?Yu Yu Stap Soemaot Ona Long Narafala Fastaem?
?Yu Yu Stap Soemaot Ona Long Narafala Fastaem?
“Long saed blong fasin blong ona long narafala, yufala fastaem i mas soemaot rod.”—ROM 12:10, NW.
1. ?Wanem fasin i stap lus long plante ples blong wol?
LONG sam ples blong wol i gat wan kastom se taem ol pikinini oli stap wetem ol bigman, oli mas nildaon blong soem se oli ona mo oli gat respek long ol bigman. Oli nildaon olsem blong mekem se oli no longfala moa long wan bigman we i sidaon klosap long olgeta. Long ol ples ya, oli gat tingting tu se sipos wan pikinini i tanem baksaed blong hem long wan bigman, hemia i no soem respek. Nating se long ol defren kalja i gat ol defren rod blong soem respek, fasin ya blong soem respek long narafala i mekem yumi tingbaot Loa blong Moses. Long Loa ya, God i talem se: “Yufala i mas bodaon long ol olfala [blong soem respek], mo yufala i mas ona gud long olgeta.” (Lev. 19:32) Be sore tumas we long plante ples, fasin ya blong ona long narafala i stap lus. Tru ya, bighaf blong ol man oli no gat respek long narafala.
2. ?Tok blong God i talem se yumi mas ona long hu?
2 Tok blong God i pulum yumi blong tinghae long fasin ya blong ona long narafala. Hem i talem se yumi mas ona long Jeova mo Jisas. (Jon 5:23) Baebol i talem tu se yumi mas ona long ol memba blong famle blong yumi mo long ol brata sista long kongregesen mo long sam narafala we oli no stap long kongregesen. (Rom 12:10; Efes. 6:1, 2; 1 Pita 2:17) ?Wanem sam rod we yumi save soemaot se yumi ona long Jeova? ?Olsem wanem yumi save soemaot se yumi gat ona, no bigfala respek long ol Kristin brata mo sista? Bambae yumi tokbaot ol kwestin ya mo sam narafala kwestin bakegen long saed ya.
Ona Long Jeova Mo Nem Blong Hem
3. ?Wanem wan impoten rod blong ona long Jeova?
3 Wan impoten rod blong ona long Jeova hemia taem yumi soem respek we i stret long nem blong hem. I stret we yumi mekem olsem from we yumi nao yumi ol man we i “holem nem blong hem.” (Wok 15:14) Hemia wan bigfala ona we yumi gat blong karem nem blong Jeova God we i gat olgeta paoa. Profet Maeka i talem se: “Olgeta pipol, bambae oli wokbaot long nem blong god blong olgeta. Be yumi, bambae yumi wokbaot olwe long nem blong Jeova, God blong yumi, yes gogo i no save finis.” (Maeka 4:5, NW) Yumi ‘wokbaot long nem blong Jeova’ taem yumi traehad evri dei blong laef long fasin we i leftemap nem ya we yumi karem. Olsem Pol i pulum ol Kristin long Rom blong tingbaot, sipos laef blong yumi i no laenap wetem gud nius we yumi talemaot, yumi stap “spolem” no sakem doti long gudfala nem blong God.—Rom 2:21-24.
4. ?Yu yu gat wanem tingting long saed blong blesing ya blong talemaot trutok long saed blong Jeova olsem wan witnes blong hem?
4 Yumi ona tu long Jeova taem yumi joen long wok blong prij. Long taem bifo, Jeova i singaot ol man long neson blong Isrel blong oli kam ol witnes blong hem, be olgeta oli no holemgud wok ya. (Aes. 43:1-12) Plante taem oli tanem baksaed long Jeova mo oli “mekem hem i harem nogud.” (Sam 78:40, 41) Taswe neson ya i lusum blesing blong Jeova fulwan. Be yumi tede yumi gat bigfala tangkiu long blesing we yumi gat blong talemaot trutok long saed blong Jeova olsem ol witnes blong hem mo mekem ol man oli save nem blong hem. Yumi mekem samting ya from we yumi lavem hem, mo yumi wantem tumas blong luk we hem i leftemap tabu nem blong hem. Yes, taem yumi save trutok long saed blong Papa blong yumi long heven mo ol plan blong hem, samting ya i mekem se yumi wantem tumas blong prij. Yumi harem olsem aposol Pol taem hem i talem se: “Hemia i wok blong mi we mi mas mekem. Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.”—1 Kor. 9:16.
5. ?Olsem wanem man we i bilif long Jeova i gat respek long hem tu?
5 Deved we i wan man blong raetem Sam, i talem se: “Olgeta we oli save [“nem,” NW] blong yu, oli trastem yu. Olgeta we oli kam long yu, yu no save lego wan long olgeta.” (Sam 9:10) Sipos yumi savegud Jeova mo yumi gat respek long nem blong hem mo mining blong nem ya, bambae yumi trastem hem, olsem ol gudfala man blong hem bifo oli mekem. Tras mo bilif we yumi gat long Jeova i wan narafala rod blong soem ona long hem. Makemgud olsem wanem Tok blong God i joenem fasin blong trastem Jeova wetem fasin blong respektem Hem. Taem ol man Isrel bifo oli no moa trastem Jeova, Hem i askem long Moses se: “?Go kasem wetaem bambae ol man ya oli no gat respek long mi, mo go kasem wetaem bambae oli no stap bilif long mi from ol merikel we mi mekem long fored blong olgeta?” (Nam. 14:11, NW) Sipos yumi mekem fasin we i defren long ol man Isrel mo yumi trastem Jeova blong protektem yumi mo halpem yumi blong stanap strong nating se yumi kasem ol traem, yumi soemaot we yumi gat respek long hem.
6. ?Wanem i pusum yumi blong gat bigfala respek long Jeova?
6 Tok blong Jisas i soemaot se hat blong man i mas pusum hem blong gat respek long Jeova. Taem Jisas i stap toktok long olgeta we oli no tru long wosip blong olgeta, hem i talem tok we Jeova i bin talem, i se: “Ol man ya oli stap ona long mi long ol toktok blong olgeta nomo, be tingting blong olgeta i longwe tumas long mi.” (Mat. 15:8) Lav long Jeova we i stap long hat blong yumi i pusum yumi blong gat respek long Hem. (1 Jon 5:3) Mo tu, oltaem yumi tingbaot promes blong hem se: “Man we i ona long mi, mi bambae mi ona long hem.”—1 Saml. 2:30.
Ol Elda Long Kongregesen Oli Soemaot Respek Long Narafala
7. (a) ?From wanem ol brata we oli gat wok insaed long kongregesen oli mas soem ona long narafala we i stap aninit long kea blong olgeta? (b) ?Olsem wanem Pol i soemaot we hem i gat respek long ol brata sista?
7 Aposol Pol i givim advaes ya long ol brata sista se: “Long saed blong fasin blong ona long narafala, yufala fastaem i mas soemaot rod.” (Rom 12:10, NW) Ol brata we oli gat wok insaed long kongregesen oli mas soemaot gudfala eksampol blong ona long ol narafala we oli stap aninit long kea blong olgeta. Yes, olgeta oli mas mekem samting ya ‘fastaem blong soemaot rod’ long ol narafala. I gud olgeta we oli gat ol bigfala wok blong mekem insaed long kongregesen oli folem eksampol blong Pol long saed ya. (Ridim 1 Tesalonaeka 2:7, 8.) Ol brata long ol kongregesen we Pol i stap visitim olgeta bifo, oli savegud se bambae hem i neva askem long olgeta blong mekem wan samting we hem wan i no wantem mekem. Pol i soemaot respek long ol brata sista, mo from samting ya, olgeta tu oli gat respek long hem. Pol i talem long olgeta se: “Mi mi strong long yufala, se plis yufala i folem fasin blong mi.” I sua se plante long olgeta oli glad blong folem eksampol blong hem from gudfala fasin blong hem.—1 Kor. 4:16.
8. (a) ?Wanem wan impoten rod we Jisas i soem respek long ol disaepol blong hem? (b) ?Olsem wanem ol brata we oli lukaot long kongregesen tede oli save folem eksampol blong Jisas?
8 Wan narafala rod we wan brata we i gat wok long kongregesen i save soem respek long narafala we i stap aninit long kea blong hem, hemia taem hem i eksplenem from wanem hem i askem narafala blong mekem wan samting, mo from wanem hem i givim sam advaes long narafala. Taem hem i mekem olsem, hem i stap folem fasin blong Jisas. Taem Jisas i talem long ol disaepol blong hem blong prea blong i gat moa man blong karem kakae long garen, hem i talem long olgeta from wanem oli mas mekem samting ya. Hem i se: “I gat plante kakae tumas i stap long garen we i rere finis, be smol man nomo oli stap blong karem i go long haos. [“Taswe,” NW] yufala i mas askem strong long masta blong garen ya, blong hem i save sanem sam moa man oli kam blong karem ol kakae ya.” (Mat. 9:37, 38) I sem mak taem hem i talem long ol disaepol blong hem blong oli “lukaot gud,” hem i talem from wanem oli mas mekem olsem. Hem i se: “From we yufala i no save wanem dei, mi, mi Masta blong yufala, bambae mi kamtru long hem.” (Mat. 24:42) Plante taem, Jisas i no talem nomo long ol disaepol blong hem wanem samting we oli mas mekem, be hem i talem tu from wanem oli mas mekem samting ya. Long rod ya, hem i soem respek long olgeta. !Hemia wan nambawan eksampol blong ol Kristin brata we oli lukaot long kongregesen!
Respektem Kongregesen Blong Jeova Mo Advaes We Kongregesen i Givim
9. ?Taem yumi gat respek long Kristin kongregesen we i stap raonabaot long wol mo ol man we oli wok long nem blong hem, hu ya narafala ya we yumi ona long hem tu? Eksplenem.
9 Blong ona long Jeova, yumi mas ona tu long Kristin kongregesen we i stap raonabaot long wol mo ol man we oli wok long nem blong hem. Taem yumi obei long advaes blong Baebol we slef we i stret mo waes i talemaot, yumi soemaot se yumi gat respek long rod we Jeova i yusum. Samfala long Kristin kongregesen blong faswan handred yia oli soemaot we oli no gat respek long ol brata we oli gat wok insaed long kongregesen. Taswe aposol Jon i luk se i gat nid blong tok long olgeta ya. (Ridim 3 Jon 9-11.) Toktok blong Jon i soemaot se samfala oli no gat respek long ol wanwan elda, mo tu oli no gat respek taem ol elda oli tijim olgeta mo givim advaes long olgeta. Be i gud se bighaf blong ol Kristin oli no olsem. Taem ol aposol oli laef bifo, bighaf blong ol brata sista oli soemaot bigfala respek long olgeta we oli lidim kongregesen.—Fil. 2:12.
10, 11. Yusum Baebol blong eksplenem from wanem i stret we samfala oli holem wok insaed long Kristin kongregesen.
10 Samfala oli gat tingting ya, se from we Jisas i talem long ol disaepol blong hem se “yufala evriwan i brata,” hem i minim se i no mas gat brata we i holem wan wok blong lukaot long Kristin kongregesen. (Mat. 23:8) Be long Hibru mo Grik haf blong Baebol, i gat plante eksampol blong ol man we God i givim wok long olgeta blong lukaot long narafala. Ol stori long saed blong ol man we oli hed blong ol laen blong ol man Hibru bifo, ol jaj mo ol king blong olgeta, i pruvum se Jeova i yusum sam man we oli wok long nem blong hem blong oli lidim ol man blong hem. Taem samfala oli no ona long ol man we God i putumap, Jeova i stretem olgeta.—2 King 1:2-17; 2:19, 23, 24.
11 Long sem fasin, ol Kristin long faswan handred yia oli luksave wok we ol aposol oli gat blong lukaot long kongregesen. (Wok 2:42) Tingbaot Pol. Hem i givim advaes long ol brata blong hem long saed blong samting we oli mas mekem. (1 Kor. 16:1; 1 Tes. 4:2) Be hem i glad blong obei tu long olgeta we oli gat wok blong lukaot long hem. (Wok 15:22; Gal. 2:9, 10) Yes Pol i gat stret tingting long saed blong wok blong hem insaed long Kristin kongregesen.
12. ?Long ol eksampol blong Baebol, wanem tufala samting ya we yumi lanem long saed blong wok we ol brata oli gat long kongregesen?
12 Yumi lanem tu samting long eksampol ya. Faswan samting, hemia se folem Baebol, i stret blong “slef we i stret mo waes” i yusum Hed Kampani blong putumap ol brata, blong oli mekem ol wok insaed long kongregesen. Mo slef we i stret mo waes i putumap sam brata blong oli lukaot long wok we ol narafala brata ya oli mekem long kongregesen. (Mat. 24:45-47, NW; 1 Pita 5:1-3) Seken samting, hemia se yumi evriwan, ol brata tu we slef we i stret mo waes i putumap, yumi mas ona long olgeta we oli gat wok blong lukaot long yumi. ?Wanem sam gudfala rod we yumi save folem blong soem ona long olgeta we oli gat wok long Kristin kongregesen blong fulwol?
Respektem Ol Seket Mo Distrik Elda
13. ?Olsem wanem yumi save soemaot se yumi gat respek long ol man we oli wok long nem blong Kristin kongregesen tede?
13 Pol i talem se: “Ol brata mo sista. Mifala i askem strong long yufala blong yufala i ona gud long olgeta ya we oli stap [“wokhad,” NW] wetem yufala. Hemia olgeta ya we Masta blong yumi i jusumaot olgeta blong oli lidim yufala, mo blong oli tijim yufala. Yufala i mas ona gud long olgeta from ol wok ya we oli stap mekem mo yufala i mas lavem olgeta. Mo oltaem, yufala i mas joen gud, we yufala i no rao.” (1 Tes. 5:12, 13) I sua se ol seket elda mo ol distrik elda oli sam long olgeta ya we “oli stap wokhad.” From samting ya, i stret we yumi “ona gud long olgeta.” Wan rod blong mekem olsem, hemia taem yumi folem advaes we oli givim wetem fulhat blong yumi. Taem wan long ol elda ya i givim advaes long yumi we i kam long slef we i stret mo waes, ‘waes we i kam long heven’ bambae i pusum yumi blong yumi “rere blong obei.”—Jem. 3:17, NW.
14. ?Olsem wanem ol brata sista blong wan kongregesen oli soemaot se oli gat trufala respek long ol seket mo distrik elda? ?Mo samting ya i karem wanem frut?
14 ?Be olsem wanem sipos yumi kasem advaes blong mekem sam samting long wan fasin we i defren long wanem we yumi stap mekem bifo? Maet yumi save tingting se: “Mifala i no mekem samting long fasin olsem long ples ya,” no, “Maet samting ya i wokgud long ol narafala ples be i no wokgud long kongregesen blong mifala.” Yumi mas faet strong blong agensem ol tingting olsem, blong yumi save soemaot we yumi gat respek. Yes, yumi mas traehad blong obei. Blong givhan long yumi blong obei long ol advaes we yumi kasem, oltaem yumi mas tingbaot se kongregesen i blong Jeova, mo Jisas nao i Hed blong kongregesen. Taem ol brata sista long wan kongregesen oli folem advaes blong seket no distrik elda wetem glad, samting ya i soemaot se oli gat trufala respek. Aposol Pol i talem gudfala toktok long ol brata long Korin from we oli gat respek mo oli obei long advaes we Taetas, brata we i visitim kongregesen blong olgeta, i givim. (2 Kor. 7:13-16) Tede tu, yumi save sua se taem yumi glad blong folem advaes we ol seket mo distrik elda oli givim, bambae samting ya i givhan bigwan long yumi blong kasem moa glad long wok blong prij.—Ridim 2 Korin 13:11.
“Ona Long Olgeta Man”
15. ?Wanem sam rod blong soemaot se yumi gat respek long ol brata sista?
15 Pol i raetem se: “Yu no tok strong long man we i olfala. Yu mas toktok gud long hem, olsem we hem i stret papa blong yu. Mo yu mas toktok long yang man olsem we hem i stret brata blong yu. Yu mas toktok gud long woman we i olfala, olsem we hem i stret mama blong yu. Mo yu mas toktok long yang woman olsem we hem i stret sista blong yu, mo we fasin blong yu i klin gud. Yu mas ona gud long wido we i stap hem wan, we i no gat famle blong lukaot long hem.” (1 Tim. 5:1-3) Yes, Tok blong God i givim advaes se yumi mas ona long olgeta Kristin long kongregesen. ?Be olsem wanem sipos yu yu no agri wetem wan Kristin brata no sista blong yu long wan samting? ?Bambae samting ya i blokem yu blong soem respek long Kristin brata no sista ya? ?No bambae yu traem luksave ol gudfala Kristin fasin blong hem blong yu save gat wan gudfala tingting long saed blong hem? Olgeta we oli gat wok insaed long kongregesen, oli nidim tumas blong holem wan tingting long saed blong ol brata sista we i soemaot se oli gat respek long olgeta, mo oli neva mas kam olsem “bigfala masta blong olgeta” ya we oli olsem ol sipsip. (1 Pita 5:3) Ol man oli luksave trufala Kristin kongregesen from lav we ol memba blong hem i gat. Tru ya, long Kristin kongregesen yumi gat plante janis blong ona long ol brata sista.—Ridim Jon 13:34, 35.
16, 17. (a) I impoten we yumi gat respek long ol man we yumi prij long olgeta, be ?from wanem i impoten tu blong gat respek long ol man we oli agensem yumi? (b) ?Olsem wanem yumi “ona long olgeta man”?
16 I tru se yumi no mas soem respek nomo long olgeta we oli joen long Kristin kongregesen. Long leta we Pol i raetem long ol Kristin long taem blong hem, hem i se: “Oltaem, sipos yumi gat janis, yumi mas mekem i gud long olgeta man.” (Gal. 6:10) Samtaem maet i had blong folem advaes ya, olsem taem wan man long wok no wan pikinini long skul i mekem samting long yumi we i no kaen nating. Long taem olsem, yumi mas tingbaot toktok ya se: “I nogud yu stap harem nogud long ol samting we ol man nogud oli stap mekem.” (Prov. 24:19) Sipos yumi folem advaes ya, bambae hem i halpem yumi blong gohed blong soem respek long ol man, nating se oli agensem yumi. I sem mak taem yumi stap long wok blong prij, tingting daon bambae i halpem yumi blong ‘toktok gud long olgeta man mo ona long olgeta.’ (1 Pita 3:16, 15, NW) Hea mo klos blong yumi i wan narafala rod tu blong soemaot we yumi gat respek long ol man we yumi prij long olgeta.
17 Yes, nomata yumi stap wetem ol brata sista no wetem ol man we oli no stap long kongregesen, yumi wantem traehad blong folem advaes ya se: “Yufala i mas ona long olgeta man, mo yufala i mas lavem olgeta Kristin man, mo yufala i mas ona gud long God, mo yufala i mas ona long ol hed gavman blong yufala.”—1 Pita 2:17.
?Bambae Yu Yu Ansa Olsem Wanem?
?Olsem wanem yu save soemaot we yu gat respek long:
• Jeova?
• Ol elda blong kongregesen mo ol seket mo distrik elda?
• Wanwan memba blong kongregesen?
• Ol man we yu prij long olgeta?
[Kwestin]
[Tok blong pija long pej 23]
Ol Kristin long faswan handred yia oli gat respek long wok blong hed kampani blong lukaot long olgeta
[Tok blong pija long pej 24]
Long evri kantri, ol elda oli gat ona long ol seket mo distrik elda we Hed Kampani i putumap olgeta