Faenem Glad Long Wok Blong Pulum Ol Man Oli Kam Disaepol
Faenem Glad Long Wok Blong Pulum Ol Man Oli Kam Disaepol
“Yufala i mas go long ol man . . . blong pulum olgeta oli kam man blong mi.”—MAT. 28:19.
1-3. (a) ?Wanem filing we plante pablisa oli gat taem oli mekem ol Baebol stadi? (b) ?Wanem ol kwestin we bambae yumi tokbaot?
WAN sista we i joen long wan grup we i toktok lanwis Hindi long Yunaeted Stet, i raetem se: “Blong leven wik nao, mi mi stadi Baebol wetem wan famle we i kam long Pakistan. Mifala i joengud tugeta. Nao mi harem nogud from we i no longtaem famle ya bambae i gobak long Pakistan. Wota i fulap long ae blong mi from we bambae mifala i no moa save joen wan ples bakegen. Mo tu mi krae from glad we mi kasem taem mi tijim olgeta long saed blong Jeova.”
2 ?Olsem wanem? ?Yu yu gat janis blong stadi Baebol wetem narafala mo kasem glad olsem sista ya? Jisas mo ol faswan disaepol blong hem, oli kasem bigfala glad long wok ya blong pulum ol man oli kam disaepol. Taem ol 70 disaepol we Jisas i trenem olgeta oli kambak long wok blong prij, oli glad tumas blong talemaot long hem ol samting we oli mekem. Long taem ya, tabu spirit i mekem Jisas tu “i harem gud tumas.” (Luk 10:17-21) Long sem fasin, tede i gat plante man we oli kasem bigfala glad taem oli mekem wok ya blong pulum ol man oli kam disaepol. Tru ya, long yia 2007, ol pablisa we oli glad mo oli wok had oli mekem samwe 6 milian haf Baebol stadi evri manis.
3 Sam pablisa, oli no joen yet long nambawan wok ya blong mekem Baebol stadi. Sam narafala, longtaem lelebet nao oli no mekem wan Baebol stadi. ?Wanem traem we maet yumi fesem taem yumi traehad blong mekem wan Baebol stadi? ?Olsem wanem yumi save winim ol traem ya? ?Mo wanem blesing yumi save kasem taem yumi traehad blong obei long oda blong Jisas, we i talem se: “Yufala i mas go long ol man . . . blong pulum olgeta oli kam man blong mi”?—Mat. 28:19.
Ol Traem We Oli Spolem Glad Blong Yumi
4, 5. (a) ?Long sam ples blong wol, wanem tingting blong plante man long saed blong gud nius? (b) ?Long sam narafala ples, wanem ol traem we ol pablisa oli fesem?
4 Long sam ples long wol, ol man oli glad blong tekem magasin blong yumi, mo oli wantem stadi Baebol wetem yumi. Wan brata mo sista blong Ostrelia we oli prij sam manis long Sambia, oli raetem se: “Ol stori we mitufala i harem oli tru. Sambia i wan gudfala teritori. !Prij long rod i rili nambawan! Ol man oli kam luk mifala, mo sam oli askem stret magasin we oli wantem.” Long yia we i pas i no longtaem, ol brata mo sista long kantri ya oli mekem 200,000 Baebol stadi, i minim se wan pablisa i mekem moa long wan Baebol stadi.
5 Be long sam narafala ples, ol pablisa oli faenem i had blong givimaot ol buk mo statem Baebol stadi. ?From wanem? Plante taem, ol man oli no stap long haos taem ol pablisa oli pas. Sam narafala oli stap long haos, be oli no wantem save long ol skul. Maet hemia from we oli gruap long wan famle we papa mama oli no joen nating long wan skul, no maet from we oli taed long fasin tu fes blong ol lida blong skul. Plante man oli harem nogud tumas, from ol giaman tijing we ol lida blong skul oli tijim. (Mat. 9:36) Yumi kasem save from wanem ol man ya oli fraet blong storian wetem yumi long saed blong Baebol.
6. ?Wanem traem we sam pablisa oli fesem?
6 Sam pablisa oli fesem wan narafala traem, nao oli lusum glad we oli gat fastaem. Fastaem, ating oli bin wok strong long wok ya blong pulum ol man oli kam disaepol, be naoia oli no moa save wok olsem from we oli sik mo oli kam olfala. Tingbaot tu se sam pablisa oli ting se oli no naf blong mekem wok ya. ?Olsem wanem? ?Yu yu harem se yu no naf blong mekem wan Baebol stadi? Maet yu harem olsem Moses taem Jeova i sanem hem blong i go toktok wetem Fero. Moses i talem se: “Hae God, yu yu Masta blong mi, be plis yu no sanem mi. Mi mi no man blong givim gudfala toktok, mo yu yu kam toktok wetem mi, be fasin blong mi long saed ya i stap sem mak nomo. Taem mi traem toktok long fes blong ol haeman, be mi no save toktok gud.” (Eks. 4:10) Wan filing we i klosap sem mak long filing ya blong harem se yumi no naf, hemia se yumi fraet we stadi i no gohed gud. Maet yumi wari se man we yumi tijim, i no save kam wan disaepol from we yumi no tijim gud hem. Maet yumi ting se i moa gud we yumi no mekem wan Baebol stadi nating, i bitim we yumi no tijim gud man. ?Olsem wanem yumi save winim ol traem ya?
Rerem Hat Blong Yu
7. ?Wanem samting we i pusum Jisas blong talemaot gud nius?
7 Faswan rod hemia blong rerem hat blong yumi. Jisas i talem se: “Taem man i tok, hem i stap talemaot ol samting we tingting [“hat,” NW] blong hem i fulap long hem.” (Luk 6:45) Samting we i pusum Jisas blong mekem wok ya blong talemaot gud nius, hemia se hem i tingbaot laef blong narafala. Olsem nao, taem hem i luk we ol man Jiu oli stap longwe long God, “hem i sore tumas long olgeta.” Hem i talem long ol disaepol blong hem se: “I gat plante kakae tumas i stap long garen we i rere finis . . . Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.”—Mat. 9:36-38.
8. (a) ?Wanem samting we i gud blong tingbaot? (b) ?Wanem samting we yumi lanem from toktok blong wan woman we i stadi Baebol?
8 Tingbaot olsem wanem i bin givhan bigwan long yumi taem wan brata no sista i tekem taem blong stadi Baebol wetem yumi. I gud yumi tingting dip long samting ya taem yumi joen long wok blong pulum ol man oli kam disaepol. Mo tu tingbaot ol man we yumi mitim long wok blong prij, olsem wanem gud nius we yumi talemaot bambae i givhan long olgeta. Wan woman i raetem leta i go long branj ofis blong kantri we hem i stap long hem, i se: “Mi mi wantem talem long yu se mi mi tangkiu tumas we ol Witnes ya, oli tijim mi long haos blong mi. Samtaem ating oli mas kam taed blong stap longtaem wetem mi from we mi mi askem plante kwestin. Be oli gat longfala tingting mo oli wantem tumas blong tijim mi long ol samting we oli lanem. Mi talem tangkiu long Jeova mo Jisas from ol Witnes ya we oli givhan long mi.”
9. ?Jisas i putum tingting blong hem i stap long wanem samting, mo yumi save folem eksampol ya blong hem olsem wanem?
9 I tru, i no olgeta man we oli bin kam man blong Jisas. (Mat. 23:37) Sam oli folem Jisas blong smol taem nomo, biaen “oli gowe long hem, oli no moa biaen long hem bakegen.” (Jon 6:66) Nating we sam man oli no wantem harem gud nius, samting ya i no mekem se Jisas i no moa tinghae long gud nius. Nating se plante sid we hem i planem oli no karem frut, hem i putum tingting blong hem i stap strong long gudfala frut we hem i stap karem. Hem i luksave se i stret taem blong tekem kakae we i stap long garen, mo hem i kasem glad from wok ya blong karem kakae i kam. (Ridim Jon 4:35, 36.) ?Olsem wanem? ?Yumi save mekem olsem Jisas mo putum tingting blong yumi i stap long gudfala frut we yumi save karem long teritori blong yumi? ?No yumi lukluk teritori blong yumi olsem drae graon we i gat wanwan stamba blong kon nomo i stap long hem? Bambae yumi luk olsem wanem yumi save holem gudfala tingting long saed blong teritori blong yumi.
Prij Wetem Tingting Blong Statem Wan Baebol Stadi
10, 11. ?Wanem samting we yumi mas mekem blong stap glad?
10 Taem man blong wokem garen i planem sid, tingting blong hem hemia blong karem kakae long garen ya. Long sem fasin, taem yumi prij yumi mas gat tingting ya blong statem wan Baebol stadi. ?Olsem wanem sipos i gat plante haos we oli no gat man, mo ol visit blong yu tu oli no stap? Samting ya i save mekem yu yu harem nogud. ?Olsem wanem? ?Bambae yu no moa gohed blong prij long ol haos wanwan? !I nogud blong mekem olsem! Yumi prij long haos wanwan longtaem i kam mo long rod ya yumi stap toktok wetem plante man we oli neva harem gud nius.
11 Blong holemtaet glad blong yu, ?yu yu save yusum sam narafala rod tu blong kasem moa man wetem trutok? ?Yu yu traem finis blong storian long ol man long rod mo long ples blong wok blong olgeta? ?Yu yu save yusum telefon blong prij long ol man? ?Yu yu save kasem telefon namba blong olgeta we yu bin storian finis long olgeta long saed blong gud nius blong Kingdom, blong yu save ring long olgeta? Sipos yumi holemstrong long wok blong prij, mo yumi yusum ol defren rod blong kasem ol man, bambae yumi haremgud taem yumi faenem ol man we oli lesin long gud nius blong Kingdom.
Winim Traem Ya We Plante Oli No Wantem Lesin
12. ?Yumi save mekem wanem sipos plante man long teritori oli no intres long ol skul?
12 ?Bambae yu yu mekem wanem sipos ol man oli no wantem save long ol skul? ?Yu save jenisim tok blong yu mo tokbaot samting we oli intres long hem? Aposol Pol i raetem wan leta i go long ol Kristin brata blong hem long Korin i se: “Mi mi laen blong Isrel, mo long fes blong ol laen ya blong mi, mi folem fasin blong mifala . . . be long fes blong ol man we oli no laen blong Isrel we oli no save Loa blong Moses, mi mekem olsem we mi tu mi no save Loa ya.” ?Wanem i pusum Pol blong mekem olsem? Hem i talem se: “Long fes blong ol man we oli gat ol defdefren kaen fasin, be mi mekem olsem we mi tu mi gat sem fasin we olgeta oli gat, blong yusum olgeta rod blong sevem sam long olgeta.” (1 Kor. 9:20-22) ?Olsem wanem? ?Yumi tu yumi save tokbaot samting we ol man long teritori blong yumi oli intres long hem? Plante man we oli no intres long skul, oli wantem se famle blong olgeta i joen moa gud. Maet oli stap lukaot save tu long saed blong mining blong laef. ?Olsem wanem? ?Yumi save talemaot gud nius blong Kingdom long wan rod we i pulum intres blong olgeta?
13, 14. ?Olsem wanem yumi save kasem moa glad long wok ya blong pulum ol man oli kam disaepol?
13 Plante moa pablisa oli stap mekem glad blong olgeta long wok ya i kam bigwan moa, nating we plante man oli no wantem lesin long olgeta. ?Olsem wanem oli mekem samting ya? Oli lanem blong toktok narafala lanwis. Wan brata mo sista we tufala i gat 60 yia, tufala i faenem se i gat plante taosen studen blong Jaena wetem famle blong olgeta we oli kam stap long teritori blong tufala. Hasban i talem se: “Samting ya i pulum mitufala blong lanem lanwis blong ol man Jaena. I tru se mitufala i mas spenem taem evri dei blong stadi lanwis ya, be gudfala frut we i kamaot from, hemia se plante man Jaena long teritori blong mitufala oli stadi Baebol.”
14 Sipos yu no save lanem wan narafala lanwis, yu save yusumgud buk ya Good News for People of All Nations, blong storian long olgeta we oli toktok defren lanwis. Mo tu, yu yu save kasem wan buk long prapa lanwis blong olgeta we yu mitim long wok blong prij. l tru, i nidim taem mo fasin traehad blong storian long olgeta we oli gat defren kastom mo lanwis. Be tingbaot stamba rul blong Baebol we i talem se: “Man we i planem plante, hem bambae i kasem plante.”—2 Kor. 9:6.
Evriwan Long Kongregesen i Givhan
15, 16. (a) ?From wanem olgeta pablisa long kongregesen oli mas joen long wok ya blong pulum ol man oli kam disaepol? (b) ?Wanem wok we ol olfala oli mekem?
15 Be wok blong pulum ol man oli kam disaepol i no save kamaot from traehad blong wan man. Traehad blong ful kongregesen i pulum man i kam disaepol. ?From wanem yumi talem olsem? Jisas i talem se: “Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Mo i tru, taem ol Baebol studen oli kam long ol miting, oli sapraes blong luk we yumi gat lav taem yumi joengud tugeta. Wan woman we i stadi Baebol i raetem se: “Mi laekem blong go long ol miting !Olgeta long miting oli soem gudfala fasin long mi mo oli talem ol gudfala toktok!” Jisas i talem se olgeta we oli biaen long hem, famle blong olgeta bambae i agensem olgeta. (Ridim Matiu 10:35-37.) Be Jisas i mekem promes se bambae oli kasem plante moa ‘brata, mo sista, mama, mo pikinini blong olgeta’ insaed long kongregesen.—Mak 10:30.
16 Ol olfala brata sista blong yumi oli mekem bigfala wok blong givhan long ol Baebol studen, blong oli gohed gud long trutok. ?Long wanem rod? Maet sam we oli olfala oli no naf blong mekem ol Baebol stadi, be ol ansa we oli givim long miting blong kongregesen, oli save bildimap bilif blong ol man we oli lesin. Gudfala eksampol blong ol olfala blong folem “stret fasin,” i flasem kongregesen mo i pulum olgeta we hat blong olgeta i stret blong oli kam insaed long ogenaesesen blong God.—Prov.16:31, NW.
Winim Fraet
17. ?Yumi save mekem wanem blong winim filing ya se yumi no naf?
17 ?Yu yu save mekem wanem sipos yu harem se yu no naf blong mekem wan Baebol stadi? Rimemba se Jeova i givhan long Moses, taem i givim tabu spirit long hem, mo i givim Eron, brata blong hem, blong i wok wetem hem. (Eks. 4:10-17) Jisas i promes se spirit blong God bambae i givhan long yumi long wok we yumi mekem blong prij. (Wok 1:8) Antap long hemia, Jisas i sanem ol man we oli go prij, oli go tutu. (Luk 10:1) Taswe, sipos yu faenem i had blong mekem wan Baebol stadi, yu save prea from tabu spirit blong Jeova blong i givim waes long yu, mo biaen, i gud yu lukaot wan fren we i prij longtaem finis mo we i save givhan long yu blong yu no fraet. Bilif blong yumi i save kam strong moa taem yumi tingbaot se olgeta we Jeova i jusum blong mekem spesel wok ya hemia ol man we oli no skul gud mo oli no gat nem. Hem i jusumaot olgeta we ol man blong wol oli stap luk olgeta olsem “oli no gat paoa.”—1 Kor. 1:26-29.
18. ?Olsem wanem yumi save winim fraet ya se stadi bambae i no gohed gud?
18 ?Olsem wanem yumi save winim fraet ya se stadi bambae i no gohed gud from we yumi no save tijim gud hem? I gud blong tingbaot se wok blong mekem disaepol i no sem mak olsem wok blong rerem kakae. Wan gudfala kakae i dipen long man we i kukum, be wok blong pulum man i kam disaepol i no dipen long wok we wan pablisa nomo i mekem. Nogat. Antap long traehad blong yumi, i nidim wan samting moa. Jeova i mekem bigfala haf blong wok ya taem hem i pulum man i kam long hem. (Jon 6:44) Yumi mo ol narafala long kongregesen, yumi traem bes blong yumi blong tijim ol studen long fasin we i stretgud, blong oli save gohed gud. (Ridim 2 Timoti 2:15.) Mo studen ya i mas wok folem samting we hem i lanem. (Mat. 7:24-27) Maet yumi save harem nogud sipos wan studen i no moa gohed blong stadi Baebol. Yumi wantem se ol Baebol studen oli mekem wan gudfala jus. Be yumi wanwan i mas “talemaot olgeta fasin blong yumi long fes blong God.”—Rom 14:12.
?Wanem Ol Blesing?
19-21. (a) ?Wanem gudfala frut i kamaot taem yumi mekem ol Baebol stadi? (b) ?Jeova i tingbaot olgeta we oli joen long wok blong prij olsem wanem?
19 Taem yumi mekem ol Baebol stadi, samting ya i halpem yumi blong putum Kingdom long fasples long laef blong yumi. Mo tu ol save blong Tok blong God, oli go dip insaed long tingting mo hat blong yumi. ?From wanem wok blong mekem Baebol stadi i givhan blong mekem samting ya? Wan paenia we nem blong hem Barak, i eksplenem se: “Wok blong mekem ol Baebol stadi i save pulum yumi blong kam ol gudfala studen blong Tok blong God. Mi luksave se mi mi mas kasem save fulwan long ol samting we mi bilif long hem, bifo we mi nafgud blong tijim ol narafala man.”
20 ?Sipos yu yu no gat wan Baebol stadi, i minim se God i no moa tinghae long wok blong yu? !Nogat! Jeova i tinghae tumas long traehad we yumi mekem blong leftemap nem blong hem. Olgeta we oli joen long wok blong prij, oli “stap joen wetem God blong mekem wok blong hem.” Be taem yumi stadi Baebol wetem wan studen, yumi kasem glad we i bigwan moa from we yumi luk olsem wanem God i stap mekem sid we yumi planem i gru gud. (1 Kor. 3:6, 9) Wan paenia we nem blong hem Amy, i talem se: “Taem studen i gohed gud, yu harem se yu yu gat bigfala tangkiu long Jeova from we hem i yusum yu blong givim wan nambawan presen long studen ya, hemia janis ya blong save Jeova mo kasem laef we i no save finis.”
21 Traehad blong yumi blong statem mo mekem ol Baebol stadi, bambae i halpem yumi blong putum tingting blong yumi i stap strong long wok blong God naoia, mo bambae i mekem yumi strong blong wantem stap laef taem niufala wol i kamtru. Jeova bambae i halpem yumi blong sevem olgeta we oli lesin long yumi. (Ridim 1 Timoti 4:16.) !Hemia i wan bigfala risen blong stap glad!
?Yu Yu Tingbaot?
• ?Wanem traem i save blokem sam brata sista blong mekem ol Baebol stadi?
• ?Taem ol man oli no wantem lesin long trutok, wanem samting we yumi save mekem?
• ?Wanem blesing we yumi save kasem taem yumi mekem ol Baebol stadi?
[Kwestin]
[Tok blong pija long pej 15]
?Yu save traem yusum sam narafala rod blong prij mo faenem ol man we hat blong olgeta i stret?