Strong Tingting Blong Talemaot Gud Nius Fulwan
Strong Tingting Blong Talemaot Gud Nius Fulwan
“Jisas ya, hem i talem long mifala, se mifala i mas talemaot gud nius blong hem [“fulwan,” NW] long ol man.”—OL WOK 10:42.
1. ?Taem Pita i stap toktok long Konilias, hem i tokbaot wanem wok we Jisas i givim?
WAN man Itali we hem i kapten blong ol ami, i singaot ol fren mo famle blong hem oli kam joen wanples. Samting we i hapen biaen i makem wan bigfala jenis long fasin we God i stap mekem long ol man. Kapten ya we i wan man blong ona long God, hemia Konilias. Aposol Pita i talem long ol man ya we oli hivap, se Jisas i givim oda long ol aposol blong oli ‘talemaot gud nius blong hem fulwan.’ Ol toktok we Pita i talem long taem ya i karem plante frut. Plante man we oli no man Jiu oli kasem tabu spirit, oli tekem baptaes, mo oli gat janis blong kam ol king we oli rul wetem Jisas long heven. !Hemia i rili nambawan frut blong wok ya blong Pita blong talemaot gud nius!—Wok 10:22, 34-48.
2. ?Olsem wanem yumi save se oda ya blong talemaot gud nius i no go long ol 12 aposol nomo?
2 Pita i prij long Konilias long yia 36 K.T. Tu yia bifo, wan samting i hapen long man ya Sol we i blong taon ya Tasas, mo samting ya i jenisim laef blong hem fulwan. Sol i stap mekem ol fasin we oli strong bitim mak agensem ol Kristin. Be wan dei, taem hem i stap wokbaot long rod i go long Damaskes, Jisas i kamtru long hem, i talem se: “Yu girap, yu wokbaot, yu go long taon ya. Bambae long ples ya, wan man i save talemaot long yu, wanem samting we yu yu mas mekem.” Jisas i toktok long disaepol Ananaeas tu, mo i talem klia long hem se Sol bambae i prij “long ol man we oli no laen blong Isrel, mo long ol king, mo long ol laen blong Isrel tu.” (Ridim Ol Wok 9:3-6, 13-20.) Taem Ananaeas i storian long Sol, hem i talem se: “God ya blong ol olfala blong yumi, hem i jusumaot yu finis, . . . Ol samting ya we yu luk mo we yu harem, bambae yu mas talemaot long olgeta man, blong soemaot hem long olgeta.” (Wok 22:12-16) ?Olsem wanem? ?Sol, we biaen oli singaot hem se Pol, i tinghevi long wok ya blong talemaot gud nius long olgeta man?
!Hem i Talemaot Gud Nius Fulwan!
3. (a) ?Bambae yumi tokbaot wanem? (b) ?Ol elda long Efesas oli mekem wanem taem oli kasem mesej blong Pol? ?Wanem gudfala eksampol we oli givim long yumi?
3 Sipos yumi stadi long olgeta samting we Pol i mekem afta long taem ya, ating bambae ol stori ya oli pulum intres blong yumi bigwan. Be naoia, bambae yumi lukluk long wan tok nomo we Pol i mekem samwe long yia 56 K.T. Tok ya i stap long Ol Wok japta 20. Pol i givim tok ya i no longtaem bifo we hem i finisim namba tri misinari trip blong hem. Hem i ron long sip i go kasem taon ya Maelitas, klosap long Aegean Si. Hem i goso long ples ya, nao hem i sanem toktok i go long ol elda long kongregesen blong Efesas se oli mas kam luk hem. Efesas i stap samwe 50 kilometa longwe long Maelitas, be rod i longfala moa from we i stap tantanem olbaot. Tingbaot olsem wanem ol elda long Efesas oli glad tumas, taem oli kasem mesej blong Pol. (Skelem Ol Proveb 10:28.) Nating se i olsem, oli mas mekem plan blong wokbaot i go long Maelitas. Ating sam long olgeta oli mas askem spel long wok no satem stoa blong olgeta. Plante Kristin tede tu oli mekem samting ya blong oli no mestem wan haf blong distrik asembli evri yia.
4. ?Pol i mekem wanem long olgeta yia we hem i stap long Efesas?
4 ?Yu ting se Pol i mekem wanem long tri no fo dei we hem i wet long Maelitas, blong ol elda oli wokbaot i kam? ?Sipos yu, bambae yu mekem wanem? (Skelem Ol Wok 17:16, 17.) Ol tok we Pol i talem long ol elda blong Efesas oli givhan long yumi blong faenem ansa long kwestin ya. Hem i tokbaot laef blong hem long ol yia we i pas, mo samting we hem i bin mekem taem hem i stap long Efesas tu. (Ridim Ol Wok 20:18-21.) I no gat man i save agensem samting ya we hem i talem, se: “Yufala i save fasin blong mi finis, we mi stap mekem oltaem nomo taem mi stap wetem yufala, i stat long taem ya we mi kamtru long Esia fastaem go kasem taem we mi aot bakegen . . . mi mi stap talemaot ol trutok.” Yes, hem i gat strong tingting blong finisim wok we Jisas i givim long hem. ?Olsem wanem hem i talemaot trutok long Efesas? Wan rod, hem i go long ol ples we plante man Jiu oli stap long hem, nao hem i prij long olgeta. Luk i tokbaot ol yia we Pol i stap long Efesas, samwe long yia 52 kasem 55 K.T., i talem se Pol i go long haos blong prea blong ol man Jiu, mo i “mekem plante toktok from we hem i wantem pulum olgeta blong oli bilif.” Be ol man Jiu ya, “hed blong olgeta i strong tumas, oli no save bilif long hem.” Ale, Pol i aot long olgeta, i go long wan narafala ples long taon ya, mo i gohed blong prij long ples ya. Long rod ya, Pol i prij long ol Jiu mo ol man Gris tu long bigfala taon ya.—Wok 19:1, 8, 9.
5, 6. ?Olsem wanem yumi save se taem Pol i prij long olgeta haos wanwan, hem i go long ol man we oli no gat bilif?
5 Samfala we oli kam Kristin, biaen oli kam naf blong mekem wok blong elda, hemia nao ol elda we Pol i toktok long olgeta long Maelitas. Pol i mekem olgeta oli tingbaot fasin we hem i bin folem, i se: “Taem mi stap talemaot gud nius, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mi talemaot evri samting long yufala.” Tede, samfala oli talem se Pol i stap tokbaot ol visit we hem i bin mekem blong leftemap tingting blong ol man we oli bilif finis. Be tingting ya i no stret. Tok blong hem se hem i ‘tijim olgeta long fes blong ol man mo long ol haos blong olgeta,’ i stap tokbaot wok blong hem blong talemaot gud nius long ol man we oli no gat bilif. Nekis tok blong hem i soemaot samting ya i klia nomo. Hem i talem se hem i prij long ‘ol laen blong Isrel mo long ol narafala man [Gris], se oli mas tanem tingting blong olgeta from ol sin blong olgeta blong kam long God, mo oli mas bilif long Jisas.’ I klia se Pol i prij long ol man we oli no gat bilif, from we hem i talem se oli mas tanem tingting blong olgeta mo bilif long Jisas.—Wok 20:20, 21.
6 Wan man we i stadi dip long Kristin Grik haf blong Baebol, i eksplenem Ol Wok 20:20 olsem: “Pol i stap tri yia long Efesas. Hem i go long olgeta haos wanwan. Blong talem long fasin we i stret moa, hem i prij long olgeta man (vas 26). Hemia nao haf blong Baebol we i soemaot se i stret blong go long olgeta haos wanwan blong talemaot gud nius, mo i stret blong tijim ol man we oli joen wanples long ol haos miting.” Nating sipos Pol i go long olgeta haos olsem man ya i talem, no nogat, be i klia se Pol i wantem we ol elda blong Efesas oli no fogetem se hem i bin prij, mo se i gat frut blong wok ya we hem i bin mekem. Luk i talem se: “Olgeta man we oli stap long provins ya Esia, ol laen blong Isrel wetem ol narafala man [Gris], olgeta evriwan oli harem tok blong Masta blong yumi.” (Wok 19:10) ?Olsem wanem “olgeta man” long Esia oli save harem tok ya? ?Mo hemia i soemaot wanem long saed blong wok blong yumi blong talemaot gud nius?
7. ?Long wanem rod maet gud nius i bin kasem sam man we Pol i no prij long olgeta stret?
7 Taem Pol i prij long ol pablik ples mo long olgeta haos wanwan, plante man oli harem gud nius. ?Yu ting se olgeta we oli harem gud nius ya oli stap olwe long Efesas? Ating nogat. Maet samfala oli muv i go long narafala ples blong mekem bisnes, stap klosap long famle, no blong stap long kwaet ples longwe long bigfala taon. Plante man tede oli muv i go long narafala ples from ol semfala risen. Maet yu tu yu bin mekem olsem. Mo tu, long taem bifo, sam man blong ol narafala ples oli stap kam long Efesas blong visitim ol fren mo blong mekem bisnes. Taem oli stap long Efesas, maet oli harem gud nius we Pol i talemaot. ?Taem oli gobak long ples blong olgeta, oli mekem wanem? Olgeta we oli bilif long trutok oli talemaot gud nius ya long ol narafala. Nating se sam we oli harem trutok long Efesas oli no bilif, be ating oli tokbaot samting we oli harem wetem ol narafala. Taswe, famle blong olgeta, ol man we oli stap klosap long olgeta, mo olgeta we oli mekem bisnes wetem olgeta, oli harem trutok, mo ating sam long olgeta oli bilif. (Skelem Mak 5:14.) ?Samting ya i soemaot wanem? ?Sipos yu yu talemaot gud nius long olgeta man, wanem i save kamaot?
8. ?Maet ol man long Esia oli bin harem trutok long wanem rod?
8 Pol i tokbaot taem we hem i bin prij long Efesas, i talem se long taem ya, ‘doa i open long hem, blong i mekem wan gudfala wok we bambae i gat plante frut blong hem.’ (1 Kor. 16:8, 9) ?Wanem doa i open? ?Mo olsem wanem doa ya i open long hem? From wok blong prij we Pol i mekem long Efesas, gud nius i goaot long plante narafala ples tu. Tingbaot trifala taon ya we oli klosap long Efesas, long saed i go moa long bus, hemia ol taon blong Kolosi, Laodisia, mo Hierapolis. Pol i no go long trifala taon ya, be gud nius i kasem ol ples ya. Man ya Epafras i stap long eria ya. (Kol. 2:1; 4:12, 13) ?Olsem wanem? ?Epafras i kasem save long gud nius mo i kam wan Kristin taem hem i harem Pol i prij long Efesas? Baebol i no talem stret. Be maet Epafras nao i talemaot gud nius long ples blong hem, mo long rod ya hem i givhan long Pol long wok blong prij. (Kol. 1:7) Long ol yia we Pol i stap prij long Efesas, maet gud nius long saed blong Kraes i go kasem ol taon olsem Filadelfia, Sadis, mo Tuatira tu.
9. (a) ?Pol i wantem tumas blong mekem wanem? (b) ?Wanem stamba vas blong yia 2009?
9 Taswe, ol elda long Efesas oli luksave se tok blong Pol i stret nomo, se: “Mi mi luk finis, we laef blong mi i olsem nating nomo long mi. Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem. Wok ya i blong talemaot gud nius ya [“fulwan,” NW] we God i lavem yumi tumas, mo i stap mekem i gud tumas long yumi.” Wan haf blong vas ya we i pusum yumi blong wok, bambae i kam ol gudfala toktok long stamba vas blong yia 2009: ‘Talemaot gud nius fulwan.’—Wok 20:24.
Talemaot Gud Nius Fulwan Tede
10. ?Olsem wanem yumi save se tede tu yumi mas talemaot gud nius fulwan?
10 Oda ya blong ‘talemaot gud nius fulwan’ i no go long ol aposol nomo. Biaen plante narafala man tu oli mekem wok ya. Taem Jisas i laef bakegen mo i toktok long samwe long 500 disaepol we oli kam wanples long Galili, hem i talem long olgeta se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.’ Tok ya i go long ol trufala Kristin tede tu, olsem nekis tok blong Jisas i soemaot: “Yufala i mas save se mi bambae mi stap wetem yufala oltaem, gogo wol ya i finis.”—Mat. 28:19, 20.
11. ?Ol man oli luksave ol Witnes blong Jeova from wanem impoten wok we oli mekem?
11 Ol Kristin we oli gat strong tingting blong wok, oli gohed blong obei long oda ya, from we oli wantem ‘talemaot gud nius fulwan.’ Wan long ol beswan rod blong mekem wok ya, hemia blong folem fasin we Pol i talem long ol elda long Efesas—prij long olgeta haos wanwan. Long yia 2007, man ya David G. Stewart, Jr., i raetem wan buk we i tokbaot wok blong ol misinari we i karem frut, i se: “Fasin we ol Witnes blong Jeova oli folem blong tijim ol wanwan memba blong olgeta blong serem bilif blong olgeta wetem ol narafala, i pulum ol memba blong oli joen fulwan long wok blong misinari. Fasin ya i moa gud i bitim [ol jos seves] we oli mekem plante toktok be ol tok ya i no klia nating. Plante Witnes blong Jeova oli laekem moa blong serem bilif blong olgeta wetem ol narafala, i bitim we oli mekem enikaen narafala wok.” ?Wanem frut blong wok blong olgeta? “Long yia 1999, mi askem long plante man long tu bigfala taon long Is Yurop sipos ol misinari blong Momon oli bin kam luk olgeta samtaem. Tu no maet fo nomo long evri 100 man we mi askem, oli talem ‘yes.’ Nao mi askem long ol man ya bakegen sipos ol Witnes blong Jeova oli bin kam luk olgeta, mo bitim 70 long evri 100 man oli talem ‘yes.’ Mo oli talem tu se ol Witnes oli no kam luk olgeta wan taem nomo be plante taem.”
12. (a) ?From wanem yumi go “plante taem” long ol haos long ples blong yumi? (b) ?Yu save talem stori blong wan man we fastaem hem i no wantem lesin long gud nius be biaen tingting blong hem i jenis?
12 Long ples blong yu tu, ating ol man oli savegud ol Witnes. Mo ating yu yu bin givhan blong mekem se oli save ol Witnes. Yu bin ‘go luk’ ol man ya taem yu prij long olgeta haos wanwan. Yu bin toktok wetem ol man, ol woman, mo ol yangfala long ol haos ya. Nating se yu gobak “plante taem” long samfala, ating oli no wantem lesin. Maet sam narafala oli lesin taem yu ridim wan vas blong Baebol nomo no yu storian long wan tingting nomo long Baebol. Be ating sam narafala oli lesingud, mo yu bin givim wan gudfala witnes long olgeta. Ol samting ya we yumi jes tokbaot, oli stap kamaot taem yumi traehad blong ‘talemaot gud nius fulwan.’ Ating yu save finis se, plante man we yumi bin go luk olgeta “plante taem” be oli no lesin, biaen oli jes jenisim tingting blong olgeta. Maet wan samting i bin hapen long olgeta no long wan famle no fren blong olgeta, we i openem tingting mo hat blong olgeta blong oli lesin long trutok. Tede ol man ya oli ol Kristin brata mo sista blong yumi. Taswe nating se long ol manis we oli pas, maet yu no faenem plante man we oli wantem lesin, be yu no mas letem tingting blong yu i kam slak. Yumi save finis se i no olgeta man we bambae oli lesin long trutok. Be samting we God i wantem, hemia se yumi mas gohed blong traehad mo wok wetem strong tingting blong talemaot gud nius fulwan long olgeta man.
Ol Frut We Maet Yumi No Save Long Hem
13. ?Olsem wanem wok blong yumi blong talemaot gud nius i save karem frut we yumi no save long hem?
13 Pol i halpem plante man we hem i prij long olgeta blong oli kam Kristin. Be wok blong hem i halpem plante narafala man tu we hem i no prij long olgeta stret. Sem mak long wok blong prij blong yumi tede. Yumi meksua se yumi joen oltaem long wok blong prij long olgeta haos wanwan, mo yumi traehad blong talemaot gud nius long plante man olsem we yumi naf blong mekem. Yumi talemaot gud nius long ol man long ol haos klosap long yumi, ol man we oli wok wetem yumi, ol fren long skul, mo ol famle blong yumi. ?Olsem wanem? ?Yumi save wanem frut blong wok blong yumi? Long saed blong samfala, wok blong yumi i karem gudfala frut kwiktaem nomo long laef blong olgeta. Be long sam narafala, sid blong trutok we yumi sakem, i slip fastaem. Biaen nomo trutok i kasem hat blong olgeta, mo i gru olsem sid i gru long gudfala graon. Nating sipos samting ya i no hapen, be ating ol man ya we yumi talemaot gud nius long olgeta oli toktok long ol narafala long saed blong samting we yumi bin talem, ol bilif blong yumi, mo fasin blong yumi. Yes, maet sid blong trutok we yumi planem long tingting blong olgeta, i gru long hat blong narafala man we hat blong hem i olsem gudfala graon.
14, 15. ?Wanem frut blong wok we wan brata i mekem blong prij long narafala?
14 Tingbaot samting we i hapen long Ryan mo waef blong hem Mandi, we tufala i stap long Florida, Yunaeted Stet. Ryan i tekem janis blong prij long ples blong wok. Hem i storian long wan man we i wok wetem hem, wan man we i gruap olsem wan Hindu. Man ya i laekem ol toktok blong Ryan mo i laekem fasin blong hem blong werem ol klos we oli stret. Long ol storian blong tufala, Ryan i tokbaot laef bakegen mo wanem i hapen long man taem i ded. Long wan naet long manis Jenuware, man ya i askem long woman blong hem Jodi, we hem i wan Katolik, wanem samting we hem i save long saed blong ol Witnes blong Jeova. Woman blong hem i talem se hem i save wan samting nomo long saed blong ol Witnes, hemia se oli “stap prij long ol haos wanwan.” Nao Jodi i go long kompiuta, mo i taepem nem ya “Ol Witnes blong Jeova” blong traem faenem sam moa save long Intenet. Hemia i openem Web saet blong ol Witnes, www.watchtower.org. Ale klosap tri manis Jodi i gohed blong jekemap ol save long Intenet, i ridim sam haf we oli kamaot long Baebol mo sam haf blong ol buk blong ol Witnes we hem i intres long olgeta.
15 Samtaem biaen, Jodi i mitim Mandi, from we tufala tugeta i wok olsem nes. Mandi i glad blong ansa long ol kwestin blong Jodi. Afta we sam taem i pas bakegen, tufala i mekem wan longfala storian, Jodi i talem se storian ya “i stat long Adam i go kasem Amagedon.” Mandi i askem long Jodi sipos hem i wantem wan Baebol stadi, mo Jodi i talem se hem i glad blong stadi Baebol. I no longtaem, Jodi i stat go long Haos Kingdom. Long Oktoba, Jodi i kam wan pablisa we i no baptaes, mo long Februari hem i tekem baptaes. Hem i raetem se: “Naoia we mi save trutok, mi harem gud mo mi glad tumas long laef blong mi.”
16. ?Samting we i hapen long wan brata long Florida i soemaot wanem long saed blong traehad blong yumi blong talemaot gud nius fulwan?
16 Ryan i no save nating se taem hem i prij long man ya we i wok wetem hem, bambae hem i mekem we woman blong man ya i kasem trutok. I tru, biaen hem i kasem save long frut ya we i kamaot from strong tingting blong hem blong ‘talemaot gud nius fulwan.’ Maet yu tu yu prij long wan haos, long ples blong wok, long skul, no yu tekem janis blong prij long wan narafala ples, be yu yu no save se trutok we yu talemaot i go kasem sam narafala. Maet yu no gat rod blong save long ol frut blong wok blong yu blong talemaot gud nius fulwan, olsem we Pol i no save olgeta frut blong wok blong hem “long Esia.” (Ridim Ol Wok 23:11; 28:23.) !Taswe, i impoten tumas we yu gohed blong talemaot gud nius fulwan!
17. ?Yu yu gat strong tingting blong mekem wanem long yia 2009?
17 Long yia 2009, i gud we yumi evriwan i traehad fulwan blong mekem wok ya we i stap long han blong yumi, hemia blong prij long olgeta haos wanwan mo long olgeta narafala ples we yumi save faenem man long hem. Olsem nao, bambae yumi save gat sem filing olsem Pol, we i talem se: “Mi mi luk finis, we laef blong mi i olsem nating nomo long mi. Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem. Wok ya i blong talemaot gud nius ya [“fulwan,” NW] we God i lavem yumi tumas, mo i stap mekem i gud tumas long yumi.”
?Bambae Yu Yu Ansa Olsem Wanem?
• ?Olsem wanem aposol Pita mo Pol mo plante narafala long faswan handred yia, oli talemaot gud nius fulwan?
• ?From wanem frut blong wok blong prij blong yumi maet i plante moa i bitim wanem we yumi save long hem?
• ?Wanem stamba vas blong yia 2009? ?From wanem yu yu ting se i stret we hemia i stamba vas blong yia ya?
[Kwestin]
[Tok blong makem poen long pej 27]
Stamba vas blong yia 2009, hemia: “Talemaot gud nius fulwan.”—Ol Wok 20:24, NW.
[Tok blong pija long pej 25]
Ol elda long Efesas oli savegud fasin blong Pol blong go long ol haos wanwan blong talemaot gud nius
[Tok blong pija long pej 26]
Sipos yu talemaot gud nius fulwan, trutok i save kasem plante man we yu no prij long olgeta stret