‘Jeova i Lukluk Mo i Savegud Ol Man’

“[Jeova] i stap lukluk olgeta man long evri ples, mo i save evri samting we oli stap mekem.”—SAM 11:4.

1. ?Yumi laekem blong kam klosap long wanem kaen man?

?YU YU harem olsem wanem taem sam man oli soem trufala intres long yu? Oli glad nomo blong mekem evri samting we yu askem olgeta blong oli mekem. Oli givhan long yu taem yu nidim help. Wetem lav, oli givim advaes long yu taem yu nidim. (Sam 141:5; Gal. 6:1) ?Bambae yu yu glad blong frengud wetem ol man olsem? Ating yes. Jeova mo Jisas, tufala tu oli intres bigwan long yu. Be intres we tufala i gat long yu i bigwan moa i bitim intres we eni man long wol ya i save soem long yu. Tufala i no mekem olsem blong kasem wan samting long yu, be hemia from we tufala i wantem halpem yu blong yu “kasem laef ya we i prapa wan.”—1 Tim. 6:19; Rev. 3:19.

2. ?Jeova i intres long ol man blong hem go kasem wanem mak?

² Man blong raetem Sam i soemaot we Jeova i intres bigwan long yumi taem hem i talem se: “[Jeova] i stap lukluk olgeta man long evri ples, mo i save evri samting we oli stap mekem.” (Sam 11:4) Yes, Jeova i no jes stap lukluk yumi nomo, be hem i save evri samting long saed blong yumi tu. Deved i raetem tu se: “Yu yu save tingting blong mi. Yu bin kam long mi long naet, . . . yu faenem we mi mi no laekem fasin nogud nating.” (Sam 17:3) I klia we Deved i savegud se Jeova i intres bigwan long hem. Deved i save se sipos hem i no sakemaot ol nogud tingting mo sipos hem i laekem ol fasin nogud, bambae hem i mekem Jeova i harem nogud mo Jeova i no moa laekem hem. ?Yu yu gat tingting olsem Deved, se Jeova i tru i stap mo i save luk yu?

Jeova i Luk Hat Blong Man

3. ?Olsem wanem Jeova i soemaot stret tingting long ol slak fasin blong yumi?

³ Jeova i intres fastaem long hat blong man. Hem i wantem save se yumi wanem kaen man. (Sam 19:14; 26:2) From we hem i gat lav, hem i no lukluk nomo long ol smol mastik blong man. Tingbaot Sera, waef blong Ebraham. Hem i no tok tru long enjel ya we i tekem bodi olsem man mo i kamtru long hem mo Ebraham. Be enjel ya i luksave se Sera i fraet mo i seksek, taswe, hem i stretem Sera smol. (Jen. 18:12-15) Nating se olfala Job i talem se “hem i wan stret man” i bitim God, Jeova i no holemtaet ol blesing be hem i gohed, i blesem Job. Jeova i save we Job i kasem plante traem mo trabol we i kamaot long Setan. (Job 32:2; 42:12) Mo tu, Jeova i no kam kros from ol strong tok we wido blong Sarefat i talem long profet Elaeja. Jeova i kasem save se wido ya i harem nogud from we boe blong hem i ded. Wido ya i gat wan pikinini ya nomo.—1 King 17:8-24.

4, 5. ?Olsem wanem Jeova i soem kaen fasin long Abimelek?

⁴ From we Jeova i save wanem i stap long hat, hem i tingbaot ol man we oli no wosip long hem tu. Tingbaot Abimelek, king blong ol man Filistia blong taon ya Gerara. Abimelek i no luksave se Ebraham mo Sera tufala i hasban mo waef. Ale, hem i tekem Sera blong bambae hem i kam woman blong hem. Be, bifo we Abimelek i slip wetem Sera, Jeova i talem long hem long wan drim se: “Mi mi save we taem yu yu mekem olsem, tingting blong yu i no jajem yu. Taswe mi blokem yu blong yu no tajem bodi blong hem, blong mekem sin agens long mi. Be yu mas sanem woman ya i gobak long man blong hem naoia. Man blong hem i wan profet, mo hem bambae i save prea long yu blong yu no ded.”—Jen. 20:1-7.

⁵ Sipos Jeova i wantem, hem i save kilim i ded Abimelek wantaem nomo, antap moa from we Abimelek i no wosip long Hem. Be Jeova i luk we Abimelek i no mekem wan nogud samting long taem ya. Jeova i tingtinggud long bisnes ya, nao wetem kaen fasin hem i talem long king, wanem we king i mas mekem blong i save kasem fogif from sin  blong hem mo blong i “no ded.” ?Yu yu wantem wosip long wan God olsem?

6. ?Long wanem rod Jisas i folem fasin blong Papa blong hem?

⁶ Jisas i tekem gud fasin blong Papa blong hem. Jisas i tingbaot ol gudfala fasin blong ol disaepol blong hem mo i rere blong fogivim ol mastik blong olgeta. (Mak 10:35-45; 14:66-72; Luk 22:31, 32; Jon 15:15) Tingting blong Jisas i laenapgud wetem ol tok blong hem long Jon 3:17, se: “God i no sanem mi, mi Pikinini blong hem, mi kam long wol ya blong mi jajem ol man long wol. Hem i sanem mi blong mi wok blong hem blong mekem rod blong sevem olgeta.” Yes, Jeova mo Jisas oli lavem yumi tumas. Oli wantem tumas we yumi kasem laef. (Job 14:15) Bigfala lav ya nao i pulum Jeova blong i wantem save evri samting long saed blong yumi. Lav ya i mekem we hem i gat stret tingting long saed blong yumi, mo lav ya i pulum hem blong tekem aksen we i stret, folem wanem we hem i luk long yumi.—Ridim 1 Jon 4:8, 19.

Jeova i Lukluk Yumi Wetem Lav Blong Savegud Yumi

7. ?Jeova i stap wajem yumi wetem wanem tingting?

⁷ I nogud blong ting se Jeova i olsem wan polisman we i stap long heven mo i stap lukluk i kamdaon blong kasem yumi taem yumi mekem sin. Setan nao i wan man olsem we i wantem blong spolem yumi, mo hem i talem se yumi tingbaot yumi nomo. (Rev. 12:10) Nating se wan man i mekem gudfala samting, be Setan bambae i faenem poen yet long man ya se hem i gat nogud tingting. (Job 1:9-11; 2:4, 5) Man blong raetem Sam i tokbaot God, i se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Sam 130:3) Ating bambae yumi ansa se i no gat wan man i save stanap long fes blong hem. (Prij. 7:20) Defren olgeta, taem Jeova i wajem yumi, hem i gat sore mo hem i kea olsem wan papa we i wantem protektem ol pikinini blong hem long ol trabol. Hem i givim woning long yumi tu long saed blong ol mastik mo slak fasin blong yumi blong halpem yumi blong blokem ol trabol we oli save spolem yumi.—Sam 103:10-14; Mat. 26:41.

8. ?Olsem wanem Jeova i tijim mo stretem ol man blong hem?

⁸ God i soemaot se hem i lavem yumi taem hem i givim advaes blong lidim yumi mo i stretem yumi wetem Baebol mo ol kakae long saed blong spirit we oli kamaot long ‘slef we i stret mo waes’ blong givim advaes long yumi. (Mat. 24:45; Hib. 12:5, 6) Jeova i halpem yumi tu, tru long Kristin kongregesen mo “ol man we oli olsem presen.” (Efes. 4:8, NW) Mo tu, Jeova i wajem yumi blong luk sipos yumi stap folem wanem we hem i tijim yumi long hem, mo hem i lukaot rod blong givhan moa long yumi. Sam 32:8 i talem se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” !I impoten tumas we oltaem yumi lesin long Jeova! Yumi mas stap daon long fes blong hem mo luksave se hem i Tija mo Papa blong yumi we i gat lav.—Ridim Matiu 18:4.

9. ?Wanem ol nogud samting we yumi mas blokem, mo from wanem?

⁹ Yumi neva mas kam stronghed from we yumi flas, yumi sot long bilif, no from we yumi letem ‘sin i pulum’ yumi blong mekem olsem. (Hib. 3:13; Jem. 4:6) Plante taem, ol fasin ya oli stat mekem se man i wantem tumas ol nogud samting mo i gat ol nogud tingting tu. Samtaem, ol fasin ya oli save mekem se man i sakemaot stret ol advaes blong Baebol. Samting we i mowas yet hemia se man ya i save strong blong folem ol rabis fasin blong hem  mo long rod ya, hem i mekem hem wan i kam enemi blong God. !Hemia wan samting we i nogud tumas! (Prov. 1:22-31) Tingbaot eksampol blong Ken, fasbon pikinini blong Adam mo Iv.

Jeova i Tekem Aksen Folem Wanem We Hem i Luk Long Yumi

10. ?From wanem Jeova i no glad long sakrefaes blong Ken, mo Ken i mekem wanem fasin we i soemaot se hem i no jenisim tingting mo fasin blong hem?

¹⁰ Taem Ken mo Ebel tufala i givim sakrefaes i go long Jeova, Jeova i intres blong luk wanem presen we tufala i givim, be Hem i intres moa blong save wanem tingting i pusum tufala blong givim sakrefaes ya. Ale, God i soem se hem i agri long sakrefaes blong Ebel from we bilif i pusum Ebel blong mekem sakrefaes ya. Be God i no glad long sakrefaes blong Ken from we long sam fasin, Ken i soemaot se hem i sot long bilif. (Jen. 4:4, 5; Hib. 11:4) Bitim we Ken i jenisim tingting mo fasin blong hem long taem ya, hem i kros long brata blong hem.—Jen. 4:6.

11. ?Olsem wanem Ken i soemaot se hat blong hem i giaman bakegen long hem wan, mo yumi lanem wanem from stori ya?

¹¹ Jeova i luk we tingting blong Ken i stap kam nogud. Nao hem i tok stret long Ken, i talem long hem se sipos hem i mekem gudfala fasin bambae Jeova i glad long hem. Sore tumas, Ken i no lesin long tok blong Jeova mo i kilim brata blong hem i ded. Taem God i askem long Ken se: “?Wehem brata blong yu, Ebel?” Ken i soemaot se tingting blong hem i rabis from we hem i ansabak se: “Mi no save. ?Yu ting se i wok blong mi blong lukaot long brata blong mi?” (Jen. 4:7-9) !Hat i save trikim man mo i save pulum man blong agensem advaes we i kamaot stret long God! (Jer. 17:9) Stori ya i tijim yumi se taem yumi stat blong gat ol rong tingting mo yumi stat blong wantem tumas wan samting we i no stret, yumi mas sakemaot ol tingting ya kwiktaem. (Ridim Jemes 1:14, 15.) Sipos yumi kasem advaes blong Baebol, yumi mas gat tangkiu from, mo yumi mas luk advaes ya olsem wan rod we Jeova i yusum blong soemaot lav blong hem.

I No Gat Wan Sin We i Haed

12. ?Jeova i mekem wanem taem man i mekem fasin we i nogud?

¹² Samfala oli ting se sipos i no gat man i luk olgeta taem oli mekem rong, bambae oli no save kasem panis. (Sam 19:12) Be i no gat wan sin we i haed. “Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.” (Hib. 4:13) Jeova i wan Jaj we i lukluk ol tingting blong yumi we i haed mo i stretem wan nogud fasin long fasin we i stret. Hem i wan “God we i gat sore mo gladhat, hem i slo blong kam kros, mo hem i fulap long kaen fasin mo trutok.” Be taem wan man i no tanem tingting blong hem from sin blong hem, i “stap gohed blong mekem sin” mo i giaman, Jeova bambae ‘i no blokem panis nating.’ (Eks. 34:6, 7, NW; Hib. 10:26) Yumi luk samting ya long fasin we Jeova i soem long Akan wetem Ananaeas mo Safaera.

13. ?Olsem wanem rong tingting i pusum Akan blong mekem rabis fasin?

¹³ Akan i brekem tok blong God stret. Hem i girap i stilim sam samting long taon blong Jeriko mo i haedem olgeta long haos tapolen blong hem. Famle blong hem i letem hem i mekem olsem. Taem sin blong Akan i kam long klia ples, Akan i soemaot we hem i luksave se hem i sin taem hem i talem se: “Mi mi mekem i no stret long fes blong hem.” (Jos. 7:20, 21) Olsem Ken, Akan i letem nogud tingting i gru long hat blong hem. Stori blong Akan i soemaot we hem i wantem plante samting tumas mo fasin ya i pulum hem blong giaman. Ol samting ya we hem i stilim long Jeriko oli blong Jeova, taswe i olsem we Akan i stilim ol samting blong Jeova stret. Samting ya i mekem se hem mo famle blong hem oli ded.—Jos. 7:25.

14, 15. ?From wanem i stret we Ananaeas mo Safaera tufala i kasem panis, mo yumi lanem wanem long stori ya?

¹⁴ Ananaeas mo waef blong hem Safaera oli  memba blong Kristin kongregesen long Jerusalem. Afta long Pentekos 33 K.T., * ol Kristin oli givim presen mane blong givhan long ol disaepol blong narafala ples we oli stap long Jerusalem mo we oli kasem hadtaem. Ananaeas i salem graon mo i givim haf mane blong graon ya i go long ol aposol olsem presen mane. Waef blong hem, Safaera, i savegud bisnes ya. Ananaeas i mekem olsem se hem i givim olgeta mane blong graon ya. I sua se tufala i wantem we kongregesen i tinghae long tufala. Be tufala i giaman. Ale, tru long wan merikel, Jeova i soemaot nogud fasin ya blong tufala long aposol Pita. Taem aposol Pita i stap tok long Ananaeas se from wanem hem i mekem fasin ya, wantaem nomo Ananaeas i foldaon i ded. Smoltaem biaen, Safaera tu i ded.—Wok 5:1-11.

¹⁵ Ananaeas mo Safaera tufala i no foldaon long trap ya jes from we tufala i sinman. Fasin we tufala i mekem i blong giaman mo trikim ol aposol. Samting we i moa nogud hemia se tufala ‘i giaman long tabu spirit mo long God.’ Jeova i soemaot klia long stori ya se hem i rere blong protektem kongregesen long ol man we oli gat fasin tu fes. I tru tumas se, “God ya i laef, i stap we i stap. !Mo sipos yumi pas long han blong hem blong hem i jajem yumi, hemia i wan samting blong fraet we i nogud olgeta!”—Hib. 10:31.

Holemstrong Long God Oltaem

16. (a) ?Olsem wanem Setan i traem spolem ol man blong God? (b) ?Setan i yusum wanem rod blong spolem ol man long ples blong yu?

¹⁶ Setan i traem evri rod blong spolem yumi mo blong mekem se Jeova i no moa glad long yumi. (Rev. 12:12, 17) Yumi luk ol rabis tingting blong Setan oli klia long wol ya. Wol i fulap wetem rabis fasin long saed blong seks mo raf fasin. Ol man oli save wajem ol rabis pija blong seks isi nomo long ol kompiuta mo ol narafala samting olsem televisin mo DVD. Yumi mas lukaotgud blong Setan i no winim yumi long ol trik blong hem. Defren olgeta, yumi mas gat sem tingting olsem Deved we i raetem Sam ya se: “Mi wantem se bambae mi stap folem rod we i stret olgeta. . . . Long haos blong mi, bambae mi stap folem ol fasin we i klin gud long fes blong yu.”—Sam 101:2.

17. (a) ?From wanem Jeova i stap mekem ol sin we oli haed oli kam long klia ples? (b) ?Yumi mas gat strong tingting blong mekem wanem?

¹⁷ Tede, Jeova i no yusum wan merikel blong soemaot ol bigfala sin mo giaman fasin olsem we hem i bin mekem bifo. Nating se i olsem, Hem i luk evri samting mo long stret taem mo long stret rod, bambae hem i soemaot ol rabis fasin ya long klia ples. Pol i talem se: “Sam man, nating we God i no mekem kot yet blong jajem olgeta, be ol sin blong olgeta i stap long klia ples finis. Mo sam man, sin blong olgeta i stap haed fastaem, be biaen, i kamaot long klia ples.” (1 Tim. 5:24) Stamba fasin we i pusum Jeova blong mekem se sin we man i mekem i kam long klia ples, hemia lav blong hem. Hem i lavem kongregesen mo i wantem protektem hem blong i stap klin oltaem. Antap moa, hem i soem sore long olgeta we oli bin sin be naoia oli rili tanem tingting blong olgeta. (Prov. 28:13) From  samting ya, i gud we yumi traehad blong holemtaet wan hat we i fulwan long God mo yumi sakemaot olkaen tingting we i save pusum yumi blong mekem nogud fasin.

Holemtaet Wan Hat We i Fulwan Long God

18. ?King Deved i wantem se boe blong hem i gat wanem tingting long saed blong Jeova?

¹⁸ King Deved i talem long boe blong hem Solomon se: “Yu mas [“save God blong papa blong yu,” NW], mo yu mas wok blong hem [“wetem fulhat,” NW] blong yu, we tingting blong yu i glad. Hem i save olgeta tingting blong yumi, mo olgeta samting we yumi wantem.” (1 Kron. 28:9) Deved i wantem we boe blong hem i no jes bilif nomo long God be i mas mekem moa. Hem i wantem se Solomon i luksave se Jeova i intres bigwan long ol man blong hem. ?Yu yu tangkiu long Jeova from we hem i intres bigwan long ol man blong hem?

19, 20. ?Folem Sam 19:7-11, wanem i halpem Deved blong stap klosap long God, mo olsem wanem yumi save folem eksampol blong hem?

¹⁹ Jeova i savegud se ol man we oli gat gudfala tingting bambae oli kam fren blong hem, mo se taem oli save ol naesfala fasin blong Hem, save ya bambae i mekem oli kam klosap moa long hem. Taswe, Jeova i wantem we yumi savegud hem mo ol gudfala fasin blong Hem. ?Olsem wanem yumi save mekem olsem? Hemia taem yumi stadi long Tok blong hem mo yumi luk ol blesing blong hem we yumi kasem long laef blong yumi.—Prov. 10:22; Jon 14:9.

²⁰ ?Yu yu stap ridim Tok blong God evri dei wetem tingting ya se ol tok ya oli kamaot long God? ?Yu stap prea long Hem blong kasem help, blong yu save mekem ol tok ya oli wok long laef blong yu? ?Yu yu luksave se i impoten blong laef folem ol rul blong Baebol? (Ridim Ol Sam 19:7-11.) Sipos yes, bilif blong yu long Jeova mo lav we yu gat long hem bambae i gohed blong gru. Mo Jeova bambae i kam klosap long yu. (Aes. 42:6; Jem. 4:8) Yes, Jeova bambae i soemaot lav long yu, bambae hem i blesem yu mo i halpem yu blong yu stap klosap long hem oltaem, taem yu stap folem rod ya we i smol nomo we i blong go kasem laef. —Sam 91:1, 2; Mat. 7:13, 14.

[Futnot]

?Bambae Yu Yu Ansa Olsem Wanem?

• ?From wanem Jeova i stap lukluk yumi?

• ?Wanem i pulum sam man blong oli kam enemi blong God?

• ?Olsem wanem yumi save soemaot se Jeova i wan trufala man long tingting blong yumi?

• ?Olsem wanem yumi save holemtaet wan hat we i fulwan long God?

[Kwestin]

[Tok blong pija long pej 9]

?Olsem wanem Jeova i wajem yumi olsem wan papa we i kea long ol pikinini blong hem?

[Tok blong pija long pej 10]

?Yumi lanem wanem lesen long stori blong Ananaeas?

[Tok blong pija long pej 11]

?Wanem bambae i halpem yumi blong gohed blong mekem wok blong Jeova wetem fulhat?