!Givhan Long Olgeta Blong Oli Kambak Kwik!
!Givhan Long Olgeta Blong Oli Kambak Kwik!
“?Bambae mifala i save go long hu? Yu nomo yu gat ol tok blong laef ya we i no save finis.”—JON 6:68.
1. ?Taem plante disaepol oli lego Jisas, Pita i talem wanem?
WAN taem, plante disaepol blong Jisas oli lego hem from we oli no agri long wan tijing blong hem. Nao Jisas i askem long ol aposol blong hem se: “?Olsem wanem long yufala? ?Yufala tu i wantem gowe long mi?” Pita i ansa se: “Masta. ?Bambae mifala i save go long hu? Yu nomo yu gat ol tok blong laef ya we i no save finis.” (Jon 6:51-69) I tru, ?bambae oli go wea bakegen? Skul blong ol man Jiu long taem bifo i no gat “ol tok blong laef ya we i no save finis.” Mo tede tu, i no gat wan long olgeta giaman skul blong Bigfala Babilon we i stap givimaot ol tok ya blong laef. Long saed blong ol sipsip blong God we oli gowe finis long kongregesen be oli gat tingting naoia se oli wantem mekem Jeova i glad, ‘i taem blong olgeta i wekap’ mo joen bakegen wetem ol narafala sipsip.—Rom 13:11.
2. ?Ol pablisa oli mas tingbaot wanem long saed blong prapa bisnes blong wan brata no sista mo ol bisnes we ol elda nomo oli mas stretem?
2 Jeova i bin soemaot se hem i wari long ol sipsip blong Isrel we oli lus. (Ridim Esikel 34:15, 16.) Sem mak long ol Kristin elda, oli wantem mekemgud wok ya we i stap long han blong olgeta, blong givhan long ol sipsip blong God we oli lus. Maet ol elda oli askem long wan pablisa blong i stadi wetem wan brata no sista we i wantem kasem help from we i no moa mekem wok blong Jeova. Nao sipos pablisa i faenemaot se brata no sista ya i bin mekem wan bigfala sin, ?bambae hem i mas mekem wanem? Hem i no mas traem stretem wan bisnes we ol elda nomo oli mas stretem no wan prapa bisnes blong brata no sista ya. Be hem i mas talem long brata no sista ya se hem i mas go luk ol elda. Sipos hem i no mekem olsem, pablisa nao i mas talemaot bisnes ya long ol elda.—Lev. 5:1, NW; Gal. 6:1, NW.
3. ?Man we i gat 100 sipsip blong hem, i mekem wanem taem hem i faenem sipsip ya we i lus?
3 Laswan stadi i bin tokbaot wan pijatok blong Jisas long saed blong man we i gat 100 sipsip blong hem. Taem wan sipsip i lus, hem i livim ol 99 narawan mo i go lukaot sipsip ya we i lus. !Man ya i glad we i glad taem hem i faenem sipsip ya! (Luk 15:4-7) Yumi tu, yumi glad tumas taem wan sipsip blong God we i lus, i kambak long kongregesen. Ating ol elda mo sam narawan long kongregesen oli bin go luk hem from we oli tingbaot hem mo oli lavem hem. Olgeta oli wantem we sipsip ya i joen bakegen wetem ol narafala sipsip, mo we God i givhan long hem, protektem hem, mo blesem hem. (Dut. 33:27; Sam 91:14; Prov. 10:22) ?Sipos oli gat janis blong halpem wan sipsip blong kambak long kongregesen, oli save mekem wanem?
4. ?Yumi kasem wanem save long Galesia 6:2, 5?
4 Blong givhan long wan sipsip blong joen bakegen long kongregesen, oli save toktok long kaen fasin blong soem long hem se Jeova i lavem ol sipsip blong hem, mo se hem i askem yumi blong mekem wanem we yumi naf blong mekem nomo. Hemia ol samting olsem stadi Baebol, kam long ol Kristin miting, mo talemaot gud nius blong Kingdom. Maet i gud blong ridim Galesia 6:2, 5 mo eksplenem se, nating we ol Kristin oli save givgivhan long olgeta long ol trabol we oli kasem, be “evri man i gat wok blong hem” long fes blong Jeova. Yumi wanwan i mas holemstrong long God, i no gat narafala man i save mekem wok ya blong yumi.
?Oli Kam Slak From Oli “Tingting Tumas Long Laef Blong Wol Ya”?
5, 6. (a) ?From wanem i impoten we yumi lesingud taem ol Kristin we oli no moa mekem wok blong Jeova oli toktok? (b) ?Maet yu save mekem wanem blong halpem olgeta blong oli luksave se taem oli no moa joen wetem ol man blong God, oli no moa haremgud?
5 Taem ol Kristin brata sista we oli no moa mekem wok blong Jeova oli talemaot samting we i stap long hat blong olgeta, ol elda mo ol pablisa we oli bigman long ol Kristin fasin oli mas lesingud. Olsem nao, bambae oli luksave wanem we oli mas mekem blong givhan long olgeta. Maet yu yu wan elda we yu go luk wan brata wetem woman blong hem, we tufala i no moa joen long kongregesen from we tufala i “tingting tumas long laef blong wol ya.” (Luk 21:34) Ating problem long saed blong mane no tumas wok insaed long famle i mekem se sloslo tufala i no moa mekem ol Kristin wok. Maet tufala i talem se tufala i taed, mo tufala i mas spel smol fastaem long ol Kristin wok. Maet yu save halpem tufala blong luksave se sipos tufala i lego kongregesen, bambae samting ya i no save givhan long tufala. (Ridim Ol Proveb 18:1.) Long kaen fasin, yu save askem long tufala se: “?Yutufala i glad moa naoia we yutufala i no moa stap kam long ol miting? ?Long famle, yufala i haremgud moa? ?Yutufala i gat glad ya yet we yutufala i bin kasem taem yutufala i bin trastem Jeova?”—Neh. 8:10.
6 Sipos olgeta we oli no moa mekem wok blong Jeova oli tingting gud long ol kwestin olsem, maet oli luksave se taem oli no moa joen long kongregesen, oli no moa gat tingting olsem Jeova, ale oli no moa glad tu. (Mat. 5:3; Hib. 10:24, 25) Maet yumi save halpem olgeta blong luksave se taem oli no moa talemaot gud nius, oli lusum glad blong olgeta. (Mat. 28:19, 20) ?Taswe, sipos oli waes, bambae oli mas mekem wanem?
7. ?Yumi save leftemap tingting blong ol sipsip we oli lus blong oli mekem wanem?
7 Jisas i talem se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. . . . Be oltaem, yufala i mas rere, mo yufala i mas prea. Sipos yufala i mekem olsem, bambae yufala i gat paoa blong ronwe long olgeta trabol ya.” (Luk 21:34-36) Olgeta we oli gowe long kongregesen be oli wantem kasembak glad we oli gat fastaem, yumi save leftemap tingting blong olgeta blong oli prea from tabu spirit mo askem help blong Jeova, mo blong oli wok folem prea blong olgeta.—Luk 11:13.
?Wan Samting i Mekem Olgeta Oli Foldaon?
8, 9. ?Wan elda i save tokbaot wanem wetem wan man we i foldaon?
8 Yumi evriwan i sinman, taswe sam samtaem smol rao i save kamaot, mo wan long yumi i save foldaon. Samfala oli foldaon from we wan brata no sista long kongregesen we oli respektem hem, i mekem samting we i no laenap wetem tingting blong God long Baebol. Sipos wan elda i go luk wan brata no sista we i bin foldaon from samting olsem, hem i save tokbaot se i no Jeova we i mekem man i foldaon. ?Taswe, from wanem yumi stopem fasin fren blong yumi wetem God mo ol man blong hem? I moagud we yumi gohed blong mekem wok blong God, mo yumi trastem se ‘Man ya blong jajem olgeta man blong wol’ i save ol samting we i hapen, mo bambae hem i stretem bisnes ya folem tingting blong hem. (Jen. 18:25; Kol. 3:23-25) ?Sipos wan man i stap wokbaot long rod nao i kikim wan ston mo i foldaon, bambae hem i stap ledaon nomo long graon? Nogat, bambae hem i traem blong stanap bakegen.
9 Blong givhan long wan man olsem blong i joen bakegen long kongregesen, maet elda i talem se samfala we oli bin foldaon olsem hem, oli luk we taem ol manis oli pas, samting we i mekem olgeta oli foldaon i no moa impoten tumas. Sipos no, maet problem we i bin mekem olgeta i foldaon i lus finis. ?Olsem wanem sipos man ya i foldaon from we ol elda oli bin stretem hem? Sipos hem i prea mo i tingting dip, ating bambae hem i luksave se i stret nomo we ol elda oli bin stretem hem from we hem i bin mekem i rong, taswe i no stret we hem i bin foldaon from we oli stretem hem.—Sam 119:165; Hib. 12:5-13.
?Oli Kam Slak From We Oli No Agri Long Wan Tijing?
10, 11. ?Wanem toktok i save givhan long wan Kristin we i no agri long wan tijing blong Baebol?
10 Sam sipsip blong God oli lus from we oli no agri long wan tijing blong Baebol. Long taem bifo, ol man Isrel we oli kamfri long Ijip, oli “fogetem ol samting ya we [God] i mekem” mo “oli no wet fastaem blong harem tok blong hem, oli girap oli folem tingting blong olgeta nomo.” (Sam 106:13) Maet i gud blong mekem brata no sista we i no moa joen long kongregesen i tingbaot se ‘slef we i stret mo waes’ i stap givimaot nambawan kakae we i kamaot long Tok blong God. (Mat. 24:45, NW) Brata no sista ya i kasem save long trutok fastaem from ol save ya we slef i givim. Taswe i stret nomo we hem i mas gat strong tingting blong folem trutok bakegen.—2 Jon 4.
11 Taem elda i stap traehad blong givhan long sipsip ya we i lus, maet hem i tokbaot ol disaepol we oli lego Jisas from we oli no agri long wan tijing blong hem. (Jon 6:53, 66) Taem oli no moa joen wetem Kraes mo ol gudfala man blong hem, oli no moa gat tangkiu from ol save blong God, mo oli lusum glad blong olgeta tu. ?Olgeta we oli no moa joen long Kristin kongregesen, oli faenem wan narafala ples we i save givim ol gudfala kakae long saed blong God? !Nogat, i no gat wan narafala ples olsem!
?Hem i Mekem Bigfala Sin?
12, 13. ?Sipos wan sipsip we i lus i talem se hem i bin mekem bigfala sin, olsem wanem yumi save halpem hem?
12 Samfala oli no moa prij mo oli no moa go long ol miting from we oli bin mekem wan bigfala sin. Maet oli ting se sipos oli talemaot sin ya long ol elda, bambae kongregesen i putumaot olgeta. Be kongregesen i no save putumaot olgeta sipos oli lego nogud fasin ya, mo oli tanem tingting blong olgeta fulwan from sin we oli bin mekem. (2 Kor. 7:10, 11) Defren olgeta, bambae kongregesen i glad tumas blong luk olgeta oli kambak, mo ol elda bambae oli givhan long olgeta blong oli kam strong bakegen.
13 Maet yu yu wan pablisa we yu strong long wok blong Jeova, nao ol elda oli askem long yu blong givhan long wan brata no sista we i no moa mekem wok blong Jeova. ?Yu yu mas mekem wanem sipos brata no sista ya i talem se hem i bin mekem bigfala sin? Olsem yumi tokbaot antap, i moagud we yu talem long hem blong go luk ol elda, i bitim we yu yu go insaed long bisnes ya moa. Sipos hem i no wantem go luk ol elda, yu nao yu mas talemaot long ol elda, folem tok we God i talem blong lidim yumi long saed ya. Olsem nao, yu yu soemaot se yu wantem we nem blong Jeova i stap klin, mo we i no gat wan samting i spolem kongregesen mo mekem i kam doti long fes blong God. (Ridim Levitikas 5:1, NW *) Ol elda bambae oli save olsem wanem blong givhan long wan man we i wantem kambak long kongregesen, mo we i wantem mekem laef blong hem i laenap wetem ol samting we God i wantem. Maet oli mas stretem hem long kaen fasin. (Hib. 12:7-11) Sipos brata no sista ya i luksave se hem i bin mekem sin agensem God, nao i no moa mekem nogud fasin ya, hem i rili sore, mo i tanem tingting blong hem from sin ya, ale ol elda bambae oli halpem hem, mo Jeova bambae i fogivim hem.—Aes. 1:18; 55:7; Jem. 5:13-16.
Bigfala Glad Taem Boe We i Lusum Rod i Kambak
14. Long prapa toktok blong yu, eksplenem parabol blong Jisas long saed blong boe we i lusum rod.
14 Brata no sista we i stap traem blong givhan long wan sipsip we i lus, i save tokbaot pijatok blong Jisas long Luk 15:11-24. Yangfala man long parabol ya i spolem ol mane blong hem long ol rabis fasin. Be sloslo tingting blong hem i jenis ale hem i no moa laekem nating ol rabis fasin we hem i bin mekem. Hem i hanggri, hem i tingbaot hom mo famle blong hem, gogo, hem i mekemap tingting blong hem. !Bambae hem i gohom! Taem boe ya i stap wokbaot i go we hem i stap longwe yet long hom blong hem, papa blong hem i luk hem, nao hem i resis i go mitim hem, i putum han blong hem i goraon long hem, i kis long hem. Papa blong hem i glad we i glad. Sipos hemia we i gowe long kongregesen i tingting dip long parabol ya, maet hem i wantem kam joen bakegen wetem ol narafala sipsip. Hem i mas ‘kamhom’ kwik, from we i no longtaem rabis wol ya bambae i lus.
15. ?From wanem samfala oli gowe sloslo long kongregesen?
15 Bighaf blong olgeta we oli gowe long kongregesen, oli no olsem boe ya we i lusum rod. Samfala oli gowe sloslo, olsem wan bot we i drif sloslo i go longwe long so. Sam narafala oli tingting tumas long ol samting blong laef, nao oli no moa tinghevi long fasin fren blong olgeta wetem Jeova. Sam narafala bakegen oli foldaon from wan samting we wan memba blong kongregesen i mekem, no maet oli no moa joen long kongregesen from wan tijing blong Baebol we oli no agri long hem. Sam long olgeta oli mekem sam fasin we oli no stret. Be ol advaes we yumi luk long saed blong ol sipsip blong God we oli lus from ol defdefren risen ya mo from sam narafala risen bakegen, i save givhan long yu blong halpem olgeta blong oli kambak kwik, bifo we i let tumas.
“!Boe Blong Mi, i Gud Tumas We Yu Kamhom!”
16-18. (a) ?Olsem wanem wan elda i halpem wan brata we i no moa mekem wok blong Jeova plante yia? (b) ?From wanem brata ya i no moa mekem wok blong Jeova? ?Wanem help we hem i kasem? ?Ol narafala long kongregesen oli mekem olsem wanem long hem?
16 Wan Kristin elda i talem se: “Ol elda long kongregesen blong mifala oli traehad bigwan blong go luk olgeta we oli no moa mekem wok blong Jeova. Mi mi tingbaot wan brata we mi bin stadi wetem hem mo mi givhan long hem blong i save trutok. Hem i no moa mekem wok blong Jeova 25 yia. Ale, taem mi go luk hem, hem i stap gotru long wan hadtaem long laef blong hem. Mi eksplenem long hem olsem wanem ol tok mo advaes blong Baebol i save halpem hem. Smoltaem i pas, nao hem i stat blong kambak long Haos Kingdom. Hem i agri tu blong wan brata i mekem Baebol stadi long hem, blong halpem hem blong gat strong tingting blong kambak long kongregesen.”
17 ?From wanem brata ya i no moa mekem wok blong Jeova? Hem i talem se: “Mi mi stat blong spenem moa taem mo paoa long ol samting blong wol ya, i no long ol samting we bambae oli mekem mi mi fren moa wetem Jeova. Biaen mi no moa stadi, mi no moa prij, mo mi no moa go long ol miting. Wan dei mi sek se mi no moa joen nating long Kristin kongregesen. Be elda ya i soemaot se hem i rili wari long mi mo hem i givhan long mi blong kambak.” Taem wan brata i stat blong mekem Baebol stadi long hem, ol problem blong hem oli godaon. Hem i talem se: “Mi mi luksave se samting we i rong long laef blong mi, hemia se mi mi no moa kasem lav long Jeova mo long ogenaesesen blong hem, mo oli no moa lidim mi.”
18 ?Taem brata ya i kambak long kongregesen, ol narafala oli mekem olsem wanem long hem? Hem i talem se: “Mi mi harem olsem boe we i lusum rod, we Jisas Kraes i tokbaot. Wan olfala sista we i stap long kongregesen 30 yia bifo mo i stap gohed strong yet, i talem long mi se: ‘!Boe blong mi, i gud tumas we yu kamhom!’ Tok ya i rili tajem hat blong mi. Tru ya, mi harem se mi kamhom. Mo mi wantem talemaot tangkiu we i stap long hat blong mi from lav, kaen fasin, longfala tingting, mo intres we elda ya mo ol narafala long kongregesen oli bin soem long mi. From we oli lavem Jeova mo oli lavem ol man raonabaot long olgeta, hemia nao samting we i givhan long mi blong joen bakegen wetem ol sipsip blong God.”
!Pulum Olgeta Blong Tekem Aksen Naoia!
19, 20. ?Yu save tokbaot wanem blong leftemap tingting blong olgeta we oli no moa mekem wok blong God blong oli kambak kwik long kongregesen? ?Mo olsem wanem yu save soem long olgeta se God i no askem tumas samting long olgeta?
19 Yumi stap long ol las dei, mo en blong rabis wol ya i klosap tumas. From samting ya, yumi mas leftemap tingting blong olgeta we oli no moa mekem wok blong Jeova, blong oli kambak long ol Kristin miting. Traem pulum olgeta blong stat naoia nomo. Mekem olgeta oli tingbaot se Setan i stap traehad blong spolem fasin fren blong olgeta wetem God. Hem i wantem we oli ting se ol trabol blong laef bambae i godaon sipos oli lego trufala wosip. Yu save mekem tingting blong olgeta i strong se i gat wan rod nomo blong oli rili spel gud long ol trabol mo faenem pis long laef blong olgeta, hemia blong folem Jisas mo stap tru long hem.—Ridim Matiu 11:28-30.
20 Eksplenem bakegen long olgeta se God i askem yumi blong mekem samting ya nomo we yumi naf blong mekem. Smoltaem bifo we Jisas i ded, sam man oli tok agens long Meri, sista blong Lasaros, from we hem i kafsaedem wan senta we praes blong hem i antap tumas, i go long hed blong Jisas. Be Jisas i talem long olgeta se: “!Ei! !Yufala i livim woman ya! . . . Woman ya i mekem wan samting we hem i naf blong mekem.” (Mak 14:3-8) Mo tu, Jisas i talem ol gudfala toktok long saed blong wan wido woman we i pua. Woman ya i putum tu smol mane nomo long bokis blong presen mane long haos blong God. Hem tu i mekem samting we hem i naf blong mekem. (Luk 21:1-4) Bighaf blong yumi, yumi naf blong kam long ol Kristin miting mo joen long wok blong talemaot Kingdom. Wetem help blong Jeova, plante we oli no moa mekem wok blong Jeova, oli kam naf tu blong mekem ol samting ya.
21, 22. ?Yu save mekem olgeta we oli kambak long Jeova oli sua long wanem samting?
21 ?Olsem wanem sipos wan sipsip blong God we i lus i fraet blong lukluk ol Kristin brata mo sista bakegen? Yu save mekem hem i tingbaot bigfala glad we i kamaot taem boe we i lusum rod i kamhom. Olgeta we oli kambak long kongregesen oli mekem bigfala glad i kamaot tu. Yu mas leftemap tingting blong olgeta blong tekem aksen naoia blong agensem Setan mo blong kam klosap long God.—Jem. 4:7, 8.
22 Taem olgeta we oli gowe long Jeova oli kambak, hemia wan taem blong bigfala glad. (Krae 3:40) Ating bifo oli bin kasem bigfala glad long wok blong God. !Mo bambae oli kasem fulap blesing long fiuja, sipos oli kwik blong joen bakegen wetem ol sipsip blong God!
[Futnot]
^ par. 13 Levitikas 5:1, NW: “Sipos wan man i harem narafala i tok swea long pablik ples, no i luk wan fasin olsemia, no i faenemaot se wan man i bin mekem olsem, be hem i no ripotem, ale man ya i mekem sin mo i mas kasem panis from rong blong hem.”
?Bambae Yu Yu Ansa Olsem Wanem?
• ?Maet yu mekem wanem blong givhan long wan Kristin we i foldaon mo i no moa mekem wok blong Jeova?
• ?Wanem ol toktok we maet i givhan long wan Kristin we i no moa joen wetem ol sipsip blong God from we hem i no agri long wan tijing?
• ?Olsem wanem yumi save halpem wan sipsip we i fraet blong kambak long kongregesen?
[Kwestin]
[Tok blong pija long pej 17]
Taem wan Kristin we i no moa mekem wok blong Jeova i talemaot tingting blong hem, yumi mas lesingud long hem
[Tok blong pija long pej 18]
Samfala oli tingting dip long parabol blong boe we i lusum rod, nao oli kambak long kongregesen