Ol Bigfala Poen Long Buk Blong Revelesen—Haf 1
Tok Blong Jeova i Wan Samting We i Laef
Ol Bigfala Poen Long Buk Blong Revelesen—Haf 1
TAEM olfala aposol Jon i stap kalabus long aelan blong Patmos, hem i luk 16 vison. Long ol vison ya, Jon i luk ol samting we Jeova God mo Jisas Kraes tufala bambae i mekem long dei blong Masta, hemia i stat long taem we Kingdom blong God i stat rul long yia 1914 go kasem en blong Wan Taosen Yia Rul blong Kraes. Buk blong Revelesen we Jon i raetem samwe long yia 96 K.T., i talemaot ol vison ya we oli pulumgud tingting blong yumi.
Bambae yumi tokbaot ol bigfala poen long Revelesen 1:1 kasem 12:17, hemia seven long ol vison we Jon i luk. Yumi wantem save long saed blong ol vison ya from we oli joen wetem ol samting we i stap hapen long wol naoia, mo oli soemaot wanem we Jeova bambae i mekem i no longtaem. Taem man i ridim ol vison ya wetem bilif, oli leftemap tingting blong hem mo mekem hem i haremgud.—Hib. 4:12.
“SMOL SIPSIP YA” I BREKEMAOT SIKIS LONG OL SEVEN GRIS BLONG KANDEL
Faswan vison we Jon i luk, hemia Jisas Kraes mo bigfala paoa blong hem. Jisas i givim sam mesej long Jon we Jon i mas ‘raetemdaon long wan buk, mo sanem i go long ol seven’ kongregesen. (Rev. 1:10, 11) Nekis vison we Jon i luk, hemia wan jea blong king long heven. Man we i sidaon long jea ya i holem wan buk long raethan blong hem. Buk ya i olsem wan longfala pepa we oli rolemap mo oli putum gris blong kandel long seven ples long en blong pepa ya blong holemtaet. Hemia we i ‘stret gud blong openem buk ya,’ hemia “Laeon blong Juda,” no “wan Smol Sipsip . . . [we] i gat seven hon blong hem mo seven ae blong hem.”—Rev. 4:2; 5:1, 2, 5, 6.
Namba tri vison i soemaot wanem i hapen taem “Smol Sipsip ya” i brekemaot wanwan long sikis gris blong kandel we oli lokem buk ya. Taem hem i brekemaot namba sikis gris blong kandel, graon i seksek bigwan mo bigfala dei blong kros blong God i stat. (Rev 6:1, 12, 17) Nekis vison i soemaot ‘fo enjel we oli stap blokem ol fo win long wol’ gogo God i putum mak blong hem long olgeta 144,000 man. “Wan bigfala kampani” blong man we God i no putum mak blong hem long olgeta, oli stap “stanap long fes blong jea blong king, mo long fes blong Smol Sipsip.”—Rev. 7:1, 9, NW.
Ansa Blong Sam Kwestin Long Saed Blong Baebol:
1:4; 3:1; 4:5; 5:6—?Wanem mining blong tok ya “ol seven spirit”? Namba ya seven i soemaot samting we i fulwan long lukluk blong God. Taswe, mesej we i go long “ol seven” kongregesen ya i stret tu long olgeta man blong God tede, we oli stap long bitim 100,000 kongregesen long olgeta ples blong wol. (Rev. 1:11, 20) Jeova i givim tabu spirit we i naf blong mekem samting we hem i wantem. Taswe “seven spirit” i soemaot se tabu spirit i wok fulwan blong givim save mo ol blesing long olgeta we oli lesingud long ol profet tok. Plante taem buk blong Revelesen i yusum namba ya seven we i minim samting we i fulwan. Mo i tru, buk ya i tokbaot ‘plan blong God we i stap haed’ se “i kamtru nao,” i min se God i wokem gogo i kamtru fulwan.—Rev. 10:7.
1:8, 17 (NW)—?Ol nem ya ‘Alfa mo Omega’ mo ‘Faswan mo Laswan’ oli blong hu? Nem ya ‘Alfa mo Omega’ i blong Jeova. Nem ya i makem se i no gat wan God bifo long Jeova we i gat olgeta paoa, mo bambae i no gat wan God biaen long hem tu. Hem i ‘Faswan, we i stap bifo olgeta, mo bambae hem i Laswan, biaen olgeta.’ (Rev. 21:6; 22:13) Revelesen 22:13 i talem se Jeova i ‘Faswan mo Laswan,’ from we i no gat wan bifo long hem mo afta long hem. Be long faswan japta blong Revelesen we i tokbaot ‘Faswan mo Laswan,’ ol vas oli soemaot se long ples ya nem ya i blong Jisas Kraes. Jisas i faswan man blong laef bakegen long wan spirit bodi we i no save ded bakegen samtaem, mo hem i laswan we Jeova hem wan i mekem i laef bakegen.—Kol. 1:18.
2:7—?Wanem ya “Garen blong God”? Ol tok ya i go long ol Kristin we tabu spirit i makemaot olgeta. Taswe, garen we vas ya i tokbaot i mas minim gudfala ples long heven, klosap long God. Ol man blong God we tabu spirit i makemaot olgeta bambae oli kasem blesing ya blong kakae long “tri blong laef.” Olgeta ya bambae oli no moa save ded bakegen samtaem.—1 Kor. 15:53.
3:7—?Wetaem Jisas i kasem ‘ki blong Deved,’ mo hem i yusum ki ya blong mekem wanem? Taem Jisas i tekem baptaes long yia 29 K.T., God i makemaot hem blong i kam King long laen blong Deved. Be Jisas i jes kasem ki blong Deved long yia 33 K.T., taem hem i go antap long heven mo i sidaon long raetsaed blong God. Long ples ya, hem i kasem raet blong rul long Kingdom blong Deved. Afta long taem ya, Jisas i yusum ki ya blong openem doa blong plante man oli kasem ol spesel wok long saed blong Kingdom. Long yia 1919, Jisas i putum “ki blong evri samting” long haos blong Deved, i go long han blong “slef ya we i stret mo waes,” taem hem i putumap grup ya blong lukaot long “olgeta samting blong hem.”—Aes. 22:22; Mat. 24:45, 47, NW.
3:12—?Wanem “niufala nem” blong Jisas? Nem ya i joen wetem niufala wok mo blesing we Jisas i kasem. (Fil. 2:9-11, NW) I no gat narafala man we i save nem ya olsem Jisas. Nating se i olsem, Jisas i raetem nem ya long ol brata blong hem long heven, mo samting ya i mekem se oli kam klosap moa long hem. (Rev. 19:12) Mo tu, Jisas i serem sam spesel wok we hem i kasem wetem olgeta.
Ol Lesen Blong Yumi:
1:3. “Taem blong ol samting ya [hemia taem we God i mekem jajmen blong hem i kamtru long wol blong Setan] i kam klosap finis.” From samting ya, i impoten tumas we yumi kasem save long mining blong buk blong Revelesen mo yumi tekem aksen folem ol tok blong hem.
3:17, 18. Blong yumi save rij long saed blong spirit, yumi mas pem ‘gol long Jisas we oli bonem finis long faea.’ Hemia i min se yumi mas traehad blong mekem ol gudfala wok, mo kam rij long fasin ya. (1 Tim. 6:17-19) Mo tu, yumi mas putum “waet klos” we oli soemaot se yumi man blong Kraes. Mo yumi mas putum ‘meresin long ae’ blong yumi, hemia i min se yumi folem ol gudfala advaes we i halpem yumi blong luksave klia ol samting long saed blong spirit, olsem ol advaes we i kamaot long Wajtaoa.—Rev. 19:8.
7:13, 14. Ol 24 elda, hemia ol 144,000 we Jon i luk olgeta long heven finis, taem oli stap mekem wok blong king mo pris. Ol pris long Isrel bifo oli pija blong grup ya. King Deved i bin seraotem ol pris oli go long 24 kampani. Wan long ol elda ya i talemaot bigfala kampani long Jon mo eksplenem se oli hu. Taswe, ol Kristin we tabu spirit i makemaot olgeta oli stat blong laef bakegen samtaem bifo long yia 1935. ?From wanem yumi talem olsem? From we long yia ya nao ol tabu man blong God long wol oli kasem save gud hu ya bigfala kampani.—Luk 22:28-30; Rev. 4:4; 7:9, NW.
BREKEMAOT NAMBA SEVEN GRIS BLONG KANDEL MO SEVEN ENJEL OLI BLU PUPU
Smol Sipsip i brekemaot namba seven gris blong kandel. Seven enjel oli holem seven pupu. Ale sikis long ol enjel ya oli blu pupu blong olgeta, blong talemaot ol panis long “wan haf” blong ol man, tu haf i stap. Haf ya we i kasem panis, hemia Krisendom. (Rev. 8:1, 2, 7-12; 9:15, 18) Hemia nao ol samting we Jon i luk long namba faef vison. Long nekis vison, Jon tu i joen insaed long hem. Hem i kakae smol buk we i stap long han blong enjel, mo hem i makem saes blong haos blong God. Afta we enjel i blu namba seven pupu, Jon i harem fulap voes oli singaot bigwan se: “Kingdom blong wol ya i kam kingdom blong Masta blong yumi mo blong Kraes blong hem.”—Rev. 10:10; 11:1, 15, NW.
Namba seven vison i givim moa save long samting we Revelesen 11:15, 17 i tokbaot. I gat wan bigfala saen i kamaot long heven. Wan woman long heven i bonem wan pikinini boe. Oli sakemaot Setan i kamdaon long wol. Hem i kros tumas long woman ya long heven, ale hem i go “faet agens long ol narafala pikinini blong hem.”—Rev. 12:1, 5, 9, 17.
Ansa Blong Sam Kwestin Long Saed Blong Baebol:
8:1-5—?From wanem heven i kam kwaet we i no moa gat noes nating, mo biaen oli kafsaedem wanem i kamdaon long wol? Heven i kam kwaet blong oli save harem “ol prea blong ol man blong God” long wol. Hemia long en blong Wol Wo Wan. Long en blong rul blong ol Jentael neson, ol Kristin we tabu spirit i makemaot olgeta oli no go antap long heven, olsem plante long olgeta oli bin tingting. Oli fesem hadtaem long Wol Wo Wan. Ale biaen, oli prea wetem fulhat blong olgeta blong askem Jeova blong lidim olgeta. Blong ansa long prea blong olgeta, enjel i kafsaedem faea i go long wol, mo hemia i mekem se ol Kristin we tabu spirit i makemaot olgeta oli gohed strong olsem we faea i laet long olgeta. Nating se oli no plante, be oli statem wan wok blong prij long olgeta ples blong wol we i mekem se Kingdom blong God i kam wan bigfala samting we ol man oli stap tingbaot. I olsem we oli laetem wan faea long Krisendom. Oli talemaot ol woning blong Baebol we oli olsem tanda, oli mekem ol man oli save long ol trutok blong Baebol we oli olsem laetning, mo oli mekem fandesen blong ol giaman skul i seksek, olsem we ol haos oli seksek taem i gat wan etkwek.
8:6-12; 9:1, 13; 11:15—?Wetaem ol seven enjel oli mekemrere blong blu pupu blong olgeta? ?Wetaem mo olsem wanem oli blu pupu? Ol seven enjel oli mekemrere blong blu pupu blong olgeta taem oli givim ol save long ol memba blong grup we i olsem Jon we oli stap yet long wol long ol yia 1919-1922, mo ol save ya i mekem se oli girap mo wok strong. Long ol yia ya, ol tabu man ya oli bisi blong mekem wan plan long saed blong wok blong prij, mo blong bildim plante faktri blong printim ol buk. (Rev. 12:13, 14) Noes blong ol pupu i olsem ol tok panis we ol man blong God oli halpem ol enjel blong talemaot, hemia jajmen we Jeova bambae i mekem i kamtru long wol blong Setan. Yumi makem se samting ya i stat long asembli long Cedar Point, Ohio, long yia 1922, mo bambae i gohed kasem taem we bigfala trabol i stat long wol ya.
8:13; 9:12; 11:14—?Olsem wanem trifala laswan pupu oli olsem ‘ol trabol’? Namba wan kasem namba fo pupu oli talemaot ol strong tok we i soemaot klia se Krisendom i ded long saed blong spirit. Namba faef, sikis, mo seven pupu oli talemaot ol trabol we oli kamaot from sam spesel samting we i hapen. Namba faef pupu i joen wetem samting we i hapen long yia 1919, taem ol man blong God oli kamfri long “bigfala hol” we oli fas long hem, we i mekem se oli no moa wok. Ale, oli gohed strong long wok blong prij, gogo wok ya i kam olsem wan bigfala trabol we i mekem Krisendom i harem nogud. (Rev. 9:1) Namba sikis pupu i krae nao wan bigfala kampani blong soldia we i bigwan moa i bitim ol narafala ami bifo, i mekem wan bigfala wok blong prij we i stat long yia 1922. Laswan pupu i krae, nao Kingdom blong Mesaea i stanap.
Ol Lesen Blong Yumi:
9:10, 19. Ol stret tok blong Baebol we i stap long ol buk blong “slef ya we i stret mo waes,” oli strong mo oli save stikim man. (Mat. 24:45, NW) Ol tok ya oli olsem tel blong ol lokis we oli kakae man “olsem skopion,” mo oli olsem ol hos blong kampani blong ol soldia ya we “tel blong olgeta i olsem snek.” ?From wanem i olsem? From we ol buk ya oli givim woning long saed blong “dei we [Jeova] i makem blong givimbak long ol man nogud.” (Aes. 61:2, NW) I gud yumi wok strong mo yumi no fraet blong givimaot ol buk ya.
9:20, 21. Plante man raon long wol we oli stap talem se oli no Kristin, oli gat tingting daon mo oli stap lesin long ol tok we yumi talemaot. Be yumi no mas gat tingting se “ol narafala man” ya we oli afsaed long Krisendom, olgeta evriwan bambae oli kam man blong God. Nogat. Nating se i olsem, yumi gohed nomo blong prij long olgeta.
12:15, 16. “Graon” i minim sam samting long wol blong Setan, olsem ol gavman blong ol defdefren kantri. Olgeta ya oli letem ol man oli fri blong mekem wosip olsem oli wantem. Stat long ol yia 1940, ol gavman ya oli “solemdaon wota ya [fasin agens] we bigfala algita ya i traot long hem.” Tru ya, taem Jeova i wantem, hem i save pulum ol gavman blong mekem samting we i stap long tingting blong hem. Taswe ol tok long Ol Proveb 21:1 i stret nomo, i se: “I isi nomo blong Hae God i mekem reva i ron i folem rod we hem i wantem, mo long sem fasin, i isi nomo blong hem i holem tingting blong king, i lidim hem long rod we hem i wantem.” Samting ya i mas mekem bilif blong yumi long God i strong gud.