Holem Tingting Blong Baebol Long Saed Blong Helt
Holem Tingting Blong Baebol Long Saed Blong Helt
“Yufala i mas lavem Hae God ya [“Jeova,” NW] we i God blong yufala . . . long olgeta tingting blong yufala, mo long olgeta paoa blong yufala.”—MAK 12:30.
1. ?Wanem plan blong God fastaem long saed blong ol man?
LONG plan we Jeova God i mekem fastaem long saed blong ol man, i no gat sik mo ded. Hem i putum Adam mo Iv long garen blong Iden, wan naesfala ples blong harem gud, “blong [tufala] i lukaot long ol samting we i stap long hem.” Hem i wantem se tufala i laef olwe long ples ya, i no blong 70 no 80 yia nomo. (Jen. 2:8, 15; Sam 90:10) Sipos faswan man mo woman tufala i bin holemstrong long Jeova mo tufala i bin obei long hae rul blong hem from we tufala i lavem hem, ale tufala i no save sik, kam slak, mo ded.
2, 3. (a) ?Wanem ol trabol blong olfala we buk blong Prija i tokbaot? (b) ?Hu i stamba blong ded we yumi kasem long Adam? ?Ded ya bambae i finis olsem wanem?
2 Prija japta 12 i yusum ol klia tok blong eksplenem ‘ol trabol we i kasem yumi’ ol sinman, taem yumi kam olfala. (Ridim Prija 12:1-7.) Hea blong yumi i kam waet. Ol leg blong yumi oli kam slak, oli no moa strong blong wokbaot. Ae blong yumi i kam nogud, yumi no moa save luklukgud. Ol tut blong yumi oli stap folfoldaon, i no moa gat plante i stap blong yumi kakae long hem.
3 Ol trabol ya oli no stap long plan blong God. Ded we yumi kasem long Adam, hem tu i no stap long plan blong God. Hem i wan “wok we Setan i mekem.” Pikinini blong God bambae i yusum Kingdom blong Mesaea blong brekemdaon wok ya. Aposol Jon i raetem se: “From samting ya nao Pikinini blong God i kamtru, blong hem i brekemdaon ol wok we Setan i mekem.”—1 Jon 3:8.
I Stret We Yumi Tingbaot Helt Blong Yumi
4. ?From wanem i stret we ol man blong Jeova oli tingbaot helt blong olgeta? ?Be oli mas luksave wanem?
4 Tede sam man blong Jeova oli stap fesem ol sik mo ol problem blong olfala, olsem we olgeta sinman oli mas fesem. Long taem olsem, i stret nomo we yumi wantem gat gud helt bakegen, mo tingting ya i save givhan long yumi. ?Hu i no wantem mekem wok blong Jeova ‘long olgeta paoa blong hem’? (Mak 12:30) I gud blong traem lukaotgud long bodi blong yumi blong i stap strong. Be yumi mas gat stret tingting. Yumi mas luksave se yumi no save blokem olgeta sik, mo yumi no save blokem fasin blong kam olfala.
5. ?Fasin blong ol gudfala man blong God we oli stanap strong nating se oli stap siksik, i tijim yumi long wanem?
5 Plante gudfala man blong Jeova bifo oli bin kasem trabol long saed blong helt. Wan long olgeta, hemia Epafrodaetas. (Fil. 2:25-27) Timoti we hem i gudfala fren blong Pol, hem tu i bin gat sik long bel blong hem. Ale Pol i talem long hem se i gud we hem i dring “smol waen” blong givhan long sik blong hem. (1 Tim. 5:23) Pol tu i bin gat wan trabol long bodi blong hem we hem i talem se i stikim hem “olsem nil blong aranis.” Maet hemia wan problem blong ae no wan narafala sik we i no gat meresin blong hem long taem bifo. (2 Kor. 12:7; Gal. 4:15; 6:11) Pol i askem plante taem long Jeova blong i tekemaot trabol blong hem we i “olsem nil blong aranis.” (Ridim 2 Korin 12:8-10.) Be God i no mekem wan merikel blong tekemaot trabol ya. Wanem we God i mekem, hem i givim paoa long Pol blong i stanap strong, nating se hem i stap siksik. Olsem nao, taem Pol i slak from sik blong hem, paoa blong Jeova nao i mekem hem i strong. ?Olsem wanem? ?Stori ya blong Pol i save tijim yumi?
Yumi No Mas Wari Bitim Mak Long Helt Blong Yumi
6, 7. ?From wanem yumi no mas wari bitim mak long helt blong yumi?
6 Olsem yu save, ol Witnes blong Jeova oli tekem meresin mo oli folem ol defren kaen tritmen from sik blong olgeta. Plante taem Wekap! i tokbaot sam trabol long saed blong helt. I tru, mifala i no leftemap wan tritmen se hem i moagud long ol narawan. Be mifala i talem tangkiu long ol dokta mo ol narafala we oli wok long saed blong helt, taem oli givhan long yumi mo oli respektem tingting blong yumi. Yumi save se bodi blong yumi i no save kam stretgud olgeta naoia. Taswe, i no waes blong tingting tumas mo wari bitim mak long helt blong yumi. Fasin blong yumi i mas defren long ol man we oli ‘no putum tingting blong olgeta i stap strong long ol promes blong God.’ Olgeta ya oli ting se laef ya hemia nomo we yumi gat naoia, ale oli folem enikaen tritmen nomo blong traem winim sik blong olgeta. (Efes. 2:2, 12) Yumi mas gat strong tingting blong no mekem samting we Jeova i save kros long yumi from, jes from we yumi wantem sevem laef blong yumi naoia. Yumi save se sipos yumi holemstrong long God, bambae yumi “kasem laef ya we i prapa wan,” hemia laef we i no save finis long niufala wol we God i promes blong mekem.—1 Tim. 6:12, 19; 2 Pita 3:13.
7 I gat wan narafala risen from wanem yumi no wari bitim mak long helt blong yumi. Sipos yumi tingting tumas long helt blong yumi, yumi save kam wan man we oltaem i tingbaot hem wan nomo. Pol i givim woning agensem fasin ya. Hem i talem long ol Kristin long Filipae blong oli ‘givgivhan long olgeta long laef blong olgeta. I nogud wan man i stap lukaot long laef blong hem nomo.’ (Fil. 2:4) I stret nomo we yumi lukaot gud long bodi long yumi. Be sipos yumi intres gud long ol Kristin brata mo sista blong yumi mo ol man we yumi talemaot “gud nius blong kingdom” long olgeta, bambae yumi no save tingting bitim mak long helt blong yumi.—Mat. 24:14, NW.
8. ?Sipos yumi wari bitim mak long helt blong yumi, samting ya i save lidim yumi blong mekem wanem?
8 I gat denja i stap se sipos wan Kristin i wari bitim mak long helt blong hem, bambae ol wok blong Kingdom oli no moa impoten long tingting blong hem. Mo tu, sipos yumi tingting tumas long saed blong helt, yumi save traem fosem ol narafala blong folem tingting blong yumi, maet long saed blong sam kakae, tritmen, no meresin we yumi ting se i gud tumas. I gud yumi tingbaot stamba trutok ya we Pol i talem long ol Kristin, i se: “Yufala i mas meksua se yufala i mekem ol samting we oli impoten moa, nao bambae yufala i no gat poen mo yufala i no save mekem narafala i foldaon go kasem dei blong Kraes.”—Fil. 1:10, NW.
?Wanem i Impoten Moa?
9. ?Wanem wan samting we i impoten moa we yumi no mas fogetem blong mekem, mo from wanem?
9 Yes, yumi mas meksua se yumi mekem ol samting we oli impoten moa. Hemia i min se bambae yumi joen oltaem long wok we i givhan long ol narafala blong oli frengud wetem God. Yumi mekem olsem taem yumi prij mo yumi tijim ol man long Tok blong God. Wok ya i givim glad, i mekem i gud long yumi, mo i halpem ol narafala tu we yumi tijim olgeta. (Prov. 17:22; 1 Tim 4:15, 16) Sam Wajtaoa mo Wekap! oli talem stori blong sam Kristin brata sista we oli gat ol bigfala sik, mo sam long ol stori ya oli tokbaot wanem we ol brata sista ya oli stap mekem blong oli save stanap strong. Oli tokbaot tu ol traehad blong olgeta blong givhan long ol narafala blong save Jeova mo ol nambawan promes blong hem, mo olsem wanem wok ya i givhan long olgeta blong fogetem sik blong olgeta blong smoltaem. *
10. ?From wanem jus we yumi mekem long saed blong tritmen, i impoten?
10 Long saed blong ol problem blong helt, wanwan Kristin we oli bigwan finis ‘oli gat wok blong olgeta.’ Olgeta nomo oli mas jusum wanem tritmen we bambae oli folem. (Gal. 6:5) Be yumi no mas fogetem se jus we yumi mekem i impoten long Jeova. Yumi respektem ol tingting blong hem long Baebol, taswe yumi no mekem samting we i olsem fasin blong “kakae blad.” Bigfala respek ya long Tok blong God bambae i pusum yumi tu blong yumi no folem enikaen narafala tritmen we i agensem Baebol, mo we i save spolem fasin fren blong yumi wetem Jeova. (Wok 15:20) Sam rod blong faenemaot sik mo sam tritmen, oli klosap sem mak long wok blong ol rabis spirit. Jeova i kros long ol man Isrel bifo, we oli gowe long hem from we oli yusum “wan paoa we i narakaen,” i min se oli joen long wok blong ol rabis spirit. Hem i talem long olgeta se: “Yufala i stap givim ol presen ya long mi, be blong nating nomo. Taem mi harem smel blong insens ya blong yufala, mi mi wantem traot. Yufala i stap mekem ol Lafet blong Niumun, mo yufala i stap blokem Sabat Dei i tabu, mo yufala i stap mekem ol miting blong wosip, be mi mi no wantem luk [“we yufala i yusum wan paoa we i narakaen taem yufala i stap go long ol tabu miting ya,” NW].” (Aes. 1:13) Yumi no wantem mekem wan samting we i save blokem ol prea blong yumi mo spolem fasin fren blong yumi wetem God, antap moa, taem yumi stap sik.—Krae 3:44.
I Nidim “Tingting We i Kliagud”
11, 12. ?From wanem yumi nidim “tingting we i kliagud” taem yumi jusum rod blong faenemaot mo winim sik?
11 Taem yumi sik, yumi no mas ting se Jeova bambae i mekem wan merikel blong mekem bodi blong yumi i gud bakegen. Be yumi save prea blong askem hem blong givim waes long yumi, blong yumi jusumgud ol tritmen we bambae yumi folem. Yumi mas letem ol tok blong Baebol mo stret tingting i lidim yumi blong mekem jus ya. Sipos yumi gat wan strong sik, yumi go luk dokta. Be ating i waes tu we yumi traem luk sam narafala dokta bakegen, blong save tingting blong olgeta tu long sik ya. Fasin ya i laenap wetem tingting we i stap long Ol Proveb 15:22 (NW), se: “Olgeta plan blong man oli save foldaon sipos oli no toktok gud tugeta fastaem. Be taem i gat fulap man blong givim advaes, bambae ol plan oli kamtru.” Aposol Pol i talem long ol Kristin se taem oli “laef long medel blong ol man long wol ya, oli mas gat tingting we i kliagud, oli mas gat stret fasin, mo oli mas onagud long [God].”—Taet. 2:12, NW.
12 Plante man oli gat sem filing olsem wan woman long taem blong Jisas. Mak 5:25, 26 i talem se: “I gat wan woman i kam we hem i gat sik blong woman, we sik ya i stap long hem oltaem gogo kasem twelef yia, we i no finis nating. Mo oltaem hem i stap harem nogud tumas. Hem i pas long plante dokta finis, i lusum ol mane blong hem, be sik ya i no godaon nating i stap kam mowas.” Jisas i sore long woman ya mo i mekem sik blong hem i kamgud. (Mak 5:27-34) Sam Kristin we oli harem nogud tumas from wan sik, oli tingting blong jusum wan rod blong faenemaot sik no folem wan tritmen we i agensem tingting blong God long saed blong klin wosip.
13, 14. (a) ?Olsem wanem Setan i save yusum tritmen we yumi jusum blong pulum yumi blong brekem loa blong Jeova? (b) ?From wanem yumi mas stap longwe long olgeta samting we oli klosap sem mak long wok blong ol rabis spirit?
13 Setan bambae i traem yusum enikaen rod nomo blong pulumaot yumi long trufala wosip. Hem i stap yusum ol rabis fasin long saed blong seks mo fasin blong ronem ol sas samting, blong mekem samfala oli foldaon. Sam narafala, hem i stap traehad blong pulum olgeta blong brekem loa blong Jeova from sam tritmen we i no stret, mo we i klosap sem mak long wok blong ol rabis spirit. Yumi stap prea long Jeova blong hem i blokem “Setan” i no kam spolem yumi mo blong hem i tekemaot yumi long ‘ol fasin we i no stret.’ Taswe yumi no save tanraon mo mekem samting we i klosap sem mak long wok blong ol rabis spirit, mo we i givim janis long Setan blong spolem yumi.—Mat. 6:13; Taet. 2:14.
14 Jeova i putum wan loa long ol man Isrel se oli no mas go luk kleva mo mekem majik. (Dut. 18:10-12) Pol i talem se “bisnes blong posen mo kleva” i wan long ‘ol rabis samting we tingting blong man i wantem.’ (Gal. 5:19, 20) Mo tu, “ol man blong mekem posen mo kleva” oli no save stap long niufala wol we Jeova bambae i mekem. (Rev. 21:8) I klia se Jeova i no laekem nating, enikaen samting we i joen wetem wok blong ol rabis spirit.
‘Soemaot Se Yu Yu Gat Stret Tingting’
15, 16. ?From wanem yumi mas waes taem yumi jusum rod blong lukaot long helt blong yumi? ?Wanem waes advaes we hed kampani i givim long faswan handred yia?
15 Ol samting we yumi tokbaot antap i soemaot se sipos yumi ting se maet wan rod blong faenemaot sik blong yumi no wan tritmen i joen wetem rabis spirit, be yumi waes blong talem ‘no’ long tritmen ya. I tru, hemia i no min se sipos yumi no save eksplenem olsem wanem wan tritmen i wok, ale tritmen ya i joen wetem ol rabis spirit, nogat. Be blong holem tingting blong Baebol long saed blong ol rod blong lukaot gud long helt blong yumi, yumi nidim waes we i kamaot long God mo yumi nidim fasin luksave tu. Long Ol Proveb japta 3, yumi ridim advaes ya se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem. . . . I gud yu holemstrong waes ya blong yu, mo fasin ya blong yu we yu save luksave mining blong ol samting we i had. Yu mas lukaot gud blong yu no lusum tufala samting ya. Bambae tufala fasin ya i givim laef long yu, mo laef ya blong yu bambae i gudwan, we bambae yu glad long hem oltaem.”—Prov. 3:5, 6, 21, 22.
16 Taswe, i tru, yumi traem blong gat gudfala helt. Be long semtaem, yumi lukaot gud blong no mekem wan samting we God i no glad long hem, blong winim sik mo ol trabol blong olfala. Mo tu, long saed blong ol rod blong lukaot gud long helt blong yumi, yumi mas ‘soemaot long olgeta man se yumi gat stret tingting.’ Blong mekem olsem, yumi mas folem ol tok blong Baebol, olsem yumi mekem long ol narafala samting long laef blong yumi. (Fil. 4:5, NW) Long faswan handred yia, hed kampani i raetem wan leta we i impoten tumas long ol Kristin, blong talem long olgeta blong stap longwe long wosip blong ol aedol, blad, mo ol nogud fasin long saed blong seks. Leta ya i mekem promes long olgeta se: “Sipos yufala i stap blokem gud ol samting ya, bambae laef blong yufala i gud.” (Wok 15:28, 29, NW) ?Olsem wanem laef blong olgeta bambae i gud?
No Bitim Mak Naoia Mo Tingbaot Gudfala Helt Long Fiuja
17. ?Olsem wanem yumi harem gud moa long bodi blong yumi from we yumi folem ol tok blong Baebol?
17 I gud we yumi wanwan i traem ansarem kwestin ya: ‘?Mi mi luksave olsem wanem fasin blong mi blong obei long ol tok blong Baebol long blad mo long rabis fasin long saed blong seks, i mekem i gud long mi?’ Tingbaot tu, olsem wanem traehad blong yumi blong ‘sakemaot olgeta samting long bodi blong yumi mo long tingting blong yumi we oli stap mekem yumi doti long fes blong God,’ i mekem i gud long yumi. (2 Kor. 7:1) Sipos yumi folem ol advaes blong Baebol we i givhan long yumi blong mekem bodi blong yumi i stap klin oltaem, yumi save blokem plante sik. Mo tu, laef blong yumi i gud moa from we yumi sakemaot fasin blong smok mo tekem drag, we i save mekem bodi blong yumi i doti mo i mekem yumi doti tu long fes blong God. Tingbaot tu olsem wanem yumi mekem i gud long helt blong yumi taem yumi no bitim mak long saed blong kakae mo dring. (Ridim Ol Proveb 23:20; Taetas 2:2, 3.) I tru, sipos yumi spelgud mo yumi mekem smol eksasaes, samting ya i save mekem i gud long helt blong yumi. Be samting we i rili mekem bodi blong yumi i strong mo fasin fren blong yumi wetem God i gud, hemia ol advaes blong Baebol we yumi folem.
18. ?Wanem samting we i mas impoten moa long yumi? ?Mo yumi stap wet blong luk wanem profet tok i kamtru long saed blong helt?
18 Samting we i moa impoten, hemia blong lukaot gud long helt blong yumi long saed blong spirit, mo traem mekem nambawan fasin fren blong yumi wetem Papa blong yumi long heven i kam strong moa. Hem nao i Stamba blong “laef ya long wol, mo bakegen, long laef ya we bambae i kamtru biaen,” long niufala wol we hem i promes blong mekem. (1 Tim. 4:8; Sam 36:9) Long niufala wol ya, bambae ol man oli kamgud fulwan long saed blong spirit mo bodi, taem ransom sakrefaes blong Jisas i tekemaot olgeta sin blong olgeta. Smol Sipsip blong God, Jisas Kraes, bambae i lidim yumi i go long “springwota ya we i save givim laef,” mo God bambae i ravemaot wota blong ae blong yumi. (Rev. 7:14-17; 22:1, 2) Long taem ya, bambae yumi luk nambawan profet tok ya i kamtru, se: “Bambae i no moa gat man olbaot long kantri ya we i save talem se hem i sik.”—Aes. 33:24.
19. ?Taem yumi lukaot gud long helt blong yumi mo yumi no bitim mak long saed ya, yumi save gat strong tingting long wanem samting?
19 Yumi bilif strong se i no longtaem nating, bambae yumi fri long rabis wol ya. Mo yumi wantem tumas blong luk taem ya we Jeova bambae i tekemaot olgeta sik mo ded. Go kasem taem ya, yumi save gat strong tingting se Papa blong yumi we i lavem yumi mo ‘i stap tingbaot yumi,’ bambae i givhan long yumi blong stanap strong tru long ol hadtaem we sik i mekem long yumi. (1 Pita 5:7) From samting ya, i gud yumi lukaotgud long helt blong yumi. !Be oltaem yumi mas mekem samting ya folem ol klia advaes long Tok blong God!
[Futnot]
^ par. 9 Oli raetem nem blong sam long ol stori ya long bokis long pej 17 blong Wajtaoa blong Septemba 1, 2003.
Blong Tingtingbak
• ?Hu i stamba blong ol sik? ?Hu bambae i tekemaot ol trabol ya we sin i mekem long yumi?
• I stret we yumi tingbaot helt blong yumi, ?be yumi mas blokem wanem?
• ?From wanem, jus we yumi mekem long saed blong tritmen i impoten long Jeova?
• ?Sipos yumi folem ol tok blong Baebol, olsem wanem samting ya i save mekem i gud long helt blong yumi?
[Kwestin]
[Tok blong pija long pej 22]
God i no wokem man blong i kam sik mo i kam olfala
[Tok blong pija long pej 23]
Nating se ol man blong Jeova oli gat ol problem long saed blong helt, oli faenem glad yet long wok blong prij