?Papa Blong Yumi Long Heven i Olsem Wanem Stret?

PLANTE man oli save talem baehat Lodsprea, no Prea blong Masta, hemia prea ya we Jisas i tijim long ol disaepol blong hem. (Matiu 6:9-13) Evri taem we oli talem prea ya, oli singaot God se: “Papa blong mifala.” ?Be hamas long olgeta oli save talem se oli savegud hem?

?Olsem wanem long yu? ?Yu yu savegud God? ?Yu yu frengud wetem hem mo yu toktok long hem? ?Yu yu talemaot ol glad blong yu mo ol trabol blong yu long hem? ?I minim wanem blong save God?

“Nem Blong Hem, Jeova”

Save we wan bebi i gat long saed blong papa blong hem, hemia se hem i “Papa” nomo. Be taem bebi ya i stap gruap, hem i lanem prapa nem blong papa blong hem mo ol fasin blong hem, mo ating save ya i mekem se hem i tinghae long papa blong hem. ?Be olsem wanem long Papa blong yumi long heven we i Givim laef long yumi? ?Yu yu save prapa nem blong hem mo mining blong nem ya?

Plante man oli ripitim toktok ya, “Nem blong yu i tabu,” taem oli talem Lodsprea. Be oli no save ansa long kwestin ya: “?Wanem nem ya?” Ol sta long heven, ol bigbigfala hil, ol kalakala rif we i gat plante laef samting long olgeta—olgeta samting ya oli pruvum se God i stap, be oli no talemaot nem blong Hem. Blong kasem save long nem ya, yumi mas lukluk i go long Baebol. Baebol i talem klia se: “Nem blong hem, Jeova.”—Eksodas 15:3, NW.

God i wantem se yumi save hem long nem blong hem, Jeova. ?From wanem? From we nem ya i soemaot se hem i olsem wanem. Nem ya i minim “Hem i Mekem i Kamaot.” Blong talem stret, hem i mekem eni wok we hem i mas mekem, blong stamba tingting blong hem i kamtru. Tingbaot samting ya: Blong wan papa i lukaotgud long famle blong hem, hem i mas jenis i kam man we i wok blong fidim famle, man blong givim advaes, jaj, man we i toktok long bihaf blong famle, man blong protektem olgeta, mo tija. Papa ya i save mekem eniwan long ol wok ya, folem nid blong famle blong hem mo taem we oli pastru long hem. Long sem fasin, nem ya Jeova i mekem yumi sua se God i nafgud blong mekem samting we hem i wantem i kamtru, mo blong blesem olgeta man we oli mekem wok blong hem, nomata wanem samting we i save hapen.

I gud yumi tokbaot ol defren wok we God ya blong yumi we i gat lav i mekem, we oli laenap wetem mining blong nem blong hem. Hemia bambae i givhan long yu blong luksave se Jeova i wanem kaen God, mo blong yu lanem se yu mas mekem wanem blong yu kam klosap long hem.

‘God Blong Lav Mo Blong Pis’

Aposol Pol i singaot God we i Wokem yumi se: “God ya we i lavem ol man tumas, mo i stap givim pis oltaem.” (2 Korin 13:11) ?From wanem? Sam yia bifo we Pol i talem tok ya, Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) God i lavem tumas ol man, taswe hem i givim Pikinini ya blong hem we hem i laekem tumas, blong i ded olsem wan ransom. Nao ol man we oli bilif long Jisas, oli save haremgud long laef ya we i no save finis, mo oli no moa save harem nogud from ol trabol we i kamaot from sin. From samting ya, Pol i talem bakegen se: “Ol man we oli stap mekem sin, pei  blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) Samting ya i mas pusum yumi blong yumi lavem God mo blong kam klosap long hem.

God i soem lav blong hem long olgeta man, be hem i soem tu long ol wanwan man we oli stap tru long hem. Ol man Isrel bifo oli no obei long God, ale Moses i tokbaot olgeta, i se: “Bambae oli ting se oli stap mekem gudfala fasin, be nogat. !Bambae oli krangke! !Bambae oli no gat tingting! Hae God i papa blong olgeta, mo hem nomo i mekem olgeta. Hem nao bambae i mekem olgeta oli kam plante, we olgeta oli gat kantri blong olgeta.” (Dutronome 32:6) ?Yu yu kasem save se tok ya i minim wanem? Jeova i save se ol man blong hem oli no stretgud olgeta. Be hem i wan Papa we i gat lav, ale Hem i keagud long olgeta. Mo hem i givim evri samting we oli nidim, ol samting long saed blong bodi mo filing, mo ol samting we oli nidim blong mekem fasin frengud blong olgeta wetem Hem i kam strong moa.

Yumi evriwan i fesem ol gudfala samting mo ol trabol long laef blong yumi, mo samtaem yumi wari, mo tingting blong yumi i foldaon. Yumi nidim we wan man i givhan long yumi blong gat stret tingting long saed blong samting we i hapen long laef blong yumi, mo ol problem we yumi fesem. ?Hu i save givhan long yumi? Insaed long Baebol, Jeova i pruvum se hem i wan Man blong givim Advaes mo Kea long yumi. Tabu Buk ya i eksplenem from wanem yumi stap fesem tumas trabol mo olsem wanem yumi save winim ol trabol ya. Wan papa we i lavem boe blong hem, i givhan long hem taem hem i foldaon mo i kasem kil. Long sem fasin, Jeova tu i lavem yumi tumas, mo hem i soemaot lav ya taem hem i givim help we yumi nidim. I tru tumas, Jeova i naf blong givhan long olgeta we oli bilif long hem, mo hem i glad blong mekem olsem.—Aesea 59:1.

Mo tu, taem God i “ansa long ol prea,” hemia i soem lav blong hem. (Ol Sam 65:2) ?Olsem wanem samting ya i soem lav blong hem? Aposol Pol i eksplenem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:6, 7) Taem yu prea long God wetem fulhat blong yu, mo yu folem advaes we hem i givim long Tok blong hem, yu tu yu save kasem “pis we hem i givim, we i bigfala moa, i bitim save blong yumi.”

“God We i Save Olgeta Samting”

Baebol i tokbaot Jeova God se, “save blong hem i stret gud olgeta.” Hem i “God we i save olgeta samting,” taswe hem i save fasin mo ol nid blong ol man moa, i bitim ol narafala. (Job 36:4, NW, 1 Samuel 2:3) Tru long Moses, Jeova i talem se “kakae nomo i no save mekem man i laef. Evri tok we [Jeova] i talem, hemia nao i save mekem man i laef.” (Dutronome 8:3; Matiu 4:4) Hemia i min se sipos yumi wantem kasem trufala glad long laef blong yumi, yumi no nidim ol samting long saed blong bodi nomo.

God ya we i Wokem yumi i givim ol nambawan advaes long Tok blong Hem, Baebol, blong lidim yumi. Taem yumi stadi Baebol mo yumi folem advaes blong hem long laef blong yumi, “evri tok we [Jeova] i talem” i givhan long yumi. Tingbaot wan Kristin woman we nem blong hem, Zuzanna. Hem i tokbaot famle laef blong hem, i se: “Taem mi mo hasban blong mi, mitufala i ridim Baebol tugeta, go long ol Kristin miting tugeta, mo mitufala i joen tugeta blong talemaot long ol narafala ol samting we mitufala i lanem, mared blong mitufala i kam strong moa.  From we God i lidim mitufala, ale mitufala i gat ol semfala mak long laef blong mitufala, mo mitufala i glad from we mitufala i frengud moa.”

?Olsem wanem ol advaes we God i givim blong lidim yu, oli save givhan long yu? Taem yu stadi Baebol oltaem mo yu folem ol advaes blong hem long laef blong yu, yu save kasem plante blesing we i kamaot long Jeova.—Hibrus 12:9.

‘God We i Sevem Yumi’

I gat plante trabol long wol tede. Ol man oli no save se wanem bambae i hapen long fiuja. Sipos yu yu laef long wan kantri we i gat faet long hem, ating yu wantem tumas se i gat pis. Long plante narafala haf blong wol, ol man oli fraet tumas long fasin blong brekem loa mo raf fasin, ol trabol long saed blong mane mo ol rabis wok blong ol teroris. ?Hu bambae i sevem yumi long olgeta trabol ya? Naoia, olgeta man oli nidim blong wan i protektem mo i sevem olgeta, i bitim olgeta taem bifo.

Baebol i talem se: “Nem blong Jeova i olsem wan strong haos. Ol stret man oli resis blong go haed long hem, nao hem i lukaot long olgeta.” (Ol Proveb 18:10, NW) Taem yumi save nem blong God mo yumi tinghevi long nem ya, bambae yumi tingbaot ol samting we hem i mekem finis mo ol samting we bambae hem i mekem blong sevem olgeta we oli soem se oli bilif long hem. Jeova God i pruvum fulwan se hem i naf blong sevem ol man blong hem. Tingbaot, hem i sevem ol man Isrel taem hem i draonem ol kat blong faet blong Fero mo ol ami blong hem. Jeova i pruvum se hem i God we i tru oltaem, hem i God we i tingbaot ol man we oli kasem trabol mo i wantem sevem olgeta.—Eksodas 15:1-4.

Blong yumi kasem laef we i no save finis, yumi mas bilif tu se Jeova i God we i save Sevem yumi. King Deved blong Isrel bifo i fesem plante hadtaem, mo hem i soem se hem i bilif we Jeova i God we i save Sevem hem, ale hem i raetem se: “Yu nomo yu God blong mi we yu stap sevem mi.” (Ol Sam 25:5) Aposol Pita i talem wetem strong bilif se: “[Jeova] i save sevem ol man we oli bilif long hem, i save tekemaot olgeta long ol samting we i stap traem olgeta.”—2 Pita 2:9.

Long saed blong man we i lukluk i go long Jeova blong kasem help, Jeova i promes se: “From we hem i savegud nem blong mi, mi bambae mi lukaot gud long hem.” (Ol Sam 91:14, NW) Ol man blong God tede oli pruvum se promes ya blong God i tru. Henryk i stap long Polan, mo 70 yia nao hem i stap mekem wok blong God, nating se hem i kasem hadtaem mo fasin agens. Taem Henryk i gat 16 yia, ol soldia oli putum papa blong hem long rabis kalabus long Auschwitz. Mo oli putum Henryk mo brata blong hem long wan kamp blong ol yangfala, we gavman i trenem olgeta blong oli folem tingting blong hem. Biaen, Henryk i go long plante defren kalabus. Hem i tingbaot ol samting we oli hapen long taem ya, mo i talem se: “Long olgeta hadtaem we mi mi kasem, neva Jeova i lego mi. Hem i givhan long mi oltaem blong mi stanap strong, nating se plante taem klosap nomo mi ded.” Yes, Jeova i mekem bilif blong ol man blong hem i strong,  mo hem i givim paoa long olgeta blong oli naf blong stanap strong.

Klosap nao God bambae i sevem olgeta man we oli soem se oli bilif long hem mo oli trastem se hem bambae i mekem olgeta oli fri. Hem i talem se: ‘Mi mi [Jeova], mi nomo mi save sevem yufala.’ (Aesea 43:11) Long “faet long bigfala Dei blong God ya we i gat olgeta paoa,” God bambae i tekemaot ol man nogud long wol ya mo i sevem ol stret man. (Revelesen 16:14, 16; Ol Proveb 2:21, 22) Jeova i mekem yumi sua se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11.

Kam Ol “Pikinini Blong [God]”

Long taem blong Profet Malakae, ol man Isrel oli stap talem se Jeova i papa blong olgeta. Be taem oli wantem mekem sakrefaes blong ona long hem mo mekem wosip i go long hem, oli givim ol kakae we i nogud mo ol anamol we oli blaen, no we wan haf blong bodi blong olgeta i nogud. From samting ya, Jeova i askem long olgeta se: “Mi mi papa blong yufala. ?Be from wanem yufala i no save ona long mi?”—Malakae 1:6.

Ol man Isrel ya oli no stap tru long God, taswe yu no mas mekem semfala mastik olsem olgeta. Defren olgeta, mifala i leftemap tingting blong yu blong yu lanem moa long saed blong Jeova God mo yu kam klosap long hem. Disaepol Jemes i givim advaes long yumi se: “Yufala i mas stap klosap long God, nao hem bambae i kam stap klosap long yufala.”—Jemes 4:8.

Taem yumi letem Jeova i kam Papa blong yumi, yumi gat sam wok blong mekem. Sipos yu traehad blong folem ol rul blong hem long evri haf blong laef blong yu, hemia i soemaot se yu stap traehad blong ona long hem, mo hem bambae i neva fogetem ol traehad blong yu. Hem bambae i givhan long yu blong wokbaot long stret rod ya we i go long niufala wol ya we God i promes blong mekem. Long niufala wol ya, “bambae i no moa gat man i ded . . . bambae i no moa gat man i krae, mo bambae man i no moa harem nogud long bodi blong hem.” (Revelesen 21:4) Long taem ya, olgeta man we oli obei long God, “God bambae i mekem . . . oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.”—Rom 8:21.

[Tok blong makem poen long pej 5]

God i wantem se yumi save hem long nem blong hem, Jeova, we i minim se “Hem i Mekem i Kamaot”

[Tok blong makem poen long pej 6]

“Long olgeta hadtaem we mi mi kasem, neva Jeova i lego mi.”—HENRYK

[Tok blong makem poen long pej 7]

“Taem mi mo hasban blong mi, mitufala i ridim Baebol tugeta, go long ol Kristin miting tugeta, mo mitufala i joen tugeta blong talemaot long ol narafala ol samting we mitufala i lanem, mared blong mitufala i kam strong moa.”—ZUZANNA