?Ol Tok Blong Jisas Oli Gat Paoa Long Ol Prea Blong Yu?

“Taem Jisas i finisim ol tok ya, ol man oli sapraes tumas long tok blong hem.”—MAT. 7:28.

1, 2. ?From wanem ol man we oli stap lesin long Jisas oli sapraes tumas long fasin blong hem blong tij?

YUMI mas agri long ol tok blong Jisas, stret Pikinini ya blong God, wan nomo we Hem i gat, mo yumi mas mekem ol tok ya oli wok long laef blong yumi. Toktok blong Jisas i no olsem toktok blong ol narafala man. !Hemia nao from wanem plante man oli sapraes tumas long fasin blong hem blong tij long Bigfala Toktok blong hem antap long Hil!—Ridim Matiu 7:28, 29.

² Pikinini blong God i no tij olsem ol tija blong Loa, we oli mekem ol longfala tok we oli stanap long ol tijing blong ol sinman nomo. Jisas i tijim man long fasin we i “gat paoa” from we ol tok we hem i talem oli kam long God. (Jon 12:50) Taswe bambae yumi luk olsem wanem ol tok blong Jisas antap long Hil i save mo i mas gat paoa long ol prea blong yumi.

No Prea Olsem Ol Man We Oli Gat Tu Fes

3. Talem sam samting we Jisas i tokbaot long Matiu 6:5.

³ Prea i wan impoten haf blong trufala wosip, mo i impoten we yumi prea long Jeova evri dei. Be ol tok we Jisas i talem long Bigfala Toktok blong hem antap long Hil i mas gat paoa long ol prea blong yumi. Jisas i talem se: “Taem yu prea, i nogud yu folem fasin blong olgeta ya we oli gat tu fes. Olgeta ya oli laekem tumas blong stanap blong prea insaed long ol haos blong prea, mo afsaed long ol big rod, blong ol man oli save luk olgeta. Tru mi talem long yufala, olgeta ya oli kasem pei blong olgeta finis.”—Mat. 6:5.

4-6. (a) ?From wanem ol Farisi oli laekem blong “stanap blong prea insaed long ol haos blong prea, mo afsaed long ol big rod”? (b) ?Olsem wanem ol man ya we oli gat tu fes oli “kasem pei blong olgeta finis”?

⁴ Taem ol disaepol blong Jisas oli prea, oli no mas folem fasin blong ol Farisi ya we oli ting se oli stretgud be oli gat “tu fes,” mo we oli giaman long ol man se oli stap folemgud Loa. (Mat. 23:13-32) Ol man ya we oli gat tu fes oli laekem blong “stanap blong prea insaed long ol haos blong prea, mo afsaed long ol big rod.” ?From wanem oli mekem olsem? Blong “ol man oli save luk olgeta.” Ol man Jiu long faswan handred yia oli gat kastom ya blong prea olsem wan kongregesen long taem blong bonem sakrefaes long haos tempol. (Hemia samting olsem 9 klok long moning mo 3 klok long aftenun.) Plante man we oli laef long Jerusalem oli joen wetem wan bigfala hip blong man insaed long yad blong tempol blong oli prea. Plante taem, ol man Jiu we oli strong long wosip be oli stap afsaed long Jerusalem, oli “stanap blong prea insaed long ol haos blong prea,” tu taem long wan dei.—Skelem wetem Luk 18:11, 13.

⁵ Plante man oli no stap klosap long tempol mo long haos prea blong oli joen long ol prea ya we yumi jes tokbaot. From samting ya, oli prea nomata wanem ples oli stap long hem long ol taem ya blong prea. Samfala oli meksua se long ol taem ya blong prea, oli stap “afsaed long ol big rod.” Oli mekem olsem from we oli wantem se ol man we oli stap go mo kam long rod ya “oli luk olgeta.” Ol man ya we oli gat tu fes ‘oli mekem ol longlongfala prea’ blong ol man oli luk olgeta mo oli tinghae long olgeta. (Luk 20:47) Yumi no mas gat fasin olsem.

⁶ Jisas i talem se olgeta ya we oli gat tu fes, oli “kasem pei blong olgeta finis.” Oli wantem we ol man oli luk mo leftemap olgeta mo hemia nomo samting we bambae oli kasem. Hemia nomo fulwan pei blong olgeta from we Jeova i no ansa long ol prea blong man we i gat tu fes. Defren olgeta, God bambae i ansa long prea blong ol trufala man blong Kraes olsem we nekis tok blong Jisas i soemaot.

7. ?Advaes ya blong go “insaed long rum” mo prea i minim wanem?

⁷ “Be taem yu yu prea, i gud yu go yu wan insaed long rum blong yu, yu satem doa, nao yu prea long Papa ya blong yu we man i no save luk hem. Nao Papa ya blong yu we i save luk ol samting we yu mekem we man i no save luk, hem bambae i givim pei long yu from.” (Mat. 6:6) Advaes blong Jisas se man i mas go insaed long wan rum, i satem doa mo i prea i no minim  se man i no save mekem prea long kongregesen. Advaes ya i long saed blong ol prea we man i mekem long pablik ples we plante taem i pulum ae blong ol man i kam long man ya we i mekem prea mo i blong pulum ol man blong oli leftemap hem. Hemia nao fasin we Jisas i stap tok agensem. Sipos yumi gat blesing ya blong mekem wan prea long bihaf blong ol man blong God, yumi mas tingbaot advaes ya. Yumi mas folem tu sam narafala tok blong Jisas long saed blong prea.

8. Folem Matiu 6:7, yumi mas blokem wanem fasin blong mekem prea?

⁸ “Taem yufala i prea, yufala i no mas talem semfala toktok bakegen mo bakegen, olsem ol hiten man oli mekem. Olgeta oli ting se sipos oli talem plante toktok, bambae God i harem prea blong olgeta.” (Mat. 6:7, NW) Jisas i tokbaot wan narafala nogud fasin blong prea hemia fasin blong talem semfala toktok bakegen mo bakegen. Jisas i no minim se long prea blong yumi, yumi neva mas talem bakegen wan samting we yumi askem wetem fulhat blong yumi mo ol tok blong talem tangkiu. Long garen blong Getsemane, long naet bifo we Jisas i ded, Jisas i talem “sem tok bakegen” long prea blong hem.—Mak 14:32-39.

9, 10. ?From wanem yumi no mas ripitim semfala samting bakegen mo bakegen long ol prea blong yumi?

⁹ I no stret we yumi folem fasin blong “ol hiten man” blong ripitim ol semfala tok long prea blong yumi. Olgeta ya oli lanem baehat sam tok mo oli ripitim ol semfala tok ya “bakegen mo bakegen” be bighaf blong ol tok ya i no gat mining nating. Fasin ya i no halpem nating ol man we oli wosip long Bal taem oli singaot long giaman god ya stat long moning i go ‘kasem medel dei se, “!Bal! !Plis yu harem prea blong mifala!”’ (1 King 18:26) Plante milian man tede oli talem plante tok long prea blong olgeta mo oli ripitim ol prea from oli ting se God bambae “i harem prea blong olgeta.” Be long nekis tok blong Jisas, Jisas i halpem yumi blong luksave se long lukluk blong Jeova, fasin blong “talem plante toktok” long ol longlongfala prea mo blong ripitim ol prea, i blong nating nomo.

¹⁰ “Be bambae yufala i no folem fasin blong olgeta. Taem yufala i no askem ol samting long Papa blong yufala yet, be hem i save finis ol samting we yufala i sot long hem.” (Mat. 6:8) Plante lida blong skul blong ol man Jiu oli olsem ol hiten man from we olgeta tu oli talem plante toktok taem oli prea. Prea we i kamaot long hat blong presem Jeova, blong talem tangkiu long hem mo blong plis long hem, i wan impoten haf blong trufala wosip. (Fil. 4:6) Nating se i olsem, i no stret we yumi ripitim sem samting bakegen mo bakegen wetem tingting ya se God i save fogetem samting. Taem yumi prea, yumi mas tingbaot se yumi stap toktok long Man ya we, ‘bifo we yumi askem samting long hem be hem i save finis samting we yumi sot long hem.’

11. ?Yumi mas tingbaot wanem sipos yumi gat janis ya blong prea long fored blong plante man?

¹¹ Ol tok blong Jisas long saed blong ol prea we God i no agri long olgeta, i mas mekem yumi tingbaot bakegen se God i no glad long ol prea we oli blong soem flas nomo mo we ol tok blong olgeta i no gat mining. Yumi mas luksave tu se prea we man i mekem long fored blong plante man i no wan rod blong soemaot hem long ol man we oli lesin. Mo ol prea we oli longfala tumas oli save mekem se olgeta we oli lesin oli no moa harem ol tok blong prea be oli stap tingbaot sipos i klosap no i longtaem yet blong oli talem “Amen.” Mo tu, fasin blong yusum prea blong talemaot wan mesej no blong givim advaes long ol man we oli lesin i no laenap wetem ol tingting we Jisas i talem long Bigfala Toktok blong hem antap long Hil.

Jisas i Tijim Yumi Olsem Wanem Blong Prea

12. ?Olsem wanem bambae yu eksplenem mining blong tok ya se “nem blong yu i tabu”?

¹² Afta we Jisas i givim woning long saed blong ol fasin blong prea we oli no stret, hem i tijim ol disaepol blong hem olsem wanem blong prea. (Ridim Matiu 6:9-13.) Prea ya i olsem wan eksampol nomo blong soemaot olsem wanem blong prea. Eksampol ya i no blong yumi talem baehat ol wanwan tok blong hem mo blong ripitim bakegen mo bakegen oltaem. Defren olgeta, prea ya i tijim yumi long sam samting we yumi save tokbaot long prea blong yumi. Long ol faswan toktok blong prea ya, Jisas i tokbaot God fastaem i se: “Papa blong mifala. Yu yu stap long heven. Nem blong yu i tabu.” (Mat. 6:9) I stret blong yumi tu yumi singaot Jeova olsem ‘Papa blong yumi’ from we hem nao i Wokem yumi, hem i stap “long heven,” longwe long wol ya. (Dut. 32:6; 2 Kron. 6:21; Wok 17:24, 28) Fasin blong yusum tok ya “mifala” i mas mekem yumi tingbaot se ol Kristin brata mo sista blong yumi tu oli gat wan gudfala  fasin fren wetem Jeova. “Nem blong yu i tabu” i wan tok blong askem long Jeova blong i tekem aksen blong mekem nem blong hem i tabu taem hem i karemaot doti we ol man oli sakem long nem blong hem, stat long rebelian ya long garen blong Iden i kam kasem tede. Blong ansa long prea ya, Jeova bambae i finisim ol nogud fasin long wol, mo olsem nao hem i mekem se nem blong hem i tabu.—Esik. 36:23.

13. (a) ?Olsem wanem God bambae i ‘mekem Kingdom blong hem i kam’? (b) ?I minim wanem se God bambae i mekem ol samting we hem i wantem i kamtru long wol?

¹³ “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Mat. 6:10, NW) Folem prea ya we Jisas i tijim ol man blong hem long hem, yumi mas tingbaot se “kingdom” ya hem i gavman blong Mesaea long heven. Jeova i putumap Jisas wetem ol ‘tabu man’ we oli laef bakegen blong oli rul long gavman ya. (Dan. 7:13, 14, 18; Aes. 9:6, 7) Taem yumi prea se Kingdom ya i “kam,” i olsem we yumi stap askem se Kingdom blong God i kam agensem olgeta man long wol ya we oli agens long hae rul blong God. Samting ya bambae i kamtru i no longtaem mo bambae i openem rod blong wol i save kam wan paradaes we stret fasin, pis mo gudfala samting nomo i stap long hem. (Sam 72:1-15; Dan. 2:44; 2 Pita 3:13) Samting we God i wantem i kamtru finis long heven. Mo taem yumi askem long God blong mekem samting we hem i wantem i kamtru long wol, i minim se yumi plis se God i mekem ol stamba tingting blong hem long saed blong wol ya i kamtru. Hemia i minim tu se bambae hem i finisim ol enemi blong hem long taem blong yumi, olsem we hem i bin mekem long ol taem bifo.—Ridim Ol Sam 83:1, 2, 13-18.

14. ?From wanem i stret blong askem God blong i givim ‘kakae we i naf’ blong wan dei?

¹⁴ “Plis yu givim kakae long mifala, i naf blong tede.” (Mat. 6:11; Luk 11:3) Taem yumi askem samting ya long prea blong yumi, yumi stap askem long God blong i givim naf kakae “blong tede.” Samting ya i soemaot we yumi gat bilif se Jeova hem i naf blong givim samting we yumi nidim evri dei. Yumi no mekem prea ya blong kasem plante samting long laef. Taem yumi askem long God blong i givim samting we yumi nidim evri dei long laef, samting ya i mekem yumi tingbaot bakegen tok blong God we i talem long ol man Isrel blong oli pikimap mana “we i naf blong wan dei nomo.”—Eks. 16:4.

15. ?Wanem samting we yumi mas mekem sipos yumi wantem se Jeova i fogivim yumi?

¹⁵ Nekis haf blong prea ya we Jisas i bin tijim i pulum tingting blong yumi i go long samting we yumi nidim blong mekem. Jisas i talem se: “Yu fogivim mifala from ol sin blong mifala, olsem we mifala i stap fogivim ol man we oli mekem i nogud long mifala.” (Mat. 6:12) Jeova bambae i fogivim yumi nomo sipos yumi “fogivim” olgeta we oli sin agens long yumi. (Ridim Matiu 6:14, 15.) Yumi mas glad blong fogivim ol narafala.—Efes. 4:32, NW; Kol. 3:13.

16. ?Wanem mining blong tok ya we i blong askem God blong i no letem ol samting oli traem yumi mo blong i blokem Setan?

¹⁶ “Yu no letem ol samting oli kam traem mifala tumas, mo yu blokem Setan i no kam spolem mifala.” (Mat. 6:13) ?Wanem mining blong tufala tok ya blong Jisas long prea ya? Wan samting we yumi sua long hem hemia se: Jeova i no save pulum yumi blong mekem sin. (Ridim Jemes 1:13.) “Setan” nao hem i “man ya blong traem man.” (Mat. 4:3) Be samtaem Baebol i tokbaot wan samting olsem se Jeova nao i mekem samting ya, no i wokem rod blong wan samting i kamaot. Be rili, Baebol i minim nomo se Jeova i letem samting ya i hapen. (Rut 1:20, 21; Prij. 11:5) Taswe tok ya se “yu no letem ol samting oli kam traem mifala” i blong askem long Jeova blong i no letem yumi foldaon taem wan samting i traem fasin obei blong yumi long hem. Laswan samting hemia se, tok ya “yu blokem Setan i no kam spolem mifala,” i blong askem long Jeova blong i no letem Setan i winim yumi. Mo yumi save sua se neva Jeova i “letem wan samting i traem yumi, we i strong tumas long yumi.”—Ridim 1 Korin 10:13.

‘Gohed Blong Askem, Lukaot, Kilkilim Doa’

17, 18. ?I minim wanem se yumi mas ‘gohed blong askem, lukaot mo kilkilim doa’?

¹⁷ Aposol Pol i talem long ol Kristin brata sista se: “Yufala i mas prea oltaem.” (Rom 12:12) Jisas i talem wan tok we i klosap sem mak i se: “Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala. Man we i stap askem samting,  oltaem hem i save kasem samting ya. Mo man we i stap lukaot samting, oltaem hem i save faenem samting ya. Mo man we i stap kilkilim doa, oltaem doa i save open long hem.” (Mat. 7:7, 8) I stret nomo blong “gohed blong askem” eni samting we i laenap wetem tingting blong God. Blong sapotem tok ya blong Jisas, aposol Jon i raetem se: “Yumi bilif strong se sipos yumi askem samting long [God] we i stret long tingting blong hem, hem bambae i harem prea blong yumi.”—1 Jon 5:14.

¹⁸ Advaes blong Jisas blong ‘gohed blong askem mo lukaot’ i minim se yumi mas prea wetem fulhat blong yumi mo yumi mas gohed blong prea oltaem nating se i luk olsem se yumi no gat ansa blong prea blong yumi kwiktaem. I impoten tu we yumi “gohed blong kilkilim doa,” blong yumi save kasem mo haremgud long ol blesing mo ol gudfala samting we Kingdom bambae i givim. ?Olsem wanem? ?Yumi save trastem se God bambae i ansa long ol prea blong yumi? Yes, sipos yumi stap tru long Jeova, yumi save sua se hem bambae i ansa long ol prea blong yumi, from we Jisas i talem se: “Man we i stap askem samting, oltaem hem i save kasem samting ya. Mo man we i stap lukaot samting, oltaem hem i save faenem samting ya. Mo man we i stap kilkilim doa, oltaem doa i save open long hem.” Plante gudfala stori blong ol man blong Jeova i pruvum se yes, Jeova i man we i stap “ansa long ol prea.”—Sam 65:2.

19, 20. ?Folem ol tok blong Jisas long Matiu 7:9-11, olsem wanem Jeova i olsem wan papa we i gat lav?

¹⁹ Jisas i tokbaot God se Hem i olsem wan gudfala papa we i gat lav mo we i givim ol gudfala samting long ol pikinini blong hem. Tingbaot sipos yu bin stap long taem ya we Jisas i mekem Bigfala Toktok blong hem antap long Hil mo yu harem Jisas i talem se: “I no gat wan long yufala we taem pikinini blong hem i askem bred long hem, be hem i save givim ston long hem. Mo i no gat man we taem pikinini blong hem i askem fis long hem, be hem i save givim snek long hem. Yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim ol gudgudfala samting long ol man we oli askem samting long hem.”—Mat. 7:9-11.

²⁰ Wan papa long wol ya, we long vas ya i talem se hem i “man nogud” from we i sinman, i gat filing long ol pikinini blong hem. Bambae papa ya i no trikim ol pikinini blong hem be bambae hem i givim “ol gudgudfala samting” long olgeta. Papa blong yumi long heven we i gat lav, i gat semfala filing olsem long yumi tu. Hem i givim “ol gudgudfala samting” long yumi. Wan long ol samting ya hemia tabu spirit blong hem. (Luk 11:13) Samting ya i givim paoa long yumi blong mekem wok blong Jeova long fasin we Hem i agri long hem. Yes, Jeova nao hem i Man ya we i givim “evri samting we oli gud mo evri presen we oli nambawan.”—Jem. 1:17.

Gohed Blong Kasem Gudfala Frut From Ol Tok Blong Jisas

21, 22. ?Wanem i spesel long saed blong Bigfala Toktok blong Jisas antap long Hil, mo wanem filing blong yu taem yu harem ol tok ya blong Jisas?

²¹ Neva wan narafala man i givim wan tok we i olsem Bigfala Toktok ya blong Jisas antap long Hil. Bigfala Toktok ya i spesel from i tijim yumi long saed blong God mo i klia gud. Taem yumi luk ol poen we oli kamaot long ol haf blong ol stadi ya, yumi save kasem plante gudfala samting sipos yumi mekem ol advaes we i stap long Bigfala Toktok ya blong Jisas i wok long laef blong yumi. Ol tok ya blong Jisas oli save mekem yumi haremgud long laef blong yumi naoia mo oli givim hop blong wan nambawan fiuja long yumi.

²² Long ol haf ya, yumi bin lukluk sam long ol sas trutok nomo long Bigfala Toktok blong Jisas antap long Hil. Yumi luksave nao from wanem olgeta we oli bin stap long taem ya mo oli harem ol tok blong Jisas, oli “sapraes tumas long tok blong hem.” (Mat. 7:28) I sua se bambae yumi tu yumi gat sem tingting olsem olgeta ya, taem yumi fulumap tingting mo hat blong yumi wetem ol tok ya mo ol narafala sas trutok blong Bigfala Tija ya Jisas Kraes.

?Wanem Ansa Blong Yu?

• ?Jisas i talem wanem long saed blong ol prea blong ol man ya we oli gat tu fes?

• ?From wanem yumi no mas ripitim ol semfala tok bakegen mo bakegen long prea blong yumi?

• ?Wanem ol samting we Jisas i askem long prea we hem i tijim long ol man blong hem?

• ?Olsem wanem yumi save ‘gohed blong askem, lukaot mo kilkilim doa’?

[Kwestin]