?Wanem i Rili Hapen Long Wan Man Taem Hem i Ded?

“Olgeta sol, we hemia blong ol rabis man, oli no save ded . . . Faea ya we i gohed blong laet olwe i panisim olgeta gogo i no save finis, mo olgeta tu oli no save ded, taswe i no gat rod blong mekem se trabol blong olgeta i [stop].”—Clement blong Alexandria, wan man blong raetem buk long ol yia 100 mo 200 K.T. *

OLSEM Clement, olgeta we oli leftemap tijing ya se hel i wan ples blong harem nogud long faea, oli bilif se man i gat wan sol we i no save ded samtaem. ?Olsem wanem? ?Baebol i sapotem tijing ya? Tingbaot wanem we Tok blong God i talem blong ansa long ol kwestin we oli kam biaen.

?Faswan man, Adam, i gat wan sol we i no save ded samtaem? King James Version, we i wan Baebol blong Protestan, i tokbaot taem we God i wokem Adam i se: “Mo MASTA God i wokem man long das blong graon, mo i blu long nus blong hem, i putum win blong laef long hem; mo man ya i kam wan laef sol.” (Jenesis 2:7) Makem se vas ya i no talem se God i givim wan sol long Adam, nogat.

?Wanem i hapen long Adam afta we hem i mekem sin? Panis we God i givim long hem, i no blong harem nogud long hel blong olwe, nogat. Defren olgeta, Baebol i tokbaot panis we God i givim long Adam, i se: “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.” (Jenesis 3:19, mifala i putum italik) Tok blong God i no talem nating se wan haf blong bodi blong Adam i stap laef afta we hem i ded. Afta we Adam i ded, sol ya Adam i ded.

?Ol man oli gat wan sol we i no save ded samtaem? God i talem long profet Esikel se: “Sol we i sin, hem bambae i ded.” (Esikel 18:4, KJ) Aposol Pol i raetem se: “Wan man [Adam] nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Sipos olgeta man oli mekem sin, ale i stret nomo we olgeta sol oli ded.

?Wan sol we i ded, i haremsave mo filim samting? Tok blong God i talem se: “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5) Blong tokbaot wanem i hapen long wan man taem hem i ded, Baebol i talem se: “Hem i gobak long graon; long sem dei ya ol tingting blong hem oli lus.” (Ol Sam 146:4, KJ) ?Sipos ol dedman oli “no moa save wan samting” mo ol “tingting blong [olgeta] oli lus,” olsem wanem oli save harem nogud long hel?

Jisas i no talem se man we i ded i save haremsave no filim samting, nogat. Hem i talem se man we i ded i olsem we hem i slip. (Jon 11:11-14) Maet samfala we oli no agri long tingting ya, oli talem se Jisas i bin tijim  se hel i wan ples we i hot mo se ol sinman bambae oli go long helfaea. I gud yumi tokbaot wanem we Jisas i talem long saed blong hel.

[Futnot]