Mekem Tingting Blong Yu i Laenap Wetem Ol Tok Blong Jisas
Mekem Tingting Blong Yu i Laenap Wetem Ol Tok Blong Jisas
“Man ya we God i sanem hem i kam, hem i stap talemaot ol tok ya we i blong God nomo.”—JON 3:34.
1, 2. ?From wanem yumi save talem se Bigfala Toktok blong Jisas antap long Hil i stanap long ‘tok blong God nomo’?
JISAS i tijim plante sas trutok long Bigfala Toktok we hem i mekem antap long Hil. Yes, yumi no sapraes long samting ya from we Jeova nao i stamba blong ol tok we Jisas i talemaot. Baebol i tokbaot Jisas i se: “Man ya we God i sanem hem i kam, hem i stap talemaot ol tok ya we i blong God nomo.”—Jon 3:34-36.
2 Jisas i tokbaot 21 vas we i kamaot long eit buk long Hibru haf blong Baebol, nating se Bigfala Toktok blong hem antap long Hil i no bitim 30 minit. Hemia i soemaot klia se ol tok ya blong Jisas oli stanap long ‘tok blong God nomo.’ Naoia bambae yumi luk olsem wanem yumi save mekem ol sas trutok ya we Jisas i talem oli wok long laef blong yumi.
Fastaem Yu Mas Go “Mekem Pis Wetem Brata Blong Yu”
3. ?Afta we Jisas i givim woning long ol disaepol blong hem long saed blong fasin blong holem kros, hem i givim wanem advaes?
3 Yumi ol Kristin, yumi glad mo yumi gat pis from we tabu spirit blong God i stap wetem yumi, mo sam haf blong frut ya blong spirit blong God hemia glad mo pis. (Gal. 5:22, 23) Jisas i no wantem we ol disaepol blong hem oli lusum glad mo pis, taswe hem i givim woning long olgeta long saed blong fasin ya blong holem kros se i save lidim man blong kasem ded. (Ridim Matiu 5:21, 22.) Jisas i gohed blong toktok i se: “From samting ya, sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya [“mekem pis,” NW] wetem brata blong yu blong yutufala i fren gud, nao biaen yu save kambak bakegen blong givim presen blong yu long God.”—Mat. 5:23, 24.
4, 5. (a) ?Jisas i minim wanem taem hem i tokbaot “presen” long Matiu 5:23, 24? (b) ?Fasin ya blong mekem pis wetem brata blong yumi we i kros long yumi i impoten olsem wanem?
4 “Presen” ya we Jisas i tokbaot long ples ya hemia enikaen presen we ol man Isrel bifo oli mekem long haos tempol long Jerusalem. Wan eksampol hemia ol anamol we oli givim olsem sakrefaes. Ol sakrefaes olsem oli impoten from we oli haf blong wosip we ol man blong Jeova oli mekem i go long hem. Be Jisas i makem wan samting we i moa impoten, hemia blong mekem pis wetem wan brata we i kros long yu bifo we yu givim presen blong yu i go long God.
5 “Mekem pis” i minim blong ‘fren gud bakegen.’ Taswe, yumi lanem long tok ya blong Jisas se fasin we yumi mekem long narafala i save gat paoa long fasin fren blong yumi wetem Jeova. (1 Jon 4:20) Tru ya, sipos ol man blong God bifo oli no mekem i gud long ol brata blong olgeta, ol presen we oli givim long God oli blong nating nomo long ae blong Jeova.—Ridim Maeka 6:6-8.
Yumi Mas Gat Tingting Daon
6, 7. ?From wanem yumi nidim tingting daon taem yumi wantem fren gud bakegen long pis wetem wan brata no sista we i kros long yumi?
6 Ating taem yumi mas mekem pis wetem wan brata we i kros long yumi, samting ya i save traem yumi se yumi gat tingting daon no nogat. Man we i gat tingting daon i no rao wetem ol brata mo sista blong hem long saed blong ol samting we hem i gat raet blong mekem. Fasin olsem i save mekem bigfala problem i kamaot, olsem samting we i bin hapen bitwin sam Kristin long Korin bifo. Long saed blong problem ya, aposol Pol i pulum ol Kristin blong tingting, i se: “Fasin ya we yufala i stap pas long kot blong stretem ol rao blong yufala, hem i soemaot i klia we yufala i foldaon finis. ?Blong wanem yufala i no save letem sam long yufala i mekem i no stret long yufala? ?Blong wanem yufala i no save letem sam long yufala i stil long yufala? Hemia i moa gud, i winim fasin ya blong yufala.”—1 Kor. 6:7.
7 Jisas i no talem se yumi mas go luk brata blong yumi blong talem long hem se hem nao i rong be i no yumi, nogat. Mak blong yumi hemia se yumi mas fren gud bakegen long pis. Blong mekem pis, yumi mas tok tru long saed blong ol filing blong yumi. Mo tu, yumi mas luksave we yumi mekem brata blong yumi i harem nogud. Mo sipos yumi nao yumi mekem rong, yumi mas gat tingting daon mo talem sore.
“Sipos Raet Ae Blong Yu i Mekem Yu Yu Foldaon Long Sin”
8. Tokbaot sam samting we Jisas i talem long Matiu 5:29, 30.
8 Long Bigfala Toktok blong Jisas antap long Hil, Jisas i givim wan waes advaes long saed blong fasin we i gud. Hem i save se sin i gat bigfala paoa long ol defren haf blong bodi blong yumi. From samting ya Jisas i talem se: “Sipos raet ae blong yu i mekem yu yu foldaon long sin, i gud yu tekemaot, yu sakem. I moa gud yu lusum wan haf blong bodi blong yu, i winim we olgeta haf blong bodi blong yu i go lus long [“Gehena,” NW]. Mo sipos raet han blong yu i mekem yu yu foldaon, i gud yu katemaot, yu sakem. I moa gud yu lusum wan haf blong bodi blong yu i winim we olgeta haf blong bodi blong yu i go lus long [“Gehena,” NW].”—Mat. 5:29, 30.
9. ?Olsem wanem “ae” mo “han” blong yumi i save mekem yumi “foldaon long sin”?
9 “Ae” we Jisas i tokbaot i pija blong fasin we yumi ol man i gat blong putum tingting blong yumi i stap long samting we yumi luk wetem ae blong yumi. “Han” i minim samting we yumi mekem wetem ol han blong yumi. Sipos yumi no lukaotgud, ol haf ya blong bodi oli save pulum yumi blong “foldaon long sin” nao yumi no moa “fren gud wetem God.” (Jen. 5:22; 6:9) Taswe, sipos ol samting ya oli pulum yumi blong no moa obei long Jeova, yumi mas tekem aksen kwiktaem olsem se yumi tekemaot ae no katemaot han blong yumi.
10, 11. ?Wanem i save givhan long yumi blong blokem rabis fasin long saed blong seks?
10 ?Olsem wanem yumi save blokem ae blong yumi blong i no lukluk ol nogud samting? Man ya Job we i fraetgud long God i talem se: “Mi mi mekem wan strong promes finis, se sipos mi luk wan gel, bambae mi no save tingting nogud long hem.” (Job 31:1) Job i wan man we i mared finis mo hem i gat strong tingting blong no brekem ol loa blong God long saed blong klin fasin. Yumi mas gat sem tingting olsem Job nomata se yumi mared no nogat. Blong no foldaon long rabis fasin long saed blong seks, yumi mas letem tabu spirit blong God i lidim yumi. Tabu spirit ya i givhan long ol man we oli lavem God blong oli bos long tingting blong olgeta.—Gal. 5:22-25.
11 Blong blokem rabis fasin long saed blong seks, i gud blong askem ol kwestin olsem, ‘?Mi mi letem ae blong mi i pulum filing blong mi blong wantem tumas ol rabis samting long saed blong seks we ol buk, TV mo Intenet oli tokbaot?’ I gud yumi tingbaot tu ol tok blong disaepol Jemes se: “Taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin. Mo taem hem i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from. Mo taem hem i stap mekem ol samting nogud, fasin ya tu bambae i kam bigwan moa long hem, nao bambae hem i ded from.” (Jem. 1:14, 15) Tru ya, sipos eni man no woman we i givim laef blong hem i go long God finis, i gohed blong “luk” wan man no woman wetem tingting ya blong mekem nogud fasin wetem hem, Kristin ya i mas mekem sam bigfala jenis kwiktaem olsem we hem i karemaot ae blong hem mo i sakem i go longwe.—Ridim Matiu 5:27, 28.
12. ?Wanem advaes blong Pol we i save halpem yumi blong faet agensem ol doti fasin?
12 Sipos yumi yusum han blong yumi long rong fasin, bambae yumi save brekem ol rul blong Jeova long saed blong klin fasin. From samting ya, yumi mas traehad bigwan blong holem wan tingting we i klin mo yumi mas folem advaes blong Pol we i talem se: “Yufala i mas blokem ol haf blong bodi blong yufala we oli stap long wol ya, blong mekem oli ded long saed blong ol rabis fasin. Hemia se, yufala i no mekem nogud wetem woman, yufala i no mekem fasin we i no klin, yufala i no wantem tumas ol samting blong seks, yufala i no wantem ol rabis samting, yufala i no wantem ol samting blong narafala man, from we fasin ya i olsem wosip blong ol giaman god.” (Kol. 3:5, NW) Tok ya “mekem oli ded” i blong makem strong se yumi mas tekem wan strong aksen blong faet agensem ol doti fasin we bodi nomo i wantem.
13, 14. ?From wanem i impoten blong blokem ol tingting mo fasin we oli no klin?
13 Ating wan man we i kasem sik blong suga bambae i agri we dokta i katemaot haf leg blong hem, blong sik i no spolem ful bodi blong hem. Olsem nao, man ya i save gohed blong stap laef. Tok ya se yumi “sakem” ae mo han blong yumi i go longwe i soemaot se i impoten tumas we yumi blokem ol nogud tingting mo ol aksen we oli save mekem se Jeova i no moa glad long yumi. Sipos yumi no wantem lus long Gehena we i min se yumi lus blong olwe, yumi mas stap klin long saed blong spirit, tingting mo fasin blong yumi.
14 From we yumi bon wetem sin mo yumi no stretgud olgeta, yumi mas mekem wan bigfala traehad blong stap klin long ol tingting mo fasin blong yumi. Pol i talem se: “Be mi mi stap faetem gud bodi blong mi, mo mi mi stap bos long hem olsem we hem i wan slef nomo. From we mi ya we mi prij finis long ol narafala, i nogud mi mi kam wan man we God i no save agri long mi from wan fasin blong mi.” (1 Kor. 9:27, NW) I gud yumi strong blong folem advaes ya blong Jisas long saed blong ol fasin we i klin. Yumi neva mas mekem ol fasin we oli soemaot se yumi no gat tangkiu from ransom sakrefaes blong Jisas.—Mat. 20:28; Hib. 6:4-6.
“Lanem Fasin Blong Givim”
15, 16. (a) ?Olsem wanem Jisas i soemaot eksampol long fasin blong givim samting long narafala? (b) ?Wanem mining blong tok blong Jisas long Luk 6:38?
15 Ol tok mo gudfala eksampol blong Jisas oli leftemap fasin ya blong givim. Wan bigfala samting we hem i mekem blong soemaot fasin ya blong givim samting long gladhat, hemia blong kam long wol blong givhan long yumi ol sinman. (Ridim 2 Korin 8:9.) Jisas i glad nomo blong lego ples blong hem long heven blong kam long wol ya olsem wan man mo blong givim laef blong hem blong sevem ol sinman. Sam long ol sinman ya bambae oli joen wetem hem long heven blong rul long Kingdom. (Rom 8:16, 17) Jisas i pulum yumi blong gat fasin ya blong givim samting long gladhat taem hem i talem se:
16 “Yufala i mas givim olting blong yufala i go nomo long narafala man, nao narafala man bambae i givim olting blong hem i go nomo long yufala. Bambae narafala man i givim long yufala olsem we hem i fulumap bag, i seksekem, i ramem gogo i fulap gud, i stap kafsaed i folfoldaon. Fasin we yufala i folem blong givim presen long narafala man, hemia fasin we narafala man bambae i folem blong givim presen long yufala.” (Luk 6:38, futnot long Nyutesteman wetem Ol Sam long Bislama) Tok ya “fulumap bag” i blong tokbaot wan kastom blong sam man blong salem ol samting. Taem oli salem sam samting long wan man, oli fulumap gud ol samting ya long longfala kot blong man ya, mo oli fasemtaet kot ya wetem wan strap, blong man ya i save karem ol samting we hem i pem. Sipos yumi givim samting long narafala long gladhat, bambae narafala i save givim samting long yumi tu, speseli long taem we yumi nidim.
17. ?Olsem wanem Jeova i soemaot nambawan eksampol long fasin blong givim, mo yumi save kasem bigfala glad sipos yumi folem wanem fasin blong givim samting?
17 Jeova i laekem mo i blesem olgeta we oli givim samting long narafala long gladhat blong olgeta. Hem wan i soemaot nambawan eksampol blong givim samting long gladhat taem hem i givim stret pikinini blong hem, wan nomo we hem i gat, blong ‘olgeta man we oli bilif long hem bambae oli no save lus, oli gat laef we i no save finis.’ (Jon 3:16) Pol i raetem se: “Be man we i planem plante, hem bambae i kasem plante. Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Kor. 9:6, 7) I sua se bambae yumi kasem bigfala glad mo plante nambawan blesing sipos yumi givim taem blong yumi, paoa mo ol samting we yumi gat blong leftemap trufala wosip.—Ridim Ol Proveb 19:17; Luk 16:9.
“I Nogud Yu Stap Tokbaot Long Fes Blong Ol Man”
18. ?Wanem samting i save mekem se Papa blong yumi long heven bambae i “no save givim pei” long yumi?
18 “Ol fasin we yufala i mekem blong ona long God, i nogud yufala i mekem long fes blong ol man, blong oli lukluk yufala. Sipos yufala i stap mekem olsem, bambae Papa blong yufala we i stap long heven, hem i no save givim pei long yufala from.” (Mat. 6:1) Taem Jisas i tokbaot ‘ol fasin we oli ona long God,’ hem i minim ol fasin we oli laenap wetem wil blong God. Hem i neva talem se yumi no mas soemaot ol gudfala fasin long ol pablik ples, nogat. Hem i talem long ol disaepol blong hem se oli “mas letem laet [blong olgeta] i saenaot i kasem ol man.” (Mat. 5:14-16) Be Papa blong yumi long heven bambae i “no save givim pei” long yumi sipos yumi mekem samting nomo blong ol man “oli lukluk” yumi mo blong oli laekem yumi, olsem ol man we oli aktem sam samting antap long wan stej. Sipos yumi gat ol tingting olsem, bambae yumi no save haremgud long fasin fren blong yumi wetem God mo long ol blesing blong olwe aninit long rul blong Kingdom.
19, 20. (a) ?Jisas i talem wanem long saed blong man we i givim samting long puaman blong givhan long hem? (b) ?Olsem wanem yumi save mekem se lef han i no save wanem we raet han blong yumi i stap mekem?
19 Sipos yumi gat stret tingting, bambae yumi folem tok ya blong Jisas se: “Sipos yu givim samting long puaman blong givhan long hem, i nogud yu stap tokbaot long fes blong ol man, olsem we olgeta ya we oli gat tu fes oli stap mekem. Olgeta ya oli stap talemaot ol gudfala wok blong olgeta insaed long ol haos blong prea, mo afsaed long ol big rod, blong mekem ol man oli ona long olgeta. Tru mi talem long yufala, olgeta ya oli kasem pei blong olgeta finis.” (Mat. 6:2) Jisas mo ol disaepol oli gat wan basket blong mane we oli yusum blong givhan long ol puaman. (Jon 12:5-8; 13:29) Yumi no mas mekem olsem ol Farisi we oli wantem mekem olgeta man oli save se oli givim samting long narafala. Jisas i kolem olgeta se oli gat tu fes from we oli talemaot long ol man long ol ‘haos prea mo long rod,’ ol presen we oli givim long ol puaman. Olgeta ya we oli gat tu fes oli “kasem pei blong olgeta finis.” Ol man oli leftemap olgeta mo oli sidaon long ol nambawan ples long haos prea wetem ol tija blong Loa. Be hemia nomo pei we oli kasem. Bambae Jeova i no givim wan narafala samting long olgeta. (Mat. 23:6) ?Be ol disaepol blong Jisas oli mas gat wanem fasin? Jisas i talem long olgeta mo long yumi tu se:
20 “Be sipos yu givim samting long puaman blong givhan long hem, yu mas mekem, olsem we lef han blong yu i no save samting we raet han blong yu i mekem. Yu mas haedem ol gudfala fasin ya blong yu, blong ol man raonabaot long yu oli no luk. Nao Papa blong yu we i save luk ol samting ya, hem bambae i givim pei long yu from.” (Mat. 6:3, 4) Taem yumi mekem wan wok, plante taem yumi yusum tufala han blong yumi tugeta. Be, tok ya se no letem lef han i save wanem we raet han i stap mekem i minim se yumi no talemaot long man, gudfala fasin we yumi mekem long narafala, nating sipos yumi frengud wetem man ya no yumi klosap long hem, olsem we lef han blong yumi i stap klosap long raet han blong yumi.
21. ?Wanem pei we Man ya we i “luk ol samting” i givim?
21 Sipos yumi no tok flas long ol man taem yumi “givim presen” long ol puaman, bambae i no gat man we i luk gudfala fasin blong yumi. Be Papa blong yumi, “we i luk ol samting ya,” bambae i givim pei long yumi. Pei we Jeova bambae i givim long yumi hemia wan gudfala fasin fren wetem hem, bambae hem i fogivim ol sin blong yumi mo hem i givim laef we i no save finis long yumi. (Prov. 3:32; Jon 17:3; Efes. 1:7) !Hemia i gud moa i bitim we man i leftemap yumi!
Ol Sas Toktok Blong Yumi Folem
22, 23. ?From wanem yumi mas folem ol tok blong Jisas?
22 Bigfala Toktok blong Jisas antap long Hil i fulap long ol sas trutok we i save mekem yumi glad nating se yumi laef long wol ya we i fulap long trabol. Yes, bambae yumi glad sipos yumi folem ol tok blong Jisas mo letem ol tok ya oli jenisim ol tingting mo fasin blong laef blong yumi.
23 Evri man we i “harem” mo i “mekem” wanem we Jisas i tijim bambae i kasem blesing. (Ridim Matiu 7:24, 25.) Taswe, yumi mas gat strong tingting blong folemgud ol advaes blong Jisas. Long laswan stadi blong magasin ya, bambae yumi tokbaot sam moa long ol toktok blong Jisas antap long Hil.
?Bambae Yu Yu Ansa Olsem Wanem?
• ?From wanem i impoten blong mekem pis wetem wan brata we i kros long yumi?
• ?Olsem wanem blong no letem “raet ae” blong yumi i pulum yumi blong mekem sin?
• ?Wanem tingting yumi mas gat long saed blong fasin blong givim samting long narafala?
[Kwestin]
[Tok blong pija long pej 17]
Jeova i blesem olgeta we oli givim samting long gladhat
[Tok blong pija long pej 18]
!I gud tumas blong “mekem pis” wetem wan Kristin brata no sista blong yumi we i kros long yumi!