“Yu Kam, Yu Biaen Long Mi, Yu Man Blong Mi”

“Man we i wantem kam biaen long mi, hem i mas blokem ol samting we hem nomo i wantem, mo evri dei hem i mas karem [“pos,” NW] blong hem, i biaen long mi.”—LUK 9:23.

1, 2. (a) ?Wanem janis we Jisas i givim long ol man? (b) ?Taem yu yu save we Jisas i singaot yu blong biaen long hem, yu yu mekem wanem?

KLOSAP long en blong wok we Jisas i mekem long wol, hem i prij long Perea, hemia wan distrik long not is blong Judia, narasaed long Jodan Reva. Wan yangfala man i kam long Jisas, i askem long hem wanem samting we hem i mas mekem blong kasem laef we i no save finis. Jisas i luksave se yangfala man ya i stap obei gud long Loa blong Moses. Ale hem i givim wan nambawan janis long yangfala man ya. Hem i se: “Yu go, yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat plante samting blong yu long heven. Mo yu kam, yu biaen long mi, yu man blong mi.” (Mak 10:21) !Tingbaot! !Hemia wan janis ya blong biaen long Jisas, stret Pikinini blong God ya we i gat olgeta paoa!

² Yangfala man ya i no biaenem Jisas, be sam narafala oli glad blong biaen long hem. Bifo we yangfala man ya i kam luk Jisas, Jisas i talem long Filip se: “Yu kam, yu biaen long mi, yu man blong mi.” (Jon 1:43) Filip i glad blong biaen long Jisas, ale hem i kam wan aposol blong Jisas. Jisas i talem semfala toktok ya long Matiu blong singaot hem, mo hem tu i glad blong biaen long Jisas. (Mat. 9:9; 10:2-4) Jisas i givim janis ya long olgeta man we oli laekem stret fasin. Hem i se: “Man we i wantem kam biaen long mi, hem i mas blokem ol samting we hem nomo i wantem, mo evri dei hem i mas karem [“pos,” NW] blong hem, i biaen long mi.” (Luk 9:23) Yes, eni man i save biaenem Jisas sipos hem i wantem. ?Olsem wanem? ?Yu yu wantem kam man blong Jisas? Plante long yumi i tekem aksen finis blong biaenem Jisas, mo long wok blong prij, yumi stap talemaot toktok ya blong Jisas blong singaot moa man blong oli kam biaen long hem.

3. ?Yumi save mekem wanem blong yumi no lusum rod, nao yumi no moa biaen long Jisas?

³ Sore tumas, samfala we fastaem oli intres long trutok blong Baebol, oli no moa gohed blong stadi. Sloslo oli kam slak mo oli “lusum rod,” oli no moa biaen long Jisas. (Hib. 2:1) ?Yumi save mekem wanem blong samting ya i no hapen long yumi? Blong givhan long yumi, i gud yumi askem se: ‘?From wanem mi mi bin jusum blong biaen long Jisas? ?Mi mi mas mekem wanem blong biaen long hem?’ Sipos yumi tingbaot ansa blong tufala kwestin ya oltaem, samting ya bambae i halpem yumi blong gat strong tingting blong gohed long nambawan rod ya we yumi jusum, mo bambae i halpem yumi tu blong pulum ol narafala blong oli biaenem Jisas.

?From Wanem Yumi Biaen Long Jisas?

4, 5. ?From wanem Jisas i nafgud blong lidim yumi?

⁴ Profet Jeremaea i talem se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jer. 10:23) Histri blong man i pruvum se ol tok ya blong Jeremaea i tru nomo, mo i stap kam klia moa oltaem se ol sinman oli no save rulum olgeta bakegen. Yumi glad blong biaen long Jisas from we yumi luksave se hem i man we i naf blong lidim yumi be ol man long wol ya oli no naf. Tingbaot sam samting we i soem se Jisas i nafgud blong lidim yumi.

⁵ Faswan samting se, Jeova nao i jusumaot Jisas blong hem i kam Mesaea, Lida blong yumi. Man ya we i Wokem yumi, hem i save gud bitim eni narafala man hu bambae i beswan Lida blong yumi. Seken samting se, ol fasin blong Jisas oli pulum yumi blong laekem hem mo blong wantem folem eksampol blong hem. (Ridim Aesea 11:2, 3.) Hem i givim wan eksampol we i stretgud olgeta. (1 Pita 2:21) Namba tri samting se, Jisas i laekem tumas olgeta we oli biaen long hem. Hem i soemaot samting  ya taem hem i ded blong sevem olgeta. (Ridim Jon 10:14, 15.) Mo tu, taem Jisas i stap lidim yumi blong gat wan laef we yumi save glad long hem naoia mo blong kasem nambawan laef we i no save finis long fiuja, hem i stap lukaotgud long yumi, olsem wan man blong lukaot long sipsip i stap keagud long ol sipsip blong hem. (Jon 10:10, 11; Rev. 7:16, 17) From ol risen ya, yumi bin mekem wan waes desisen taem yumi jusum blong biaen long hem. ?Be yumi mas mekem wanem blong biaen long hem?

6. ?Yumi mas mekem wanem blong biaen long Jisas?

⁶ Blong biaen long Kraes, yumi no talem nomo se yumi Kristin. Tede, samwe tu bilian man oli stap talem se oli Kristin, be ol samting we oli mekem i soemaot se oli ol “man blong mekem ol rabis fasin.” (Ridim Matiu 7:21-23.) Taem wan man i soem we hem i wantem kam man blong Jisas, yumi halpem hem blong kasem save se ol trufala Kristin oli folem ol tijing mo eksampol blong Jisas long evri haf blong laef blong olgeta, mo oli mekem samting ya evri dei. Blong givhan long yumi blong kasem save olsem wanem blong mekem samting ya, bambae yumi lukluk long sam samting we yumi save long saed blong Jisas.

Folem Waes Fasin Blong Jisas

7, 8. (a) ?Wanem ya waes fasin, mo from wanem waes blong Jisas i bigwan? (b) ?Olsem wanem Jisas i soem se hem i waes? ?Olsem wanem yumi save folem eksampol blong hem?

⁷ Jisas i gat plante fasin we oli nambawan, be bambae yumi tokbaot fo long olgeta nomo: waes, tingting daon, fasin blong wok strong, mo lav. Fastaem, bambae yumi tokbaot waes blong hem, hemia se, hem i naf blong mekem ol save blong hem mo fasin ya blong luksave samting, i wok long laef blong hem. Aposol Pol i raetem se: “God i haedem ol gudgudfala samting blong waes mo save blong hem long Kraes.” (Kol. 2:3) ?Hu i lanem Jisas long waes fasin? Hem i talem se: “Mi mi stap talemaot ol samting ya nomo we Papa blong mi i tijim mi finis long hem.” (Jon 8:28) Jeova nao i stamba blong waes we Jisas i gat, taswe yumi no sapraes we Jisas i mekem ol gudfala desisen.

⁸ Tingbaot gudfala desisen we Jisas i mekem taem hem i jusum wanem we bambae hem i mekem long laef blong hem. Hem i jusum blong gat wan laef we i no fasfas, mo blong putum tingting blong hem long wan samting nomo, hemia long samting we God i wantem hem blong mekem. Hem i waes long fasin blong hem blong yusum taem mo paoa blong hem blong putum Kingdom long fasples long laef blong hem. Yumi folem eksampol blong Jisas taem yumi traehad blong mekem ‘ae blong yumi i klia gud,’ i min se yumi no mekem tingting blong yumi i hevi wetem ol samting we oli no impoten, ol samting we oli westem paoa mo taem blong yumi. (Mat. 6:22, Nyutesteman wetem Ol Sam long Bislama) Plante Kristin oli mekem sam jenis long laef blong olgeta blong i no moa fasfas, from we oli wantem spenem moa taem long wok blong prij. Samfala oli statem wok blong fultaem paenia. Sipos yu yu wan long olgeta ya, hemia i nambawan. Taem yumi ‘lukaot kingdom fastaem,’ yumi kasem glad we i bigwan tumas mo yumi haremgud.—Mat. 6:33, NW.

Gat Tingting Daon Olsem Jisas

9, 10. ?Olsem wanem Jisas i soem tingting daon?

⁹ Seken fasin blong Jisas we bambae yumi tokbaot, hemia tingting daon. Taem ol sinman oli kasem paoa antap long narafala, plante taem oli kam flas from. !Be fasin blong Jisas i defren olgeta! Nating se wok we hem i mekem long plan blong Jeova i impoten tumas, hem i no kam flas nating. I gud yumi folem fasin ya blong hem. Aposol Pol i raetem se: “Tingting blong yufala i mas kam stretgud wetem tingting we Jisas Kraes i gat. Fastaem, bifo olgeta, bodi blong hem i olsem bodi blong God, be hem i no ting se hem i mas traem kam olsem we hem i sem mak wetem God, nogat. Hem nomo i lego ol samting blong laef ya, nao i kam olsem man  blong wok nomo. Hem i bon long wol ya, i kam olsem man.” (Fil. 2:5-7, NW) ?Olsem wanem Jisas i soemaot se hem i gat tingting daon?

¹⁰ Nating we Jisas i haremgud long nambawan blesing ya blong stap wetem Papa blong hem long heven, hem i glad nomo blong “lego ol samting” ya. God i putum laef blong hem i go long bel blong wan yangfala gel Jiu we hem i neva stap wetem wan man. Ale Jisas i gru long bel blong hem gogo, naen manis biaen, hem i bon olsem wan smol bebi we i no save mekem wan samting blong hem wan. Mo hem i bon long wan famle we i no impoten. Hed blong famle ya, Josef, hem i wan kapenta nomo. Long haos blong Josef, sloslo Jisas i lanem blong wokbaot, hem i gru i kam antap gogo hem i kam wan yangfala. Hem i no gat sin. Be long ol yia ya we hem i stap kam bigwan, hem i gohed blong obei long papa mama blong hem nating se tufala i sinman. (Luk 2:51, 52) !Yes, hemia wan nambawan eksampol blong tingting daon!

11. ?Wanem sam rod we yumi save soem tingting daon olsem Jisas?

¹¹ Yumi soem tingting daon olsem Jisas taem yumi glad blong mekem wok we maet narafala i no ting se i impoten tumas. Tingbaot wok ya blong talemaot gud nius. Maet samfala oli ting se wok ya i daonem man, speseli taem sam man oli no wantem lesin long yumi, oli jikim yumi, no oli agensem yumi. Be sipos yumi gohed nomo long wok blong prij, yumi halpem ol narafala blong oli obei long tok blong Jisas blong biaen long hem. Mo long rod ya, yumi stap givhan blong sevem laef blong olgeta. (Ridim 2 Timoti 4:1-5.) Tingbaot tu, wok blong klinim Haos Kingdom. Maet yumi mas mekem ol samting olsem sakemaot doti, pasem mop, mo klinim ol toelet. !Tru ya, hemia ol wok we oli no leftemap man nating! Be yumi luksave se wok ya blong klinim Haos Kingdom we i stamba ples blong mekem trufala wosip, hemia haf blong ol tabu wok we yumi mas mekem. Taem yumi glad blong mekem ol wok ya we maet oli luk olsem se oli no impoten, yumi soem tingting daon, mo yumi folem eksampol blong Jisas.

Yumi Mas Wok Strong Olsem Jisas

12, 13. (a) ?Olsem wanem Jisas i soem fasin ya blong wok strong, mo wanem i pusum hem blong mekem olsem? (b) ?Wanem i save pusum yumi blong wok strong long wok blong prij?

¹² Tingbaot fasin blong Jisas blong wok strong long wok blong prij. Jisas i mekem plante samting taem hem i stap long wol. Taem hem i finisim skul, ating hem i wok olsem wan kapenta wetem papa blong hem Josef,we i karemaot hem. Taem hem i mekem wok blong God long wol, hem i mekem plante merikel, i hilim sikman mo i mekem dedman i laef bakegen. Be bigfala wok blong hem, hemia blong talemaot gud nius mo tijim ol man we oli glad blong lesin. (Mat. 4:23, NW) Yumi ol man blong hem, yumi gat semfala wok ya blong mekem. ?Olsem wanem yumi save folem eksampol blong hem? Wan samting se, yumi save wokem  semfala tingting olsem Jisas, hemia tingting we i pusum hem blong wok strong.

¹³ Bigfala samting we i pusum Jisas blong prij mo blong tijim man, hemia se hem i lavem God. Be Jisas i laekem tu ol trutok we hem i tijim ol man long hem. Long tingting blong hem, ol trutok ya oli sas tumas, mo hem i tekem evri janis blong talemaot olgeta long ol narafala. Yumi ol “man we i tij long fored blong narafala,” yumi gat sem filing olsem Jisas. !Tingbaot ol sas trutok we yumi lanem long Tok blong God! Yumi save long kwestin ya long saed blong hu i stret blong rulum heven mo wol, mo yumi save olsem wanem God bambae i ansa long kwestin ya. Yumi kasem save gud long samting we Baebol i talem se i hapen taem man i ded, mo ol blesing we bambae yumi kasem long niufala wol we God bambae i mekem. Nomata se yumi jes lanem ol trutok ya no yumi save olgeta plante yia finis, ol trutok ya oli sas yet. (Ridim Matiu 13:52. *) Taem yumi prij long ol narafala wetem trufala glad, yumi soem long olgeta olsem wanem yumi laekem ol trutok ya we Jeova i tijim yumi long hem.

14. ?Olsem wanem yumi save folem fasin blong Jisas blong tij?

¹⁴ Tingbaot tu, olsem wanem Jisas i tijim ol man. Oltaem hem i pulum tingting blong olgeta we oli stap lesin long hem i go long Baebol. Plante taem, blong makem wan impoten poen, hem i se: “Baebol i talem se.” (Mat. 4:4; 21:13) Long ol toktok blong hem we i stap long Baebol, i gat ol tok we i kamaot long bitim stret haf blong ol buk long Hibru haf blong Baebol. Samtaem hem i yusum stret tok we Hibru hanraet i talem, samtaem hem i givim tingting nomo we i stap long olfala hanraet. Olsem Jisas, yumi mas tijim wanem we Baebol i talem oltaem long wok blong prij, mo yumi mas tekem evri janis blong yusum Baebol. Olsem nao, yumi halpem olgeta we hat blong olgeta i stret blong oli luksave we yumi stap tijim ol tingting blong God, i no ol tingting blong yumi. !Yes, yumi glad tumas taem wan man i agri blong ridim wan vas blong Baebol, mo taem hem i wantem kasem mining blong vas ya mo save olsem wanem i givhan long hem! Mo taem ol man olsem oli jusum blong biaen long Jisas, glad blong yumi i bigwan tumas.

Blong Biaen Long Jisas, Yumi Mas Lavem Narafala

15. ?Wanem wan nambawan fasin blong Jisas, mo taem yumi tingting dip long fasin ya, samting ya i mekem wanem long yumi?

¹⁵ Laswan fasin blong Jisas we bambae yumi tokbaot i mekem yumi haremgud tumas, hemia lav we hem i gat long ol man. Aposol Pol i raetem se: “Kraes i lavem mifala tumas, nao fasin ya blong hem i stap holemtaet mifala.” (2 Kor. 5:14) Taem yumi tingting dip long lav we Jisas i gat long olgeta man mo long yumi wanwan, samting ya i save tajem hat blong yumi mo yumi harem se yumi wantem folem eksampol blong hem.

16, 17. ?Olsem wanem Jisas i soem se hem i lavem narafala?

¹⁶ ?Olsem wanem Jisas i soem lav long ol narafala? Bigfala samting we i soemaot lav blong hem, hemia se hem i rere blong lusum laef blong hem blong sevem ol man. (Jon 15:13) Long taem we Jisas i prij, hem i soem lav long sam narafala rod tu. Hem i sore long ol man we oli safa. Taem hem i luk Meri mo ol narafala we oli stap wetem hem oli stap krae from ded blong Lasaros, hem i kasem save long filing blong olgeta nao hem tu i harem nogud tumas. Nating se Jisas i save se bambae hem i mekem Lasaros i laef bakegen, hem i harem nogud long filing blong hem gogo hem tu i “krae.”—Jon 11:32-35.

¹⁷ I no longtaem afta we Jisas i stat blong prij, wan man wetem sik ya leprosi i kam luk hem mo i talem long hem se: “Plis, sipos yu yu wantem, mi mi save se yu yu gat paoa blong mekem mi mi gud  bakegen.” ?Jisas i mekem wanem? Baebol i talem se: “Jisas i sore tumas long hem.” Ale hem i mekem wan samting we i narakaen. Jisas i “putum han blong hem long hem, i talem long hem se, ‘Yes, mi mi wantem. !Yu klin!’ Nao wantaem nomo, sik ya i finis, bodi blong man ya i klin bakegen.” Folem Loa we God i givim long Moses, ol man we oli gat sik ya leprosi oli doti. Mo i sua se Jisas i no nidim blong tajem man ya blong hilim hem. Be taem Jisas i hilim man ya, Jisas i tajem hem blong man ya i save filim se i olsem wanem blong wan narafala man i tajem hem. Maet hemia fastaem long plante yia we man ya i filim samting ya. !Yes, fasin we Jisas i mekem long man ya i soem bigfala lav mo sore blong hem!—Mak 1:40-42.

18. ?Olsem wanem yumi save soemaot we yumi “gat sore”?

¹⁸ Yumi ol man blong Kraes, yumi mas “gat sore” long ol narafala, nao long rod ya yumi soemaot se yumi lavem olgeta. (1 Pita 3:8) Maet i no isi blong kasem save long filing blong wan Kristin brata sista we i harem nogud from wan strong sik no from tingting blong hem i foldaon bigwan, speseli sipos yumi neva pastru long wan samting olsem. Be Jisas i kasem save long filing blong man we i sik, nating se hem i neva sik. ?Yumi save mekem wanem blong wokem fasin olsem, we yumi kasem save long filing blong narafala? Yumi save tekem taem blong lesin, taem man we i harem nogud i talemaot filing blong hem long yumi. Mo yumi save tingbaot ol kwestin olsem se: ‘?Sipos wan trabol olsem i kasem mi, bambae mi mi harem olsem wanem?’ Sipos yumi lanem blong haremsave filing blong narafala, bambae yumi save moa olsem wanem blong “toktok gud blong leftemap tingting blong olgeta we oli harem nogud oltaem from we tingting blong olgeta i foldaon.” (1 Tes. 5:14, NW) Olsem nao, bambae yumi folem fasin blong Jisas.

19. ?Eksampol blong Jisas i mekem wanem long yumi?

¹⁹ !Yes i gud tumas blong stadi long ol tok mo fasin blong Jisas Kraes! Moa we yumi lanem long saed blong hem, moa we yumi wantem kam olsem hem, mo yumi wantem halpem ol narafala tu blong oli mekem samting ya. !Tru ya, yumi save kasem bigfala glad sipos yumi biaen long Mesaea King naoia mo blong olwe!

[Futnot]

?Yu Yu Save Eksplenem?

• ?Olsem wanem yumi save soem waes fasin olsem Jisas?

• ?Wanem sam rod blong soem tingting daon?

• ?Olsem wanem yumi save wokem fasin ya blong wok strong long wok blong prij?

• ?Olsem wanem yumi save folem fasin blong Jisas blong lavem ol narafala?

[Kwestin]

[Bokis blong pija long pej 10]

Wan Buk We i Halpem Yumi Blong Folem Fasin Blong Kraes

Long distrik asembli blong yia 2007, oli soemaot wan niufala buk we long Inglis, nem blong hem se “Come Be My Follower.” Buk ya i blong givhan long ol Kristin blong putum tingting blong olgeta i stap long eksampol blong Jisas, speseli long ol fasin mo aksen blong hem. Afta long ol fastok blong buk ya long japta wan mo tu, buk ya i tokbaot sam bigfala fasin blong Jisas olsem tingting daon, fasin no fraet, waes, fasin blong obei, mo fasin blong stanap strong longtaem.

Ol narafala haf blong buk ya oli gohed blong tokbaot ol wok we Jisas i mekem olsem wan tija mo wan man blong talemaot gud nius, mo i talem sam rod we hem i folem blong soemaot bigfala lav blong hem. Long ful buk ya, i gat ol save we i blong halpem ol Kristin blong folem eksampol blong Jisas.

Mifala i sua se buk ya bambae i pulum yumi evriwan blong jekemap yumi wan mo askem se: ‘?Mi mi rili stap biaen long Jisas? ?Mi save mekem wanem blong folem eksampol blong hem moa?’ Mo tu, buk ya bambae i halpem olgeta man we “oli stret blong kasem laef blong olwe,” blong oli joen wetem yumi blong biaen long Jisas. —Ol Wok 13:48, NW.

[Tok blong pija long pej 9]

Jisas i agri blong kam long wol olsem wan man mo blong i bon olsem wan bebi. ?Wanem fasin we hem i mas gat blong mekem samting ya?