Jisas—Ol Man Oli Talem Wanem Long Saed Blong Hem

“Yes, Jisas man Nasaret . . . i wan impoten man long histri.”—H. G. Wells, man Inglan we i stadi long histri.

“Kraes nomo . . . i no gat wan narafala man long histri we i olsem hem.”—Philip Schaff, man Swiselan we i stadi long bilif blong jos mo histri.

?HU MAN i stret blong oli singaot hem se hem i hae moa long olgeta man? ?Olsem wanem yumi save skelem wan man se hem i hae no nogat? ?From we hem i wan nambawan man blong faet? ?From we hem i gat paoa long bodi? ?From we hem i gat gudhed? ?No yu ting se yumi save skelem hem folem ol toktok blong hem mo wok we hem i mekem we i jenisim laef blong ol man mo eksampol we hem i soem long olgeta?

Ol man blong stadi long histri, ol saentis, ol man blong hae save, ol man blong raetem ol buk, ol lida blong politik, mo sam narafala man—we oli laef bifo mo we oli laef tede—oli talem tingting blong olgeta long saed blong man Nasaret ya, Jisas Kraes, oli se:

“I gat plante plante pruf we oli soemaot se—long ol 2,000 yia we oli pas mo long ful histri blong man long wol ya tu—Jisas blong Nasaret nomo hem i man ya we i gat bigfala paoa long laef blong ol man i bitim eni narafala haeman. Sipos wan man i no agri long samting ya, ating bambae hem i mas haedem ol pruf ya.”—Reynolds Price, man Amerika we i raetem ol buk mo i stadi long Baebol.

“Wan man we i no mekem wan samting nating we i nogud, i givim laef blong hem olsem wan sakrefaes blong mekem i gud long ol narafala man, we hemia i minim ol enemi blong hem tu, mo i kam ransom ya blong olgeta man long wol. Hemia wan fasin we i stretgud olgeta.”—Mohandas K. Gandhi, lida blong politik mo skul long India.

“Taem mi mi pikinini, mi kasem tijing we i kamaot long Baebol mo long buk ya Talmud. Mi mi wan Jiu, be mi mi laekem tumas stori blong Jisas.”—Albert Einstein, wan saentis we i bon long Jemani.

“Long lukluk blong mi, fasin blong Jisas Kraes olsem Pikinini blong God, mo olsem Pikinini blong Man, bambae i stap olwe long histri blong man olsem beswan eksampol. Evri samting we Hem i talem mo mekem oli impoten long yumi we yumi laef tede, mo i no gat narafala man nating we i olsem hem.”—Toktok blong Sholem Asch, wan man blong raetem stori we i bon long Polan, olsem i stap long Christian Herald; olgeta i putum long italik.

“Blong toti faef yia, mi no bilif long eni samting. Be bambae i mekem faef yia nao we mi stat blong bilif se Jisas i wan trufala man. Mi bilif long tijing blong Jisas Kraes mo wantaem nomo ful laef blong mi i jenis.”—Count Leo Tolstoy, man Rasia we i stap raetem ol buk mo i waes long ol save blong man.

“Laef blong [Jisas] i gat paoa long laef blong olgeta man long wol mo i stap gohed yet blong gat paoa long laef blong plante man.”—Kenneth Scott Latourette, man Amerika we i stap stadi long histri mo i raetem ol buk.

“?Yu ting se ol stori blong laef blong Jisas oli ol kastom stori nomo? Nogat, fren blong mi. I gat plante samting we oli pruvum se hem i no kastom stori. I gat moa samting blong pruvum stori blong Jisas Kraes i bitim ol samting blong pruvum stori blong man ya Socrates we plante man oli bilif long hem.”—Jean-Jacques Rousseau, man Franis we i waes long ol save blong man.

I klia se Jisas Kraes nomo i save stap olsem wan gudfala eksampol blong yumi. Pol i wan man long faswan handred yia we i skulgud mo Jisas i jusumaot hem blong i kam man blong Hem mo blong i talemaot Hem long olgeta ples. Pol i talem long yumi blong “oltaem yumi mas luk” long Jisas. (Hibrus 12:2; Ol Wok 9:3) ?Jisas i save tijim wanem long yumi long saed blong laef? ?Olsem wanem laef blong hem i save mekem i gud long yu?