambawan fiuja i stap long fored blong yumi. !Yumi klosap long wan taem we i moa gud! ?Bambae yu yu kasem nambawan fiuja ya?

[Tok blong makem poen long pej 7]

Olgeta man we oli talem se ol samting bambae oli stap sem mak nomo olsem bifo, oli mestem bigwan

[Tok blong pija long pej 8]

?Bambae yu yu kasem nambawan fiuja ya?