Tinghae Long Spesel Wok Blong Jisas Long Plan Blong God

“Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem.”—JON 14:6, NTB.

1, 2. ?From wanem yumi mas intres blong save long spesel wok blong Jisas long plan blong God?

LONG ol yia we oli pas, plante man oli traehad blong stap defren long ol narafala man raonabaot long olgeta, be bighaf oli no naf blong mekem olsem. Smol nomo oli save talem tru se oli rili defren long sam bigfala fasin. Be Jisas Kraes, Pikinini blong God, hem i spesel long plante fasin.

² ?From wanem yumi mas intres long spesel wok blong Jisas? !From we samting ya i gat paoa long fasin fren we yumi gat wetem Jeova, Papa blong yumi long heven! Jisas i talem se: “Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem.” (Jon 14:6, NTB; 17:3) Bambae yumi luk sam long ol samting we i soem se Jisas i spesel. Taem yumi mekem olsem, bambae i halpem yumi blong kasem save mo tinghae long spesel wok blong hem long plan blong God.

‘Stret Pikinini Blong God, Wan Nomo We Hem i Gat’

3, 4. (a) ?Olsem wanem Jisas i spesel from we hem i stret Pikinini blong God, wan nomo we hem i gat? (b) ?Olsem wanem wok blong Jisas blong givhan blong wokem olgeta samting i spesel?

³ Jisas i no jes “Pikinini blong God” nomo, olsem Setan i talem taem hem i traem Jisas. (Mat. 4:3, 6) Tok we i stret blong singaot Jisas long hem, hemia se ‘stret Pikinini blong God, wan nomo we hem i gat.’ (Jon 3:16, 18) Grik tok we oli tanem i kam “wan nomo we hem i gat,” i minim “i no gat narafala samting we i olsem hem, hem wan nomo,” “i no gat narafala man we i sem mak olsem hem,” “hem i spesel.” Jeova i gat plante milian spirit pikinini blong hem. ?Sipos i olsem, i minim wanem se i no gat narafala “we i sem mak” olsem Jisas?

⁴ Jisas i spesel from we Papa blong hem nomo i wokem hem. Hem i fasbon Pikinini blong God. Tru ya, “hem i fasbon long ol samting we God i wokem.” (Kol. 1:15, NW) “Hem i faswan long olgeta samting we God i wokem.” (Rev. 3:14, NW) Wok blong stret Pikinini blong God blong givhan blong wokem olgeta samting long heven mo wol, hemia tu i spesel. Jisas i no Man we i wokem olgeta samting, mo i no Stamba blong olgeta samting. Be Jeova i yusum hem olsem man blong wok, nao olgeta samting oli kamaot tru long hem nomo. (Ridim Jon 1:3.) Aposol Pol i raetem se: “Yumi gat wan God nomo blong yumi. Hem i Papa blong yumi, we olgeta samting oli kamaot long hem, mo laef blong yumi i blong hem nomo. Mo yumi gat wan Masta nomo blong yumi, Jisas Kraes, [“we olgeta samting oli kamaot tru long hem, mo yumi kamaot tru long hem,” NW].”—1 Kor. 8:6.

5. ?Olsem wanem Baebol i makem se Jisas i spesel?

⁵ Be i gat plante samting moa we i soem se Jisas i spesel. Baebol i talem plante taetel no nem blong Jisas we oli makem spesel wok blong hem long plan blong God. Yumi save luk faef moa nem we Kristin Grik haf blong Baebol i talem blong tokbaot Jisas.

“Tok” Blong God

6. ?From wanem i stret we Baebol i singaot Jisas se “Tok” blong God?

⁶ Ridim Jon 1:14. ?From wanem Baebol i singaot Jisas se “Tok” blong God, no Logos? Taetel ya i makem wok we hem i mekem afta long taem ya we God i wokem ol narafala man long heven mo wol. Jeova i yusum Pikinini blong hem blong givim save mo advaes long ol narafala spirit pikinini, mo God i yusum hem tu blong karem mesej i go long ol man long wol. Jisas Kraes i soemaot se hem i Tok blong God, no Man we i talemaot tok blong God, taem hem i talem long ol man Jiu we oli lesin long hem se: “Ol tok ya we mi stap tijim ol man long hem, oli no blong mi nomo,  oli kamaot long God we i sanem mi mi kam. Mo sipos wan man i tingting strong blong mekem ol samting we God i wantem, hem bambae i faenemaot se tok ya blong mi i kamaot long God, no i kamaot long mi nomo.” (Jon 7:16, 17) Afta we Jisas i go long heven, hem i karem taetel ya yet se “Tok blong God.”—Rev. 19:11, 13, 16.

7. ?Olsem wanem yumi save folem tingting daon we Jisas i gat, taem hem i mekem wok olsem ‘Tok blong God’?

⁷ Tingbaot se taetel ya i minim wanem. Nating we Jisas i waes i bitim ol narafala samting we Jeova i wokem, hem i no dipen long prapa waes blong hem. Hem i stap talem ol samting ya nomo we Papa blong hem i tijim hem long hem. Oltaem hem i pulum ol man blong oli lukluk i go long Jeova, i no long hem wan. (Jon 12:50) !Hemia i wan nambawan eksampol blong yumi save folem! Yumi tu, yumi gat wan wok blong mekem we i wan bigfala ona, hemia blong “talemaot gud nius.” (Rom 10:15) Sipos yumi tinghae long gudfala eksampol blong Jisas blong gat tingting daon, samting ya i mas pusum yumi blong blokem fasin ya blong talemaot prapa tingting blong yumi. Taem yumi talemaot tok blong Baebol we i save sevem laef blong man, yumi no mas “bitim mak blong ol tok ya we oli raetem finis.”—1 Kor. 4:6, NW.

“Amen”

8, 9. (a) ?Wanem mining blong tok ya “amen,” mo from wanem Baebol i singaot Jisas se “Amen”? (b) ?Olsem wanem Jisas i mekem wok ya olsem “Amen”?

⁸ Ridim Revelesen 3:14. * ?From wanem Baebol i singaot Jisas se “Amen”? Tok ya “amen” i wan Hibru tok we i minim “bambae i mas olsem” no “i tru.“ Stamba blong Hibru tok ya i minim “holem promes,” no “save trastem.” Hemia i semfala tok we Baebol i yusum blong tokbaot Jeova se hem i holem promes blong hem oltaem. (Dut. 7:9; Aes. 49:7) Ale, ?nem ya “Amen” i soem se Jisas i spesel olsem wanem? Traem lukluk ansa we 2 Korin 1:19, 20 i talem, se: “Pikinini ya blong God, Jisas Kraes, we mi . . . talemaot long yufala, hem i no talem ‘Yes’ mo ‘No’ long sem taem nomo, nogat. Oltaem nomo, tok blong hem, ‘Yes.’ Jisas ya, hem i olsem ansa we i talem se ‘Yes’ long olgeta promes we God i talem finis. Mo from we yumi joen long hem, taswe yumi save talem se ‘Amen’ blong leftemap nem blong God i go antap.”

⁹ Jisas hem i “Amen” long olgeta promes we God i mekem. Laef blong Jisas long wol we i stret gud olgeta, mo ded blong hem olsem sakrefaes, i pruvum mo i mekem rod blong olgeta promes blong Jeova God oli kamtru. Taem Jisas i holemstrong long God, hem i soemaot we tok blong Setan long buk blong Job i giaman. Setan i talem se taem ol man blong God oli no gat ol samting we oli nidim long laef, taem oli safa mo oli fesem ol traem, bambae oli lego Hem. (Job 1:6-12; 2:2-7) Long olgeta man we God i wokem, fasbon Pikinini ya i save pruvum bitim ol narafala se tok blong Setan i giaman. Antap long hemia, Jisas i pruvum long nambawan fasin se hem i sapotem Papa blong hem long saed blong bigfala kwestin ya, se hu nao i gat raet blong rulum heven mo wol.

10. ?Olsem wanem yumi save folem eksampol we Jisas i soem taem hem i mekem spesel wok blong hem olsem “Amen”?

¹⁰ ?Olsem wanem yumi save folem eksampol we Jisas i soem taem hem i mekem spesel wok blong hem olsem “Amen”? Yumi mas holemstrong long Jeova mo sapotem hae rul blong hem. Taem yumi mekem olsem, yumi obei gud long tok we i stap long Ol Proveb 27:11 (NW), se: “Pikinini boe blong mi, yu mas waes, mo yu mas mekem hat blong mi i glad, blong bambae mi save ansa long hemia we i stap jikim mi.”

“Man Blong Stanemap Niufala Promes Ya We God i Mekem”

11, 12. ?From wanem wok blong Jisas blong tekem ol man oli kam joen wetem God, i spesel?

¹¹ Ridim 1 Timoti 2:5, 6. Jisas i man ya blong “tekem ol man oli kam joen wetem God.” Hem i “man blong stanemap niufala promes ya blong God.” (Hib. 9:15; 12:24) Be Baebol i tokbaot Moses tu se i tekem ol man oli go joen wetem God, taem hem i karem promes, no kontrak, blong Loa i go long ol man. (Gal. 3:19) ?Sipos i olsem, from wanem wok blong Jisas blong tekem ol man oli kam joen wetem God, i spesel?

¹² Long olfala lanwis blong bifo, tok ya “man blong tekem ol man oli kam joen wetem God” i wan tok we ol loea oli yusum oltaem. Tok ya i soemaot se Jisas nao i Man we i stret folem loa blong stanemap niufala promes blong God, (no i olsem wan loea) we i mekem se wan niufala neson i stanap, hemia “Isrel blong God.” (Gal. 6:16, NW) Long neson ya, i gat ol Kristin we tabu spirit i makemaot olgeta, we oli “wan kampani blong pris mo king” long heven.  (1 Pita 2:9, NW; Eks. 19:6, NW) Kontrak blong Loa, we Moses i tekem i go long ol man, i no naf blong stanemap wan neson olsem.

13. ?Olsem wanem Jisas i tekem ol man oli kam joen wetem God?

¹³ ?Olsem wanem Jisas i tekem ol man oli kam joen wetem God? Jeova i mekem samting we i stret folem loa, taem hem i yusum blad blong Jisas we i ron blong mekem olgeta we oli joen long niufala kontrak ya, oli save kam ol stret man long fes blong hem. (Rom 3:24; Hib. 9:15) Ale, God i luk olgeta se oli stret blong joen long niufala promes no kontrak ya, mo oli save kam ol king mo pris long heven. From we Jisas i Man blong tekem ol man oli kam joen wetem God, hem i givhan long olgeta blong oli stap klin long fes blong God.—Hib. 2:16.

14. ?From wanem ol Kristin we oli wantem laef long heven no long wol oli mas tinghae long wok blong Jisas olsem man blong tekem ol man oli kam joen wetem God?

¹⁴ ?Olsem wanem long olgeta we oli no joen long niufala kontrak ya, mo we oli wantem laef blong olwe long wol, i no long heven? Nating we oli no joen long niufala kontrak, be oli kasem blesing from kontrak ya. God i fogivim sin blong olgeta, mo hem i luk olgeta olsem ol stret man we oli fren blong hem. (Jem. 2:23; 1 Jon 2:1, 2) Nating we yumi putum tingting blong yumi long laef long heven no long wol, i gat gudfala risen blong yumi evriwan i tinghae long wok blong Jisas, olsem man blong stanemap niufala promes no kontrak.

“Hae Pris”

15. ?Olsem wanem wok blong Jisas olsem Hae Pris i defren long ol narafala man we oli bin wok olsem hae pris?

¹⁵ Plante man bifo oli bin wok olsem ol hae pris, be wok blong Jisas olsem Hae Pris i rili spesel. ?Hem i spesel olsem wanem? Pol i eksplenem se: “Hem i no olsem ol narafala hae pris ya we evri dei oli mas mekem sakrefaes we oli kilim anamol blong tekemaot ol sin blong olgeta fastaem, nao biaen oli save kilim anamol blong tekemaot ol sin blong ol narafala man. Taem Jisas i letem hem blong i ded blong tekemaot ol sin blong ol man, wantaem nomo, hem i finisim fasin ya, mo i no save mekem bakegen. Loa blong Moses i stap putumap ol man blong oli hae pris, we olgeta oli no gat paoa, oli save mekem sin. Be promes ya blong God we i kam biaen long Loa ya, mo we God i talem nem blong hem blong mekem i strong, promes ya i putumap Pikinini ya blong hem, we hem i mekem hem i stret gud finis, blong i stap olsem, gogo i no save finis.”—Hib. 7:27, 28. *

16. ?From wanem sakrefaes blong Jisas i rili spesel?

¹⁶ Jisas i wan man we i stretgud olgeta, olsem Adam bifo we hem i mekem sin. (1 Kor. 15:45) From samting ya, Jisas nomo hem i naf blong givim wan sakrefaes we i stretgud olgeta, hemia wan sakrefaes we i no gat nid blong mekem bakegen mo bakegen. Folem Loa blong Moses, ol man Isrel oli mas mekem sakrefaes evri dei. Be ol sakrefaes ya mo wok we ol pris oli mekem, oli olsem wan sado nomo blong samting we Jisas bambae i mekem long fiuja. (Hib. 8:5; 10:1) Yes, Jisas i save mekem plante moa samting i kamtru i winim ol narafala hae pris, mo bambae hem i mekem wok ya blong olwe, taswe wok blong hem olsem Hae Pris i rili spesel.

17. ?From wanem yumi mas tinghae long wok blong Jisas olsem Hae Pris, mo olsem wanem yumi save mekem samting ya?

¹⁷ Yumi nidim we Jisas i mekem wok olsem Hae Pris, blong i save givhan long yumi blong yumi frengud oltaem wetem God. !Mo hem i rili wan nambawan Hae Pris blong yumi! Pol i raetem se: “Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin.” (Hib. 4:15) I tru, sipos yumi tinghae long wok blong Jisas olsem Hae Pris, samting ya i mas pusum yumi blong yumi ‘no moa laef blong mekem ol wok blong yumi nomo, be yumi laef blong mekem ol wok blong hem, we hem i ded blong i sevem yumi.’—2 Kor. 5:14, 15; Luk 9:23, NW.

“Sid” We Profet Tok i Talemaot

18. ?Wanem profet tok we Jeova i talem afta we Adam i mekem sin, mo biaen wanem save i kam klia long saed blong profet tok ya?

¹⁸ Taem Adam mo Iv i mekem sin long garen  blong Iden, i luk olsem we tufala i lusum evri samting, olsem fasin fren we tufala i gat wetem God, laef we i no save finis, fasin glad, mo Paradaes. Be Jeova God i talemaot wan Sevia. Man ya nao we hem i “sid” we profet tok i tokbaot. (Jen. 3:15, NW) Long ol yia biaen, plante profet tok blong Baebol oli tokbaot Sid ya, we i olsem wan tok haed. Sid ya i mas kamaot long laen blong Ebraham, Aesak, mo Jekob. Mo tu, hem i mas kamaot long laen blong King Deved.—Jen. 21:12; 22:16-18; 28:14; 2 Saml. 7:12-16.

19, 20. (a) ?Hu ya Sid ya we God i promes blong sanem i kam? (b) ?From wanem yumi save talem se sid we God i promes blong sanem i no Jisas nomo, be i gat sam narafala tu?

¹⁹ ?Hu ya Sid ya we God i promes blong sanem i kam? Ansa blong kwestin ya i stap long Galesia 3:16. (Ridim.) Be biaen, long semfala japta, aposol Pol i talem long ol tabu Kristin se: “Sipos yufala i blong Kraes, ale, yufala i olsem ol laen ya [“sid,” NW] blong Ebraham. Mo bambae yufala i save kasem ol samting ya we God i promes finis blong givim long ol laen ya [“sid,” NW] blong hem.” (Gal. 3:29) ?Sipos Jisas nao i Sid ya we God i promes blong sanem, olsem wanem i gat sam narafala tu oli mekemap sid ya?

²⁰ Plante milian man oli talem se oli kamaot long laen blong Ebraham, mo sam oli mekem olsem we oli ol profet. Sam skul oli tinghae long ol profet blong olgeta, from we oli ting se oli kamaot long laen blong Ebraham. ?Be olsem wanem? ?Olgeta ya oli Sid ya we God i promes blong sanem i kam? Nogat. Tabu spirit i pulum aposol Pol blong talemaot se i no evriwan long laen blong Ebraham we oli save talem se oli Sid ya. Sid ya we i blesem ol man long wol, i kamtru long Aesak nomo. God i no yusum ol narafala pikinini blong Ebraham blong blesem ol man long wol. (Hib. 11:18) Impoten man long sid ya we profet tok i talemaot, hemia wan man nomo, Jisas Kraes. Hem nao man we i kamaot long laen blong Ebraham olsem we ol man oli raetem long Baebol. * Ol narafala we biaen olgeta tu oli kam sid blong Ebraham, oli kasem blesing ya from we oli “blong Kraes.” Yes, wok blong Jisas blong mekem profet tok ya i kamtru, i rili spesel.

21. ?Yu yu tinghae long wanem fasin we Jisas i soem taem hem i mekem spesel wok blong hem long plan blong Jeova?

 ²¹ ?Wanem samting we yumi lanem long smol stadi ya long saed blong spesel wok we Jisas i mekem long plan blong Jeova? Stret Pikinini blong God, wan nomo we hem i gat, i rili spesel. Stat long taem ya we God i wokem hem kam kasem tede, i no gat wan narafala we i olsem hem. Be spesel Pikinini ya blong God we biaen i kam Jisas, oltaem hem i mekem tingting blong hem i stap daon blong mekem wok we God i wantem, neva hem i leftemap hem wan. (Jon 5:41; 8:50) !Hemia i wan nambawan eksampol blong yumi tede! Olsem Jisas, mak we yumi wantem kasem hemia se, ‘long olgeta fasin blong yumi, oltaem yumi mas leftemap nem blong God.’—1 Kor. 10:31.

[Ol futnot]

?Yu Yu Tingbaot?

• ?Yu yu lanem wanem long saed blong spesel wok blong Jisas, from ol taetel mo nem blong hem? (Lukluk bokis.)

• ?Olsem wanem yu yu save folem eksampol blong spesel Pikinini ya blong Jeova?

[Kwestin]

[Bokis/Foto blong pija long pej 23]

Sam Taetel We Oli Soemaot Spesel Wok Blong Jisas Long Plan Blong God

◼ Stret Pikinini Blong God, Wan Nomo We Hem i Gat. (Jon 1:3) Jisas, hem wan nomo we Papa blong hem stret i wokem.

◼ Tok Blong God. (Jon 1:14) Jeova i yusum Pikinini blong hem olsem Man blong givim save mo advaes long ol narafala man long heven mo wol.

◼ Amen. (Rev. 3:14, NW) Laef blong Jisas long wol we i stretgud olgeta, mo ded blong hem olsem sakrefaes, i pruvum mo i mekem rod blong olgeta promes blong Jeova God oli kamtru.

◼ Man Blong Stanemap Niufala Promes No Kontrak. (1 Tim. 2:5, 6) Jisas nao Man ya we i stret folem loa blong tekem ol man oli kam joen wetem God. Hem i mekem se wan niufala neson i stanap, hemia “Isrel blong God.” Ol Kristin long neson ya bambae oli mekemap “wan kampani blong pris mo king” long heven.—Gal. 6:16, NW; 1 Pita 2:9, NW.

◼ Hae Pris. (Hib. 7:27, 28) Jisas, hem wan nomo we i naf blong givim wan sakrefaes we i stretgud olgeta, we i no nid blong mekem bakegen mo bakegen. Hem i save tekemaot sin blong yumi mo mekem yumi fri long ded.

◼ Sid We God i Promes Blong Sanem i Kam. (Jen. 3:15, NW) Impoten man long sid ya we profet tok i talemaot, hemia wan man nomo Jisas Kraes. Ol narafala we biaen olgeta tu oli kam sid blong Ebraham, oli “blong Kraes.”—Gal. 3:29.