Tok Blong Jeova i Wan Samting We i Laef

Ol Bigfala Poen Long Ol Leta Blong Tesalonaeka Mo Timoti

STAT long taem we Pol i visitim Tesalonaeka mo i stanemap wan kongregesen long ples ya, oltaem samfala oli agensem olgeta long kongregesen. Taem Timoti i gat bitim 20 yia, hem i go blong visitim kongregesen ya, mo i kambak bakegen long Pol wetem wan gudfala ripot. Taswe Pol i raetem leta i go long kongregesen blong Tesalonaeka blong presem olgeta from traehad blong olgeta mo blong leftemap tingting blong olgeta. Ating Pol i raetem faswan leta blong hem klosap long en blong yia 50 K.T. Smoltaem afta, hem i raetem namba tu leta blong hem i go long ol Kristin long kongregesen blong Tesalonaeka. Long leta ya, hem i stretem rong tingting we sam long olgeta oli gat, mo i leftemap tingting blong olgeta blong stanap strong long bilif blong olgeta.

Samwe long ten yia afta, Pol i stap long Masedonia mo Timoti i stap long Efesas. Pol i raetem leta i go long Timoti blong pulum hem blong stap long Efesas, mo blong givhan long ol brata sista long ples ya blong oli mekem fasin fren blong olgeta wetem Jeova i kam moa strong, from we i gat sam giaman tija we oli kam insaed long kongregesen. Taem ol man oli stap mekem i nogud long ol Kristin afta we faea i bonem Rom long yia 64 K.T., Pol i raetem namba tu leta blong hem i go long Timoti. Hemia i laswan buk blong Baebol we Pol i raetem. Ol tok blong leftemap tingting mo blong stretem tingting we i stap long fofala leta we Pol i raetem, i save givhan tu long yumi tede.—Hib. 4:12.

“WEKAP”

(1 Tes. 1:1–5:28)

Pol i presem ol Kristin blong Tesalonaeka from ‘fasin blong olgeta we i soemaot bilif blong olgeta, from hadwok blong olgeta we i soemaot se oli lavem God, mo from we oli stap stanap strong.’ Hem i talem long olgeta se olgeta oli stap mekem hem i ‘harem gud mo oli olsem medol we hem i winim, we hem i save tok flas from.’—1 Tes. 1:3; 2:19.

Pol i leftemap tingting blong ol Kristin long Tesalonaeka blong oli toktok tugeta long saed blong promes blong laef bakegen, blong givgivhan long olgeta, nao biaen hem i raetem se: “Dei ya blong [“Jeova,” NW], bambae i mekem ol man oli sek, olsem wan man blong stil, we i kamtru long naet.” Mo hem i givim advaes long olgeta se oli mas “wekap” we hed blong olgeta i klia gud.—1 Tes. 4:16-18; 5:2, 6.

Ansa Blong Sam Kwestin Long Saed Blong Baebol:

4:15-17 (NW)—?Hu ya olgeta we bambae oli “go long ol klaod . . . blong mitim Masta long win ya antap,” mo samting ya bambae i hapen olsem wanem? Hemia ol Kristin we tabu spirit i makemaot olgeta, we oli laef long taem ya we Kraes i rul long kingdom blong hem. Olgeta ya bambae oli “mitim Masta” Jisas long heven. Be blong go mitim Masta ya, fastaem oli mas ded, nao bambae oli laef bakegen olsem ol spirit man. (Rom 6:3-5; 1 Kor. 15:35, 44) Kraes i stap rul finis long heven, taswe taem ol Kristin we tabu spirit i makemaot olgeta oli ded, wantaem nomo oli “go long ol klaod” no oli laef bakegen.—1 Kor. 15:51, 52.

5:23—?Pol i minim wanem taem hem i prea olsem, “tingting blong yufala, mo laef blong yufala, mo bodi blong yufala, bambae oli stap gud nomo”? Pol i tokbaot tingting, laef, mo bodi blong Kristin kongregesen olsem wan grup, hemia ol Kristin we tabu spirit i makemaot olgeta we oli stap long Tesalonaeka. Pol i no prea nomo blong kongregesen i stap gud, be hem i prea se “tingting” blong kongregesen tu i stap gud. Hem i prea tu from “laef” blong kongregesen, hemia se i stap olwe, mo from “bodi” blong hem, hemia fulwan grup blong ol Kristin we tabu spirit i makemaot olgeta. (1 Kor. 12:12, 13) Taswe, prea we Pol i mekem i soemaot we hem i tingbaot kongregesen ya bigwan.

Ol Lesen Blong Yumi:

1:3, 7; 2:13; 4:1-12; 5:15. Taem yumi stretem mo givim woning long wan man, yumi mas talem tu ol tok we i save leftemap tingting mo pulum hem blong traehad moa.

4:1, 9, 10. Ol man we oli wosipim Jeova oli mas gohed oltaem blong fren moa wetem Jeova.

 5:1-3, 8, 20, 21. Taem dei blong Jeova i kam klosap moa, “hed blong yumi i mas klia gud. Yumi mas holem fasin blong bilif mo blong lavem narafala man. Hemia i olsem klos blong faet we oli wokem long aean, blong ara i no save kasem yumi. Mo yumi mas putum tingting blong yumi long God blong hem i sevem yumi. Hemia i olsem hat blong faet blong yumi.” Mo tu, yumi mas lesin gud long ol profet tok blong God we oli stap insaed long Baebol.

“STANAP STRONG”

(2 Tes. 1:1–3:18)

Samfala long kongregesen oli twistim tok we Pol i raetem long faswan leta blong hem, nao oli talem se taem we masta i “stap,” i kam finis. Be Pol i stretem tingting ya, i talem samting we i mas “kamtru fastaem.”—2 Tes. 2:1-3, NW.

Pol i leftemap tingting blong olgeta se: “Yufala i mas stanap strong. Mo yufala i mas holemtaet trutok ya we mitrifala i tijim yufala finis long hem.” Mo i givim oda long olgeta se: “Bambae yufala i no go joen long ol brata blong yumi we oli stap les nomo.”—2 Tes. 2:15; 3:6.

Ansa Blong Sam Kwestin Long Saed Blong Baebol:

2:3, 8—?Hu ya “Man Blong Brekem Loa” mo bambae hem i lus olsem wanem? “Man” ya, hemia grup blong ol lida blong Krisendom. Man we i naf blong talemaot jajmen blong God agensem ol man nogud mo blong givim oda blong kilim olgeta i ded, hemia “Tok ya”—Nambawan Man Blong Talemaot Tok Blong God, Jisas Kraes. (Jon 1:1) Taswe yumi save talem se “spirit [paoa] blong maot” (NW) blong Jisas bambae i spolem man ya blong brekem loa.

2:13, 14—?Olsem wanem ol Kristin we tabu spirit i makemaot olgeta, oli ‘faswan we God i jusumaot olgeta blong hem i save sevem olgeta’? Olgeta we tabu spirit i makemaot olgeta, Jeova i jusumaot olgeta olsem wan grup, taem hem i mekemap tingting blong hem se bambae sid blong woman i smasem hed blong Setan. (Jen. 3:15, NW) Jeova i talem ol tok we oli mas folem, wok we oli mas mekem, mo tu, ol traem we oli mas winim. Taswe hem i singaot olgeta blong mekem ol samting ya.

Ol Lesen Blong Yumi:

1:6-9. Jajmen blong Jeova bambae i no kamtru long olgeta man evriwan, be long ol man nomo we oli no obei long hem.

3:8-12. Yumi no mas mekem eskius se, from we dei blong Jeova i stap kam klosap, yumi no save wok blong kasem samting we yumi nidim long laef mo blong sapotem yumi long wok blong prij. Yumi save kam les sipos yumi no wok, mo yumi save kam wan man we i “go insaed long ol bisnes blong narafala man.”—1 Pita 4:15.

“YU MAS HOLEMGUD OLGETA SAMTING YA WE GOD I PUTUM FINIS LONG HAN BLONG YU”

(1 Tim. 1:1–6:21)

Pol i talem long Timoti se: “Mekem tingting blong yu i strong blong yu save faet gud agens long ol rabis fasin blong wol ya, we bilif blong yu i no save foldaon, mo yu save se long tingting blong yu, yu yu klin gud long fes blong God.” Aposol Pol i talem fasin we ol man oli mas gat blong oli save kam elda no man blong givhan insaed long kongregesen. Mo tu Pol i talem long Timoti se bambae hem i “no lesin long ol giaman storian ya, we oli agensem ol samting we oli tabu.”—1 Tim. 1:18, 19; 3:1-10, 12, 13; 4:7, NW.

Pol i talem long Timoti se: “Bambae yu no tok strong long man we i olfala.” “Yu mas holemgud olgeta samting ya we God i putum finis long han blong yu. Bambae yu no go joen long ol toktok ya we i no blong ona long God, mo long ol krangke toktok ya we oli talem se i fasin blong man i kam waes. Ol man we oli toktok olsem oli giaman nomo.”—1 Tim. 5:1; 6:20.

Ansa Blong Sam Kwestin Long Saed Blong Baebol:

1:18; 4:14—?Wanem “tok blong ol profet” long saed blong Timoti? Maet hemia ol tok we tabu spirit i pulum samfala blong talem, long taem ya we Pol i stap long Listra long namba tu misinari trip blong hem. Ol tok ya oli long saed blong wok we bambae Timoti i mekem insaed long Kristin kongregesen. (Ol Wok 16:1, 2) From ‘ol profet tok ya,’ ol elda long kongregesen oli “putum han blong olgeta long hed” blong Timoti, blong putumap hem blong mekem wan spesel wok.

2:15—?Olsem wanem ‘God bambae i lukaot gud long woman taem hem i bonem pikinini’? Sipos woman i bonem pikinini, mo i lukaotgud long ol pikinini blong hem mo long haos, ol wok ya oli save “lukaot gud” long hem blong i no foldaon long sam nogud fasin. Woman ya i no save ‘go olbaot long ol haos blong storian blong nating nomo mo go insaed long bisnes blong ol narafala man.’—1 Tim. 5:11-15.

3:16 (NW)—?Wanem tabu tok haed long saed blong fasin blong onagud long God? ?Man i save  obei long hae rul blong Jeova long fasin we i stretgud olgeta no nogat? Ansa blong kwestin ya i stap olsem wan tok haed blong longtaem. Jisas i ansa long kwestin ya taem hem i holemstrong fulwan long God gogo kasem we hem i ded.

6:15, 16 (NW)—?Ol tok ya oli stret long Jeova God no long Jisas Kraes? Ol tok ya oli stret long man we ol vas ya oli soemaot we bambae hem i kamtru, hemia Jisas Kraes. (1 Tim. 6:14) Taem yumi skelem Jisas wetem ol man we oli rul tede olsem king mo masta, yumi luk se Jisas nomo i stret “Man blong Rulum man,” mo hem nomo i no save ded bakegen samtaem. (Dan. 7:14; Rom 6:9) Taem hem i go long heven, i no moa gat man i save “luk hem” wetem prapa ae blong hem.

Ol Lesen Blong Yumi:

4:15. Nating se yumi stap long trutok longtaem finis no yumi jes save trutok, be yumi mas traehad blong gohedgud mo mekem fasin fren blong yumi wetem Jeova i kam moa strong.

6:2. Sipos yumi wok blong wan Kristin brata no sista, yumi no mas traem winim moa samting long hem i bitim long wan narafala masta, be yumi mas glad moa blong wok blong hem bitim we yumi wok blong wan man afsaed long kongregesen.

‘OLTAEM YU MAS STRONG BLONG TALEMAOT TOK BLONG GOD’

(2 Tim. 1:1–4:22)

Pol i rerem gud Timoti blong fesem ol traem we bambae oli kasem hem long laef blong hem, i se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo blong mekem yumi naf blong blokem ol samting we yumi nomo i wantem.” Hem i givim advaes long Timoti se: “Man blong wok blong Masta blong yumi, hem i no mas man blong faet, hem i mas mekem i gud long olgeta man. Mo hem i mas wan gudfala man blong tij.”—2 Tim. 1:7; 2:24.

Pol i givim advaes ya tu long Timoti se: “Yu yu mas holemstrong ol samting ya we mifala i tijim yu long hem bifo, mo we yu bilif gud long hem finis.” I gat ol tijing blong ol man blong apostasi we oli kam insaed long Kristin kongregesen, taswe aposol Pol i givim advaes long yangfala elda ya se: “Yu mas talemaot tok blong [God]. . . . Yu mas pulum ol man blong oli bilif long hem, mo yu mas tok strong long ol man we oli rong, mo yu mas mekem tingting blong ol man oli stanap strong.”—2 Tim. 3:14; 4:2.

Ansa Blong Sam Kwestin Long Saed Blong Baebol:

1:13—?Wanem ol tok ya we ‘i stretgud mo i blong soemaot rod’? Tok ya we i stretgud, hemia “ol trutok ya we Jisas Kraes Masta blong yumi i talemaot,” i min se ol trufala Kristin tijing. (1 Tim. 6:3) Jisas i talem mo mekem ol samting nomo we Tok blong God i talem long hem, taswe ‘ol tok we i stretgud’ i save minim tu, olgeta tijing blong Baebol. Ol tijing ya oli halpem yumi blong luksave wanem samting we God i wantem yumi blong mekem. Yumi stap holemtaet ol trutok ya taem yumi mekem ol samting we yumi lanem long Baebol oli wok long laef blong yumi.

4:13—?Wanem ‘ol buk ya we oli wokem long skin blong nani’? Hemia ol skrol we oli raetem tok long hem, we oli wokem long skin blong anamol. Maet Pol i stap askem blong oli karem sam long ol Hibru hanraet oli kam long hem blong hem i save stadi long olgeta taem hem i stap long kalabus long Rom. Ating sam long ol skrol ya oli wokem long gras ya papiras, mo sam oli wokem long skin blong nani.

Ol Lesen Blong Yumi:

1:5; 3:15. Samting we i mekem se Timoti i gat bilif long Jisas Kraes, mo se bilif ya i gat paoa long evri samting we hem i mekem, hemia tijing blong Baebol we hem i kasem taem hem i smol yet. Taswe ol papa mama oli mas tinghevi long wok we Jeova i putum long han blong olgeta blong tijim ol pikinini blong olgeta.

1:16-18. I gud yumi prea from ol brata blong yumi we oli kasem traem, ol man oli mekem i nogud long olgeta, mo oli putum olgeta long presin, mo yumi traehad blong mekem sam samting blong givhan long olgeta.—Prov. 3:27; 1 Tes. 5:25.

2:22. Ol Kristin, speseli ol yangfala, oli no mas spenem tumas taem blong bildimap ol masel blong olgeta, plei spot, miusik, ol pleplei, ol samting we man i mekem blong spel, mo mekem trip i go long narafala ples, storian olbaot long ol samting we i blong nating nomo, mo sam narafala fasin bakegen we oli mekem se oli gat smoltaem nomo blong mekem ol Kristin wok blong olgeta.

[Tok blong pija long pej 31]

?Wanem laswan leta we Aposol Pol i raetem?