?From Wanem Yu Yu Mas Holemstrong Long Jeova?

“Jeova, yu jajem mi folem stret fasin blong mi, mo folem fasin blong mi blong holemstrong long yu.”—SAM 7:8, NW.

1, 2. ?Wanem sam samting we oli save hapen long laef blong ol Kristin, we oli traem fasin blong olgeta blong holemstrong long God?

TRAEM tingbaot trifala samting ya we oli save hapen: Faswan se, wan boe i stap long skul nao sam fren blong hem oli stap jikim hem. Oli stap traem blong mekem hem i kros, oli wantem pulum hem blong swea long olgeta no faetem olgeta. ?Olsem wanem? ?Boe ya bambae i givimbak long olgeta, no bambae hem i blokem kros blong hem mo gowe? Seken samting se, wan hasban i stap long haos hem wan, mo i stap lukaot sam save long Intenet. Nao wantaem nomo wan mesej i kamaot long kompiuta, i talem wan Web saet we i gat ol rabis pija blong seks long hem. ?Olsem wanem? ?Man ya bambae i go long Web saet ya, no bambae hem i meksua se i stap longwe long hem? Namba tri samting se, wan Kristin woman i stap storian wetem sam narafala woman, ale storian i stat blong go nogud, oli stat tokbaot wan sista long kongregesen. ?Olsem wanem? ?Kristin woman ya bambae i joenem toktok ya i go, no bambae hem i traem jenisim storian i go long wan gudfala samting?

² Trifala samting ya oli defdefren, be i gat wan samting we i sem mak long saed blong trifala evriwan. Fasin blong ol Kristin ya blong holemstrong long Jeova, i kasem traem. ?Taem yu fesem ol wari blong laef, no yu nidim sam samting, no taem yu putum ol mak we yu traehad blong kasem, yu yu stap tingbaot fasin blong yu blong holemstrong long Jeova? Evri dei ol man oli tingbaot ol samting olsem, garen blong olgeta, praes blong evri samting we i stap go antap, haos, mo helt blong olgeta. Ating yumi spenem plante taem long ol samting ya from we yumi ting se oli impoten. ?Be taem Jeova i lukluk gud long hat blong yumi, wanem samting we hem i ting se i moa impoten? (Sam 139:23, 24) Hem i wantem luk se yumi stap holemstrong long hem.

3. ?Jeova i letem yumi wanwan i jusum wanem? ?Bambae yumi tokbaot wanem long stadi ya?

³ Jeova, we hem i givim “evri samting we oli gud mo evri presen we oli nambawan,” i givim plante presen long yumi. (Jem. 1:17) Yumi talem tangkiu long hem from ol presen we hem i givim olsem, bodi, tingting, mo helt blong yumi, mo from we yumi naf blong mekem plante samting. (1 Kor. 4:7) Be Jeova i no fosem yumi blong holemstrong long hem. Hem i letem yumi wanwan i jusum sipos yumi wantem holemstrong long hem no nogat. (Dut. 30:19) From samting ya, yumi nidim blong stadi long fasin ya blong holemstrong long God, blong yumi save gud se i olsem wanem. Mo tu, bambae yumi tokbaot tri risen from wanem i impoten tumas blong holemstrong long Jeova.

?Wanem Ya Fasin Blong Holemstrong Long God?

4. ?Wanem ya fasin blong holemstrong long God? ?Loa blong Jeova long saed blong ol anamol we ol man oli givim olsem sakrefaes, i tijim yumi long wanem?

⁴ Klosap olgeta man oli ting se fasin blong holemstrong i min se man i stap tru long wan narafala man, i holemtaet wan bilif, no wan loa. Taem Baebol Long Bislama i tokbaot fasin ya blong holemstrong long God, hem i yusum tok ya ‘stret man,’ i min se fasin blong man i gud, hem i mekem i stret, mo i no save mekem kruked fasin. Stamba tok long Hibru we oli tanem i kam “holemstrong” i minim, gud olgeta, wan samting we i fulwan, i no gat wan samting i rong long hem. Baebol i yusum tok ya long saed blong ol sakrefaes we ol man blong God oli givim i go long God. Blong God i glad long anamol we oli givim olsem sakrefaes, i no mas gat wan samting i rong long anamol ya, fulwan bodi blong hem i mas gud. (Ridim Levitikas 22:19, 20.) Jeova i jajem strong olgeta we oli no obei long ol tok blong hem, hemia ol man we oli mekem sakrefaes long anamol we wansaed leg blong hem i nogud, no maet anamol ya i sik, no i blaen.—Mal. 1:6-8.

5, 6. (a) ?Wanem i soem se plante taem yumi tinghae long samting we i gud olgeta no i fulwan? (b) ?Long saed blong yumi ol sinman, yumi save holemstrong long God? Eksplenem.

⁵ I no wan narakaen tingting blong wantem kasem  mo tinghae long samting we i gud olgeta, no i fulwan. Traem tingbaot wan man we i stap faenem mo hivimap ol olfala buk. Ating longtaem finis hem i lukaot wan spesel buk. Ale hem i faenem buk ya, be hem i luk se sam impoten pej blong buk ya oli lus finis. Hem i mas harem nogud, ating hem i no moa wantem buk ya. Traem tingbaot wan woman we i stap wokbaot klosap long solwota, i stap pikimap ol sel we solwota i sakem long sanbij. Wanwan taem, woman ya i bendaon blong lukluk gud long wan sel, from we hem i laekem blong luk ol defdefren kaen sel we oli naes tumas. ?Yu ting se woman ya bambae i pikimap wanem kaen sel? Bambae hem i pikimap olgeta we oli gud, oli fulwan, i no gat wan haf blong olgeta we i brok. Long sem fasin, God i stap lukaot ol man we oli gud, i no gat samting i rong long olgeta.—2 Kron. 16:9.

⁶ Maet yu ting se man we i holemstrong long God i mas wan man we i no gat sin. From we yumi sinman mo yumi no stret olgeta, maet yu ting se yumi olsem buk ya we sam pej blong hem oli lus no yumi olsem wan sel we i brokbrok. ?Samtaem yu yu gat filing olsem? Yu no mas harem nogud. Jeova i save se yumi sinman. Hem i no save askem yumi blong mekem samting we yumi no naf blong mekem. * (Sam 103:14; Jem. 3:2) Nating se i olsem, hem i wantem we yumi holemstrong long hem. ?Olsem wanem? ?Man we i holemstrong long God i defren long man we i stretgud olgeta? Yes. Tingbaot wan yangfala man we i lavem wan yangfala woman, mo hem i wantem mared wetem woman ya. Man ya i krangke sipos hem i ting se woman ya i mas stretgud olgeta. Be i stret nomo mo i waes tu sipos hem i ting se woman ya i mas lavem hem wetem olgeta hat blong hem, i min se hem i no mas lavem wan narafala man olsem we i lavem hem. Long sem fasin, Jeova i wantem we yumi “mekem wosip long hem” nomo, hem ‘i no save letem yumi blong yumi mekem wosip long narafala god bakegen.’ (Eks. 20:5) Hem i no ting se yumi mas stretgud olgeta, be hem i wantem we yumi lavem hem wetem olgeta hat blong yumi, yes, yumi mekem wosip long hem nomo.

7, 8. (a) ?Wanem eksampol we Jisas i givim long saed blong fasin blong holemstrong long God? (b) ?Fasin blong holemstrong we Baebol i tokbaot, hem i olsem wanem?

⁷ Maet yumi tingbaot ansa we Jisas i givim taem wan man i askem long hem blong talem wanem loa we i impoten moa. (Ridim Mak 12:28-30.) Jisas i no talem nomo ansa blong kwestin ya, be hem i folem samting we hem i talem long laef blong hem. Hem i givim beswan eksampol olsem wanem man i save lavem Jeova wetem olgeta tingting, hat, laef, mo paoa blong hem. Hem i soemaot se i no ol toktok blong man nomo we i mekem se hem i holemstrong long Jeova, be ol gudfala samting we man i mekem mo we gudfala tingting i pusum hem blong mekem, hemia nao samting we i soem se hem i holemstrong. Sipos yumi wantem holemstrong long Jeova, yumi mas folem fasin blong Jisas.—1 Pita 2:21.

⁸ Ale, fasin blong holemstrong we Baebol i tokbaot i olsem: Man i ona wetem fulhat blong hem long wan Man nomo long heven, hemia Jeova God. Hem i mekem samting we God i wantem wetem fulhat blong hem, mo i agri fulwan long ol tingting mo plan blong God. Man ya i traehad evri dei long laef blong hem blong mekem Jeova God i glad, i bitim we hem i traem mekem ol narafala man oli glad. Ol samting we man ya i putum long fasples long laef blong hem, hemia ol samting we God i ting se oli impoten. Bambae yumi tokbaot tri risen from wanem samting ya i impoten tumas.

1. Fasin Blong Holemstrong Long God Mo Kwestin Long Saed Blong Hae Rul Blong Hem

9. ?Olsem wanem fasin blong yumi wanwan blong holemstrong long Jeova i joen wetem hae rul blong hem long heven mo long wol?

⁹ Nating se yumi holemstrong long Jeova no nogat, samting ya bambae i no jenisim hae rul blong hem. Hae rul blong Jeova i mekem i stret long olgeta man, i no save finis samtaem, mo i kavremap heven mo wol. Bambae i stap olsem olwe, nomata wanem samting ol man oli talem no oli mekem. Be i tru se, fulap man long heven mo long wol oli tok nogud long hae rul blong God. Taswe hem i mas soemaot long olgeta man long heven mo wol se hem i gat raet blong rulum olgeta, mo se hae rul blong hem i stret, i gud, mo i soemaot lav. Yumi ol Witnes blong Jeova, yumi laekem tumas blong tokbaot hae rul blong God long ol man we oli glad blong lesin. ?Be olsem wanem ol jus mo aksen blong yumi wanwan, oli save soemaot se yumi luksave  hae rul blong God? ?Olsem wanem yumi soemaot se yumi jusum Jeova blong i rul long yumi? Blong soemaot samting ya, yumi mas holemstrong long Jeova.

10. ?Wanem poen we Setan i putum agensem ol man long saed blong fasin blong olgeta blong holem strong long God? ?Yu yu wantem mekem wanem blong ansa long ol tok blong hem?

¹⁰ Tingbaot olsem wanem fasin blong yu blong holemstrong long Jeova i joen wetem bisnes ya. Setan i bin talem se i no gat wan man we bambae i stanap long saed blong hae rul blong God, mo se i no gat wan man we bambae i mekem wok blong Jeova from we hem i lavem Jeova nomo. Long wan bigfala miting blong ol enjel, Setan i talem long Jeova se: “[Man] i save lego olgeta samting we hem i gat blong i sevem laef blong hem.” (Job 2:4) Setan i no sakem ol rabis tok ya long stret man ya Job nomo. Hem i tok agensem olgeta man. Taswe Baebol i talem se Setan “i stap talemaot ol poen blong hem agens long [ol brata blong yumi] long fes blong God.” (Rev. 12:10) Hem i stap sakem tok long Jeova se olgeta Kristin, wetem yu tu, bambae oli no stap tru long hem. Setan i talem se bambae yu yu save lego Jeova blong sevem laef blong yu. ?Ol poen ya we Setan i putum agensem yu, oli mekem yu yu harem olsem wanem? ?Bambae yu yu glad blong gat janis blong soemaot se Setan i wan man blong giaman? Yu save mekem olsem sipos yu holemstrong long Jeova.

11, 12. (a) Talem sam eksampol we oli soemaot se kwestin ya se bambae yumi holemstrong long Jeova no nogat, i joen wetem ol desisen blong yumi evri dei. (b) ?From wanem i wan bigfala ona blong holemstrong long Jeova?

¹¹ Kwestin ya se bambae yu holemstrong long Jeova no nogat, i mekem se fasin blong yu evri dei mo ol jus we yu mekem oli impoten. Tingting bak long trifala samting we oli save hapen, we yumi bin tokbaot long paragraf 1 blong stadi ya. ?Man we i holemstrong long Jeova bambae i mekem wanem taem i fesem ol samting ya? Boe ya we ol fren blong hem long skul oli stap jikim hem, ating hem i harem se i wantem givimbak long olgeta. Be hem i tingbaot advaes ya blong Baebol se: “Sipos wan man i spolem yufala, bambae yufala i no givimbak fasin ya long hem bakegen. Yufala i mas livim hem i stap, blong God bambae i jajem hem, i givim panis long hem, from we Baebol i talem se, ‘Hae God i talem se, “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.”’” (Rom 12:19) Ale, boe ya i tanemraon, i gowe long olgeta. Hasban ya we i stap yusum Intenet, i isi nomo blong hem i lukluk ol doti pija blong seks. Be hem i tingbaot tok we Job i talem se: “Mi mi mekem wan strong promes finis, se sipos mi luk wan gel, bambae mi no save tingting nogud long hem.” (Job 31:1) Ale, hasban ya i mekem olsem Job. Hem i no lukluk ol rabis pija ya, be hem i stap longwe long olgeta olsem we oli posen. ?Olsem wanem long woman we i stap storian wetem ol fren blong hem nao oli stat tokbaot ol narafala blong spolem olgeta? Woman ya i tingbaot advaes ya se: “Yumi mas tingbaot ol fasin we ol Kristin brata mo sista blong yumi oli wantem, nao yumi mas mekem i gud long olgeta, blong mekem olgeta oli strong moa long bilif blong olgeta.” (Rom 15:2) Tok we woman ya i harem mo we maet hem i talemaot long narafala, bambae i no mekem bilif blong narafala i kam strong moa. Sipos hem i talemaot tok ya, bambae i no mekem ol narafala oli tinghae long Kristin sista blong hem, mo bambae i no mekem Papa blong hem long heven i glad tu. Ale woman ya i bos long tang blong hem mo i jenisim storian ya i go long wan gudfala rod.

¹² Wanwan long trifala Kristin ya oli mekem wan jus. I olsem we oli talem se: ‘Jeova i Man we i Rulum mi. Bambae mi traehad blong mekem samting we hem i glad long hem.’ ?Olsem wanem long yu? ?Taem yu mas mekem wan jus no wan desisen, yu yu traehad blong mekem samting we Jeova i glad long hem? Sipos yes, yu yu stap obeigud long ol gudfala tok long Ol Proveb 27:11 (NW), se: “Pikinini boe blong mi, yu mas waes, mo yu mas mekem hat blong mi i glad, blong bambae mi save ansa long hemia we i stap jikim mi.” !I wan bigfala ona blong gat janis blong mekem hat blong God i glad! ?Olsem wanem? ?Yu ting se i impoten we yumi mekem bes blong yumi blong holemstrong long Jeova?

2. Taem Jeova i Jajem Man, Hem i Luk Sipos Man Ya i Stap Holemstrong Long Hem

13. ?Olsem wanem tok blong Job mo Deved i soemaot se taem God i jajem yumi, hem i skelem yumi blong luk sipos yumi stret man?

¹³ Yumi luk finis se sipos yumi holemstrong long Jeova, yumi stanap long saed blong hae rul blong hem. Taswe, taem God i jajem yumi, hem i stap jekem sipos yumi holemstrong long hem. Job i kasem save gud long samting ya. (Ridim Job 31:6. *) Job i save se God i yusum “skel we i stret gud” blong skelem ol man, i min se hem i skelem fasin blong man wetem ol stret rul blong hem blong luk sipos man ya i holemstrong long hem. Deved tu i talem samting ya, i se:  “[“Jeova, yu jajem mi folem stret fasin blong mi, mo folem fasin blong mi blong holemstrong long yu,” NW]. Plis yu lukluk gud long fasin ya blong mi, yu givhan long mi. Yu yu God we fasin blong yu i stret nomo, yu yu stap jajem ol tingting blong mifala mo ol samting we mifala i wantem.” (Sam 7:8, 9) Yumi save se God i naf blong lukluk long ‘tingting blong man’ mo save wanem i stap long hat blong hem. Be yumi mas tingbaot wanem samting we God i stap lukaotem. Olsem Deved i talem, hem i wantem luk sipos yumi stap holemstrong long hem.

14. ?From wanem yumi no mas ting se sin we i stap long yumi bambae i blokem yumi blong yumi no save holemstrong long Jeova?

¹⁴ Tingbaot wok ya blong Jeova God blong skelem hat mo tingting blong plante bilian man. (1 Kron. 28:9) ?Hem i faenem hamas man tede we oli gat Kristin fasin ya blong holemstrong long hem? !Smol nomo! Be yumi no mas ting se yumi gat plante tumas poen long yumi, ale yumi no save holemstrong long hem. Nogat. I gat plante risen blong yumi trastem Jeova, olsem Deved mo Job, se hem bambae i faenem we yumi stap holemstrong long hem, nating we sin i stap long yumi. Tingbaot se, wan man we i stretgud olgeta, hem tu i save foldaon mo lego Jeova. Tri man nomo we oli stretgud olgeta oli bin stap long wol ya. Tu long olgeta, hemia Adam mo Iv, tufala i foldaon mo lego Jeova. Be plante milian sinman oli stap holemstrong long Jeova. Yu tu yu save mekem olsem.

3. Yumi Mas Holemstrong Long God, Blong Yumi Save Tingting Strong Se God Bambae i Sevem Yumi

15. ?Olsem wanem Deved i soemaot se i impoten we yumi holemstrong long God, blong yumi save gat strong tingting se God bambae i sevem yumi?

¹⁵ Taem Jeova i jajem yumi, hem i skelem yumi blong luk sipos yumi stap holemstrong long hem. Taswe, i impoten we yumi holemstrong long hem blong yumi save gat strong tingting se God bambae i sevem yumi. Deved i save samting ya. (Ridim Ol Sam 41:12. *) Deved i tinghae long janis we hem i gat blong kasem blesing blong God gogo i no save finis. Olsem ol trufala Kristin tede, Deved i putum tingting blong hem long laef we i no save finis. Taem Deved i gohed blong mekem wok blong Jeova God, hem i kam klosap moa long God oltaem. Deved i save se hem i mas holemstrong long God sipos i wantem we God bambae i sevem hem. Sem mak long yumi. Jeova bambae i givhan long yumi, i tijim yumi, i lidim yumi, mo i blesem yumi, sipos yumi holemstrong long hem.

16, 17. (a) ?From wanem yu yu gat strong tingting blong holemstrong long Jeova? (b) ?Wanem ol kwestin we nekis stadi bambae i tokbaot?

¹⁶ Blong stap glad, i impoten we yumi mas gat strong tingting se God bambae i sevem yumi. Strong tingting ya bambae i givim glad ya we yumi nidim blong winim ol hadtaem. Mo tu, tingting ya se God bambae i sevem yumi i save blokem ol nogud tingting blong oli no spolem yumi. Tingbaot we Baebol i talem se tingting ya se God bambae i sevem yumi i olsem wan hat blong faet. (1 Tes. 5:8) Hat blong faet i blokem hed blong soldia taem hem i stap faet. Long sem fasin, tingting ya se God bambae i sevem yumi, i save blokem ol nogud tingting we Setan i stap leftemap long olfala wol ya we i stap go blong lus. Tru ya, sipos yumi no putum tingting blong yumi i stap strong long wan gudfala fiuja, laef blong yumi naoia i nating nomo. Yumi mas lukluk gud long yumi wan, blong skelem sipos yumi stap holemstrong long God, mo blong luk sipos yumi gat tingting ya se bambae God i sevem yumi. Yu no mas fogetem se, sipos yu holemstrong long Jeova, yu yu stap sapotem hae rul blong hem, mo yu stap holemtaet gudfala tingting long saed blong fiuja se God bambae i sevem yu. !Oltaem yumi mas holemstrong long Jeova!

¹⁷ From we i impoten tumas blong holemstrong long Jeova, yumi mas tingbaot sam narafala kwestin. ?Olsem wanem yumi kasem fasin ya blong holemstrong long God? ?Olsem wanem yumi save holemtaet fasin ya? ?Yumi save mekem wanem sipos yumi foldaon, nao yumi no moa holemstrong long Jeova? Nekis stadi bambae i tokbaot ol kwestin ya.

[Ol futnot]

?Bambae Yu Yu Ansa Olsem Wanem?

• ?Wanem ya fasin blong holemstrong long God?

• ?Olsem wanem fasin blong holemstrong long Jeova i joen wetem hae rul blong hem long heven mo wol?

• ?Olsem wanem fasin blong holemstrong long Jeova i givhan long yumi blong yumi gat strong tingting se God bambae i sevem yumi?

[Kwestin]