Ansa Blong Jeova Long Wan Prea We i Kamaot Long Hat

“Plis yu mekem olgeta oli save se yu, we nem blong yu Jeova, yu nomo yu Hae God long olgeta ples long wol.”—SAM 83:18, NW.

1, 2. ?Wanem samting i tajem hat blong plante man taem oli stap lanem trutok? ?Wanem sam kwestin we yumi save tingbaot?

SAM yia bifo, tingting blong wan woman i trabol bigwan from wan nogud samting we i hapen long ples blong hem. Hem i bon long wan famle we i joen long Katolik jos. From samting ya, long taem ya we hem i harem nogud, hem i askem pris long ples blong hem blong i halpem hem. Be pris ya i no wantem toktok wetem hem nating. Ale woman ya i prea long God, i se: “Mi no save se yu yu hu . . . , be mi save se yu yu stap. !Plis yu halpem mi blong mi save yu!” Smoltaem biaen, ol Witnes blong Jeova oli mitim hem mo oli leftemap tingting blong hem mo givhan long hem blong kasem ansa blong ol kwestin blong hem. Oli givhan long hem blong kasem save long plante samting. Wan long ol samting ya hemia se God i gat wan prapa nem blong hem, hemia Jeova. Samting ya i rili tajem hat blong woman ya. Hem i talem se: “!Tru ya! !Hemia nao God ya we, stat taem mi mi smol i kam, mi wantem tumas blong save hem!”

² Plante man oli gat filing olsem tu taem oli lanem nem blong God. Fastaem we plante long olgeta oli luk nem ya Jeova, hemia taem oli ridim Sam 83:18 long Baebol. Long New World Translation, vas ya i talem se: “Plis yu mekem olgeta oli save se yu, we nem blong yu Jeova, yu nomo yu Hae God long olgeta ples long wol.” ?Yu bin tingbaot samtaem from wanem man blong raetem Sam i raetemdaon toktok ya blong Sam 83? ?Wanem samting bambae i hapen we i fosem olgeta man blong luksave se Jeova nomo i trufala God? ?Sam 83 i tijim wanem long yumi? Bambae yumi tokbaot ol kwestin ya long stadi ya. *

Wan Plan Agensem Ol Man Blong Jeova

3, 4. ?Hu i wokem Sam 83? ?Mo hem i stap tokbaot wanem plan?

³ Smol toktok long stat blong Sam 83 i talem se “sing ya, Asaf i wokem.” I luk olsem se man we i wokem Sam ya i wan smol bubu blong Livaet ya Asaf. Long taem we King Deved i rul, Asaf i wan nambawan man blong plei miusik. Long Sam ya, smol bubu ya blong Asaf i plis long Jeova blong tekem aksen blong leftemap hae rul blong Hem mo blong mekem ol man oli save nem blong Hem. Hem i wokem sing ya sam yia afta we Solomon i ded. ?From wanem yumi talem samting ya? From we taem Deved mo Solomon i rul, king blong Taea i no enemi blong Isrel. Be long taem we smol bubu ya blong Asaf i wokem Sam ya, ol man Taea oli agensem ol man Isrel mo oli joenem ol enemi blong ol man Isrel.

⁴ Smol bubu blong Asaf i talem nem blong ten neson we oli stap plan tugeta blong spolem ol man blong God. Ol enemi ya oli ol neson we oli stap raonabaot long ol man Isrel. Baebol i talemaot nem blong olgeta se: “I gat ol man Edom, mo ol laen blong Ismael, mo ol man Moab, mo ol laen blong Hega, mo ol man blong Gebal, mo ol laen blong Amalek, mo ol man Filistia, mo ol man Taea. Mo ol man Asiria tu oli joen wetem olgeta.” (Sam 83:6-8) ?Sam ya i stap tokbaot wanem samting we i bin hapen? Samfala oli ting se Sam ya i stap tokbaot taem we ol man Amon, Moab, mo ol man Edom, oli girap agens long ol man Isrel long taem we Jehosafat i stap rul. (2 Kron. 20:1-26) Sam narafala oli ting se Sam ya i tokbaot ol defdefren taem we ol man Isrel oli kasem trabol from ol neson raonabaot long olgeta.

5. ?Olsem wanem Sam 83 i givhan long ol Kristin tede?

⁵ Nomata yumi no suagud wetaem samting we Sam ya i stap tokbaot i bin hapen, i klia se long taem ya we neson blong Isrel i stap long denja, Jeova God i pusum smol bubu blong Asaf blong i raetemdaon prea blong hem long singsing ya. Sam ya i leftemap tingting blong ol man blong God tede we olgeta tu oli pastru long ol taem we ol enemi oli traehad plante blong spolem olgeta. Mo i sua se sing ya bambae i givim paoa long yumi long fiuja, taem Gog blong kantri ya Magog i rerem ol ami blong hem blong laswan taem, blong traem spolem olgeta man we oli wosipim God long spirit mo trutok.—Ridim Esikel 38:2, 8, 9, 16.

 Samting We i Impoten Moa

6, 7. (a) ?Long stat blong Sam 83, smol bubu blong Asaf i askem wanem long prea blong hem? (b) ?Wanem samting i impoten moa long tingting blong smol bubu blong Asaf?

⁶ Smol bubu blong Asaf i prea long God mo i talemaot ol filing blong hem. Makemgud wanem we hem i talem, i se: “God. !Plis yu no stap kwaet! !Yu no satem maot blong yu olsem! !Plis yu tok! !Yu luk! Ol enemi blong yu oli girap oli agensem yu, olgeta ya we oli no laekem yu oli stap faet agens long yu. Mifala i man blong yu nomo we yu yu stap lukaot long mifala, be oli stap mekem ol tokhaed blong spolem mifala, . . . olgeta oli agri long plan ya blong olgeta, nao oli joen wanples blong oli agens long yu.”—Sam 83:1-3, 5.

⁷ ?Wanem samting i impoten moa long tingting blong smol bubu blong Asaf? I tru se hem i mas wari bigwan long laef blong hem mo famle blong hem. Be bigfala samting we hem i tokbaot long prea blong hem, hemia se ol enemi oli stap sakem doti long nem blong Jeova, mo neson we i karem nem blong Hem i stap long bigfala denja. I gud yumi tu yumi gat wan tingting olsem we i skelgud, blong yumi save stanap strong long hadtaem ya blong ol laswan dei blong olfala wol ya.—Ridim Matiu 6:9, 10.

8. ?Ol neson oli mekem plan blong agensem ol man Isrel from we oli wantem wanem samting?

⁸ Smol bubu blong Asaf i talem toktok we ol enemi blong ol man Isrel oli talem, i se: “!Yufala i kam! !Yumi go flatem olgeta ya! !Yumi spolemgud ples blong olgeta! !Bambae nem ya Isrel i lus olgeta!” (Sam 83:4) !Ol neson ya oli no laekem nating ol man we God i jusumaot! Be i gat wan narafala samting we i pusum olgeta blong mekem plan ya blong agensem ol man Isrel. Oli wantem graon blong Isrel mo oli tok flas oli se: “Graon ya we i blong God, bambae yumi tekem i blong yumi.” (Sam 83:12) ?Olsem wanem? ?Wan samting olsem i hapen long taem blong yumi? !Yes!

Ples We “i Tabu, i Blong Yu Nomo”

9, 10. (a) ?Long taem bifo, wanem i tabu ples blong God? (b) ?Ol tabu Kristin we oli stap yet long wol mo ol “narafala sipsip,” oli haremgud long wanem blesing?

⁹ Long taem bifo, ol man Isrel oli tokbaot Promes Lan se i tabu ples blong God. Tingbaot singsing we ol man Isrel oli sing long hem afta we God i mekem oli fri long Ijip, oli se: “Mifala i man blong yu, mo oltaem yu stap lavem mifala, nao yu yu mekem mifala i fri, mo yu stap lidim mifala. Long paoa blong yu, yu stap soemaot rod, blong mifala i go long ples ya we yu yu makemaot se i tabu, i blong yu nomo.” (Eks. 15:13) Long ol yia we oli kam biaen, tempol wetem ol pris mo bigfala taon blong Juda hemia Jerusalem, mo ol king we oli kamaot long laen blong Deved mo we oli sidaon long jea blong Jeova, olgeta ya oli stap long ‘ples ya we i tabu.’ (1 Kron. 29:23, NW) Jisas i talem stret se Jerusalem “hem i ples blong God we hem i Hae King.”—Mat. 5:35.

¹⁰ ?Olsem wanem long taem blong yumi? Long yia 33, wan niufala neson i bon, hemia “Isrel blong God.” (Gal. 6:16, NW) Ol brata blong Jisas Kraes we tabu spirit i makemaot olgeta oli mekemap neson ya. Oli mekem wok we prapa neson blong ol man Isrel oli lego, hemia blong witnes long nem blong God. (Aes. 43:10; 1 Pita 2:9) Semfala promes we Jeova i bin mekem wetem ol man Isrel bifo, hem i mekem wetem olgeta ya, hem i se: “Mi bambae mi God blong yufala, mo yufala bambae i man blong mi.” (2 Kor. 6:16; Lev. 26:12) Long 1919, Jeova i mekem wan spesel fasin fren wetem ol memba blong Isrel blong God we oli stap yet long wol. Mo long taem ya, i olsem we oli tekem wan kantri no wan “ples” i blong olgeta. Hemia wan kantri long saed blong spirit, we oli haremgud blong mekem ol wok blong trufala wosip. Yes hemia paradaes long saed blong spirit. (Aes. 66:8) Stat long 1930, plante milian “narafala sipsip” oli joen wetem olgeta. (Jon 10:16) Jeova i stap blesem ol Kristin ya long taem blong yumi, hem i stap protektem olgeta mo namba blong olgeta i stap kam antap oltaem. Hemia i pruvum se hae rul blong Jeova nao i stret. (Ridim Ol Sam 91:1, 2. *) !Samting ya i mekem se Setan i kros tumas!

11. ?Wanem bigfala mak we ol enemi blong God oli stap traehad yet blong kasem?

 ¹¹ Long taem blong en, Setan i pulum ol man blong hem long wol blong oli mekem samting we hem i wantem, blong oli agensem ol tabu Kristin we oli stap yet long wol mo ol narafala sipsip. Samting ya i bin hapen long Wes Yurop taem Nasi gavman i rul, mo long Is Yurop taem Komunis gavman blong Soviet Yunion i rul. Long plante narafala kantri tu ol man oli agensem ol tabu Kristin mo ol narafala sipsip. Mo bambae ol man oli gohed blong agensem ol man ya blong God, speseli long taem ya we Gog blong Magog i mekem laswan traehad blong hem blong spolem olgeta. Long taem ya, maet griri fasin i pusum ol man blong agens blong oli tekem graon mo ol samting blong ol man blong Jeova, olsem ol enemi i mekem bifo. Be kam kasem tede, mak blong Setan i blong seraotem grup blong ol man blong God, blong mekem se ol man oli no moa tingbaot nem ya “Ol Witnes Blong Jeova.” ?Jeova i mekem wanem taem man i agensem hae rul blong hem olsem? Tingbaot toktok blong smol bubu blong Asaf.

Jeova i Win Bifo Finis Mo Bambae Hem i Win Bakegen

12-14. ?Smol bubu blong Asaf i tokbaot wanem tufala bigfala faet we i hapen klosap long taon blong Megido?

¹² Makem olsem wanem smol bubu blong Asaf i gat strong bilif se Jeova i naf blong blokem ol plan blong ol enemi. Long Sam 83, hem i tokbaot tu bigfala faet we ol man Isrel oli winim agensem ol enemi blong olgeta. Tufala faet ya, tufala i hapen klosap long taon blong Megido bifo, long wan bigfala level ples we nem blong hem tu Megido. Long hot taem, Kison Reva i kam drae mo ol man oli save luk rod blong reva ya we i tantanem hem long bigfala level ples ya blong Megido. Long kolkol taem, afta we bigfala ren i foldaon, reva i kam antap mo i kavremap bigfala level ples ya. Maet hemia nao from wanem Baebol i singaot reva ya se “springwota ya long Megido.”—Jaj. 4:13; 5:19.

¹³ Samwe 15 kilometa longwe long Megido, long bigfala level ples, i gat wan hil we nem blong hem More. Long taem blong Jaj Gideon, ol ami blong ol man Midian, ol man Amalek, mo ol man blong draeples long saed i go long is, oli joen tugeta blong faet long hil ya blong More. (Jaj. 7:1, 12) Fulnamba blong smol ami blong Gideon hem i 300 man nomo. Be wetem help blong Jeova, oli winim bigfala ami blong ol enemi blong olgeta. ?Oli mekem samting ya olsem wanem? Oli mekem wanem we Jeova i talem long olgeta. Long naet, oli raonem kamp blong ol enemi blong olgeta mo oli holem ol laet we oli kavremap wetem ol graonpot. Taem Gideon i mekem saen long ol man blong hem, oli smasem ol graonpot blong olgeta, mo wantaem nomo ol laet ya we oli bin haed oli saenaot. Long semfala taem ya, oli blu long ol pupu blong olgeta mo oli singsingaot bigwan se: “!Yumi faet long nem blong [Jeova] mo long nem blong Gideon!” Samting ya i mekem ol enemi oli konfius bigwan, mo oli stat blong kilkilim i ded olgeta bakegen. Ol enemi we oli laef oli ronwe oli krosem Jodan Reva. Be sam moa man Isrel oli joen blong ronem ol enemi ya we oli ronwe. Fulnamba blong ol soldia blong ol enemi we ol man Isrel oli kilim olgeta i ded, i kasem 120,000 man.—Jaj. 7:19-25; 8:10.

¹⁴ Long bigfala level ples blong Megido, samwe sikis kilometa afta long hil blong More, i gat wan hil we nem blong hem Taboro. Sam yia bifo, Jaj Barak i hivimap 10,000 ami blong ol man Isrel oli kam long hil ya blong faet agens long ol ami blong Jabin mo ol ami blong king blong Hajoro blong ol man Kenan, we jif blong ami blong hem i Siseraha. Ami ya blong ol man Kenan i gat 900 kat blong faet. Long wil blong ol kat ya, i gat ol naef we oli wokem long aean. Be ol ami blong ol man Isrel oli no gat plante tul blong faet, taswe taem oli kasem hil ya Taboro mo ol ami blong Siseraha oli luk samting ya, hemia i pulum olgeta blong kam long bigfala level ples blong Megido. Biaen, Jeova “i mekem Siseraha olgeta oli fraet we oli lusum hed.” Ating wan bigfala ren we i foldaon i mekem se Kison Reva i fulap tumas nao i kavremap bigfala level ples blong Megido mo ol kat blong faet blong olgeta oli fas long sofmad. Ol man Isrel oli kilim ful ami blong Siseraha i ded.—Jaj. 4:13-16; 5:19-21.

15. (a) ?Smol bubu blong Asaf i prea blong Jeova i mekem wanem? (b) ?Nem blong laswan bigfala faet blong God i mekem yumi tingbaot wanem?

¹⁵ Smol bubu blong Asaf i plis long Jeova blong mekem wan samting olsem bakegen long ol neson long taem blong hem, we oli stap mekem plan blong agensem ol man Isrel. Hem i prea se: “Plis yu mekem long olgeta olsem we yu bin mekem long ol man Midian bifo, olsem we yu bin mekem long tufala ya Siseraha mo Jabin, long Kison Reva. Yu yu winim tufala long taon ya Endoro, mo bodi blong tufala i roten long ples ya.” (Sam 83:9, 10) Wan impoten samting blong makem hemia se Baebol i kolem laswan bigfala faet blong God agens long wol blong Setan se Amagedon  (we i minim “Bigfala Hil long Megido”). Nem ya i mekem yumi tingbaot ol bigfala faet we oli bin hapen klosap long Megido. Jeova i win long ol faet ya bifo, mo from samting ya yumi save gat strong tingting se hem bambae i win long faet blong Amagedon tu.—Rev. 16:13-16.

Prea Long Jeova Blong Hem i Leftemap Hae Rul Blong Hem

16. ?Olsem wanem ol man blong agens oli “sem gud” tede?

¹⁶ Long taem ya blong “ol las dei,” Jeova i blokem finis olgeta traehad we ol man blong agens oli mekem blong traem finisim ol man blong Hem. (2 Tim. 3:1, NW) Mo from samting ya ol man ya blong agens oli sem bigwan. Ol Sam 83:16 (NW) i talemaot samting ya taem hem i talem long saed blong ol enemi blong Isrel bifo se: “O Jeova, yu mekem we fes blong olgeta i soemaot se oli sem gud. Nao ol man bambae oli traem faenem nem blong yu.” Long plante kantri, ol enemi oli traehad blong stopem wok blong ol Witnes blong Jeova, be oli no save win. Long ol kantri ya, gudfala fasin blong ol Witnes blong stanap strong mo holemstrong long wosip blong olgeta long trufala God, i givim wan witnes long olgeta we hat blong olgeta i stret, mo i pulum plante man blong oli ‘traem faenem nem blong Jeova.’ Long plante kantri we ol Witnes blong Jeova oli kasem strong fasin agens, naoia i gat plante taosen no plante handred taosen man we oli glad blong presem Jeova. !Yes Jeova nao i win! !Mo ol enemi blong Hem oli sem gud!—Ridim Jeremaea 1:19.

17. ?Klosap nao, wanem bambae i hapen long janis we ol man oli gat? ?Mo bambae yumi tingbaot wanem toktok?

¹⁷ Yumi save se ol enemi bambae oli gohed yet blong agensem yumi. Mo yumi stap gohed yet blong talemaot gud nius long olgeta man, yes long olgeta ya tu we oli agensem yumi. (Mat. 24:14, 21) Be klosap nao, janis ya we ol enemi blong yumi oli gat blong tanem tingting blong olgeta mo kasem laef, bambae i finis. Samting we i moa impoten i bitim laef blong ol man hemia se Jeova i leftemap tabu nem blong Hem. (Ridim Esikel 38:23. *) Taem olgeta neson oli joen tugeta blong traem spolem olgeta man blong God, bambae yumi tingbaot toktok ya we smol bubu blong Asaf i talem long prea blong hem se: “Plis yu winimgud olgeta, yu mekem we bambae oli fraet gogo i no save finis, yu mekem olgeta oli ded long wan fasin we bambae i mekem nem blong olgeta i nogud.”—Sam 83:17.

18, 19. (a) ?Wanem bambae i hapen long ol man we oli gat strong tingting blong agensem hae rul blong Jeova? (b) ?Taem yu save se laswan taem we Jeova i mas leftemap hae rul blong hem i klosap, samting ya i mekem wanem long yu?

¹⁸ Yes ol man ya we oli gat strong tingting blong agensem hae rul blong Jeova, bambae oli lus long fasin we i mekem olgeta oli sem gud. Tok blong God i talemaot se olgeta we oli “no save obei long gud nius” bambae oli lus long Amagedon mo bambae oli kasem panis we “i no save finis samtaem.” Yes bambae oli lus blong olwe. (2 Tes. 1:7-9) Taem olgeta ya oli lus mo ol man we oli wosipim Jeova long trutok oli sef, samting ya bambae i pruvum fulwan se Jeova nomo i trufala God. Long niufala wol, bambae yumi neva save fogetem bigfala faet ya we Jeova i win long hem. Olgeta we bambae oli “laef bakegen, ol man we oli stret, wetem ol man we oli no stret,” bambae oli harem stori long saed blong bigfala samting ya we Jeova i mekem. (Wok 24:15) Long niufala wol, bambae oli luk ol samting we i pruvum se i waes blong laef aninit long hae rul blong Jeova. Mo kwiktaem nomo, olgeta we tingting blong olgeta i stap daon bambae oli bilif se Jeova nomo i trufala God.

¹⁹ !Tru ya Papa blong yumi long heven i lavem yumi tumas! !Hem i rerem wan nambawan fiuja blong ol man we oli stap tru long hem! I sua se samting ya i pusum yu blong prea long Jeova blong hem i kwik blong givim laswan ansa long prea blong smol bubu blong Asaf, we i se: “Plis yu mekem [ol enemi blong yu] oli sem mo oli lus olgeta. Plis yu mekem olgeta oli save se yu, we nem blong yu Jeova, yu nomo yu Hae God long olgeta ples long wol.”—Sam 83:17, 18, NW.

[Ol futnot]

?Yu Yu Save Eksplenem?

• ?Ol man Isrel oli stap long wanem denja taem smol bubu blong Asaf i raetemdaon Sam 83?

• ?Wanem samting i impoten moa long tingting blong man we i raetem Sam 83?

• ?Long taem blong yumi, hu ya olgeta we Setan i stap kros bigwan long olgeta?

• ?Olsem wanem bambae Jeova i givim laswan ansa long prea we i stap long Sam 83:18?

[Kwestin]

[Map blong pija long pej 18]

(Lukluk niuspepa)

?Olsem wanem ol faet we oli hapen klosap long Megido bifo, oli joen wetem fiuja blong yumi?

Kison Reva

Haroset

Hil blong Kamel

Bigfala levelples blong Jisrehel

Megido

Tahanak

Hil blong Gilboa

Springwota blong Harod

Hil blong More

Endoro

Hil blong Taboro

Lugun blong Galili

Jodan Reva