?Yu Yu Rere Blong Givim Wanem Blong Kasem Laef?
?Yu Yu Rere Blong Givim Wanem Blong Kasem Laef?
“?Wan man bambae i rere blong givim wanem jenis blong laef blong hem?”—MAT. 16:26, NW.
1. ?From wanem Jisas i no agri nating long toktok we Pita i talem long hem?
APOSOL PITA i sek long samting we hem i harem. Hem i laekem tumas Lida blong hem, Jisas Kraes, be naoia Jisas i stap ‘talemaot klia’ long hem mo ol narafala aposol, se i no longtaem bambae ol man oli mekem i nogud long hem mo bambae hem i mas ded. Pita i wantem mekem i gud long Jisas ale hem i toktok strong blong blokem Jisas, i se: “Masta, God i mas blokem samting ya. Samting ya i no save kamtru long yu olsem.” Jisas i tanem baksaed long Pita, i lukluk ol narafala disaepol. Ating olgeta tu oli tingting olsem Pita, be tingting blong olgeta evriwan i no stret. Ale Jisas i talem long Pita se: “Setan. Yu gowe long mi. Yu yu stap traem blong blokem mi nomo. Tingting blong yu i no tingting blong God, i tingting blong man nomo.”—Mak 8:32, 33; Mat. 16:21-23.
2. ?Jisas i talem se man we i biaenem hem i mas rere blong mekem wanem?
2 Ating ol toktok we Jisas i talem biaen, oli halpem Pita blong luk risen from wanem hem i talem ol strong tok olsem blong stretem hem. Jisas i “singaot ol man oli kam long hem, wetem ol disaepol blong hem tu,” mo i talem se: “Man we i wantem biaen long mi, hem i mas lego ol samting we hem nomo i wantem mo i mas karem pos blong hem, nao i mas folem mi oltaem. Man we i wantem sevem laef blong hem, bambae i lusum laef ya. Be man we i lusum laef blong hem from mi mo from gud nius ya, bambae hem i sevem laef blong hem.” (Mak 8:34, 35, NW) Jisas i save se i no longtaem bambae hem i mas ded blong givim laef blong hem olsem wan sakrefaes. Ale hem i wantem soemaot long ol man blong hem se olgeta we oli biaenem hem, olgeta tu oli mas rere blong givim laef blong olgeta blong mekem wok blong God. Sipos oli mekem olsem, bambae oli kasem plante nambawan blesing.—Ridim Matiu 16:27.
3. (a) ?Wanem tufala kwestin we Jisas i askem long ol man we oli stap lesin long hem? (b) ?Taem ol man ya long taem blong Jisas oli harem namba tu kwestin blong hem, maet oli tingbaot wanem?
3 Long semfala taem ya, Jisas i askem tu kwestin we oli pulum ol man blong hem blong oli tingting. Hem i askem se: “?Wanem gudfala samting we wan man bambae i winim sipos hem i kasem olgeta samting blong wol be i lusum laef blong hem?” Mo nara kwestin se: “?Tru ya, wanem samting nao we wan man bambae i rere blong givim olsem jenis blong laef blong hem?” (Mak 8:36, 37, NW) Ansa blong faswan kwestin i klia nomo blong eniman i faenem. Wan man i no winim wan gudfala samting nating sipos hem i hivimap plante samting blong hem long wol, be biaen hem i ded. Yes, olting we man i gat, oli mekem i gud long hem nomo taem hem i laef i stap blong harem gud long olgeta. Namba tu kwestin blong Jisas se: “?Tru ya, wanem samting nao we wan man bambae i rere blong givim olsem jenis blong laef blong hem?” Ating kwestin ya i pulum ol man we oli stap lesin long Jisas blong tingbaot toktok ya we Setan i sakem agensem God long taem blong Job. Setan i bin talem tok ya se wan man “i save lego olgeta samting we hem i gat blong i sevem laef blong hem.” (Job 2:4) Ol tok ya blong Setan maet oli tru long ol man we oli no wosipim Jeova. Plante long olgeta ya, sipos oli luk se bambae oli mas ded from we oli folem ol stret rul, be kwiktaem nomo bambae oli lego ol stret rul ya jes blong sevem laef blong olgeta. Be ol trufala Kristin oli no gat tingting olsem.
4. ?From wanem ol kwestin ya we Jisas i askem oli stret moa long ol Kristin?
4 Yumi save se Jisas i no kam long wol ya blong givim strong bodi, mane, mo longfala laef long yumi. Hem i kam blong openem rod long yumi blong yumi save laef olwe long niufala wol, mo yumi tinghae tumas long janis ya we yumi gat blong kasem wan laef olsem. (Jon 3:16) Long tingting blong wan Kristin we i ridim faswan kwestin blong Jisas, ating i olsem we Jisas i stap askem se, “?Wanem gudfala samting we wan man bambae i winim sipos hem i kasem olgeta samting blong wol be i lusum janis blong laef olwe?” Ansa i klia nomo se hem i no winim wan gudfala samting nating. (1 Jon 2:15-17) Blong yumi save ansa blong namba tu kwestin blong Jisas, ating i gud yumi askem se, ‘?Mi mi rere blong lego wanem samting naoia blong mi no lusum janis blong mi blong laef long niufala wol?’ Fasin blong laef blong yumi nao, bambae i soemaot ansa blong kwestin ya, mo bambae i soemaot tu se yumi putum tingting blong yumi i stap strong olsem wanem long niufala wol.—Skelem wetem Jon 12:25.
5. ?Olsem wanem yumi save kasem presen ya laef we i no save finis?
5 Jisas i no talem se laef we i no save finis hemia wan samting we man i save pem. Nogat. Laef, nating se hemia sotfala laef blong yumi long wol blong naoia, be hem i wan presen we God i givim long gladhat blong hem. Yumi no save pem laef ya wetem mane, mo nomata hamas samting we yumi mekem be olgeta samting ya bambae oli neva inaf blong mekem we yumi stret blong kasem laef ya. Wan rod nomo blong kasem laef we i no save finis, hemia blong “bilif long Jisas Kraes” mo long Jeova we hem i “stap mekem i gud long olgeta we oli stap traem faenem hem.” (Gal. 2:16; Hib. 11:6) Nating se i olsem, i gat sam samting yet we yumi mas mekem from we bilif i wan samting we man i soemaot long ol wok blong hem. Tru ya, “man we i bilif be i no mekem gudfala wok, bilif blong hem tu i ded.” (Jem. 2:26) Taswe, taem yumi tingting dip long kwestin ya we Jisas i bin stanemap, yumi mas tingbaot gud se, ‘?Wanem samting we mi mi rere blong lego long wol ya, mo mi mi rere blong mekem wanem long wok blong Jeova blong soemaot se mi gat wan bilif we i laef?’
“Kraes i No Folem Ol Fasin We Hem Nomo i Wantem”
6. ?Wanem samting we Jisas i ting se i impoten moa?
6 Jisas i no intres long ol gudfala samting blong laef we ol man long taem blong hem oli save kasem. Hem i putum tingting blong hem i stap strong long ol samting we oli rili impoten, mo hem i sakemaot ol tingting we oli save pulum hem blong wantem gat plante samting blong mekem laef blong hem i isi. Hem i lego fulap samting we hem nomo i wantem, mo i obei fulwan long God. Hem i no mekem i gud long hem wan, be hem i se: “Oltaem, mi stap mekem ol samting we [God] i wantem.” (Jon 8:29) ?Jisas i mekem ol samting we God i wantem gogo kasem wanem mak?
7, 8. (a) ?Wanem samting we Jisas i rere blong lego, mo hem i kasem wanem blesing from? (b) ?Yumi wanwan i mas tingbaot wanem?
7 Jisas i talem long ol disaepol blong hem se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.” (Mat. 20:28) Long taem ya we Jisas i talem long ol man blong hem se i no longtaem bambae hem i mas ‘givim laef blong hem,’ Pita i talem long Jisas se hem i no mas letem samting ya i kasem hem. Be Jisas i no wantem jenisim tingting blong hem. Hem i rere nomo blong lego laef blong hem we i stretgud olgeta, blong sevem ol man. From we Jisas i no tingbaot hem wan, hem i gat wan gudfala fiuja. God i mekem hem i laef bakegen long ded mo i “leftemap hem i go antap, blong i stap long raet saed blong hem.” (Wok 2:32, 33) From samting ya, Jisas i kam wan gudfala eksampol blong yumi folem.
8 Aposol Pol i givim advaes long ol Kristin long Rom se “i no stret blong yumi folem ol fasin we yumi nomo i wantem.” Nao hem i mekem olgeta oli tingbaot se, “Kraes i no folem ol fasin we hem nomo i wantem.” (Rom 15:1-3) ?Olsem wanem? ?Bambae yumi folem advaes ya blong Pol? ?Yumi rere blong lego wanem samting blong folem fasin blong Jisas?
Jeova i Wantem We Yumi Givim Bes Blong Yumi
9. ?Wanem desisen we wan Kristin i mekem taem hem i givim laef blong hem long God?
9 Long Isrel bifo, Loa blong Moses i talem se taem wan man no woman Hibru i wok slef sikis yia blong masta blong hem, ale masta ya i mas letem hem i gofri long namba seven yia, hemia yia we oli kolem Jubili. Be sipos wan slef i laekem tumas masta blong hem, hem i save jusum blong i stap slef long haos blong masta blong hem oltaem long laef blong hem. (Ridim Dutronome 15:12, 16, 17.) Yumi mekem wan desisen we i sem mak long slef ya taem yumi givim laef blong yumi i go long God. Yumi wan yumi jusum blong mekem wok blong God, mo yumi no moa folem wanem we yumi nomo i wantem. Taem yumi mekem olsem, yumi soem se yumi gat bigfala lav long Jeova mo yumi wantem tumas blong mekem wok blong hem gogo i no save finis.
10. ?Wanem i mekem se yumi blong God, mo sipos i olsem, ol tingting mo aksen blong yumi oli mas olsem wanem?
10 Sipos yu yu stap stadi Baebol wetem ol Witnes blong Jeova, mo yu stap joen long wok blong talemaot gud nius, mo yu stap kam long olgeta miting blong kongregesen, mifala i wantem talem long yu se yu stap mekem wan gudfala samting. Mifala i wantem tumas se i no longtaem bambae yu givim laef blong yu i go long Jeova, mo askem sem kwestin ya we man Itiopia i bin askem long Filip se: “?Wanem nao i blokem mi, blong mi no save baptaes?” (Wok 8:35, 36) Sipos yu mekem samting ya, fasin joen blong yu wetem God bambae i olsem hemia we Pol i talem long ol Kristin long Korin, se: “Naoia, [bodi blong yufala] i blong God. . . . Hem i pemaot yufala finis long bigfala praes.” (1 Kor. 6:19, 20) Nating se bambae yumi go laef long heven no bambae yumi laef long wol ya, be sipos yumi givim laef blong yumi long Jeova, ale, yumi blong Hem. Taswe i impoten tumas blong sakemaot fasin blong tingbaot yumi wan nomo mo “yumi no mas kam olsem slef blong man.” (1 Kor. 7:23) Yumi tinghae tumas long janis ya blong stap olsem slef blong Jeova mo yumi wantem holemgud wok ya, blong bambae Jeova i yusum yumi olsem we hem i wantem.
11. ?Wanem sakrefaes we ol Kristin oli mas givim? ?Olsem wanem ol sakrefaes we Loa blong Moses i talem blong ol man Isrel oli givim i soemaot kaen sakrefaes ya we wan Kristin i mas givim?
11 Pol i talem long ol Kristin brata sista blong hem se: “Yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong yufala i mekem long hem.” (Rom 12:1) Taem ol Kristin we oli man Isrel, oli harem ol tok ya blong Pol, ating oli tingbaot ol sakrefaes we oli bin mekem blong wosipim God, bifo we oli kam ol man blong Kraes. Oli save se folem Loa blong Moses, man we i karem wan anamol blong givim olsem sakrefaes long olta blong Jeova, hem i mas givim anamol we i beswan. Jeova i no save agri long sakrefaes blong anamol we bodi blong hem i nogud. (Mal. 1:8, 13) Hemia i sem mak taem yumi givim laef blong yumi ‘olsem wan sakrefaes we i laef.’ Yumi givim bes blong yumi long Jeova. Yumi no yusum laef blong yumi blong mekem samting we yumi nomo i wantem, ale yumi yusum smol taem we i stap blong mekem wok blong Jeova. Nogat. Taem yumi givim laef blong yumi i go long God, yumi no holembak wan samting long “laef” blong yumi. I minim se paoa, olting mo mane, mo save we yumi gat, be yumi givim i blong Jeova. (Kol. 3:23) ?Yumi mekem samting ya olsem wanem?
Yusum Taem Blong Yu Long Waes Fasin
12, 13. ?Wanem wan rod blong soem se yumi wantem givim bes blong yumi long Jeova?
12 Sipos yumi wantem givim bes blong yumi long Jeova, ale bambae yumi yusum taem blong yumi long waes fasin. (Ridim Efesas 5:15, 16.) Blong mekem olsem, yumi nidim fasin we yumi bos long tingting blong yumi. Wol ya wetem sin we i stap long yumi oli stap pulum yumi oltaem, blong yumi wantem yusum taem blong yumi blong harem gud mo blong kasem samting we yumi wantem. I tru, i gat ‘wan taem we i stret blong evri samting,’ olsem nao, i gat taem blong spel mo i gat taem blong wok, blong yumi save pem ol samting we yumi nidim long laef, hemia nao samting we olgeta Kristin oli mas mekem. (Pri. 3:1, NW) Be wan Kristin we i givim laef blong hem long God i mas skelemgud taem we hem i stap spenem long evri samting, blong meksua se hem i no westem taem ya long samting we i no waes.
13 Taem Pol i wokbaot long Atens, hem i luk we “oltaem ol man Atens, mo ol strenja tu long ples ya oli wantem sidaon blong harem ol niufala tok, mo blong storian gud long ol samting olsem.” (Wok 17:21) Tede tu plante man oli westem taem blong olgeta olsem ol man Atens. I gat plante samting we oli westem taem blong ol man, olsem televisin, vidio gem, mo Intenet. Ol samting ya oli plante we oli plante moa oltaem, mo oli save stilim plante tumas taem blong yumi. Sipos yumi letem oli winim yumi, maet bambae yumi no moa tekem ol save long saed blong Jeova. Maet yumi save tingting tu se yumi bisi tumas, yumi no gat taem blong lukluk long “ol samting we oli impoten moa,” hemia ol wok blong Jeova.—Fil. 1:9, 10, NW.
14. ?Wanem ol kwestin we yumi mas tingbaot?
14 Taswe, yu we yu givim laef blong yu finis long Jeova, i gud yu tingbaot kwestin ya: ‘?Long ol samting we mi mi plan blong mekem evri dei, mi stap tekem taem blong ridim Baebol, tingting dip, mo prea?’ (Sam 77:12; 119:97; 1 Tes. 5:17) ‘?Mi mi putum wan stret taem blong rerem ol miting? ?Mi mi givim ansa long miting blong leftemap tingting blong ol narafala?’ (Sam 122:1; Hib. 2:12) Baebol i talem se Pol mo Banabas tufala i “stap longtaem lelebet long ples ya, mo tufala i no fraet, tufala i gohed blong talemaot nius blong [Jeova].” (Wok 14:3) ?Yu yu save jenisim sam samting long laef blong yu blong mekem we yu spenem moa taem, we maet yu “stap longtaem lelebet” moa long wok blong prij, no maet yu mekem wok blong paenia?—Ridim Hibrus 13:15.
15. ?Olsem wanem ol elda oli yusum taem blong olgeta long waes fasin?
15 Taem aposol Pol mo Banabas, tufala i kamtru long Kristin kongregesen blong Antiok, oli “stap longtaem lelebet long ples ya, wetem ol man blong Jisas” blong leftemap tingting blong olgeta. (Wok 14:28) Tede tu, ol elda we oli gat lav oli spenem plante taem blong olgeta blong mekem narafala i kam strong. Ol elda oli joen long wok blong prij, mo tu, oli wokhad blong lukaot long ol sipsip blong God, oli traem faenem ol sipsip we oli lus, oli givhan long olgeta we oli sik, mo oli mekem plante narafala wok insaed long kongregesen. ?Sipos yu yu wan brata we yu baptaes finis, mo sipos i no gat samting long laef blong yu we i blokem yu, yu save traehad blong kam inaf blong mekem ol wok ya?
16. ?Long wanem rod yumi save ‘mekem i gud long olgeta ya we oli brata mo sista blong yumi’?
16 Plante brata mo sista oli kasem bigfala glad taem oli joen long ol wok blong givhan long ol man we oli lusum olting blong olgeta from ol trabol we man i mekem no from disasta. Wan sista we i gat bitim 60 yia finis mo we i wok long Betel, i tekem spel blong hem blong go plante taem long ol ples we oli farawe, blong givhan long ol man we oli kasem trabol from disasta. ?From wanem hem i yusum spel blong hem olsem? Hem i se: “I tru se mi mi no gat save long wan spesel wok, be mi glad tumas blong mekem wanem wok we oli givim long mi. Taem mi luk ol brata mo sista ya we oli lusum plante samting be bilif blong olgeta i stap strong, samting ya i leftemap tingting blong mi bigwan.” I gat plante taosen narafala brata mo sista raon long wol we oli givim taem blong olgeta blong givhan long wok blong bildim ol Haos Kingdom mo Haos Asembli. Olkaen wok ya we i soem se yumi no tingbaot yumi wan, oli ‘mekem i gud long olgeta ya we oli brata mo sista blong yumi from we olgeta tu oli bilif.’—Gal. 6:10.
“Mi Bambae Mi Stap Wetem Yufala Oltaem”
17. ?Wanem samting we bambae yu yu givim olsem jenis blong laef we i no save finis?
17 Fasin blong laef blong ol man we oli no tingbaot God bambae i lus i no longtaem. Yumi no save stret se samting ya bambae i hapen wetaem. Be yumi save se “yumi no gat plante taem i stap,” mo yumi save se “wol ya wetem ol fasin blong hem, bambae i no longtaem hem i lus,” no olsem sam narafala Baebol oli talem, fasin blong laef long wol ya i stap jenis. (Ridim 1 Korin 7:29-31.) Tok ya i mekem mining blong kwestin blong Jisas i kam klia moa. Kwestin ya se: “?Tru ya, wanem samting nao we wan man bambae i rere blong givim olsem jenis blong laef blong hem?” I sua se bambae yumi rere blong givim eni samting we Jeova i askem yumi blong givim from we yumi wantem kasem “laef ya we i prapa wan.” (1 Tim. 6:19) Yes, i impoten tumas blong obei long tok ya we Jisas i talem blong ‘folem hem oltaem’ mo blong ‘lukaot Kingdom fastaem.’—Mat. 6:31-33, NW; 24:13.
18. ?Yumi suagud long wanem, mo from wanem?
18 I tru se i no isi oltaem blong folem Jisas, mo olsem tok blong Jisas i soem, samfala bambae oli ded from we oli jusum blong stap olsem man blong Kraes. Nating se i olsem, yumi folem fasin blong Jisas. Yumi stap longwe long ol samting we oli save pulum yumi blong tingbaot yumi nomo. Yumi bilif long tok ya we Jisas i talem long ol man blong hem we tabu spirit i makemaot olgeta long faswan handred yia, se: “Mi bambae mi stap wetem yufala oltaem, gogo wol ya i finis.” (Mat. 28:20) Taswe i gud yumi traem bes blong yumi blong yusum taem mo save blong yumi long tabu wok blong God, gogo kasem mak we yumi naf blong mekem. Taem yumi mekem olsem, yumi soemaot we yumi trastem Jeova se hem i save lukaotgud long yumi long taem blong bigfala trabol, mo sipos yumi ded, hem i save mekem yumi laef bakegen long niufala wol. (Hib. 6:10) Samting ya bambae i soemaot se yumi rili tinghae tumas long presen ya laef.
?Wanem Ansa Blong Yu?
• ?Olsem wanem Jisas i soem se hem i rere fulwan blong mekem wok blong God mo ol man?
• ?From wanem yumi mas lego ol samting we yumi wantem, mo yumi mekem samting ya olsem wanem?
• ?Long Isrel bifo, wanem kaen sakrefaes we Jeova i agri long hem, mo samting ya i halpem yumi tede blong tingbaot wanem?
• ?Wanem sam samting we yumi save mekem blong yusum taem blong yumi long waes fasin?
[Kwestin]
[Tok blong pija long pej 26]
Oltaem nomo Jisas i mekem samting we God i glad long hem
[Tok blong pija long pej 28]
Ol man Isrel we oli gat tangkiu long God oli yusum beswan samting we oli gat long trufala wosip