Jisas—Eksampol We i Stretgud Blong Folem

?YU YU wantem stap olsem wan gudfala man, wan man we i hapi? Aposol Pita i eksplenem wanem we yumi save mekem blong kam olsem. Hem i se: “Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Yes, yumi save lanem plante samting long laef blong Jisas Kraes. Taem yumi lanem long saed blong Jisas mo yumi folem eksampol blong hem long laef blong yumi, i sua se bambae yumi kam ol gudfala man mo yumi hapi. I gud yumi lukluk moa long sam gudfala fasin blong man ya we i hae moa long olgeta man mo luk olsem wanem eksampol blong hem i save givhan long yumi.

Jisas i skelemgud ol samting. Nating se Jisas i talem se hem i “no gat ples . . . blong go slip long hem,” hem i no blokem ol samting we i save mekem hem i haremgud long laef. (Matiu 8:20) Hem i go long lafet. (Luk 5:29) Faswan merikel we Jisas i mekem—blong jenisim wota i kam waen long wan lafet blong mared—i soemaot se hem i no blokem sam samting we i save mekem hem i haremgud long laef. (Jon 2:1-11) Be yet, Jisas i soemaot klia wanem we i moa impoten long laef blong hem. Hem i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.”—Jon 4:34.

□ ?Yu yu luklukgud laef blong yu blong save olsem wanem yu save skelemgud ol samting long saed blong bodi mo fasin fren blong yu wetem God?

Ol man oli no fraet blong kam long Jisas. Baebol i tokbaot Jisas olsem wan man we i gat lav mo i kaengud. Hem i no kros long ol man we oli kam long hem from we oli gat ol problem mo ol kwestin blong askem long hem. Long wan taem we hip man i raonem Jisas, wan woman we i gat sik blong woman i stap long hem blong 12 yia finis, i tajem klos blong Jisas from we hem i wantem se sik blong hem i finis. Jisas i no tok strong long woman ya from fasin blong hem we, maet long lukluk blong ol man, hem i flas. Defren olgeta, Jisas i talem long woman ya long kaen fasin i se: “Dota blong mi. Bilif blong yu i mekem yu yu gud bakegen.” (Mak 5:25-34) Ol pikinini tu oli haremgud blong joen wetem Jisas. Jisas i no ronemaot olgeta. (Mak 10:13-16) Taem hem i storian wetem ol disaepol blong hem, oli storian olsem ol gudfala fren mo oli no fraet blong talem tingting blong olgeta. I no gat samting i blokem olgeta blong kam klosap long hem.—Mak 6:30-32.

□ ?Ol narafala oli no fraet blong toktok wetem yu?

Hem i kasem save long filing blong narafala mo i gat sore. Wan nambawan fasin blong Jisas hemia se hem i naf blong putum hem wan long ples blong ol narafala, i kasem save filing blong olgeta mo i givhan long olgeta. Aposol Jon i talem se taem Jisas i luk Meri i stap harem nogud tumas from we brata blong hem Lasaros i ded, Jisas “i harem nogud tumas we i stap pulum win blong hem from” mo “i krae.” I klia we ol man we oli stap long taem ya oli luk filing we Jisas i gat long famle ya. Hem i no sem blong soemaot filing ya. !Jisas i soemaot se hem i gat sore ya taem hem i mekem fren blong hem i laef bakegen!—Jon 11:33-44.

Long wan narafala taem bakegen, wan man i harem nogud from i kasem leprosi—wan rabis  sik we i mekem se hem i no joen wetem ol narafala man—i askem long Jisas se: “Masta, sipos yu yu wantem, mi mi save se yu yu gat paoa blong mekem mi mi gud bakegen.” Ansa we Jisas i talem long man ya i tajem hat blong hem: “Jisas i putum han blong hem long hem, i talem se, ‘Yes, mi mi wantem. !Yu klin!’” (Matiu 8:2, 3) Jisas i no mekem ol sikman oli kamgud bakegen jes blong mekem ol profet tok oli kamtru, nogat. Hem i wantem mekem ol sikman ya oli haremgud, oli no moa krae. Long olgeta samting ya we hem i mekem, oltaem hem tingbaot tok ya se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.”—Luk 6:31.

□ ?Ol samting we yu mekem i soemaot se yu gat sore long ol narafala we oli kasem trabol?

Jisas i kasem save mo i luksave. Nating se Jisas i wan man we i no mekem mastik samtaem be hem i neva ting se ol narafala oli mas stretgud olgeta mo hem i neva mekem olsem we hem i hae moa long ol narafala; hem i neva jajem wan bisnes we i no kasem save fulwan long bisnes ya fastaem. Wan taem, wan woman we ol man oli save hem olsem “wan woman nogud,” i soemaot bilif mo i glad blong wasem leg blong Jisas wetem wota blong ae blong hem. Jisas i letem hem i mekem olsem. Samting ya i mekem ol narafala ya we oli jajem woman ya finis oli sapraes tumas. Jisas i luksave we fasin blong woman ya i tru, i no gat tu fes. From samting ya, hem i no jajem woman ya from ol sin blong hem. Defren olgeta, hem i talem se: “Bilif blong yu i mekem yu yu gud bakegen. Yu go, yu no moa wari bakegen.” Gudfala ansa blong Jisas i pusum woman ya blong lego ol nogud fasin blong hem.—Luk 7:37-50.

□ ?Ol narafala oli luk yu olsem wan man we i kwik blong talem ol gudfala toktok long narafala mo yu no hareap blong jajem narafala?

Jisas i mekem i sem mak long ol man mo i respektem olgeta. Jisas i gat wan spesel fasin fren wetem disaepol ya blong hem Jon. Jisas mo Jon, tufala i gat sam fasin we i klosap sem mak mo maet tufala i famle tu. * Nating se i olsem, Jisas i no mekem wan samting we i spesel moa long Jon i bitim ol narafala disaepol mo hem i no leftemap Jon olsem se hem i hae moa long ol narafala, nogat. (Jon 13:23) Mo taem Jon mo brata blong hem Jemes oli askem blong sidaon klosap long Jisas long Kingdom blong God, Jisas i ansa se: “Samting ya, we yutufala i askem se wan i sidaon long raet saed blong mi, mo narawan long lef saed blong mi, hemia i no blong mi blong givim.”—Mak 10:35-40.

Oltaem Jisas i gat respek long ol narafala. Hem i no gat ol rong tingting olsem ol man long taem blong hem, olsem tingting ya se ol man oli hae moa long ol woman. Jisas i tinghae long ol woman. Faswan taem we Jisas i talemaot se hem i  Mesaea, hemia long wan woman we i no Jiu be i wan woman Sameria. Long taem ya ol man Jiu oli no save toktok long ol man Sameria mo oli no save talem halo long olgeta. (Jon 4:7-26) Mo taem Jisas i laef bakegen, hem i ona long tu woman bakegen taem hem i soemaot hem long tufala.—Matiu 28:9, 10.

□ ?Yu yu mekem i stret oltaem taem yu joen wetem ol man mo ol woman, nomata wanem kala blong skin, kantri, lanwis blong olgeta?

Hem i wan pikinini boe mo wan brata we i mekemgud wok blong hem. I luk olsem se Josef, papa blong Jisas long wol ya, i ded taem Jisas i yangfala nomo. Ating Jisas i mekem wok blong kapenta blong i save givhan long mama blong hem mo ol smol brata mo sista blong hem. (Mak 6:3) Sam dei bifo we Jisas i ded, hem i askem long aposol blong hem Jon, blong i lukaot long mama blong Hem.—Jon 19:26, 27.

□ ?Yu yu save folem eksampol blong Jisas blong lukaot long ol nid blong famle blong yu?

Jisas i wan trufala fren. Jisas i wan nambawan fren. ?From wanem? Hem i no sakemaot ol fren blong hem jes from we oli mekem mastik nating se maet hemia semfala mastik we oli mekem bakegen mo bakegen. I no oltaem we ol disaepol blong hem oli mekem samting olsem we hem i wantem. Be Jisas i pruvum long olgeta se hem i wan trufala fren taem hem i luk ol gudfala fasin blong olgeta i bitim we hem i jajem olgeta se tingting blong olgeta i nogud. (Mak 9:33-35; Luk 22:24-27) Jisas i no fosem olgeta blong oli gat sem tingting olsem hem. Defren olgeta hem i pulum olgeta blong talemaot tingting blong olgeta.—Matiu 16:13-15.

Antap long olgeta samting ya, Jisas i lavem ol fren blong hem. (Jon 13:1) ?Hem i lavem olgeta gogo kasem wanem mak? Jisas i talem se: “I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15:13) ?I gat wan man we i save givim wan samting we i moa sas long fren blong hem i bitim prapa laef blong hem?

□ ?Yu yu stap olsem wan gud fren oltaem taem fasin blong wan man i mekem yu yu kros no yu harem nogud?

Hem i no fraet mo i wan strong man. Plante pija i soemaot Jisas olsem wan man we i slak, be Jisas i defren olgeta long wan man we i slak no i sidaon nomo mo wet. Ol Gospel oli tokbaot Jisas olsem wan man we i strong, i gat paoa. Tu taem Jisas i ronemaot ol man we oli stap mekem maket wetem ol samting blong olgeta long haos tempol. (Mak 11:15-17; Jon 2:14-17) Taem wan grup blong man i kam blong holem ‘man Nasaret ya Jisas,’ Jisas i no fraet, i muv i go fored long ol man ya blong talemaot se hem i hu mo blong protektem ol disaepol blong hem taem hem i talem strong i se: “Mi ya nao. Sipos yufala i stap lukaot mi, be i gud yufala i letem ol man ya blong mi oli gohom.” (Jon 18:4-9) Yumi no sapraes we taem Ponjes Paelat i luk we Jisas i no fraet long taem ya we oli holem hem mo mekem i nogud long hem, Paelat i talem se: “!Yufala i luk! !Hemia nao man ya!”—Jon 19:4, 5.

□ ?Yu yu tekem desisen kwiktaem mo yu gat strong tingting taem yu luksave wanem we yu mas mekem?

Hemia sam long ol nambawan fasin blong Jisas we i mekem se Jisas i stap olsem wan gudfala eksampol blong yumi folem. Sipos yumi mekem we ol fasin blong Jisas oli gat paoa long laef blong yumi, bambae yumi save stap olsem wan gudfala man mo wan man we i hapi. From risen ya nao, aposol Pita i talem long ol Kristin blong oli biaen long Jisas. ?Yu yu traehad long evri rod blong biaen long Jisas?

Hem i No Jes Wan Eksampol Nomo Blong Folem

Jisas i no jes wan eksampol nomo blong yumi folem. Hem i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Jisas i openem rod blong yumi save lanem trutok long saed blong God mo blong yumi kam klosap long Hem, mo tu, Jisas i mekem rod  blong bambae ol man we oli stap tru long God oli save kasem laef.—Jon 3:16.

Jisas i talemaot risen from wanem hem i kam long wol ya i se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.” (Matiu 20:28) Taem Jisas i givim laef blong hem olsem wan sakrefaes, hem i putum wan fandesen blong ol man oli save haremgud long laef blong olwe. ?Yumi wanwan i mas mekem wanem blong haremgud from sakrefaes ya? Jisas i eksplenem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

Yes, blong kasem laef blong olwe, yumi mas lanem blong save Jisas, folemgud fasin blong laef blong hem, mo soemaot bilif long sakrefaes blong hem. Mifala i singaot yu blong yu tekem taem blong kasem ol save ya long Baebol, mo blong traehad blong wokem ol save ya long laef blong yu olsem Jisas i mekem. *

Eksampol blong laef blong Jisas i tijim yumi se yumi mas wanem kaen man. Ded blong hem we i olsem wan sakrefaes i save mekem yumi fri long sin mo pei blong sin we hemia ded. (Rom 6:23) Laef blong yumi bambae i nogud tumas sipos laef blong Jisas i no gat paoa long yumi. Yumi neva mas letem ol samting mo ol wari blong laef i spolem janis we yumi gat blong lanem mo folemgud eksampol blong man ya we i hae moa long olgeta man hemia Jisas Kraes.

[Ol futnot]

[Bokis blong pija long pej 7]

◼ Jisas i mekem i sem mak long ol man mo i gat respek long olgeta man

◼ Hem i stap olsem wan trufala fren gogo kasem we hem i ded

◼ Hem i no fraet

?Yu yu traem blong folemgud eksampol blong Jisas?

[Tok blong pija long pej 5]

Jisas i skelemgud ol samting . . .

ol man oli no fraet blong kam long hem . . .

hem i gat sore